•  Tau Kupu Hafagi 2

•  Tau Tanakiaga he Kupu he Atua 3-5

  •  Lauga 3

  •  Tau Koloa Fakaagaaga 4

  •  Totouaga he Tohi Tapu 5

•  Fakaaoga e Koe ke he Gahua he Fonua 6-14

  •  Kamata e Tutalaaga 7

  •  Liu ke Matutaki Atu 8

  •  Taute Tutaki 9

  •  Fakamaama e Taofiaga Haau 10

  •  Lauga 11

  •  Manatu 12

  •  Fakatokaaga 13

  •  Fakaaoga e Tau Vitiō mo e Tau Tohi 14

•  Moui ko e Tau Kerisiano 15-16

  •  Fakaakoaga Tohi Tapu he Fakapotopotoaga 16

•  Tau Kupu Fakaoti 17

•  Nava mo e Fakatonuaga 18

•  Magaaho 19

•  Ahiahi he Leveki Takaiaga 20

•  Faahi Tapu he Toloaga po ke Fonoaga 21

•  Faahi Tapu he Fakamanatuaga 22

•  Leveki he Feleveiaaga he Moui mo e Fekafekauaga 23

•  Tagata Nofoa he Feleveiaaga he Moui mo e Fekafekauaga 24

•  Tagata Fakatonu Fakakū 25

•  Tau Aoga Fakakū 26

•  Tau Vitiō 27

1. Ko e tau fakatonuaga he tohiaga nei ka lagomatai e tau matakainaga oti kua fai vala he feleveiaaga he Moui Kerisiano mo e Fekafekauaga. Ko lautolu ka fai vala kua lata ke kumikumi e tau fakatonuaga ma e tau kotofaaga ha lautolu he Life and Ministry Meeting Workbook mo e tohi nei ato tauteute e tau vala ha lautolu. Lata e tau tagata fakailoa oti ke uiina ke fakaatā a lautolu ke taute e tau kotofaaga he tau tagata fakaako. Falu kua makai ke fakalataha mo e fakapotopotoaga ka fai vala kaeke kua talia e lautolu e tau fakaakoaga he Tohi Tapu ti fakatatau e tau momoui ha lautolu mo e tau matapatu fakaakoaga Kerisiano. Ko e leveki he Life and Ministry Meeting kua lata ke fakatutala ke he lakaaga ma e ha tagata ne nakaila ko e tagata fakailoa kua manako ke fai vala he aoga ti fakailoa ke he tagata kaeke kua talia a ia. Lata e fakatutala nei ke taute ka e nofo ai e matakainaga ne taute e fakaako Tohi Tapu mo ia (po ke putoia e matua ne ko e matakainaga). Ko e tau lakaaga nei kua tatai mo e puhala ka manako e tagata ke eke mo tagata fakailoa ka e nakaila papatiso.—od-E ve. 8 para. 8.

2. Taha e minuti. He tau faahi tapu takitaha, ka oti e lologo mo e liogi hafagi, to fakailoa he tagata nofoa he Feleveiaaga he Moui mo e Fekafekauaga e fakaholoaga kua amanaki ki ai. Lata e tagata nofoa ke hagaaki ke he tau manatu ka aoga lahi ke he fakapotopotoaga.

 3. Lauga: Hogofulu e minuti. Ko e matakupu mo e fakatokaaga he tau matapatu manatu ne ua po ke tolu kua fakakite he Life and Ministry Meeting Workbook. To kotofa e lauga nei ke he motua po ke fekafekau lagomatai ne lotomatala. Ka setulu e tohi foou he Tohi Tapu ma e totouaga he Tohi Tapu he faahi tapu, to tā e vitiō ke hafagi aki. Maeke he tagata lauga ke fakaaoga e tau fakatataiaga mai he vitiō mo e matakupu. Ka e lata a ia ke putoia foki e tau manatu ne fakakite he tohi fakaaoga. Ka fai magaaho foki, lata a ia ke fakaaoga fakamitaki e tau fakatino ne taute ke lagomatai aki e vala kua fakaaoga. Maeke a ia ke putoia falu tohi ka fakalaulahi ni ke he manatu ne fakakite he tohi fakaaoga.

 4. Tau Koloa Fakaagaaga: Hogofulu e minuti. Ko e vala hūhū mo e tali anei kua nakai fai fakafeleveiaaga po ke fakaotiaga. Taute he motua po ke fekafekau lagomatai ne lotomatala. Lata e matakainaga ne taute e vala ke hūhū e tau hūhū ua ke he toloaga. Maeke foki a ia ke fifili ke totou po ke nakai totou e tau kupu Tohi Tapu ne tū ai. Ko lautolu kua fakaatā ke tali kua lata ke 30 e sekone po ke nakai molea.

 5. Totouaga he Tohi Tapu: Fā e minuti. To kotofa e vala nei ke he tagata taane fakaako. Lata he tagata fakaako ke totou e vala tala ne kotofa he nakai fai fakafeleveiaaga po ke fakaotiaga. Kua lata ke mataala pauaki e tagata nofoa he feleveiaaga ke lagomatai e tau tagata fakaako ke totou fakahako, maama, mahifi, peehi fakahako e manatu, aga he leo, latatonu e fakamanou, mo e mukamuka. Ha kua kūkū po ke loloa e falu kotofaaga he totouaga Tohi Tapu, kua lata he leveki he Feleveiaaga he Moui mo e Fekafekauaga ke manamanatu ke he lotomatala he tau tagata fakaako ka taute e tau kotofaaga nei.

6. Hogofulu ma lima e minuti. Ko e vala nei he feleveiaaga kua taute ke foaki e magaaho ke he tau matakainaga oti ke fakamahani ma e gahua he fonua mo e fakaholo ki mua e tau puhala tutala mo e maamaaga ke fakamatala mo e fakaako atu. Ka latatonu, maeke e tau motua ke moua e tau kotofaaga he tagata fakaako. Kua lata e tau tagata fakailoa takitaha ke gahua ke he vala fakaako he porosua Fakamahani po ke Love People he tau parakete he tapa he kotofaaga i loto he Tohi Fakaaoga he Feleveiaaga he Moui mo e Fekafekauaga. Falu magaaho, to fai vala ka fakatoka ke fakatutala. Ko e vala pihia to taute he motua po ke fekafekau lagomatai ne lotomatala.—Kikite e  paratafa 15 puhala ke taute aki e tau vala fakatutala.

 7. Kamata e Tutalaaga: Maeke e kotofaaga nei he tagata fakaako ke taute he tagata taane po ke fifine. Lata e matakainaga taane lagomatai ke hoa mo e matakainaga taane, hoa e matakainaga fifine mo e matakainaga fifine po ke tagata he magafaoa. Ko e tagata fakaako mo e tagata lagomatai kua maeke ke nonofo po ke tutū.—Ma e falu vala tala foki ma e manatu mo e fakatokaaga he kotofaaga nei, kikite e  paratafa 12 mo e  13.

 8. Liu ke Matutaki Atu: Maeke e kotofaaga nei he tagata fakaako ke taute he tagata taane po ke fifine. Lata e matakainaga taane lagomatai ke hoa mo e matakainaga taane, hoa e matakainaga fifine mo e matakainaga fifine. (km-E 5/97 lau 2) Ko e tagata fakaako mo e tagata lagomatai kua maeke ke nonofo po ke tutū. Lata e tagata fakaako ke fakataitai e mena ke talahau ka liu atu a ia ke matutaki e fakatutalaaga kua mole.—Ma e falu vala tala ke he manatu mo e fakatokaaga ma e kotofaaga nei, kikite e  paratafa 12 mo e  13.

 9. Taute Tutaki: Maeke e kotofaaga nei he tagata fakaako ke taute he tagata taane po ke fifine. Lata e matakainaga taane lagomatai ke hoa mo e matakainaga taane, hoa e matakainaga fifine mo e matakainaga fifine. (km-E 5/97 lau 2) Ko e tagata fakaako mo e tagata lagomatai kua maeke ke nonofo po ke tutū. Lata e vala nei ke fakataitai e vala kū he fakaakoaga he Tohi Tapu kua fitā he taute. Nakai lata ke fai fakafeleveiaaga po ke fakaotiaga ato tala age pauaki ke he tagata fakaako ke gahua he taha he tau manatu fakaako nei. Nakai lata ke totou fakaleolahi e tau vala tala oti kua kotofa, ka e maeke e mena nei ke taute.

 10. Fakamaama e Taofiaga Haau: Ka kotofa ko e lauga, kua lata ke taute ai he tagata taane fakaako. Ka kotofa ko e fakatātāaga, maeke ke taute he tagata taane fakaako po ke matakainaga fifine. Lata e matakainaga taane lagomatai ke hoa mo e matakainaga taane, hoa e matakainaga fifine mo e matakainaga fifine po ke tagata he magafaoa. Lata e tagata fakaako ke talahau e tali maama mo e fakailoilo hagaao ke he matakupu hūhū he fakaaoga e tau vala tala ne tu ai. To fifili he tagata fakaako ko e talahau po ke nakai talahau e ia e tohi ka taute e vala haana.

 11. Lauga: Ko e kotofaaga nei to taute he tagata taane fakaako ti taute ko e lauga ke he fakapotopotoaga. Ka fakavē e lauga ke he manatu mai he appendix A he porosua Love People, lata e tagata fakaako ke fakamaama e puhala ke fakaaoga e (tau) kupu tohi he fekafekauaga. Ma e fakatai, liga fakamaama e ia e magaaho ke fakaaoga e kupu tohi, kakano he kupu tohi, mo e puhala ke fakakakano ai ke he tagata. Ka fakavē e lauga ke he manatu he taha he tau fakaakoaga he porosua Love People, lata e tagata fakaako ke hagaaki ke he puhala ke fakagahua ai he fonua. Liga fakamaama e ia e fakataiaga ne fakakite he vala 1 he fakaakoaga po ke fakamaama e ha kupu tohi foki i loto he fakaakoaga, kaeke kua lagomatai.

   12. Manatu: Ko e vala tala he paratafa nei mo e ka mui mai kua hagaao ke he “Kamata e Tutalaaga” mo e “Liu ke Matutaki Atu.” Ka nakai fai vala ne fakakite, ko e foliaga he tagata fakaako ke talahau e kupu mooli he Tohi Tapu ne mukamuka ti aoga ke he tagata ne tutala ki ai mo e fakatoka e puhala ke liu fakatutala he magaaho i mua. Lata e tagata fakaako ke fifili e mataulu ne felauaki mo e latatonu ke he matakavi. Ko e fifiliaga haana ke fakakite po ke nakai fakakite e tohi po ke vitiō mai he Puha Fakaako. He nakai taute e fakatātāaga ako manatu, ka e lata e tagata fakaako ke fakamahani ke he tau puhala tutala, tuga e fakakite e fiafia fakatagata mo e mukamuka.

   13. Fakatokaaga: Lata e tagata fakaako ke fakaaoga e fakatokaaga kua kotofa ke he tuaga he matakavi. Ma e fakatai:

1.  (1) Taha Fale ke he Taha Fale: Ko e fakatokaaga nei kua putoia e fakamatala mai he taha gutuhala ke he taha gutuhala—he o atu tino, hea telefoni, po ke he tohitohi—mo e liu ke matutaki atu e tutalaaga mo e tagata ne moua he gahua he taha fale ke he taha fale he magaaho kua mole.

2.  (2) Fakamatala he Magaaho kua Felauaki: Ko e fakatokaaga nei ne fakakite ke fakaaoga e tau magaaho tutala noa ke fakamatala. Liga talahau e manatu he Tohi Tapu ki a lautolu kua feleveia mo koe he gahuaaga, he aoga, he katofia kaina, he heke he peleōafi mo e tau tagata, po ke ha matakavi kua fano a koe he tau fekau haau he aho.

3.  (3) Fakamatala he Toloaga: Ko e fakatokaaga nei kua putoia e fakamatala he peleō tohi, aahi atu ke he tau matakavi pisinisi, fakamatala he puhalatū, po ke fakamatala he tau paaka, paakaaga motokā, po ke ha matakavi ne fai tagata.

 14. Fakaaoga e Tau Vitiō mo e Tau Tohi: Uta ni ke he tuaga, liga fifili e tagata fakaako ke fakakite e vitiō po ke tohi. Kaeke ko e kotofaaga kua putoia e vitiō po ke ka fifili he tagata lauga e taha vitiō foki, lata a ia ke talahau ti fakamaama e vitiō ka e nakai tā ai.

15. Ka mole e lologo, ko e 15 e minuti he vala nei to putoia e taha po ke ua e vala ne talaga ke lagomatai e toloaga ke fakagahua e Kupu he Atua. Ato kehe ai ni ka fakakite, ko e tau vala nei to kotofa ke he tau motua po ke tau fekafekau lagomatai ne lotomatala, ka ko e tau motua ni ke taute e vala he tau mena kua lata mo e fakapotopotoaga. Kaeke ko e vala ke fakatutala, to talahau he tagata lauga e falu hūhū ke lafi ke he tau hūhū ne fitā e tohi. Lata a ia ke fakakū e hafagiaga haana ke fakaatā fakalahi taha magaaho ma e tau matapatu manatu he vala tala mo e ke tali e tau matakainaga. Kaeke ke fai hūhū tala, lata a ia kua hūhū tala ki ai ke talahau mai i mua e tau manatu haana ka e nakai he mena ne nofo ai, kaeke kua maeke.

  16. Fakaakoaga Tohi Tapu he Fakapotopotoaga: Tolugofulu e minuti. Ko e vala nei kua kotofa ke he motua ne lotomatala. (Ka nakai tokologa e motua, maeke e tau fekafekau lagomatai ne lotomatala ke kotofa ki ai e vala, kaeke kua lata.) Lata e kau he tau motua ke fifili ko hai kua latatonu ke taute e Fakaakoaga Tohi Tapu he Fakapotopotoaga. Ko lautolu kua talia kua lata ke leveki he puhala ne fai kakano mitaki ke felauaki tumau e fakaakoaga ke he magaaho fafati, fakamaama e tau kupu Tohi Tapu pauaki, mo e lagomatai e tau tagata oti ke loto fakaaue ke he kakano uho he tau manatu kua taute. Ko lautolu kua moua e taliaaga to aoga he liu kumikumi ke he fakatonuaga kua tohi hagaao ke he puhala ke taute e vala hūhū mo e tali. (w23.04-E lau 24, puha) Ka oti katoatoa e vala tala ne kotofa ke taute he faahi tapu, nakai lata ke fakaloa e fakaakoaga. Ka maeke, lata ke kehekehe e tau tagata ka takitaki mo e totou he tau faahi tapu takitaha. Ka tala age e tagata nofoa he Feleveiaaga he Moui mo e Fekafekauaga ke fakakū e fakaakoaga, kua lata mogoia he tagata ne takitaki ke fifili e puhala ke fakakū e fakaakoaga. Maeke a ia ke fifili ke nakai totou oti e tau paratafa.

17. Tolu e minuti. Ko e tagata nofoa he Feleveiaaga he Moui mo e Fekafekauaga ka liu fakamanatu pauaki e tau manatu lagomatai mai he feleveiaaga. Lata foki a ia ke talahau fakatōtō e tau vala tala ma e faahi tapu kahau. Liga fakailoa e ia e tau higoa he tau tagata fakaako kua kotofa ke taute e tau vala he faahi tapu kahau, ka fai magaaho ma e mena nei. Ato kehe ai ni ka fakakite mai, ko e ha fakailoaaga kua latatonu ke fakailoa mo e ha tohi kua latatonu ke totou he tagata nofoa ke he fakapotopotoaga he magaaho ka talahau e tau kupu fakaoti haana. Ko e tau vala tala fakailoa tumau, tuga e tau fakaholoaga ke gahua he fonua mo e tau setulu fakameā, ne nakai lata ke fakailoa mai i mua ka e lata ke pine hake he lapa fakailoa. Ka nakai maeke ke fakailoa po ke totou e tau tohi he magaaho fafati he tau kupu fakaoti he fakaholoaga, kua lata e tagata nofoa ke ole ke he tau matakainaga taane ne taute e tau vala he Moui ko e Tau Kerisiano ke fakakū e tau vala ha lautolu. (Kikite e  paratafa 16 mo e  19.) To fakaoti e feleveiaaga aki e lologo mo e liogi.

18. He mole e tau kotofaaga takitaha he tau tagata fakaako, ko e tagata nofoa he Feleveiaaga he Moui mo e Fekafekauaga kua kavi ke he taha e minuti ke nava mo e fakatonu ne fakavē ke he vala fakaako ne kotofa. Ka fakailoa he tagata nofoa e kotofaaga he tagata fakaako, to nakai talahau e ia e fakatonuaga kua gahua ki ai. Ka e he oti e lauga he tagata fakaako mo e oti e falu navaaga kua lata, maeke he tagata nofoa ke talahau e vala mitaki ne taute he tagata fakaako po ke fakamaama totonu e kakano mo e puhala kua lata he tagata fakaako ke hagaaki fakalahi ki ai. Lata foki e tagata nofoa ke talahau falu vala he fakataitaiaga ka logona hifo e ia to aoga e mena nei ke he tagata fakaako po ke toloaga. Ko e falu fakatonuaga lagomatai foki ne fakavē ke he porosua Love People, porosua Fakamahani, po ke tohi Ministry School ka tala age he magaaho ko laua ni he oti e feleveiaaga po ke taha magaaho kehe hagaao ke he mena ne gahua ki ai po ke taha vala foki ke gahua ki ai.—Ma e tau vala tala foki hagaao ke he matagahua he tagata nofoa he Life and Ministry Meeting mo e matagahua he tagata fakatonu fakakū, kikite  paratafa 19,  24, mo e  25.

19. Nakai fai vala kua lata ke molea e magaaho, pihia foki e tau talahauaga he tagata nofoa he Feleveiaaga he Moui mo e Fekafekauga. Pete ko e Life and Ministry Meeting Workbook kua fitā e kotofa e magaaho ma e tau vala takitaha, kaeke kua lauia mitaki e vala tala, nakai lata ke lafi falu vala tala ke fakakatoa ke hokotia e magaaho fafati. Ka molea e magaaho he tau vala, kua lata ke fakatonu he tagata he nofoa he Feleveiaaga he Moui mo e Fekafekauaga po ke tagata fakatonu fakakū hoko laua ni. (Kikite e  paratafa 24 mo e  25.) Ko e feleveiaaga katoa, putoia e tau lologo mo e tau liogi kua lata ke 1 e tulā mo e 45 e minuti.

20. Ka ahiahi mai e leveki takaiaga ke he fakapotopotoaga, kua lata e fakaholoaga ke taute tuga ne fakamaama he Life and Ministry Meeting Workbook mo e hikiaga ke he tau mena nei ne mui mai: Ko e vala he Fakaakoaga Tohi Tapu he Fakapotopotoaga he Moui ko e Tau Kerisiano to hukui he lauga fekafekauaga ne 30 e minuti ka taute he leveki takaiaga. Ato taute e lauga fekafekauaga, to liu fakatutala he tagata nofoa he Feleveiaaga he Moui mo e Fekafekauaga e fakaholoaga ne mole laia, talahau fakatōtō e fakaholoaga he faahi tapu kahau, talahau e tau fakailoaaga kua latatonu, totou e tau tohi kua latatonu, ti fakafeleveia e leveki takaiaga. He oti e lauga fekafekauaga, to fakaoti he leveki takaiaga e feleveiaaga aki e lologo ne fifili e ia. Liga uiina e ia e taha matakainaga taane ke fakaoti aki e liogi. Nakai fai vahega fakakū he vagahau he fakapotopotoaga ka taute he ahiahi he leveki takaiaga. Liga taute he matakau e tau feleveiaaga ka ahiahi mai e leveki takaiaga ke he fakapotopotoaga ne leveki ai. Ka e lata e matakau ke liu matutaki mo e fakapotopotoaga ne leveki ma e lauga fekafekau he leveki takaiaga.

21. He faahi tapu he toloaga po ke fonoaga, nakai fakahoko e feleveiaaga he fakapotopotoaga. Lata ke fakamanatu ke he fakapotopotoaga ko e vala tala ne setulu ke he tau feleveiaaga he faahi tapu ia kua lata ke taute ni he tagata po ke he magafaoa.

22. Ka fakahoko e Fakamanatuaga he aho he faahi tapu, to nakai fai Feleveiaaga he Moui mo e Fekafekauaga.

23. Ko e motua ne fifili he kau he tau motua to eke mo leveki he Feleveiaaga he Moui mo e Fekafekauaga. To fakalago ki a ia ke mailoga kua fakatokatoka fakamitaki e feleveiaaga nei mo e muitua ke he tau fakatonuaga nei. Kua lata a ia ke fakatumau e matutakiaga mitaki mo e tagata fakatonu fakakū. Ka moua agataha e Tohi Fakaaoga he Feleveiaaga he Moui mo e Fekafekauaga, to kotofa he leveki he Feleveiaaga he Moui mo e Fekafekauaga e tau vala oti he feleveiaaga he vahā tapu ma e ua e mahina ia. Putoia he tau kotofaaga nei he tau tagata nakai fakaako mo e tau matakainaga taane ne nofoa mai ia lautolu ne talia he kau he tau motua ti pihia mo e tau kotofaaga he tau tagata fakaako. (Kikite e  paratafa 3-16 mo e  24.) Ka taute e tau kotofaaga he tagata fakaako, lata a ia ke manamanatu ke he tau moui he tagata lauga, tau mena iloa, mo e ataina haana ke fakatutala ke he vala tala ka fakaaoga. Lata foki a ia ke taute e tau fifiliaga pihia ka kotofa e falu vala he feleveiaaga. Lata e tau kotofaaga ke age kavi ke he tolu e faahi tapu ato hoko e aho he kotofaaga. Ko e laupepa Our Christian Life and Ministry Meeting Assignment (S-89) kua lata ke fakaaoga ma e tau kotofaaga he tau tagata fakaako. Ko e leveki he Feleveiaaga he Moui mo e Fekafekauaga kua lata ke iloa tonu ko e lagaki he setulu he kotofaaga ma e feleveiaaga katoa kua tau hake he lapa fakailoa. Maeke e kau he tau motua ke kotofa taha motua po ke taha fekafekau lagomatai ke lagomatai a ia. Ka ko e tau motua hokoia ni kua lata ke fakaaoga ke kotofa e tau vala nei ke he tau tagata ne nakai fakaako.

24. He tau faahi tapu takitaha, to taha e motua ka eke mo tagata nofoa he Feleveiaaga he Moui mo e Fekafekauaga. (Ka nakai tokologa e motua, maeke e tau fekafekau lagomatai ne lotomatala ke kotofa, kaeke kua lata.) To fakalago ki a ia ke tauteute e tau kupu hafagi mo e fakaoti. Fakailoa foki e ia e tau vala oti, ti fakavē ke he lahi he kau he tau motua, liga to fakalago ki a ia e tauteaga he falu vala foki he feleveiaaga, mua atu ke he tau vala ne lata mo e vitiō ka fakakite ka e nakai fai fakatutalaaga. Lata e tau talahauaga ke he tau vala ke kū lahi. To fifili he kau he tau motua e tau motua kua lotomatala ke taute e matagahua nei. To kotofa e tau motua lotomatala ke eke tumau mo tau tagata nofoa. Fakavē ke he tau tuaga he fakapotopotoaga, ko e leveki he Feleveiaaga he Moui mo e Fekafekauaga to mua atu e fakaaoga mo tagata nofoa ke he falu motua lotomatala foki. Ka lotomatala e motua ke taute e Fakaakoaga Tohi Tapu he Fakapotopotoaga, to liga lotomatala foki a ia ke eke mo tagata nofoa he feleveiaaga. Fakamolemole kia tokaloto ko e motua ne eke mo tagata nofoa kua lata ke foaki e navaaga mo e ka lata, ke fakatonu fakaalofa mo e lagomatai ke he tau tagata fakaako ne fai kotofaaga. Kua fakalago foki ke he tagata nofoa ke mailoga kua oti e feleveiaaga he magaaho fafati. (Kikite e  paratafa 17 mo e  19.) Ka manako e tagata nofoa ti ka lahi e vala ne atā i mua, to fakatū e maikorofoni ke maeke a ia ke fakailoa e tau vala takitaha ka e tū e tagata lauga he mena ke taute ai e lauga haana. Pihia foki ka manako e tagata nofoa ke nofo he laulau i mua ka taute e kotofaaga totou Tohi Tapu he tagata fakaako mo e vala Fakaaoga e Koe ke he Gahua he Fonua he feleveiaaga. Nakai mole e tau magaaho he puhala nei.

25. Ka maeke, mitaki ke fakaaoga e motua ne lotomatala ke lauga ke taute e matagahua nei. Ko e matagahua he tagata fakatonu fakakū ke foaki e fakatonuaga ha ko laua ni kaeke kua lata ke he tau motua mo e tau fekafekau lagomatai hagaao ke he tau kotofaaga lauga ne liga taute e lautolu, putoia e tau vala he Feleveiaaga he Moui mo e Fekafekauaga, tau lauga ma e toloaga, mo e taute po ke totou e Fakaakoaga Kolo Toko po ke Fakaakoaga Tohi Tapu he Fakapotopotoaga. (Kikite e  paratafa 19.) Ka tokologa e motua he fakapotopotoaga ne eke mo tau tagata lauga mo e tau faiaoga lotomatala, mitaki ke fakaaoga foki taha motua lotomatala mo tagata fakatonu fakakū he tau tau takitaha. Nakai lata he tagata fakatonu fakakū ke foaki e fakatonuaga ka oti e tau kotofaaga takitaha.

26. Fakavē ke he tokologa he tau tagata fakaako, maeke e tau fakapotopotoaga ke fakahoko e tau aoga fakakū ma e tau kotofaaga he tagata fakaako. Igatia e aoga fakakū mo e lata ke fai tagata fakatonu lotomatala, manako ke he motua. Kaeke kua latatonu, maeke he fekafekau lagomatai ne lotomatala ke kotofa. Ko e kau he tau motua kua lata ke fifili a ia kua latatonu ma e tuaga nei. Kua lata e tagata fakatonu ke muitua e fakatokaaga ne fakamaama he  paratafa 18. Ka fakahoko e aoga fakakū, kua lata ke tala age ke he tau tagata fakaako ke o atu ke he poko aoga fakakū ka mole e taute he Kumikumi Hifo e Tau Koloa Fakaagaaga he vala Tau Tanakiaga he Kupu he Atua. Kua lata a lautolu ke liu matutaki mo e fakapotopotoaga katoa ka oti e lauga fakahiku he feleveiaaga.

27. Ko e tau vitiō ne fifili to fakaaoga ke lata mo e feleveiaaga nei. To moua e tau vitiō ma e feleveiaaga he faahi tapu he JW Library® app mo e maeke ke fakaaoga he tau matini utafano kehekehe.

© 2023 Watch Tower Bible and Tract Society of Pennsylvania

S-38-NN 11/23