Lino navilwe, avyazi yane yakweti famu inono umu muzi wa Galicia muno twikalanga, uku Spain. Nene nali umwana uwalenga 4 pa yana 8. Twali sana ni nsansa umu lupwa. Pa nsita iiya umu Spain, caseesile sana ukutuma umwana nanti awenga umu lupwa ukuya umu kusambilila ivya mapepo. Mu lupwa lwitu twali yatatu swemuno twaile umu kusambilila ivya mapepo.

Lino nali ni myaka 13, nani kwene naile umu kusambilila ivya mapepo uku Madrid kuno mangulezi wasambililanga. Ivyacitikanga kuno twasambililanga ivya mapepo vitaali ningo. Kutaali ucuza, kwali amasunde yatupu, amapepo, nupya umi watazile. Katondotondo, twakolongananga umu ceici pakuti twelenganyepo sana, nanti icakuti nemo ilingi ntakwatanga ivya kwelenganyapo ivili vyonsi. Pa cisila, twimbanga ivyimbo zya mapepo nu kuzevya Maasi, vyonsi vyacitikilanga umu lulimi lwa Cilatini. Ntuvwanga nanti acimwi nupya nuvwanga kwati Leza wali ukutali nani. Amanda yapitanga ukwaula ukumanya. Nanti lino twalolana na mangulezi, twalandanga sile tukuti, “Acindikwe Maliya umutakatifu.” Ya sisita yatuzumilizyanga ukulanda sile pa mamineti 30 pa cisila ca kulya. Natiile ukuya ni nsansa ukupusanako na vino cali lino nali pa ng’anda! Nayuvwanga ukuzukilwa nupya ilingi nalilanga.

Nanti icakuti ntatazile injuvwa ukupalama kuli Leza, nalafile imilapo nu kuya sisita ala indi ni myaka 17. Nacisile viivi kwene vino antu yenekelanga kuli nene, nomba pataalengile natandike ukutwisika ndi cakuti mu cumi Leza wansoolwile ukucita vivyo. Ya sisita yalandanga yakuti aakatwisika musango uwo yalasumbilwa umu moto wa pe! Nanti ciye vivyo natwalilile ukutwisika. Namanyile ukuti Yesu Klistu ataitalusyanga uku yantu yauze; lelo lyonsi wasambilizyanga nu kwazwa antu yauze. (Mateo 4:23-25) Lino nafisizye imyaka 20, ntaakweti imilandu iyuvwike iya kutwalilila ukuya sisita. Namayo umwi uwatutungululanga wanenyile ukuti ndi cakuti nkutwisika, cingazipa ukuta ukwaula ukusumba insita. Nelenginye ukuti limwi welenganyanga ukuti ningalenga na yauze ukuta usisita. Fwandi natile ukusambilila vyakwe usisita.

Lino naswilile uku ng’anda, avyazi yane yanguvwikisye sana. Lelo vino umuzi uno twikalangamo mutaali incito, nakuukile ku Germany, kuno umutowane wenga umulumendo wikalanga. Wali umwi umba lya mapolitiki ilya ina Spain. Nuvwile ningo ukuya api umba lya yantu yayo aalwilanga insambu zya yaomvi nu kulola anaci ukuti yalingana na onsi. Nizile inja umwi umba kwene lilyo nupya nizile intwalwa kuli umwi uwali umwi umba kwene lilyo. Nelenganyanga ukuti vino nacitanga vyali sile ningo, nupya napeelangako antu impapulo zya mu kaungwe ka mapolitiki, naali nu mwi umba lya yantu aapitananga umu kutungilila kaungwe kwene kaa.

Umu kuya kwa nsita, nizile intoovoka nupya kwene. Nayuvwanga ukuti amu kaungwe kwene kaa ilingi yatacitanga vino yanenanga antu. Ukutwisika kwizile ukukula sana umu 1971 lino akazyana na alumendo yamwi amwi umba litu kwene lilyo izile iyoca icikuulwa ica ku Spain kuno yakapeelela ivitupa ivya kuila ku mpanga yuze icayelile uku Frankfurt. Yacisile vivyo pakuti yalesye ulufyengo ulwali umu uteeko wa ina Spain uwalondanga ukuti ulio sile wateeka. Lelo namanyile ukuti yii itaali inzila isuma iya kulangilamo ukali.

Lino nizile inkwata umwana wa kutandikilako, nanenyile ya wane ukuti nimata ukuzanwa umu kukomaana kwa kaungwe ka mapolitiki. Nazukiilwe sana, pano kutaali nanti awenga pali ya cuza yane ampiti uwantandalilanga pamwi nu mwanane. Ntamanyile umulandu uno twayela nu umi. Uzye cali sile ningo ukuomvya maka yane ukuzifya ivintu umu wikazi?

Umu 1976, ya Nte yaili aina Spain izile iyakonkonsya pa mulyango nupya yampeezile impapulo zimwi izikalanda pali Baibo, nani naposile. Lino yantandalile umuku wakwe ciili, natandike ukuyuzya mauzyo aingi pa mulandu uno tukaculila, mulandu uno ivintu vikazipila yamwi, yamwi foo nu mulandu uno kwayela ulufyengo. Nazungwike lino yaomvizye Baibo pa kwasuka mauzyo yonsi! Nazumile ukusambilila Baibo.

Pa kutandika natemilwe sile ukusambilila. Lelo ivintu vyasenwike lino ya wane nani twatandike ukuzanwa uku kulongana kwakwe ya Nte Yakwe Yeova pa Ng’anda ya Wene. Pa nsita iiya twakweti ana yaili. Ya Nte yatusendanga nu kutwazwa ukusakamala ana itu pa kulongana. Nizile intemwa sana ya Nte.

Nanti ciye vivyo, natwisikanga vimwi pa upefi. Napingwilepo ukutandalila ulupwa lwane uku Spain. Ya tata yanono aali ya simapepo yezizye ukuntoovola pakuti ntasambilila Baibo. Lelo ya Nte aali ku ncende iiyo yangazwilizye sana. Yaomvizye Baibo pa kwasuka mauzyo yane, wakwe vino ya Nte ya ku Germany yacisile. Napingwilepo ukutwalilila ukusambilila Baibo lino naswilile uku Germany. Nanti icakuti ya wane yapingwilepo ukuti yate ukusambilila Baibo, nemo natwalilile ukusambilila. Umu 1978, nabatiziwe nu kuya Nte Wakwe Yeova.

Ukumanya ningo icumi icaya muli Baibo, kwalenga imanye ningo mulandu uno antu yayela nu umi alino na vino ndinzile ukucita umu umi. Wakwe, pali 1 Petulo 3:1-4 pakakomelezya aci ‘ukutontela ya iya’ nu ‘kuyacindika sana’ alino nu kuya “afuuke, pano ali vintu vicindame sana kuli Leza.” Ivisinte vivyo vyangazwile ukuya umuci musuma nupya umuvyazi musuma.

Ipapita imyaka umupiipi na 35 ukufuma pano nayela Nte. Nkayuvwa uwa nsansa ukuombela Leza pamwi na ina na ya nkazi umu nsi yonsi, nupya naya ni nsansa pa mulandu wakuti ana 4 pa yana 5 yano nakwata, nayo kwene yakaombela Leza.