Go kong ni: David tye ka wot i caro mo i dyewor ma piny-nye col adada. Dong, kit ma piny col tutwal-li, en pe twero neno odi ki yo maber. En oniang ni erweny woko. Nen calo ongak i yo ma myero pe olubi.

Kono in aye ibed David, ngo ma onongo ibitimo?

Itwero yero me timo jami mogo:

1. Penyo ngat mo wek onyutti yo.

2. Tic ki toc me menyo yo.

3. Medde ameda ki wot, kun igeno ni ibio ka ma icito iye-ni.

Ngene kene ni tam me adek-ke aye ma dong konye peke loyo.

Tam me aryone olo ber loyo tam me acel pienni ibibedo ki toc kare ducu ka itye ka wot, kun konyi me menyo yoni.

Baibul romo konyi i yo acel-li!

Buk man ma pud dong kipoko loyo-ni twero

• mini tira ma konyi me lweny ki peko me kwo

• konyi me niang ngat ma ibedo ki me yubo kiti

• nyutti kit me bedo ki kwo ma pud dong ber loyo

Cakke ma wan pud watino, wapenyo lapeny.

• Pingo polo tye ma bulu?

• Lakalatwe mono kiyubo ki ngo?

Lacen, wacako penyo lapeny ma mako lobo-ni.

• Pingo jami maraco timme?

• Pingo dano to?

Ket ni lagamgi onongo tye wacon i Baibul kono?

Jo mapol giwacci Baibul opong ki lok me ododo ma tere pe, ni lokke dong karene okato woko, nyo lokke niang iye tek ma pe larre. Ento meno obedo lok ada i kom Baibul, nyo obedo gin ma dano gitamo i kom Baibul?

Me labolle, dano gitamo ni Baibul wacci Lubanga aye doro lobo man. Ento meno twere nining? Lobo-ni dong tye marac ma okato ka wange woko! Opong ki arem cwiny ki deno can, two ki to, can lim, ki peko ma poto atura. Lubanga ma lamar twero timo jami magi nining?

Tika imito ngeyo lagamme? Gin ma Baibul waco i kom ngat ma doro lobo man twero keli ur!

Oromo bedo ni iniang ni tam ma kimiyo i brocuwa man jenge i Baibul. Lucaden pa Jehovah gipe ki akalakala mo ni Baibul aye miniwa tira ma genne. Man obedo lok ada pien ni Baibul “gicoyo pi teko pa cwiny pa Lubanga. Konyo me pwony, me juko dano, me tiro kit pa dano.” (2 Temceo 3:16, 17) Pore piri me ngiyo buk man ma dong orii loyo—ento pud tiyo wa i kare-ni!