1. Myero wanen niye pa Lukricitayo nining?

NIYE obedo kit ma pire tek ma Lukricitayo myero gubed kwede. Pe dano ducu gitye kwede. (2 Tec. 3:2) Ento kadi bed kit meno, macalo but nyig ma nyak pi cwiny maleng, “ngat acel acel lubo kit pok me niye ma Lubanga opokke.” (Rom. 12:3; Gal. 5:22) Jo ducu ma gitye ki niye myero gubed ki pwoc pire.

2, 3. (a) Mot ango ma tye pi ngat ma tye ki niye? (b) Lapeny ango ma wabinyamone?

² Yecu Kricito owaco ni Wonne me polo nyiko dano cok bote kun tiyo ki en. (Jon 6:44, 65) Bedo ki niye i kom Yecu weko kitimo kica i kom bal pa ngat moni. Meno biyabo yo me bedo ki wat macok ki Jehovah pi naka. (Rom. 6:23) Gin ango ma watimo pi mot man mamwonya-ni? Macalo lubalo, onongo pe wapore me kwo pi naka. (Jab. 103:10) Ento Jehovah olo to oneno gin mo maber i kwowa. Pi kicane ma pe wapore pire-ni, en oyabo cwinywa wek wajol  kwena maber. Pi meno, wacako bedo ki niye i kom Yecu ki gen me nongo kwo ma pe tum i anyim.​—Kwan 1 Jon 4:9, 10.

³ Ento niye obedo gin ango? Tika kwako mere bedo ki ngec i kom mot ma Lubanga tye kwede piwa keken? Ma dong pire tek loyo, myero wanyut niyewa nining?

4. Tit kong gin mumiyo niye pe obedo bedo ki ngec keken.

⁴ Niye kwako jami mapol makato bedo ki ngec kacel ki niang yub pa Lubanga keken. Obedo teko ma cuko cwiny ngat moni me timo jami ma lubbe ki miti pa Lubanga. Bedo ki niye i kom yo ma Lubanga tiyo kwede me laro dano cuko cwiny luye me nywako kwena maber ki jo mukene. Lakwena Paulo otito ni: ‘Ka ituco ki dogi ni, Kricito aye Rwot, ma kun iye bene ki i cwinyi ni Lubanga yam ocere woko ki i kin jo muto, ci ibilarre. Pien dano ye ki cwinye, en aye miyo gikwane ni kite atir, ka dok tuco ki doge, ka dong miyo Lubanga lare.’​—Rom. 10:9, 10; 2 Kor. 4:13.

5. Pingo niye pire tek, dok watwero gwokone bedo matek nining? Tit kong.

⁵ Ki lok ada, genwa me kwo pi naka i lobo manyen pa Lubanga cung i kom niyewa ki gwokone wek obed matek. Tyen lok muweko bedo ki niye matek pire tek kiromo porone ki kit ma pii pire tek kwede bot yat. Dongo pa Yat cung i kom pii. Yat twero twoo ci to woko ka pii pe oromo, nyo medde ki dongo ma kome yot ka pii tye muromo. Niyewa bene bedo kit meno. Ka pe kigwoko twoo ci to woko. (Luka 22:32; Ibru 3:12) Ento ka wagwoko maber, ci niyewa bimedde ki “dongo matek” dok bene ‘wacung matek niyewa.’​—2 Tec. 1:3; Tito 2:2.

6. Yo aryo ango ma Jo Ibru 11:1 gonyo kwede tyen lok me niye?

⁶ Baibul ogonyo tyen lok me niye i Jo Ibru 11:1. (Kwan.) Niye cung i kom jami aryo ma pe watwero nenogi ki wangwa: (1) “Gin ma dano geno”​—man kwako jami mogo ma kiciko pire ento peya otimme, calo agikki me lobo man marac-ci ki lobo manyen ma bibino-ni. (2) “Jami ma pe gineno komgi [kun] gitye.” I leb Grik, lok man ma kigonyo ni “en gin ma niangowa maber” niange ni “gin ma moko” jami ma pe ginen, me labolle, ye ni Lubanga Jehovah, Yecu Kricito, ki lumalaika gitye ada, ki dok niang kit tic ma timme i Ker me polo. (Ibru 11:3) Watwero mokone ni watye ki gen i kom jami ma pe ginen ma kitito pire i Lok pa Lubanga nining? I lokwa kacel ki ticwa​—labongo acel mo i kingi nongo niyewa konye pe.

7. Lanen pa Nua konyowa nining me niang gin ma bedo ki niye kwako? (Nen cal ma tye i pot karatac 26.)

⁷ Jo Ibru 11:7 oloko i kom niye pa Nua ni i kare ma ‘Lubanga ociko en pi gin ma peya onen, owinyo doge, ka dong opayo yeya pi laro jo me ode.’ Nua onyuto niyene i tic kun gero yeya mo madit adada. Labongo akalakala, nen calo jiranine gupenye pingo en tye ka gero kodi gin madit kumeno. Tika Nua oling mere mot nyo owaccigi ni gumak gin mukemogi? Pe kumeno!  Niyene omiyo en omiyo caden ki tekcwiny kun ciko yalwakke ma lubbe ki bino pa ngolo kop pa Lubanga. Labongo akalakala mo, Nua otito ki dano jami ducu ma Jehovah owacce kore ki kore ni: “Agik pa dano ducu dong obino i nyima, pien gupongo lobo woko ki bwami . . . abicoro pii aluka madwong i wi lobo, wek otyek kom gin ducu ma tye ki kwo, i te polo, wek gin ducu ma gitye i wi lobo oto woko.” Medo i kom meno, Nua nen calo bene otito gin ma biweko gibwot ki i can meno, kun nwoyo cik pa Lubanga ni: ‘Myero gudony i yeya.’ Pi meno, Nua onyuto niyene ki bedo “latit lok me kit ma atir.”—Acak. 6:13, 17, 18; 2 Pet. 2:5.

8. Gin ango ma cwiny maleng oweko Yakobo otito ma lubbe ki bedo ki niye me ada?

⁸ Waraga pa Yakobo nen calo kicoyo cokcok i nge kare manok ma lakwena Paulo otito kwede te lok me niye. Calo Paulo, Yakobo bene otito ni bedo ki niye pe mere kwako ye gin moni keken; mitte ni onen i tic. Yakobo ocoyo ni: “Nyutta niyeni labongo tic mo, ka dong abinyutti niyena ki ticca.” (Yak.  2:18) Yakobo omedde ki tito ka maleng apokapoka ma tye i kin bedo ki niye ki keto niye i tic. Jogi bene giye i kom Lubanga, ento gipe ki niye me ada. Ma ka meno, gitute matek me balo cobbe pa yub pa Lubanga. (Yak. 2:19, 20) Yakobo oporogi ki laco mo ma obedo ki niye i kare macon, kun owaco ni: “Kwarowa Abraim yam pe gikwano ni kite atir pi tic, i kare ma en otyero wode Icaka me bedo gitum i wi keno tyer? Dong ineno ni niyene yam otiyo kacel ki ticce, dok niye yam ocobbe ki tic.” Wek dano guniang maber ni myero kinyut niye i tic, Yakobo omedo ni: “Kit meno bene, niye ka pe giketo i tic, nongo dong oto woko.”​—Yak. 2:21-23, 26.

9, 10. Lakwena Jon okonyowa nining me niang kit ma bedo ki niye pire tek kwede?

⁹ I nge mwaki 30, lakwena Jon ocoyo Jirine ki waraga adek mukene. Tika obedo ki pwoc i kom kit ma jo mukene ma gucoyo Baibul gutito kwede lok i kom niye me ada? Jon otiyo ki leb Grik ma gonye ni “dano ma ye” tyen mapol makato jo mogo ma gucoyo Baibul.

¹⁰ Me labolle, Jon otito ni: “Dano ma ye Wod tye ki kwo ma pe tum; ngat ma pe winyo dog Wod, pe bineno kwo, ento kiniga pa Lubanga bedo i kome.” (Jon 3:36) Bedo ki niye kwako lubo lok ducu ma Yecu ociko. Jon pol kare onongo tiyo ki lok pa Yecu ma nyuto ni dongo niye timme kare ducu.​—Jon 3:16; 6:29, 40; 11:25, 26; 14:1, 12.

11. Watwero nyuto pwoc pi ngeyo lok me ada nining?

¹¹ Pud dong myero wabed ki pwoc madit ya bot Jehovah me tic ki cwiny maleng wek waniang lok ada ki dok me bedo ki niye i kom kwena maber! (Kwan Luka 10:21.) Myero wiwa pe owil me pwoyo Jehovah me nyikowa cok bote kun tiyo ki Wode, ma “en aye latel wiwa i lok kom niye.” (Ibru 12:2) Me nyuto pwocwa pi kica pa Jehovah ma pe wapore pire-ni, myero wamedde ki jingo niyewa ki lega kacel ki kwano Lok pa Lubanga.​—Ep. 6:18; 1 Pet. 2:2.

12. I yo ango ma watwero nyuto kwede ki niyewa?

¹² Myero wamedde ki keto niyewa i kom cikke pa Jehovah. Myero wanyuto niyewa ka maleng bot jo mukene. Me labolle, wamedde ki tito lok i kom Ker pa Lubanga ki nywako i tic me loko dano wek gudok lupwonnye. Wamedde bene ki timo “gin maber bot dano ducu, makato ducu myero watiyu bot utmegiwa ma guye Kricito.” (Gal. 6:10) Ki dok watiyo matek me ‘weko kwowa macon ki ticce ducu’ ki bene gin mo keken ma twero weko niyewa doko goro.​—Kol. 3:5, 8-10.

13. ‘Niye i kom Lubanga’ pire tek lakwene, dok kiporo ki ngo ki dok pingo?

¹³ Baibul waco ni: “Labongo niye pe twerre me yomo cwinye, pien ngat ma mito nyiko cok bot Lubanga myero oye ni en tye ada, dok bene ni en miyo bakacic bot jo ma yenye.” (Ibru 11:6) Lok pa Lubanga tito ni ‘niye i kom Lubanga’ obedo macalo ‘guti’ ma mitte wek ngat moni odok kun medde ki bedo Lakricitayo me ada. (Ibru 6:1) I kom guti meno, Lukricitayo myero ‘gumed kit maber i kom niyegi’ wek ‘gugwokke kengi i mar pa Lubanga.’ ​—Kwan 2 Petero 1:5-7; Juda 20, 21.

14, 15. I kin mar ki niye, niye pire tek lakwene?

¹⁴ Lukricitayo ma gucoyo Baibul gunyuto kit ma niye pire tek kwede kun giloko iye tyen miya mapol. Pe tye but nyig mo ma nyak pi cwiny maleng ma kiloko iye kit meno. Tika meno te lokke ni niye dong pire tek makato kit ducu ma myero Lakricitayo obed kwede?

¹⁵ I kare ma Paulo tye ka poro niye ki mar, en ocoyo ni: Ka “atye ki ngec ducu, ma atye bene ki niye ducu, ma atwero bene kobo kwede godi madongo-gu woko ka mukene, ce pe atye ki mar, ci pe a gin mo.” (1 Kor. 13:2) Yecu bene onyuto ni mar aye pire tek loyo i kom kit ducu i kare ma en tye ka gamo lapeny mo ni: “Cik mene madit makato cik ducu?” (Mat. 22:35-40) Mar kwako kit mapol ma pire tek pa Lakricitayo ma i kine tye iye niye. Baibul waco ni “mar ye lok ducu.” Mar ye jami ducu ma Lubanga owaco i Lokke me ada.​—1 Kor. 13:4, 7.

16, 17. Kiloko i kom niye ki mar nining i Ginacoya, ento mene ma pire tek loyo, ki dok pingo?

¹⁶ Kit ma niye ki mar pigi tek kwede-ni, Lukricitayo ma gucoyo Baibul guloko iye i kabedo marom tyen mapol adada. Paulo ocuko cwiny omegine ni: “Waruku niye ki mar gubed nyonyo me gengo korwa.” (1 Tec. 5:8) Petero bene ocoyo ni: ‘Kadi pud pe wunene [Yecu], dong wumare. Dok bene kombeddi kadi pe wunene, wuye en.’ (1 Pet. 1:8) Yakobo openyo omegine ma kiwirogi ni: “Pe Lubanga aye muyero jo ma lucan i wi lobo wek gubed lulonyo i niye, dok me miyogi ker ma yam ociko ni ebimiyo bot jo ma mare.” (Yak. 2:5) Jon ocoyo ni: ‘Cikke en ene ni, myero waye nying Wode Yecu Kricito, dok wamarre kekenwa.’​—1 Jon 3:23.

¹⁷ Kadi bed ni niye pire tek, but nyig man pe dong bimitte ka dong waneno cobbe pa cikke pa Lubanga ki dok ka jami ma Lukricitayo gigeno ocobbe kakare. Ento marwa i kom Lubanga ki pi luwotwa pe bigik. Pi meno, Paulo ocoyo ni: “Dong tye gin adek ma gibedo matwal: niye, gen, mar; ento gin ma pire dit ma katogi ducu en aye mar.”​—1 Kor. 13:13.

18, 19. Gin ango ma nyuto niye matek i kare-ni, ki dok anga ma opore me nongo pwoc pire?

¹⁸ I kare-ni, jo pa Jehovah gitye ka keto niyegi i kom Ker pa Lubanga. Man oweko dano makato milion aboro i twok lobo lung gitye i paradic me cwiny. Jone weng gitute me nyako but nyig ma nyak pi cwiny maleng. (Gal. 5:22, 23) Man pud dong obedo yo maber ya me nyuto mar pa Lukricitayo kacel ki niye!

¹⁹ Pe myero kipwo ngat mo keken me timo man. Lubanga aye ma oweko meno otimme. Tic man ma pire tek-ki “bibedo gin me po nakanaka, ma pe birwenyo, me nyuto ni Jehovah aye ma ceng otiyo man.’ (Ic. 55:13) Ki lok ada, man obedo “mot pa Lubanga” me ‘larowa pi niye.’ (Ep. 2:8) Paradicwa me cwiny bimedde ka dongo wang ma lobo ducu opong ki dano ma gipe kiroc, kitgi atir, ki dok dano ma cwinygi yom ma bipako nying Jehovah nakanaka. Wamedde wunu ki keto niye i kom cikke pa Jehovah!