Lakwena Paulo ocoyo waraga bot Lukricitayo me Tecalonika kun tito ni: “Ka ngat mo okwero lubo lok ma gicoyo i waraga man, myero wuniang maber i kom dano meno.” (2 Tec. 3:14) I kare mukato, onongo wawaco ni tira man kicoyo bot luelda. Ka ngat mo omedde ki cayo cik ma igi lac me Baibul kadi bed kimine tira tyen mapol, luelda onongo gitwero miyo pwony bot kacokke me cikogi i kom ngat meno. I nge meno, lutit kwena pe dong gibicwalo cawa ka namo ki ngat meno.

Ento, wanongo ni alokaloka mitte. Dong waniang ni tira pa Paulo onongo tye ka lok i kom gin ma ngat acel acel me kacokke myero otim ma lubbe ki gin ma tye ka timme. Dong pe mitte ni luelda gumi pwony me ciko dano me kacokke. Pingo watimo alokaloka i kom niangowa madok i kom 2 Jo Tecalonika 3:14? Nen kong gin ma Paulo obedo ka lok iye i kare ma omiyo tira man.

Paulo owaco ni jo mogo me kacokke onongo “komgi wac.” En onongo ominigi tira ma jenge i Baibul ento gukwero lubone woko. I limme mo mukato, en onongo ominigi tira man: “Ngat ma dag tic myero wutwon ki cam.” Kadi bed kit meno, jo mogo onongo pud pe gimito tic, kun nongo giromo timone. Medo i kom meno, onongo giridde i lok pa jo mukene. Lukricitayo onongo myero guter jo ma kit meno nining?—2 Tec. 3:​6, 10-12.

Paulo owaco ni: “Wuniang maber i kom dano meno.” Nyig lok me leb Grik man kwako niang i kom ngat meno maber kacel ki gwokke kwede. Paulo ocoyo tira man bot jo ducu me kacokke, ento pe bot luelda keken. (2 Tec. 1:1; 3:6) Dong, Lakricitayo acel acel ma oneno omego nyo lamego mo ma pe tye ka lubo tira ma i Lok pa Lubanga onongo twero yero ‘pe me ribbe’ ki ngat meno.

Tika meno tyen lokke ni onongo kitero dano meno calo ngat ma kikwanyo woko ki i kacokke? Pe tye kit meno, pien Paulo omedde ni: “Wucike macalo ominwu.” Pi meno, Lukricitayo onongo pud giribbe ki ngat meno i cawa me cokke ki i tic me pwony, ento onongo giyero pe me cwalo cawa ka namo nyo me galowang ki ngat meno. Pingo? Paulo owaco ni: “Wek lewic omake.” Ka wajuko ribbe ki ominwa i yo meno, ci lewic twero make i kom timme ci miyo en weko tim meno woko.—2 Tec. 3:​14, 15.

I yo ma nining ma Lukricitayo ma i kare-ni gitwero keto kwede tira meno i tic? Mukwongo, omyero kong waniang maber ka gin ma ngat meno tye ka timo obedo gin ma nyuto ni en “okwero lubo lok ma gicoyo,” kit ma lakwena Paulo otito kwede. En onongo pe tye ka lok i kom jo ma gitimo jami ma cwiny ma ngoliwa kop pe ye ni watim ento nongo gin meno pe turo cik ma igi lac me Baibul. Dok en onongo pe tye ka lok i kom jami ma ngat acel acel tye agonya me yero. En bene onongo pe tye ka lok i kom jo ma gucwero cwinywa. Me ka meno, Paulo onongo tye ka lok i kom jo ma nongo kiminigi tira ki i Lok pa Lubanga ento gukwero lubone akaka.

I kare-ni, ka waneno omego nyo lamego mo ma okwero lubo tira ma a ki i Lok pa Lubanga, a ci wabimoko tamwa pe me cwalo cawa kacel kwede ka namo nyo galowang. Kit macalo man obedo tam ma ngat acel acel moko pire kene, pe wabinyamone ki jo mukene mapat ki jo me otwa ma gubedo Lucaden. Dok wabimedde ki ribbe ki ngat meno i cawa me cokke ki dong i ticwa me pwony. Ka en oloko tamme kacel ki kite, ci wabicwalo cawa kwede ka namo doki.