Son stà slevà in Los Angeles, California, nei Stati Unidi, nte un posto dela cità che l’era cognossesto par gaver tante droghe e bandidi. Mi ero el secondo de sei fioi.

Me mare la ne ga slevà come vangelichi. Ma de gióveno mi disea una roba e ghen fea nantra. Nele doméneghe mi cantea nela ciesa, ma quelaltri giorni dela stimana la me vita la era feste, sesso e droghe.

Mi perdea suito la passiensa. Par guadagnar una barufa mi doperea qualche roba come arma. Quel che go imparà nela ciesa no’l me ga giutà gnente. Mi sempre disea: “La vingansa la ze del Signor ma lu el me dopera a mi par vingar”. Nel fin dei ani 60, quando mi ero drio finir i me studi, l’è vegnesto fora un grupo polìtico che se ciamea “Pantere Negre”. Lori i era cognossesti parché i doperea la violensa par i diriti civili. Par causa che me piasea questo grupo, go scominsià a apoiar un movimento de studianti. Lori i apoiea questa lota par i diriti civili. Par quela ghemo protestà arquante volte e sempre no asseino che le persone le podesse ndar rento la scola.

Ma i protesti no i bastea par la me voia de violensa. Alora, mi go scominsià a far crime sol par òdio. Par esémpio, mi e i me amighi vedeino filmi nel sinema sora el sofrimento dei africani nei Stati Unidi quando che i era schiavi. Noantri resteino rivoltadi con queste ingiustìssie e alora pròpio lì ghe deino bote ai bianchi. Dopo ndeino nei posti ndove che ghen’era persone bianche par atacarle e farghe mal.

Quando son vegnesto pi vècio, mi e i me fradei èrino belche cognossesti come bandidi violenti. Gaveino tanti problemi cole autorità. Uno dei me fradei pi gióveni el fea parte de un grupo ben cognossesto. Mi passea tempo con lori. La me vita la ndea de mal a pedo.

I genitori de un amigo mio i era Testimònie de Geovà. Lori i me ga convidà par ndar ale so riunion e mi son ndato. Suito, nela prima volta che son ndato, go visto come le Testimònie de Geovà le era difarente. Tuti i gavea la so Bìblia e i la doperea. Fin i gióveni i fea discorsi. Son restà maraveià quando go savesto che Dio el ga un nome, Geovà, e anca veder che lori i doperea questo nome. (Salmo 83:18) Nele congregassion ghen’era persone de diverse rasse ma no se vedea division intrà de lori.

Nel scomìnsio, no volea studiar la Bìblia cole Testimònie de Geovà. Ma me piasea ndar ale riunion. Una sera che mi ero nte una de queste riunion, arquanti dei me amighi i ze ndati nte un show. Lì, i ga dato bote a un gióveno fin che i lo ga copà, parché no’l ga volesto darghe la so giacheta de coro. Nel giorno dopo, i se la ridea par gaver copà quel gióveno. I ga fin ridesto quando i era drio esser giudicadi. Quasi tuti lori i ze stati condanadi a restar in preson par sempre. Mi son restà tanto contento de no esser stato insieme con lori in quela note. Go dessidio cambiar de vita e go scominsià a studiar la Bìblia.

Par gaver vivesto tanto tempo insieme con persone che le odiea quele de altre rasse, mi son restà maraveià cola vita che le Testimònie de Geovà le gavea. Par esémpio, quando un omo bianco, Testimònia de Geovà, el ga bio de viaiar par nantro paese, lu el ga assà che una fameia de negri la tendesse dei so fioi. Nantro colpo, una fameia de bianchi la ga acetà che un negro el vivesse insieme de lori parché lu no’l gavea un posto par ndar de star. Alora go capio che le Testimònie de Geovà le ze come che Gesù Cristo el ga parlà in Gioani 13:35: “Par meso de questo tuti i saverà che valtri sì i me dissìpoli: se gavé amor intrà de valtri.” Go catà persone che le vivea come una vera fameia.

Studiando la Bìblia go visto che gavea de cambiar la me maniera de pensar. Gavea de far questo nò sol par viver de maniera passìfica ma anca par poder scominsiar a creder che questa la era la meio maniera de viver. (Romani 12:2) Pin pianeto go scominsià a cambiar par meio. In genaro del ano de 1974, son stà batesà come Testimònia de Geovà.

Anca dopo de esser stà batesà me ga tocà seitar far sforso par esser una persona passìfica. Par esémpio, una volta, quando mi ero drio predicar de casa in casa coi fradei, un omo el ga robà el ràdio del me auto e mi ghe go coresto drio. Quando che lo gavea quasi ciapà, lu el ga molà el ràdio e el ga scampà via. Quando son ritornà e go parlà ai altri come che gavea ciapà nantra volta el ràdio, un ansiano el me ga domandà: “Stephen, cossa gavarìssito fato se te gavessi ciapà el ladron?” Questa domanda la me ga fato pensar. Mi go visto che gavea ancora de far sforso par esser una persona passìfica.

In otobre del ano 1974, go scominsià a doperar la pi granda parte del tempo, o sia 100 ore al mese, par insegnar la Bìblia ale persone. Dopo, go bio el privilègio de servir nela sede mondial dele Testimònie de Geovà in Brooklyn, Nova York. Nel ano 1978, son ritornà a Los Angeles par tender de me mare che la era malada. Due ani dopo, me go maridà cola Aarhonda. La me cara sposa la me ga dà tanto apoio. E ghemo tendesto de me mare fin la so morte. Col tempo, mi e Aarhonda ghemo fato la Scola Bìblica de Gileade. Semo stati mandadi par el Panamà e semo drio servir come missionari fin ancoi.

Dopo del me batésimo, go passà par tante situassion che le me gavaria fato perder la passiensa. Mi go imparà a infrontar questo stando distante dele persone che le me provochea e fando altre robe che le me giutea a restar pi calmo. Tante persone, e anca la me sposa, i me ga lodà par la maniera che mi infrontea queste situassion. Fin mi son restà maraveià con mi stesso. Ma no l’è mia stà par mèrito mio che go cambià. Mi son sicuro che questo l’è una prova del poder che la Bìblia la ga de cambiar la vita de una persona. — Ebrei 4:​12.

La Bìblia la me ga dato un ogetivo nela me vita. E la me ga giutà a esser passìfico de verità. Ancoi, invesse de farghe mal ale persone, mi le giuto in senso spiritual. Mi go fin insegnà la Bìblia a un nemigo mio dei tempi dela scola! Col tempo, lu el se ga batesà. Ghemo fin vivesto nel medèsimo apartamento e ancora semo grandi amighi. Mi e la me sposa ghemo insegnà la Bìblia a de pi de 80 persone che dopo le ze deventade Testimònie de Geovà.

Son tanto grato a Geovà par gaverme dato una vita con ogetivo e felicità. Fao parte de una fameia mondial che la ga la vera union.