LAPENY ME 6
Atwero Lweny ki Lyeto ma a ki Bot Luwota Nining?
NGO MA ONONGO IN IBITIMO?
Go kong ni: Brian iye ocako rubbe cut i kare ma oneno lutino kwan luwote aryo gibino bote. Kiryo i cabit man, gin gutemo diye me mato taa. Man dong obibedo tyen me adekke.
Awobi mukwongo oloko ni:
“Jal itye keni doki? Wek kong anyutti larem mo.”
En odiyo wange ma tye ka wacci “larem” kun woto gin moni ki i jebane ci miyo bot Brian.
Brian oneno taa ma awobi-ni omako i kin cinge ci iye dok orubbe omedde ameda.
Brian owacci, “Wutima kica, atyeko wacciwu con ni an pe . . .”
Awobi me aryone ongolo doge ni: “Jal pe ibed lalworo!”
Brian onongo tekcwiny me wacci, “An pe alwor!”
Awobi me aryo oketo bade i wi gwok Brian i yo me lirem, kun wacce ki mwolo ni “Kwany akwanya ya.”
Awobi mukwongo oketo taa cok ki wang Brian ci okwilo lok i ite ni: “Pe wabiwaco bot ngat mo keken. Ngat mo pe obingeyo.”
Kono in aye ibedo Brian, ngo ma onongo ibitimo?
TAM KONG!
Lurem Brian tika gutamo i kom gin ma gitye ka timone? Tika gumoko tamgi pigi kengi? Nen calo pe gutamo. Tye ni, gin gitye ka lubo tam pa luwotgi. Pe gimito bedo pat ki luwotgi, pi meno giweko jo mukene aye doro kwogi.
Ka onongo in aye itye ka nongo lyeto man, ngo ma onongo ibitimo me lweny kwede?
-
YUBBE CON
Baibul waco ni: “Dano ma wiye tiyo ka oneno gin marac bino i kome, kanne woko; ento lakwiya piny medde mere ameda, ci neno can ada.”
—Carolok 22:3. Pol kare, itwero neno peko woko con. Me labolle, ket ni ineno gurup pa lutino kwan luwoti ma gitye anyim, dok gitye ka mato taa. Ka iniang woko con ni peko bibedo tye, ci ibibedo atera me kemme kwede.
-
TAM IYE
Baibul wacci: “Wubed ma cwinywu leng.”
—1 Petero 3:16. Pennye kekeni ni, ‘Abiwinyo nining lacen ka alubo kor lwak ata?’ Ada, itwero gire nongo cwak pa luwoti pi kare mo. Ento ibiwinyo nining lacen? Tika itye atera me jalo gin ma icung pire wek iyom cwiny lutino kwan luwoti?
—Nia 23:2. -
MOK TAMMI
Baibul wacci: “Ngat aryek gwokkere.”
—Carolok 14:16, Lango Baibul. Kadi ningo, kare bibino ma myero wamok tamwa dok wabikayo adwogi me tam ma wamoko. Baibul loko i kom co mogo calo Yucepu, Yubu, ki Yecu ma gumoko tam matir. Loko bene i kom Kain, Ecau, ki Juda, ma gumoko tam maraco. Ngo ma in ibitimo?
Baibul wacci: “Ngat ma lagen i kom jami matidi mo, bibedo lagen bene i kom jami madwong.” (Luka 16:10) Ka dong itamo con i kom adwogi me gin moni dok imoko tammi woko, tito ka cungoni twero bedo yot adada dok kelo adwogi maber.
Pe ipar
-
“Adagi!”
-
“An pe atimo kodi jami meno!”
-
“Jal, pe ibal cawa-ni i koma!”
Gin ma pire tek aye ni idok iye cutcut dok ki tekcwiny. Ka itimo kit man, ibibedo ki ur i kom kit ma luwoti biweko yelli kwede!
KIT ME LWENY KI NGALA PA LUWOTI
Ka iweko luwoti gudiyi me timo gin mo, ci idoko calo robot ma tye i te twerogi
Ka luwoti gitye ka ngalo in kono? Ngo ma iromo timone ka guwacci ni, “Ngo marac
-
Itwero kweyo ngala man. (“Iloko kakare, an alwor!” Ci itit tyen lok mumiyo ilwor.)
-
Iromo wiro ngala man idwoko i komgi. Tit tyen lok mumiyo ikwero ci iwac gin mo ma romo miyo en tamo iye. (“Onongo atamo ni iryek tutwal ma pe itwero mato taa!”)
Ka luwoti gumedde ki ngalo in, a woko! Wi opo ni, ka imedde ki bedo kenyu, lyetone bimedde ki doko gwar. Ka ia woko, nongo inyuto ni pe iye ni jo mukene gulok kiti.
Ngene kene ni pe itwero weyo dic ma a ki bot luwoti. Ento itwero moko tammi i kom gin ma ibitimo, itwero tito ka cungo-ni, dok itwero cung matek. I agikkine, in aye myero iyer gin ma ibitimo!
