Go kong ni: Karen, ma mwakane pud tidi, oo i pati dok ma peya orii kadi pi dakika apar, owinyo dwan ngat mo ma en ngeyo kun loko ki i ngeye.

Karen olokke oneno ka lareme Jessica omako cupa aryo ma pud kiyabo wigi ayaba. En ngeyo ni kongo aye tye i cupa magi. Jessica ocwalo cupa acel cok ki wang Karen ci owacci, “In pud itidi ma pe itwero bilo kongo ce?”

Karen mito kwerone woko, ento Jessica obedo lareme. Dok Karen pe mito ni lareme otam ni en pe ngeyo camo kwo. Dok bene, Jessica obedo anyaka ma kite pe rac. Dong ka en tye ka mato kongo, ci nen calo pe obedo gin marac tutwal. Karen otamo kekene ni, ‘Obedo kongo mamwa, pe rom ki mato jayi.’

Kono in aye ibedo Karen, ngo ma onongo ibitimo?

Me moko tam maber i cawa ma kit man, myero iniang ngat ma in ibedo. Niango man a ki i cwinyi dok weko ingeyo gin ma in icung pire. Ngec man mini kero me doro kwoni me ka weko ni jo mukene aye gudor piri.—1 Jo Korint 9:26, 27.

In itwero dongo kero meno nining? Yo maber me cakone aye me gamo lapeny ma lubo-ni.

Ngeyo dironi ki kiti mabeco bikonyi me dongo gen i komi kekeni.

LANEN ME BAIBUL: Lakwena Paulo ocoyo ni: “Gwok nyo pe aryek i lok, ento aryek i ngec mada.” (2 Jo Korint 11:6) Kit macalo Paulo onongo ngeyo Ginacoya i yo matut-ti, en ocung matek ka jo mukene gupyem kwede. En pe oweko lok maraco pa jo mukene okwanyo gen woko ki i kome.—2 Jo Korint 10:10; 11:5.

NGINE KEKENI: Piny kany, co diro nyo ryeko mo ma in itye kwede.

Co bene kit maber mo ma itye kwede. (Me labolle, in mono iparo pi dano? cinggi yot? igenne? igwoko cawa?)

Kit macalo nyor matek twero cod woko ki ka ma goro, in bene kiti twero balle woko ka ce iweko goroni aye doro kwoni.

LANEN ME BAIBUL: Paulo onongo ngeyo gorone. En ocoyo ni: “Amaro kwano cik pa Lubanga, kun alwodo lokke ki iya. Ento dok aneno cik mukene i dul koma ducu, kun tye ka lweny ki cik ma i tamma, tera i opii i te cik me bal ma bedo i dul koma ducu.”—Jo Roma 7:22, 23.

NGINE KEKENI: Goroni mene ma myero ipwony kit me loyone?

Tika itwero ito boda boda ci iwaco ki langwec ki boda ni obed ka lworo kabedo acel moni wang ma moo otum woko ki i pikipikine? Meno tim me mingo dok ma balo cente nono!

Pwony ango ma wanongo? Bedo ki yub tiro kwoni dok weko pe ibedo calo ngat ma tye ka lworo kabedo acel moni keken. Myero ibed ki yub i kom ka ma imito o iye ki kit me o kunnu.

LANEN ME BAIBUL: Paulo ocoyo ni: “An mera aringo atir ma pe acabbe atata.” (1 Jo Korint 9:26) Ma ka kuro akura ni jami otimme i kwone, Paulo oketo yub ci oyelle me cobogi.—Jo Pilipi 3:12-14.

NGINE KEKENI: Piny kany, co piny yub adek ma imito cobogi i mwaka manyen.

Ka pe iye i kom gin mo, ci ibibedo ngat ma pe twero moko tamme. Calo langogo (agogo), ibibedo ka loko kalani wek ibed cal ki luwoti—man obedo gin ma nyuto atir ni pe ingeyo ngat ma in ibedo nyo gin ma icung pire.

Ki tungcel, ka jami ma itimo rwatte ki niyeni, ci ibicung matek labongo yenge—kadi bed jo mukene guketo lyeto i komi.

LANEN ME BAIBUL: I kare ma lanebi Daniel pud tye mwaka apar ki wiye, en “omoko tamme” me lubo cik pa Lubanga, kadi bed en onongo pe tye kacel ki lupacone. (Daniel 1:8) I timo man, Daniel ocung matek pi gin ma en ye iye.

NGINE KEKENI: Jami ango ma in iye? Me labolle: In tika iye i kom Lubanga? Ka kumeno, ci pingo? Ngo ma weko in imoko atir ni Lubanga tye?

Tika iye ni cik pa Lubanga ma kwako kit matir tye pi ber bedoni? Ka kumeno, ci pingo?

I agikkine, in imito ni ibed calo ngo—oboke ma opoto piny ma yamo bayo tungi ki tungi nyo yat ma ocung matek ma kadi yamo ma kodo matek pe romo yengone? Niang ngat ma in ibedo ki gin ma icung pire, ci ibibedo calo yat meno. Man bikonyi me gamo lapeny ni, An Mono Abedo Anga?