Nkazaalirwa Székesfehérvár, Hungary, orubuga orwijwiremu ebyafaayo kurugira kimu omu myaka erukuhingura omu 1,000 enyima. Eky’enaku, ninkyaijuka ebintu ebibi ebyaleserweho obulemu obw’ensi yoona obwakabiri.

Kuruga omu buto bwange, nkakuzibwa nyinenkuru nyowe na isenkuru nyowe, kizaara nyina nyowe. Nabagonzaaga muno​—kukira muno nyinenkuru nyowe Elisabeth. Akanyegesa kuba n’okwikiriza okugumire omuli Ruhanga. Kurugira kimu obunkaba nyine emyaka esatu, buli rwebagyo nasabaga nauwe esaara eyekira kumanywa nk’eya Mukama Waitu. Baitu nabwo, esaara egi ntagyetegereze kuhikira kimu obunkaba ndi haihi kuhikya emyaka 30.

Obunkaba ndi muto, nyinenkuru nyowe na isenkuru nyowe bandolerraga habw’okuba bazaire bange bakoraga nyamusana n’ekiro nibanihira kwahura akasente akarukumara nukwo basobole kugura enju enungi. Baitu, buli kyamukaaga ekyakabiri omu kwezi, eka yaitu yayesorozaaga tusobole kuliira hamu. Obwire obutwabaga hamu nabutwaraga kuba bw’omuhendo.

Omu 1958, ekirooto ky’abazaire bange kikahikirra; bakasobora kugura enju nambere itwena basatu twakwikaire. Hati, nkaba ninyija kwikara n’abazaire bange​—kikansemeza muno! Baitu, hanyuma y’emyezi mukaaga okusemererwa oku nuho kwagarukiire. Isenyowe akaitwa kansa.

Nkahwamu muno amaani. Ninyijuka ninsaba ningamba ngu: “Ruhanga, nkakusaba okize isenyowe. Nimwetaaga. Habwaki otaragarukiremu esaara zange?” Nkaba ningonza kwo kumanya nambere isenyowe akaba ali. Nayekaguzaaga: ‘Agenzere omu iguru? Rundi tarukwija kwongera kubaho ebiro n’ebiro?’ Nakwatirwaga ihali abaana abandi abaabaga bakyaine ba isebo.

Kumara emyaka nyingi, haihi buli kiro nagendaga omu irimbo. Kandi nteeza amaju ha kituuro kya isenyowe kandi hanyuma nsaba ningamba ngu: “Caali Ruhanga, ningonza kumanya isenyowe nambere ali.” Ekindi, nasabaga obukonyezi nukwo nsobole kumanya ekigendererwa ky’obwomeezi.

Ha myaka 13, nkacwamu kwega orulimi Orugirimaani. Nkatekereza ngu obundi omu bitabu bya Bagirimaani ebirumu ebintu bingi kandi ebirukwahukana nuho ndatunga eby’okugarukamu by’ebikaguzo byange. Omu 1967, nkatandika kusomera omu rubuga orurukwetwa Jena, kasumi ako orwali omu Bugirimaani eya burugaizooba. N’ekihika nasomaga ebitabu eby’abafirosofo kuruga omu Bugirimaani, kukira muno ebikaba nibikwata ha nsonga z’okubaho kw’abantu. N’obukiraaba ngu nyine ebinasomere ebyansemiize, nkahurra ntamazirwe. Nkagumizaamu ninsaba Ruhanga ankonyere kutunga eby’okugarukamu.

Omu 1970, nkagaruka Hungary, nambere natangatangaine mukazi wange, Rose. Kasumi ako, Hungary ekaba n’elemwa bangamba nyenka. Hanyuma y’akasumi nyowe na Rose tukataaha obuswere, kandi nkairukira omu Austria. Ekigendererwa kyaitu kyali ky’okufurukira Sydney, omu Australia, nambere nyinarumi nyowe yali naikara.

Nkatunga omulimo omu Austria. Kiro kimu, ounakoraga nauwe akangambira ngu ninsobora kutunga eby’okugarukamu by’ebikaguzo byange kuruga omu Baibuli. Akampa ebitabu ebyali nibibazaaho Baibuli. Nkabisoma bwangu n’ekihika kandi nkaba ningonza kwega ebirukukiraho. Nahabweki nkahandiikira Abakaiso ba Yahwe, abarukuturukya ebitabu ebi kandi nasaba ebitabu ebindi.

Ha kiro nyowe na Rose ekitwali nituhikya omwaka gumu omu buswere, ow’oruganda na mukazi we bakatubungira. Akandetera ebitabu ebinkaba nsabire kandi yansaba kwega Baibuli, kandi nkaikiriza. Habw’okuba nkaba nyine ekihika ky’okwega, twayegaga emirundi ebiri mu wiiki​—kandi buli murundi twayegaga kumara esaaha ina!

Abakaiso ba Yahwe ebibanyegesaaga kuruga omu Baibuli bikansemeza. Obubanyolekere ibara lya Ruhanga, Yahwe, kuruga omu Baibuli yange ey’orulimi oru Hungarian, nkaba ntarukusobora kukiikiriza. Emyaka 27 einamazire ningenda omu Kanisa, nkaba ntakahurrahoga nibabazaho ibara lya Ruhanga. Eby’okugarukamu ebirukwetegerezebwa kurungi kuruga omu Baibuli bikampuniiriza. Ekyokurorraho, nkega ngu abafu tibaine ekibamanyire, bali nk’abagwijagiire omu turo otw’amaani. (Omugambizi 9:5, 10; Yohana 11:11-15) Ekindi, nkega ngu Baibuli n’eraganiza ensi empyaka nambere okufa kuliba kutakyaroho. (Okusuku’rwa 21:3, 4) Nyine okunihira okw’okwongera kurora isenyowe, habw’okuba omu nsi egi empyaka, ‘halibaho okuhumbuuka.’​—Engeso Ezabakwenda 24:15.

Rose ankanyeteranizaaho omu kwega Baibuli. Tukakurakurana bwangu, akatabu akatwali nitwegeramu tukakamara omu myezi ebiri! Twagendaga omu nsorrokano zoona ha Kyombeko ky’Obukama. Tukakwatwaho muno okugonza, kukonyerangana, n’obumu obuli omu Bakaiso ba Yahwe.​—Yohana 13:34, 35.

Omu 1976, nyowe na Rose tukaikirizibwa kutaha omu Australia. Kandi aho naaho tukaserra Abakaiso ba Yahwe ab’omu kiikaro eki. Abakaiso ba Yahwe omu kiikaro eki bakatukonyera kwehurra nkabali omuka. Omu 1978, naitwe tukafooka bamu h’Abakaiso ba Yahwe.

Nkatunga eby’okugarukamu eby’ebikaguzo ebyali bintalibaniize kumara akasumi akaraihire. Habw’okwirra haihi na Yahwe Ruhanga, nkirozere ngu nuwe taata arukukirayo outusobora kutunga. (Yakobo 4:8) Okunihira kw’okwongera kurora isenyowe omu nsi empyaka mali nkutwara kuba kw’omuhendo.​—Yohana 5:28, 29.

Omu 1989, nyowe na Rose tukacwamu kugarukayo Hungary nukwo tusobole kugambiraho abanywani n’abanyabuzaale baitu, n’abantu abandi ebiturukwikiririzaamu. Tutungire omugisa gw’okwegesa abantu baingi Baibuli. Abantu abarukuhingura omu 70 nubo batweteranizeeho omu kuramya Yahwe, otwaliremu na nyinanyowe.

Nkasaba kumara emyaka 17 kutunga eby’okugarukamu by’ebikaguzo byange. Emyaka endi 39 ehingwireho, kandi ninkyasaba​—oihireho ngu hati nisobora kugamba ngu; “Webale, Isenyowe ow’omu iguru, kugarukamu esaara zange ezinasabaga nkyali muto.”