“Lucaden magi onongo ginyuto cwiny me kica pe bot dano keken ento kadiwa bot gwogina bene. Nino mo acel, lamego ma nyinge Elaine, ma onongo ocung cok ki lalor bukke omiyo bickwit ki gwogina aryo-ni. I nge meno, kare ducu ka dong wao cok ki lalor bukke, gwogi onongo giringo bot Lucaden ka camo bickwit.

“Dwe mapol okato. Gwogi onongo ginongo mit pa camo bickwitgi, dok an bene anongo mit pa boko lok ki Lucaden. Ento onongo pe amito lok kwedgi tutwal. Onongo atye ki mwaka 70 ki wiye, dok onongo pe angeyo gin ma Lucaden pa Jehovah giye iye. Kit macalo cwinya onongo okwero dini pa Lukricitayo mapol, atamo ni bibedo ber ka akwano Baibul pira kena.

“I kare meno ducu, onongo aneno Lucaden i kabedo mapatpat i bomawa, ma gucung i nget lalor bukkegi. Gin bene onongo gitye ki cwiny me lirem. Onongo kare ducu gigamo lapenya kun gitiyo ki Baibul dok meno odongo genna i komgi.

“I nino mo acel, Elaine openya ni, ‘In tika iye ni lee gubedo mic ma oa ki bot Lubanga?’ Agamo ni, ‘Ee, aye meno do!’ Ci Elaine okwanna Icaya 11:6-9. Cakke i nino meno, onongo amito pwonyo jami ki i Baibul, ento onongo pud pe amito gamo jami akwana mo keken ki bot Lucaden.

“I nino mogo ma lubo meno, abedo ka nyamo lok mogo macego cego ento mamit ki Elaine kacel ki cware, Brent. Gumina tam ni akwan Matayo nio wa i Tic pa Lukwena wek aniang gin ma bedo Lakricitayo me ada kwako. Atimo meno. I nge kare manok, aye ni Brent ki Elaine gukwan Baibul kweda. Acako kwan i dyere me mwaka 2016.

“Onongo abedo ki miti madwong pi kwanna cabit ducu ki pi cokke ma bedo tye i Ot me Ker. Cwinya obedo yom adada me niang gin ma Baibul ada pwonyo. I nge mwaka acel ki dwe mogo, anongo batija macalo Lacaden pa Jehovah. Kombeddi dong atye ki mwaka 79 dok cwinya yom ni anongo dini me ada. Jehovah ogoyo laane i koma ki konya me doko ngat acel i kin jo me ode ma ginonge i wi lobo ducu.”