I cawa mene ma dako ma obedo Lakricitayo omyero obo iye wiye ma lubbe ki worone, dok pingo? Kong wanenu lok ma lakwena Paulo ocoyo i kom lok man. En omiyowa tira ma mitte wek wamok tam matir, ma keto deyo i kom Lubanga. (1 Jo Korint 11:3-16) Paulo onyutu jami adek ma myero wange: (1) Tic ma mitte ni dako myero obo iye wiye, (2) kabedo ma myero en obo iye wiye, ki dong (3) tyen lok ma weko en lubu cik man.

Tic. Paulo oloko i kom tic aryo: lega ki tito lok pa Lubanga. (Tyeng 4, 5) Lega obedo lok bot Jehovah i yo me woro. I kare-ni, tito lok pa Lubanga kwako pwony mo keken ma Lakricitayo pwonyo ma nongo jenge i Baibul. Ento Paulo mono onongo tye ka wacci dako myero obo wiye teke dong en tye ka lega nyo pwonyo lok ada me Baibul? Pe. Ka ma dako moni tye ka lega nyo ka pwony iye-ni moko ka ce mitte ni en myero obo wiye nyo pe.

Kabedo. Paulo oloko pi kabedo aryo—i ot ki i kacokke. En owacci: “Wi dako aye cware . . . dako ma lego Lubanga, nyo ma tito lok pa Lubanga, ma kun pe oboyo wiye, nongo oketo lewic i wiye.” (Tyeng 3, 5) I ot, Jehovah oketo laco me  bedo lawi dakone. Ka ce dako pe woro twero pa cware, ci en keto lewic i wi cware ka ce en mito ni etim tic ma Jehovah omiyo bot cware. Me labolle, ka tye ni en myero opwony latin kwanne me Baibul ma nongo cware bene tye, ci en myero obo wiye pi nyutu woro pi twero pa cware. En myero otim kumeno kadi bed cware obedo ngat munongo batija nyo pe, kit ma nongo en aye obedo lawi ot-ti. * Ka ce ni en oleg nyo omi pwony ma nongo gitye kacel gin ki wode ma dong onongo batija ento pud tidi, en bene myero obo wiye, pe ni pien wode-ni obedo lawi ot, ento pi twero ma kimiyo bot co me kacokke ma gubedo Lukricitayo.

Paulo oloko i kom yub me kacokke kun wacci: “Ka ngat mo mito kelo pyem iye, wan giwa wape ki kit macalo meno, pe bene tye i kin jo ducu muye Lubanga.” (Tyeng 16) I kacokke pa Lukricitayo, tic me tela kimiyo bot co ma gunongo batija. (1 Temceo 2:11-14; Jo Ibru 13:17) Co keken aye kicimogi me bedo luelda ki lukony kor tic pi tic ma Lubanga omiyo me gwoko romine. (Tic pa Lukwena 20:28) Ento i kare mukene, romo mitte ni Lakricitayo ma dako otim tic ma nongo omego ma onongo batija dok opore aye myero otim. Me labolle, oromo mitte ni en myero odor cokke me cito i tic me pwony pien ni nongo omego mo mupore ma dong onongo batija pe tye. Nyo nongo en oyubo me kwano Baibul ki ngat mo con kun omego ma onongo batija bene tye. * Kit macalo tic ma kit man obedo but tic me kacokke pa Lukricitayo-ni, en omyero obo wiye me nyutune ni etye ka timo tic ma kimiyo bot co aye.

Ki tungcel, tye jami mogo i worowa ma pe mitte ni lamego moni obo iye wiye ka en tye ka timone. Me labolle, pe  mitte ni en myero obo wiye ka en tye ka miyo lagam i cokke pa Lukricitayo, ka tye ka pwony i dog ot ki dog ot gin ki cware nyo omego mo ma onongo batija, nyo ka tye ka kwan nyo ka lega ki lutinone ma peya gunongo batija. Lapeny mogo pud oromo bino, dong ka ce lamego meno pe tye ki ngec matir i kom lok moni ci en romo kwedone. * Ka en pe oyeng ki kwed meno dok cwinye ongolo ni en myero ebo wiye, ci nongo pe rac bene, kit ma kinyuto kwede i cal kany.

Tyen lok. I tyeng me 10, wanongo tyen lok aryo mumiyo Lakricitayo ma dako myero obo iye wiye: “Dako myero obed ki lanyut me twero i wiye, pi lumalaika.” Mukwongo, nen lok man ni, “lanyut me twero.” Twero pa anga? Boyo wic obedo yo acel ma dako nyutu kwede ni en eworo twero ma Jehovah omiyo bot co ma gunongo batija i kacokke. Pi meno, en nongo tye ka nyutu marre ki genne bot Lubanga Jehovah. Tyen lok me aryone tye ni “pi lumalaika.” Boyo wic pa dako dok cako gudu cwec ma gubedo cwiny nining?

Lumalaika gitye ki miti me nenone ni woro twero pa Lubanga tye ma oromo dul pa Jehovah ducu, i polo wa i lobo. Gin bene ginongo ber ki i lanen ma dano ma gitye ki roc ginyutu i lok man. Pien kadi wa gin bene omyero gumine i te yub pa Jehovah—gin ma timone oloyo lumalaika mogo woko i kare mukato angec. (Juda 6) I kare mogo lumalaika gineno Lakricitayo mo mucwiny ma obedo dako, ma tye ki ngec, dok ryek loyo laco mo ma onongo batija ma i kacokke; ento en mine i te twero pa laco meno. Cawa mukene  nongo dako-ni obedo Lakricitayo ma kiwiro ma biloc kacel ki Kricito. Dako ma kit meno i anyim bitic i rwom mamalo loyo pa lumalaika woko pien biloc kacel ki Kricito i polo. Meno obedo lanen maber atika me aluba bot lumalaika i kare-ni! Adada, lumego ducu gitye ki kare me nyutu winy ki minegi i te twero pi bedo me anena bot lumalaika milion mapol ata ma gin lugen!