PWONY ME ANYAMA ME 35
WER 123 Nyutu Genne i Lubo Cik pa Jehovah
Kit ma Luelda Gitwero Konyo Kwede Jo ma Kikwanyogi ki i Kacokke
‘Bibedo yomcwiny madit tutwal i wi polo i kom labalo acel ma ongut, makato i kom jo pyerabongwen wiye abongwen ma pe mitte ni gunguti.’—LUKA 15:7.
GIN MA WABIPWONYO
Wabinyamo pingo mitte ni jo mogo kikwanygi woko ki i kacokke kacel ki kit ma luelda gitwero konyo kwede jo meno me ngut ki me yubo watgi ki Jehovah.
1-2. (a) Jehovah winyo nining i kom jo ma gutimo bal madongo ci gukwero ngut woko? (b) Gin ango ma Jehovah bedo ki gen ni lubalo gibitimo?
JEHOVAH pe cwako tim maraco dok en dag bal adada. (Jab. 5:4-6) Jehovah mito ni walub cikke ma tye i Baibul. Kadi bed kit meno, Jehovah ngeyo ni watye ki roc dok i kare mogo watimo bal. (Jab. 130:3, 4) Ki tungcel bene, en pe cwako jo ma ‘giloko kica ma Lubanga miniwa doko me timo tim me coco.’ (Juda 4) Ki lok ada, Baibul loko i kom “tyeko dano ma pe gilworo Lubanga” i kare me lweny me Armagedon.—2 Pet. 3:7; Yabo 16:16.
2 Ento, Jehovah pe mito ni ngat mo orweny woko matwal. Kit ma wanyamo kwede i pwony mukene ma i magajin man, Baibul tito ka maleng ni en “mito ni jo ducu guo i ningut.” (2 Pet. 3:9) Calo Jehovah, luelda bene gidiyo cwinygi ka gitye ka tute me konyo labalo me ngut i kom balle wek oyub watte ki Jehovah odoco. Ento i kare mukene, labalo kwero ngut woko. (Ic. 6:9) Kadi bed luelda gitute matek me konyo ngat moni, ento lubalo mogo pud gimedde ki timo gin marac. Ka tye kit meno, ci gin ango ma myero luelda gutim?
“WUKWANY DANO MARAC WOKO”
3. (a) Gin ango ma Baibul tito ni omyero kitim i kom lubalo ma pe gimito ngut? (b) Ka ngat moni okwero ngut, pingo watwero waco ni nongo en aye ma oyero ni kikwanye woko ki i kacokke?
3 Ka labalo moni pe ye ngut, ci luelda myero gulub tira ma nonge i 1 Jo Korint 5:13 [NWT], ma waco ni: “Wukwany dano marac woko ki i kinwu.” Labalo-ni nongo ngeyo ni ka pe engut i kom balle, ci kibikwanye woko ki i kacokke. Dong nongo en aye ma oyero ni kikwanye ki i kacokke. Nongo en tye ka kayo gin ma ocoyo. (Gal. 6:7) Pingo watwero wacone kit meno? Pien nongo en okwero loko kite kadi bed luelda gutute tyen mapol me konye. (2 Luker 17:12-15) Kite onyuto woko ka maleng ni en pe mito lubo cik pa Jehovah.—Nwo. 30:19, 20.
4. Pingo kimiyo lok angeya i kacokke ka kikwany labalo ma okwero ngut woko?
4 Ka kikwanyo labalo ma okwero ngut ki i kacokke, kimiyo lok angeya bot kacokke, ni dano meno dong pe tye Lacaden pa Jehovah. a Tyen lok me miyo lok angeya meno pe obedo me kelo lewic i wi labalo-ni. Me ka meno, kimiyo lok angeya man wek omege ki lumege gulub cik me Baibul ma waco ni, “pe wuribbe” ki ngat meno, dok “pe wunywak cam kacel ki kodi dano-nu.” (1 Kor. 5:9-11) Jehovah omiyo cik meno pi tyen lok maber. Lakwena Paulo ocoyo ni: “Tobi matidi mo yenyo moko ducu ma girubo me tedo mugati.” (1 Kor. 5:6) Ka pe kikwanyo labalo ma okwero ngut i kom balle woko ki i kacokke, ci jo mukene giromo cako tamo ni pire pe tek me lubo cik pa Jehovah.—Car. 13:20; 1 Kor. 15:33.
5. Omyero wanen ngat ma kikwanyo ki i kacokke nining, dok pingo?
5 Dong omyero wanen ngat ma kikwanyo ki i kacokke nining? Kadi bed pe waribbe kwede, wiwa myero opo ni gen pud tye pi dano meno, pien en tye calo romo ma orwenyo. Ka romo mo orwenyo woko ki i kin luwote, nongo pud twero dwogo cen. Wi opo ni, romo ma orwenyo meno onongo yam odyero kwone bot Jehovah. Ki cwercwiny madit, en dong pe tye ka cobo kwongene ma okwongo i kare ma odyere dok meno weko kwone bedo ka mading. (Ejek. 18:31) Ento, kit ma kare pud tye, dok Jehovah tye atera me timo kica, wabedo ki gen ni ngat meno biloko kwone. Dong luelda gitwero konyo labalo ma kikwanyo woko ki kacokke nining?
KIT MA LUELDA GIKONYO KWEDE JO MA KIKWANYOGI
6. Gin ango ma luelda gitimo me konyo ngat ma kikwanyo ki i kacokke?
6 Ka kikwanyo ngat moni ki i kacokke, tika luelda dong gijuko tutegi me konye wek odwog cen bot Jehovah? Pe tye kit meno! Ka luelda gitye ka niango ngat moni ni kibikwanye woko ki i kacokke, gititte bene gin ma myero en otim wek odwog cen i kacokke. Ento luelda gitimo makato meno. Pol kare, giniango labalo-ni ni gimito rwatte kwede doki i nge dwe mogo manok wek ginen ka ce labalo-ni oloko tamme. Ka ce labalo-ni oye rwatte ki luelda doki, ci luelda gibicuko cwinye me ngut i kom balle. Kadi bed en peya ongut i kom balle i kare meno, luelda pud gibitute me rwatte kwede doki i anyim wek gicuk cwinye me ngut.
7. Ka kikwanyo ngat moni ki i kacokke, luelda gitwero lubo lanen me kica pa Jehovah nining? (Jeremia 3:12)
7 Luelda gilubo lanen pa Jehovah ma nyuto kica bot jo ma kikwanyogi woko ki i kacokke. Me labolle, i kare macon Jehovah pe okuro ni jone Luicrael kong gungut i kom balgi ka dong ecak konyogi. Me ka meno, en okwanyo kare me cwalo lunebine botgi kadi wa i kare ma onongo peya gungut. Pwony me anyama me aryone i magajin man, otito kit ma Jehovah owaco ki Kocea ni otim kica ki dakone Gomer ci ogame, kadi bed Gomer onongo pud tye ka timo bal madit. I yo ma kit man, Jehovah opwonyo jone ni en lakica adada. (Koc 3:1; Mal. 3:7) Kit macalo gilubo lanen pa Jehovah, luelda gimito ni labalo-ni ongut i kom balle ci odwog cen i kacokke, dok giweko bedo yot bote me dwogo cen.—Kwan Jeremia 3:12.
8. Carolok pa Yecu i kom latin awobi murwenyo konyowa nining me niang kit ma Jehovah winyo kwede i kom jo ma kikwanyogi ki i kacokke? (Luka 15:7)
8 Tam kong kit ma wego ma i carolok pa Yecu i kom latin awobi murwenyo-ni otero kwede wode meno. Cutcut ma oneno wode tye ka dwogo paco, wonne “oringo okwako ngute, onoto leme.” (Luka 15:20) Nen ni, wego-ni pe okuro ni wode kong okwa kica. Me ka meno, wego-ni oringo bot wode, pien onongo mare. Luelda gitute me nyuto cwiny ma kit meno i kom jo ma kikwanyogi ki i kacokke. Gimito ni romi ma orwenyo magi gudwog cen bot Jehovah. (Luka 15:22-24, 32) Ka labalo mo ongut ci odwogo cen, Jehovah, Yecu, lumalaika, kacel ki jo me kacokke gibedo ki yomcwiny madit adada!—Kwan Luka 15:7.
9. Gin ango ma Jehovah cuko cwiny lubalo me timone?
9 Dong watyeko pwonyo ni Jehovah pe ye ni jo ma gukwero ngut i kom balgi gumedde ki bedo i kacokke. Ento, en pud medde ki tute me konyogi. En mito ni gudwog cen. Dok ka dano moni ongut, nen kong kit ma Jehovah winyo kwede i kome. Kocea 14:4 waco ni: “Abimiyo niyegi magoro-ni doko tek, abimarogi pi bercwinya, pien kinigana dong oa woko.” Pien gingeyo kit ma Jehovah winyo kwede, luelda giyenyo lanyut mo keken ma moko ni ngat moni dong ocako ngut i kom balle. Dok lok meno myero ocuk cwiny ngat mo keken ma oa woko ki bot Jehovah ni Jehovah pud mare dok mito ni edwog cen.
10-11. I yo ma nining ma luelda gitwero konyo kwede jo ma kikwanyogi ki i kacokke mwaki mapol angec?
10 I yo ma nining ma luelda gitwero konyo kwede jo ma kikwanyogi ki i kacokke mwaki mapol angec? Twero bedo ni jo ma kit meno pe dong gitye ka timo bal ma yam con oweko kikwanyogi ki i kacokke-ni. I kare mukene, twero bedo ni wigi pe dong po pingo kikwanyogi ki i kacokke. Labongo paro pi kare marom mene ma ngat meno dong otero, luelda gibitute me yenyo ki limo ngat ma kit meno. I kare me lim meno, luelda gibilego kacel ki ngat meno dok gibicuko cwinye me dwogo cen i kacokke. Ngene kene ni, ka ngat meno dong oa woko ki i kacokke pi mwaki mapol, bimitte ni en opwony lok i kom Jehovah kacel ki lok ada me Baibul odoco. Pi meno, ka ngat meno owaco ni emito dwogo cen i kacokke, ci luelda gibiyero omego nyo lamego mo me kwano Baibul kwede, kadi bed pud peya kidwoke cen i kacokke. I kare ducu, luelda aye myero guket yub wek kikwan ki ngat meno.
11 Luelda gitute matek me lubo lanen me kica pa Jehovah. Pi meno, gitute me yenyo jo ducu ma guweko Jehovah dok gicuko cwinygi me dwogo Bote. Ka labalo mo onyuto ni dong eloko tamme ki kite, ci omyero kidwoke cen i kacokke labongo galle.—2 Kor. 2:6-8.
12. (a) Kodi lubalo macalo mene ma myero luelda gugwokke adada ka gitye ka ngiyo ka kitwero dwokogi i kacokke? (b) Pingo omyero pe watam ni pe twerre kulu pi lubalo mukene me nongo kica pa Jehovah? (Nen bene lok ma tye i tere piny.)
12 I kare mukene, mitte ni luelda gugwokke adada ma peya gudwoko ngat moni i kacokke. Me labolle, ka onongo kikwanyo ngat moni pi nywaro latin nyo pi cwako pwony pa jo mungak nyo ka en oketo nyomme akaka, ci luelda myero gumok ka ada en ongut i kom balle. (Mal. 2:14; 2 Tem. 3:6) Mitte ni luelda gugwok omege ki lumege me kacokke. Kadi bed kit meno, myero wiwa opo ni Jehovah bijolo labalo mo keken ma ongut ki cwinye ducu dok oweko timo tim maraco. Dong kadi bed luelda gigwokke i kit ma gitero kwede ngat ma otimo bal madit i kom jo mukene akaka, ento pe omyero gutam ni ngat ma kit meno dong pe binongo kica pa Jehovah matwal. b—1 Pet. 2:10.
GIN MA JO ME KACOKKE GITWERO TIMO
13. Apokapoka ango ma tye i kin kit ma watero kwede ngat ma kijuko ki kit ma watero kwede ngat ma kikwanyo ki i kacokke?
13 Kit ma wanyamo kwede i pwony ma okato-ni, i kare mukene kimiyo lok angeya bot kacokke ni kijuko ngat moni. Ka tye kit meno, pud wamedde ki ribbe kwede pien nongo en oloko tamme dok oweko timo bal meno woko. (1 Tem. 5:20) En pud tye i kin jo me kacokke dok myero onong cuko cwiny ki bot omege ki lumege wek omedde ki timo gin ma atir. (Ibru 10:24, 25) Ento, lokke bedo pat ka odok i kom dano ma kikwanyo woko ki i kacokke. ‘Pe waribbe’ ki ngat meno, dok ‘pe wanywako cam kacel ki kodi dano meno.’—1 Kor. 5:11.
14. Lukricitayo gitwero tic ki cwiny ma ngoligi kop nining me moko kit me tero jo ma kikwanyogi woko ki i kacokke? (Nen bene cal.)
14 Tika tira ma kimiyo i 1 Jo Korint 5:11 nyuto ni pe omyero walwong ngat ma kikwanyo me bino pi cokke nyo pe wamote ka en obino i cokke? Pe tye kumeno. Ngene kene ni, pe omyero waribbe kwede. Ento ngat acel acel twero tic ki cwiny ma ngolle kop me moko ka ce ebilwongo ngat ma kikwanyo ki i kacokke, gwok nyo ma obedo watte, nyo yam lareme macok, me bino i cokke. Ka ngat meno obino i cokke, omyero watere nining? I kare mukato, onongo pe wamoto ngat ma kit meno. Ento i lok man bene, mitte ni Lakricitayo acel acel oti ki cwiny ma ngolle kop me moko gin ma en bitimo. Jo mukene cwinygi ye ni gumot ngat meno dok gujole i cokke. Kadi bed kit meno, pe omyero warii ka boko lok ki dano meno nyo ka timo jami mukene kwede.
Lakricitayo twero tic ki cwiny ma ngolle kop me moko ka ce ebilwongo ngat ma kikwanyo pi cokke, nyo ka ce ebimoto ngat meno ka obino i cokke (Nen paragraf 14)
15. Kodi lubalo mene ma kiloko i komgi i 2 Jon 9-11? (Nen bene bok ma wiye tye ni “ Tika Jon ki Paulo Onongo Gitye ka Lok i kom Kodi Bal Acel-li?”)
15 Baibul tito ni tye kodi lubalo mogo ma omyero pe wamotgi. Ka onongo ni wamot dano ma kit meno, ci nongo ‘watye ka ribbe kwede i ticce marac.’ (Kwan 2 Jon 9-11.) Ento lok ma orumo 2 Jon 9-11 nyuto ni kodi dano man nongo obedo dano mungak nyo ngat ma tye ka bito jo mukene me timo bal. (Yabo 2:20) Pi meno, ka ngat ma kikwanyo-ni tye ka nyayo pwony pa jo mungak nyo tim maraco mukene, ci luelda pe gibilimme. Kadi bed kit meno, pud twere pi ngat meno me ngut i kom balle. Ento, nio wang ma meno otimme, pe wabimoto ngat meno nyo lwonge me bino i cokke.
KIT ME LUBO LANEN ME KICA PA JEHOVAH
16-17. (a) Gin ango ma Jehovah mito ni lubalo gutim? (Ejekiel 18:32) (b) Luelda gitwero tic kacel ki Jehovah nining?
16 Gin ango ma wapwonyo i pwony abic ma lubbe aluba-ni? Jehovah pe mito ni ngat mo keken orweny matwal! (Kwan Ejekiel 18:32.) En mito ni lubalo gudwog cen bote. (2 Kor. 5:20) Meno aye tyen lok mumiyo Jehovah kare ducu cuko cwiny luticce ducu ma gua woko ki bote me ngut i kom balgi wek gudwog cen bote. Luelda gitiyo kacel ki Jehovah me konyo jo ma gutimo bal madongo me ngut i kom balgi.—Rom. 2:4; 1 Kor. 3:9.
17 Go kong yomcwiny ma bedo tye i polo ka lubalo gungut! Wonwa me polo Jehovah, bedo ki yomcwiny madit adada kare ducu ka romone murwenyo odwogo cen i kacokke. Marwa pi Jehovah medde ki dongo ka walwodo lok i kom kica pa Jehovah ma pe wapore pire.—Luka 1:78.
WER 111 Gin Mumiyo Cwinywa Yom
a Pe dong wabilwongo jo magi ni jo ma kiryemogi ki i kacokke. Ma lubbe ki lok pa Paulo ma kicoyo i 1 Jo Korint 5:13 [NWT], dong wabilwongogi ni jo ma kikwanyogi ki i kacokke.
b Baibul tito ni tye lubalo mogo ma Lubanga pe bitimogi kica kulu. Jo ma kit meno nongo gumoko tamgi me bedo lumone pa Lubanga matwal. Jehovah gin ki Yecu keken aye gitwero ngolo kop ka ngat moni pe kitwero timme kica.—Mar. 3:29; Ibru 10:26, 27.
