Choyüngen quiñe rume fütra cuifi huaria mülelu Hungría mapu mu. Petu acordaquen fentren cutrancahun elcünulu ti Segunda Guerra Mundial tüfachi huaria mu.

Tremümeneu tañi chedqui ca tañi chuchu. Piuqueyen mu acordaquefiñ, doyelchi mai tañi chuchu Elisabeth. Quisu quellueneu feyentual Chau Dios mu. Nielu cüla tripantu, quimeltueneu fill pun ñi feipial ti llellipun Padrenuestro pingelu. Huelu quimürpufiñ chem cüpa ñi feipiel ti llellipun nielu hula 30 tripantu.

Tañi pu chau com antü cüdauquefuingu ñi ngillayal quiñe ruca, feimu tañi chedqui ca tañi chuchu tremümeneu. Huelu epu sabado cüyen mu com ti familia trahuluuquei, femngechi ñi quiñentrür iyal. Rume cüme rupaquefuiñ feichi antü.

Conlu 1958 tripantu, ñi pu chau pepi ngillaingu ti ruca ñi ayüniequefel. Fei hula mülepun tañi pu chau engu, ¡rume ayüucülefun! Huelu ñi ayühun fentreñmalai. Cayu cüyen müten rupalu, tañi chau cancer cutran mu lai.

Rupalu tüfa, lanagi reque tañi piuque. Iñche feipiquefuiñ ta Chau Dios: “Llellipueyu ñi lanoal tañi chau, ¿chumngelu am allcütulaen? Müna hueñancütuquefiñ ñi chau”. Rume cutrancaucülefun quimnolu am cheu amutui tañi chau. Raquiduamquefun: “¿Huenu mapu mai müleputui cam rumel ngehuetulayai?”. Ütrirquefuiñ pu pichiqueche nielu ñi pu chau.

Fentren tripantu fill antü reque amuquefun eltun mu, fei lucutunagquen ñi chau ñi cüfhue mu ca feipiquefun: “Chau Dios, ¿cheu am ta mülei tañi chau?”. Ca feipiquefuiñ: “Quelluen ñi quimal chumal am ta deumamuiñ”.

Nielu mari cüla tripantu, eluhun ñi quimal aleman quehun. Aleman lifru mu huiñoldungungepelayan tañi ramtun pifun. Fei 1967 tripantu mu, amun Alemania mapu tañi chillcatual. Chillcatun fentren lifru alemanes, doyelchi mai feiti nütramcalu taiñ tuhun mu. Ayüfiñ chem tañi quimürpuel, huelu huiñoldungulaeneu ñi ramtun niequefel. Feimu petu llellipuniequefiñ ta Chau Dios tañi quelluaeteu.

Conlu 1970 tripantu, huiñotun tañi mapu Hungría. Feichi mu quimfiñ quiñe domo Rose pingelu, rupachi antü mu niehuiyu. Feichi püle Hungría ngünenieyu pu comunista, feimu Rose iñchiu lefmahuiyu ta Austria mu. Ayüniefuyu tayu amual Australia meu cheu ñi mülen iñche tañi huecu.

Huelu pürümquechi pen cüdau Austria mu. Quiñe antü, tañi compañ cüdau mu feipieneu tati Biblia huiñoldunguafeneu com tañi ramtun ñi niequeel ca elueneu epu lifru. Matu matu chillcatufiñ, huelu doi cüpa quimniefun. Feimu huirilelfiñ pu deumaquelu tüfachi lifru, pu Dunguquelu Ineingen Jehová, fei ñi huercülaeteu caquelu lifru.

Feichi antü puhul tripantulu tayu niehun tañi domo engu, pepaeiñmu quiñe Dunguquelu Ineingen Jehová. Cüpaleleneu quiñeque lifru iñche ñi duamniefel ca mangeleneu ñi chillcatual Biblia. Pürüm femcayan pifiñ, rume cüpa quimniefun ti Biblia. Feimu epu rupa ti semana mu chillcatuquefun, ¡meli hora chillcatuquefuyu!

Rume ayüucülei tañi piuque tañi quimeltumequengeel ta iñche. Pengelelngelu Chau Dios ñi üi tañi Biblia hungaro quehun mu, rume afmatulehuen. Deuma 27 tripantu amuquefun iglesia mu, huelu turpu allcüquelafuiñ feichi üi, Jehová pingerquei. Afmatuleneu ñi adümfalngen Biblia ñi quimeltun. Quiñe quimeltun tañi peel fei tati pu lalu chem no rume quimhuetuquelai, fütra umautuleingün reque (Eclesiastés 9:5, 10; Juan 11:11-15). Ca quimürpun Chau Dios ñi feipicünuel ca antü afai ti lan dungu (Apocalipsis 21:3, 4). Famülque mu rüf maneluucülen ñi huiñomongetual ta che, feimu huiño petuafiñ tañi chau em (Hechos 24:15).

Tañi domo ayühunquechi ca chillcatui Biblia. Com chillcatufiyu ti lifru epu cüyen mu müten. Amuquefuyu ti trahun ti pu Dunguquelu Ineingen Jehová engün. Afmatuleiñmu ñi piuqueyechefengen, ñi llouchefengen ca ñi quiñeucülen engün (Juan 13:34, 35).

Fei 1976 tripantu mu, tañi domo engu amutuyu Australia. Puulu Australia mu, pürüm quintufiyu pu Dunguquelu Ineingen Jehová. Fei rume cüme lloungeyu, familia müten troquingeyu. Ti tripantu 1978 fautizahuiyu.

Af meu pen ti huiñoldungun ti dungu ñi fente cutrancalcafeteu ca pen ti doi cüme Chau, Jehová llemai (Santiago 4:8). Ca maneluucülen ñi huiño petual tañi chau cüpalechi antü meu (Juan 5:28, 29).

Ti tripantu 1989 mu, huiñotuyu tayu lof Hungría mapu quimelelafiel taiñ pu familia, hueni ca caquelu pu che tati cümeque dungu cüpalu Chau Dios mu. Rume ayühuelqueiñmu quimelelafiel fentren che Chau Dios ñi rüf dungu. Doi 70 che quellufiyu tañi fautizahual, ca tañi piuqueyen ñuque.

Mari regle tripantu rupan ngillatuniefiel Chau Dios ñi huiñoldunguaeteu ti ramtun ñi niequefel. Cüla mari ailla tripantu rupauyei ñi quimfiel tati rüf dungu ca fantepu meu ngillatuquefiñ, huelu ñi mañumtual. Feipiquefiñ: “Chaltu piuqueyen Chau, huiñoldunguen tañi ramtun”.