ITYOUGH 35

Me er nan ve me ya ijende vea Aôndo?

Yange kwagh er Jeremy u vihin kpishi, nahan kav er i doo u yan ijende vea Yehova yô. A kaa ér, “Shighe u m lu anyom 12 la, terem undu tsombor wase. Sha iyange igen la, tugh mbu ilen, m nyôron u yaven yô, m gba eren msen sha gambe, zamber a Yehova mer ma a wase terem ma a hide.”

Jeremy yange nengen ér kwagh hemba un yô, a gba ôron Bibilo. Va ôron Pasalmi 10:14 yô, saan un iyol kpishi. Ivur la ôr kwagh u Yehova ér: “Ka her a We man isheeror ka i ver iyol i i ye; We, U lu Orwasen u ancôghol.” Jeremy kaa ér: “Yange m nenge mer ka mo je Yehova a lu lamen a mo, pasen mo ér un ngu orwasen mo; un ngu Terem ye. Ka an je nana lu terem a kuma sha Yehova?”

MLU wou una lu er u Jeremy la nahan shin a lu nahan ga kpa, Bibilo tese ér Yehova soo ér we u lu ijende na. Jighilii yô, Bibilo kaa ér: ‘Kporom hen Aôndo, nahan un kpa una kporom hen a we.’ (Yakobu 4:8) Ka nyi u hen ken mkaanem mara? Er i lu u u fatyô u nengen a Yehova Aôndo ga, shi a lu orkwav wou sha ma gbenda môm môm ga nahan kpa, ngu kaan a we ér we u lu ijende na!

Nahan kpa, saa u nôngo kwagh kpoghuloo ve u lu ijende i Aôndo ye. De se tese ikyav: Aluer kon ngu hen ya wou yô, u fa er imba kon la i gbe menden iyol i u tsô ga yô. Kon la ua gba vesen ga, saa u urun u hanma shighe, shi u kase u sha er ua vese a zayol shio yô. Kape u yan ijende a Aôndo kpa i lu je la. Nahan u er nan ve u ya ijende vea Aôndo kangenaa?

Er i Hii i Gbe Hange Hange u U Henen Bibilo Yô

Ka wea ya ijende a or yô, u lamen a nan shi u keghen atô a nan. Aôndo kpa aluer u ya ijende a na yô, a gba u u lamen a na shi u keghen ato a na. Ka sea ôron Bibilo shi sea henen i yô, i tese ér se mba keghen ato se ungwa kwagh u Aôndo a lu ôron se la.—Pasalmi 1:2, 3.

Ka mimi, alaghga kwaghhenen maghen we iyol ga. Agumaior kpishi nga hembe soon u nengen Televishen gayô eren anumbe a sha kômputa, gayô duen ahumbe a man vea azende a ve. Kpa aluer u soo u yan ijende vea Yehova yô, u tser a tser a gba sha mi ga. Saa u keghen ato a na sha u henen Mkaanem nam.

Nahan kpa, i de ze u iyol ga. Bibilo i henen ka tom er u hen la ga. Aluer u ngu nôngon henen i yô, a va hoghol we a mi, wea lu or u soon kwaghhenen ga je kpaa. Kwagh u i gbe u u hii eren yô, ver shighe u henen Bibilo. Wankwase ugen iti na ér Lais, a kaa ér, “M ver shighe. Ka mea nder pepe yô, m ôr ityough ki Bibilo jimin cii m mase eren akaa agen ye. Wankwase ugen u a lu anyom 15 yô, iti na ér Maria, a kaa ér, “Hanma tugh ka m ôr avur a Bibilo kpuaa cii m yav ye.”

Wea soo u hiin Bibilo you i henen yô, nenge ngeren u kiriki u ken takeda ne, u a lu sha peeji 292 la. U been yô, nger shighe u u fatyô u zuan a miniti er 30 nahan, henen Mkaanem ma Aôndo la shin heen.

․․․․․

Ka wea veren shighe yô, u hii a hii je. U nguren henen yô, u mase nengen er akaa agen Bibilo u gba ôron a ôr tseegh tsô maa u kav ga yô. U fatyô u nengen er kwagh u wannomso ugen u lun anyom 11 a ôr ne i lu mimi yô, iti na ér Jezreel, a kaa ér, “Ka wea ôron ajiir agen ken Bibilo yô, i gba u saa u ver ishima tsembelee, shi ka i magh u iyol u ôron ga cii.” Aluer ka u Jezereel nahan kpa, de gber uwer ga. Hanma shighe u u lu henen Bibilo yô, tôô wer ka shighe u u ne sha u keghen ato a ijende you Yehova Aôndo yô. Ken masejime yô, a hemba maghen we iyol u henen Bibilo shi u zua a injar, aluer u ngu nôngon kpoghuloo er i sar u la yô!

Msen Ka Kwagh u Hange Hange

Msen ka gbenda u se lamen a Aôndo yô. U nenge er msen a lu iyua i doon tsung kpa? U fatyô u lamen a Yehova Aôndo hanma shighe u u soo cii, atetan shin tugh kpaa. A kegh iyol u ungwan mbamsen ou hanma shighe cii. Heela tseegh ga, a soo u ungwan kwagh u u soo u ôron la. Ka nahan Bibilo i lu wan we kwagh ye, ér: ‘Ken hanma mlu cii, pasen Aôndo akaa a a gbe u la ken mbamsen mba zamber man mbamsen mba sughun un.’—Mbafilipi 4:6.

Er ivur Bibilo la i tese nahan, akaa nga kpishi a u fatyô u ôron Yehova ken msen yô. A fatyô u lun mbamzeyol ou kua akaa a ishima i lu nyian we sha mi la. Shi a fatyô u lun akaa a doon a a er u yô. Kera ga je kpa, ijende you ka ia er kwagh u doon sha ci u wou yô u sugh nan, shin ka nahan ga? Yehova kpa u fatyô u sughun un, sha ci u un je yô, akaa a doon a a eren sha ci wou la, ka akaa a ijende you igen i môm kpa ia fatyô u eren ga yô.—Pasalmi 106:1.

Nger akaa a u soo u sughun Yehova sha mi la shin heen.

․․․․․

Ashighe agen mciem ka ma gba u iyol shi ishima i nyian we sha akaa agen je ka u henen a hen ga. Pasalmi 55:22 kaa ér: “Haa akaa a zan we iyol cii sha TER [Yehova], tsô Una taver we; Una lumun ér i̱ tenger a mbaperapera mayange ga.”

Nger akaa a zan we iyol a u soo u lamen a Aôndo sha mi ken msen la sha ihiange i i dondo ne.

․․․․․

Kwagh u Ngise Er Orgen Yô

Kwagh ugen kpa ngu u i gbe u u eren ve, a tese ér u ngu ijende i Aôndo yô. Orpasalmi Davidi yange nger ér: “Bende, nenge nen, [Yehova] ka u doon je.” (Pasalmi 34:8) Shighe u Davidi nger Pasalmi u sha 34 la, yange sember waren kwagh u cieryol. Yange lu yevese Tor Saulu u lu keren un a ku la, lu kwagh u nan Davidi ishimanyian kpishi. Nahan kpa, gba u Davidi una za yer hen atô u Mbafiliti, mba ve vande kôron un ihyom la. Davidi nengen ér Mbafiliti ver ishigh u wuan un yô, a er kwagh sha ayom, a hingir er ishima kera ngi sha a ve a na ga nahan, maa ve kera er un kwagh ga.—1 Samuel 21:10-15.

Davidi yange nenge ér ka sha kwaghfan na un war ku sha ikyughur nahan ga. Nahan yange wuese Yehova er a war un yô. A hii ngeren ken Pasalmi u se ter sha heen ne ér: “M ker [Yehova], A ungwam, A maa A dughum ken mciem am cii.” (Pasalmi 34:4) Davidi nengen er Yehova a wase un nahan yô, a taver mbagenev kpaa ishima ér “bende, nenge nen, [Yehova] ka u doon je.” *

U fatyô u umbur ma kwagh u yange er u, u ikyav i tese ér ka Yehova yange wase u yôô? Aluer u umbur kwagh shon yô, nger shin heen. Kwagh u una wase u u tsuan ma kwagh ken akaa a u umbur la yô, ka un ne: U ngu wer saa a lu kwagh u cieryol kpishi keng u tsua ga. Nôngo u henen sha akaa a dedoo a a eren we ayange ayange, a adooga ka u nenge wer ka akaa a vesen ga la.

․․․․․

Alaghga mbamaren ou vande tesen we kwagh u Bibilo. Aluer ka nahan yô, kwagh la doo. Nahan kpa, gba u u we iyol you u ya ijende vea Aôndo. Aluer u ngu a er nahan ga yô, dondo akaa a u lu henen ken ityough kin la, sha er aa wase u u hii u yan ijende a Aôndo yô. Yehova una ver iniôngon you la doo doo. Bibilo kaa ér: “Sônon nen her, nahan a na ne. Keren nen her, nahan ne zua a mi.”—Mateu 7:7.

SEER HENEN KWAGH SHA ITINEKWAGH NE KEN TIHI U SHA 1 U TAKEDA NE, ITYOUGH 38 MAN 39

KEN ITYOUGH KI DONDON KIRA

Ka i taver we u ôron ior kwagh u Aôndo? Nenge er u fatyô u pasen mbagenev atesen a Bibilo a u ne jighjigh a mi la yô.

[Ngeren u shin kpe]

IVUR BIBILO I NGEREN NE A HAR SHA MI LA

“Saan mba i sar ve tsung u fan Aôndo la iyol.”—Mateu 5:3.

KWAGH U UNA WASE U YÔ

Hanma iyange yô, nôngo ôr upeeji mba Bibilo unyiin, nahan u fatyô u ôron Bibilo jimin cii been ken inyom i môm.

U FA KPA . . . ?

Er u lu ôron takeda ne shi dondon akaawan a Bibilo a a lu ken u la yô, tese ér Yehova soo ér we u lu ijende na.—Yohane 6:44.

KWAGH U ME ER YÔ!

Akaa a me er ve me hen Bibilo me hemba kaven yô, me ․․․․․

Akaa a me er ve a hemba wasen mo u eren msen hanma shighe yô, me ․․․․․

Akaa a m soo u pinen ormaren wam HS.3(shin mbamaren av) sha itinekwagh ne yô ․․․․․

U NA MLUMUN WER NYI?

● U hen Bibilo sha tseeneke wou nena ve a hemba doon we?

● Yehova soo ér uumace mba ve lu mbaasorabo ne ve eren msen hen a na sha ci u nyi?

● U eren msen nena ve mbamsen ou vea hemba doono?

[Mkaanem ma]

Shighe u m lu wanye la, yange m er msen m kimbir kwagh môm gbem. Hegen ne, hanma iyange yô, ka m nôngo m er msen sha akaa a doon man a doon ga, a a erem yô. Er hanma sev akaa agen kposo ka a er yô, m kimbir msen ga. Mkaanem ma gumkwase ugen, iti na ér Eve

[Ngeren u kiriki/Foto]

Seer timen ken Bibilo you

1. Tsua ma kwagh u i nger ken Bibilo u u soo u ôron yô. Er msen Aôndo a na u kwaghfan sha er u kav kwagh shon yô.

2. Ôr kwagh shon vighe vighe. De ôron ayem ayem ga. Ôron shi henen sha mi. Nenge ken ishima you er yange kwagh shon er la, shi henen er akenge a ior mba i ter mkaanem vem la kua ihuma i akaa lu yô, man er akaayan a i ter la a lu ken zwa yô, kua ambaakaa la nahan. Nôngo hen sha kwagh u u lu ôron la vighe vighe!

3. Hen sha kwagh u u sember ôron la. Pine iyol you mbampin, er mba ve dondo ne nahan:

● Yehova yange na i nger kwagh ne ken Mkaanem nam sha ci u nyi?

● Ken mba i ter kwagh ve la, ka unô nahan i doo u me dondo ieren ve? Man ka unô nahan kwagh ve a hingir mo icintana?

● Ka akaa a injaa a nyi nahan me fatyô u henen ken kwagh u m ôr nee?

● Kwagh u m ôr ne tesem nyi sha kwagh u Yehova man gbenda u a eren akaa laa?

4. Er msen tiônôô hen Yehova. Pase Yehova akaa a u hen Bibilo ve u kav la, man er u we ishima u dondon akaa shon ken uma wou la. Sughun Yehova hanma shighe sha iyua i a ne u ne, ka Icighan Bibilo, i i lu Mkaanem nam la je la!

[Foto]

Mkaanem Ou ka imenger i angahar a am, man iwanger i gbenda wam kpaa.”—Pasalm 119:105.

[Ngeren u kiriki/Foto]

Hii tsuan u eren akaa a a hembe lun hange hange la

U zuan a shighe u eren msen gaa? U zuan a shighe u henen Bibilo gaa? Akaa ne cii u fatyô u eren, aluer u ver a hiihii ken akaa a u eren la yô.

Kar u eren kwagh ne: Tôô bokoti, wa awen a vesen shimi kpishi. U been yô, haa waarawa shimi poo. Nahan u lu a waarawa kua awen shin bokoti poo.

Maa gema akaa la cii haa inya, kpa de awen la kua waarawa cii ve lu her. Hide wa akaa ne cii shin bokoti la, kpa kwa ne yô, vande haan waarawa shimi cii u mase wan awen la ye. Awen la nyôr shimi cica cii kpa? A nyôr cii ga, sha ci u kwa ne, u vande haan waarawa shin bokoti la yum.

Ka nyi u fatyô u henen ken kwagh ne? Bibilo kaa ér: ‘fa akaa a a hembe lun a inja la.’ (Mbafilipi 1:10) Aluer u tsua wer akaa a kiriki, er a akaa a nan msaanyol a ka u eren la nahan, a lu kwagh u hiihii ken uma wou yô, mayange u zuan a shighe u eren akaa a vesen ga, ka akaa a ken jijingi je la. Kpa aluer u ngu dondon kwaghwan u Bibilo yô, u nenge wer u ngu a ian i eren akaa a Tartor kua akaa agen a nan we msaanyol kpaa. Kpa ka kwagh u hii wan shin bokoti wou la una na ve ian ia gba i akaa agen kpa aa nyôr shimi ye!

[Foto]

Er ka i gba u saa a urun kon u hen ya ve ua vese nahan, Aôndo kpa gba u u nôngo kwagh kpoghuloo ve u ya ijende vea na kangenaa ye