Luotwu owacci ni “Pe itye ka winyo lokka!” Ento iloko ki i cwinyi ni ‘Onongo atye ka winyi.’ Ento i kom lok, gin ma iwinyo pat ki gin ma en owaco. Macalo adwogine, laro lok mukene dok ocakke.

Iromo gwokke ki i laro lok ma kit magi. Ento mukwongo, omyero kong iniang pingo i kare mukene pe iwinyo lok ma pire tek ma luotwu tye ka wacci—kadi bed itamo ni itye ka winye.

Gin mo tye ka wiro tammi, iol woko, nyo itye ki peko aryo-ni ducu. Lutino gitye ka wor, telebijon dwane tye lamal, dok itye ka tamo pi peko mo ma irwatte kwede i gang tic. I cawa meno, luotwu ocako wacci gin mo—ni welle gubibino ka limowu i otyeno meno. Ci iyengo wi me nyuto ni iniang, ento tika ada iwinyo gin ma en owaco? Twero bedo ni pe iwinyo.

Ibyeko ngo ma luotwu tye ka wacci. Byeko gin ma luotwu tye ka wacci twero kelo adwogi marac. Itwero tamo ni luotwu tye ka wacci gin mo marac, kun in aye itye ka tamo gin ma pe tye kakare. Me labolle, ket kong ni luotwu owacci ni: “Itero cawa malac i dog tic i cabit-ti.” Ka iniang lok meno i yo marac, ibiwacci: “Pe obedo balla! Myero ati pi cawa malac pien itye ka lanyo centewa alanya.” Ento luotwu bidange ni “Onongo pe atye ka kok i komi!” En onongo mito ni wucit ka yweyo wiwu kacel i tum cabit meno.

Iyenyo yo me cobo peko oyotoyot. Marcie, a owacci “I kare mukene amito mere tito kit ma awinyo kwede ki i cwinya, ento Mike mito wacca kit me cobo pekona. Pe amito cobone. Amito ni en onge kit ma awinyo kwede.” Peko tye kakwene? Mike tye ka tam matek i kom kit me cobo peko pa Marcie. Macalo adwogine, en pe biwinyo lok mogo nyo lok ducu ma Marcie tye ka wacce.

Labongo paro pi gin ma okelo peko-ni, ngo ma itwero timo me bedo ngat ma tero ite ka winyo lok?

Ket cwinyi ducu ka winyo lok. Luotwu tye ki lok ma pire tek ma mito wacci, ento tika itye atera me winyone? Twero bedo ni pe itye atera. Gwok nyo tammi tye i kom jami mukene i cawa meno. Ka tye kumeno, ci pe ipor odenge kun itimme calo itye ka winye. Ka twere, wek gin ma itye ka timone, ci iket cwinyi ka winyo lok pa luotwu, nyo itwero penyo luotwu me kuro wang ma itye atera me winyo lokke.—Cik ma iye lac me Baibul: Yakobo 1:19.

Pe ingol lok pa luotwu. Ka itye ka winyo lok pa luotwu, temme pe me ngolo nyo kwero lokke. Ibibedo ki kare-ni bene me lok. Ento ma pudi, ter iti ka winyo lokke.—Cik ma iye lac me Baibul: Carolok 18:13.

Peny lapeny. Man bikonyi me niang maber gin ma luotwu tye ka wacone. Marcie, ma kiloko i kome malo-ni, owacci: “Amaro ka Mike penyo lapeny. Meno nyuto ni en tye ki miti madwong i kom gin ma atye ka wacone.”

Winy me niang gin ma en tye ka wacone kikome, ento pe nyig lok keken. Temme me niang ngo kikome ma en tye ka wacone kun ineno kit ma loko kwede wange ki dwan ma en tiyo kwede. I kare mukene ka luotwu owacci ni “Amito,” mogo nongo gin ma en tye ka wacone kikome aye ni “Pe amito.” Meno lubo kit ma en oloko kwede. I kare mukene ka en owacci ni “In pe ikonya matwal” nongo te lokke ni “In itera calo ngat ma pire pe tek.” Temme me niang gin ma en tye ka wacone kikome, kadi bed lokkke pe okatti ki i doge. Ka pe itimo meno, wuromo cako laro lok i kom gin ma en owaco ma ka lok i kom gin ma tye i cwinye.

Medde ki winyo lokke. Pe ijuk winyo lokke nyo ia woko ki bote, kadi bed gin ma en tye ka wacone cwero cwinyi. Me labolle, ka luotwu tye ka kok i komi kono? Gregory, ma dong orii i nyom pi mwaka 60 miyo tam ni “Medde ki winyo lokke. Ket cwinyi me niang gin ma luotwu tye ka wacci. Timo meno pe obedo gin mayot, ento kelo adwogi maber.”—Cik ma iye lac me Baibul: Carolok 18:15.

Ket cwinyi i kom luotwu. Winyo lok pe obedo diro mo mamwa, ento obedo gin ma nyuto mar. Ka itye ki miti i kom gin ma luotwu tye ka wacone, ci ibibedo atera me winye. I yo ma kit man, nongo itye ka lubo tam ma Baibul miyo ni: “Pe itam pi gin ma konyi keken, ento tam pi gin ma konyo jo mukene bene.”—Jo Pilipi 2:4