“I kare ma pud atidi, omera madit onongo yeta dok lwenyo i koma nino ducu. I nge nyom, daana omedde ki tera i yo marac. En kacel ki won cwara onongo gitera calo opii. Onongo alwenyo ki tam me kwanyo kwona woko.”—Madhu, a India.

 Dul ma loyo lok me yotkom (World Health Organization) owaco ni, “Tim gero i kom mon onya i twok lobo ducu.” Dul man byeko ni cokcok pacen 33 pa mon gikato ki i tim gero nyo kinywarogi i yo me buto.

 Ka meno dong otimme i komi, itwero winyo calo pe itye ki gwok muromo pien kitwero yeti, lweny i komi, ki dong nywari i yo me buto ka mo keken ma icito iye. Kit macalo mon gikato ki i tim gero dok kiterogi marac, iromo winyo calo pol pa dano gitamo ni ‘Mon konygi pe.’ Ento, tika Lubanga tero mon calo jo ma pigi tek?

 Ginacoya: ‘Lubanga ocweyo laco ki dako.’—Acakki 1:27.

 Tyen lokke: Lubanga ocweyo co ki mon. En neno gin ducu calo gupore me nongo woro. Medo i kom meno, en mito ni laco “omar dakone macalo maro kome kene,” dok pe otem loyo wi dakone ki yet nyo tim gero. (Jo Epeco 5:33; Jo Kolocai 3:19) Ki lok ada, Lubanga tero ber bedo pa mon calo gin ma pire tek.

 “I kare ma pud atidi, wadina gunywara i yo me buto. Ma atye mwaka 17, ladit ticca obwura ni ebiryema woko ki i tic ka pe abuto kwede. Man dong ma adoko dit, cwara, lunyodona, ki jiranina bene pe ginyuta woro. Ento lacen, apwonyo lok madok i kom Lacwec, Jehovah. b En tero mon ki woro. Man oweko amoko ni en mara dok tera calo ngat ma pire tek.”—Maria, Argentina.

 Ginacoya: “Tye dano ma moko mere i kom lareme liking ma loyo ominne kikome.”—Carolok 18:24.

 Tyen lokke: Larem me ada bikonyi. Ka twere, tit bot ngat mo ma igeno kit ma iwinyo kwede.

 “Pi mwaki 20, pe awaco ki ngat mo keken ni kinywara i yo me buto. Macalo adwogine, arwenyo yomcwinya, abedo ki par mapol, dok cwinya otur adada. Ento, ma atito gin mutimme i koma bot ngat mo ma onongo mito winyo lokka, cwinya okwe adada.”—Elif, Türkiye.

 Ginacoya: “Wuket parwu ducu i kome, pien en tamo piwu.”—1 Petero 5:7.

 Tyen lokke: Ka ilego, Lubanga winyo. (Jabuli 55:22; 65:2) En twero konyi me niang kit ma piri tek kwede pien en paro piri.

 “Pwonyo lok madok i kom Jehovah okonya me nongo kwecwiny ki i arem malit ma akato ki iye. I kare-ni dong, atwero lega bot Lubanga dok awacce kit ma awinyo kwede kikome. En tye calo larem ma niang kit ma awinyo kwede.”—Ana, Belize.

 Ginacoya: ‘Jehovah bingolo kop pa litino kic ki jo ma giunogi, wek dano mo me lobo man pe dok okel lworo.’—Jabuli 10:​17, 18.

 Tyen lokke: Cokcok-ki, Lubanga bigiko tim maraco ducu, ma i kine tye iye tero mon ki gero.

 “Okweyo cwinya adada me niang ni cokcok-ki, Jehovah bigiko tim me tero mon ki anyira i yo marac. Man okonya me bedo ki wic ma opye mot.” —Roberta, Mexico.

 Me nongo ngec matut i kom kit ma Baibul miyo kwede gen, pingo itwero geno cikke ma nonge iye, ki dong kit ma Lucaden pa Jehovah gimiyo kwede kony kun gitiyo ki Baibul i kare-ni, peny wek olimi labongo cul mo.

 Kwany PDF me pwony man ma itwero rudone.