Jo Me Ot Ma Lukricitayo​—‘Wubed Ma Wangwu Twolo’

‘Wabedu ma wangwa twolo kun wagwokke.’​—1 TEC. 5:6.

1, 2. Ngo ma mitte wek jo me ot gubed ma wanggi twolo i yo me cwiny?

 ILOKKE i kom “nino madit pa Rwot [Jehovah], ma kelo lworo,” lakwena Paulo ocoyo bot Lukricitayo ma i Tecalonika ni: “Wun pe wutye i piny macol, utmegiwa, ma twero miyo nino-nu turuwu atura calo lakwo. Pien wun ducu wubedo jo me ceng, jo me dyeceng; wan pe jo me dyewor nyo me piny macol.” Paulo omedo ni: ‘Pi meno, pe myero waninu anina macalo jo mukene, ento wabedu ma wangwa twolo kun wagwokke.’​—Joel 2:31 Baibol pa Katoli; 1 Tec. 5:4-6.

² Tira pa Paulo bot jo Tecalonika-ni rwatte pi Lukricitayo ma gikwo “i kare me agik[ki-ni].” (Dan. 12:4) Ka agikki me lobone-ni woto ki nyiko cok, Catan omoko tamme me loko luworo mapol me ada kit ma etwero kwede wek pe guti pi Lubanga. Wanyutu ryeko ka waketo i cwinywa lok pa Paulo ma owaco ni myero wabed ma wangwa twolo i yo me cwiny-nyi. Wek jo me ot ma Lukricitayo gubed ma wanggi twolo, pire tek ni dano acel acel me ot myero ocob ticce kit ma kicimo kwede i Ginacoya. Ci dong, tic ango ma co, mon, ki lutino myero gutim me konyo jo me odigi wek ‘gubed ma wanggi twolo’?

Co​​—Wulub lanen pa “Lakwat Maber”

3. Ma lubbe ki 1 Temceo 5:8, tic pa laco macalo lawi ot kwako timo gin ango?

³ Baibul waco ni “wi dako aye cware.” (1 Kor. 11:3) Tic pa laco macalo lawi ot kwako timo gin ango? Kun nyutu yo acel me tela, Ginacoya wacci: “Ka ce dano mo pe miyo gin mo me konyo wadine, makato pi jo me ode kikome, nongo dong okwero niyene woko, dok bene odoko rac makato ngat ma pe oye Lubanga.” (1 Tem. 5:8) Ada, laco myero omi jami me kom bot jo me ode. Wek en okony jo me ode me bedo ma wanggi twolo i yo me cwiny, en pe myero oyeny cente keken me konyo jo me ode. Mitte ni en myero oger ode i yo me cwiny, kun konyo jo ducu me ode wek gujing watgi ki Lubanga. (Car. 24:3, 4) En twero timone nining?

4. Ngo ma romo konyo laco wek oger ode i yo me cwiny?

⁴ Kit ma ‘laco obedo lawi dakone, macalo Kricito en aye lawi lwak muye en-ni,’ laco munyomme myero ongi dok olub lanen me tela pa Yecu kit ma en telo kwede kacokke. (Ep. 5:23) Nen kong kit ma Yecu oloko kwede i kom wat ma tye i kin en ki lulub kore. (Kwan Jon 10:14, 15.) Laco ma mito gero ode i yo me cwiny myero otim gin ango? En myero otim gin man: Okwan gin ma Yecu owaco dok otim gin ma “lakwat maber” otimo, kun ‘lubo kore macok.’​—1 Pet. 2:21.

5. Ngec ango ma Lakwat Maber tye kwede i kom kacokke?

⁵ Wat ma tye i kin lakwat ki romine jenge i kom ngec ki gen. Lakwat ngeyo romine maber adada, dok romi bene gingeyo dok gigeno lakwat. Gingeyo dok giwinyo dwane. Yecu owacci “Angeyo romina, mera  bene ngeya.” Ngecce i kom kacokke pe tye wiye wiye. Leb me Grik ma kitiyo kwede kany ni “angeyo” te lokke gonye ni “ngec matut.” Ada, Lakwat Maber ngeyo romine ki acel acel. En ngeyo gin ma gimito, gorogi, ki dong kerogi. Pe tye gin mo ma timme i kom romine ma ngat ma tye Lanenwa pe ngeyo. Dok romi gingeyo maber adada lakwat dok gigeno telane.

6. Co gitwero lubo lanen pa Lakwat Maber nining?

⁶ Me telo telane kun lubo lanen pa Kricito, laco myero opwonye me nene kekene calo lakwat ki jo ma en gwokogi calo romi. En myero otute me bedo ki ngec matut i kom jo me ode. Laco tika ada twero bedo ki ngec ma kit meno? Ada, ka en loko maber ki jo ducu me ode, winyo pekogi, telo yo i tic me ot, dok moko kiryeko tam mogo mabeco ma kwako jo me ode calo woro pi jo me ot, wot i cokke, wot i ticwa me pwony, mato yamo, ki dong galowang. Ka laco ma Lakricitayo pwonyo gin ma Lok pa Lubanga waco dok ngeyo maber jo me ode wek ebed lanen ki dok emok tam me ryeko, ci jo me ode giketo gen i kom telane dok en bedo ki yomcwiny me neno jo me ode ka ginote i woro me ada.

7, 8. Co gitwero lubo lanen pa Lakwat Maber i nyutu mar pi jo ma gin gwoko nining?

⁷ Lakwat maber bene maro romine. Ka wakwano Jiri madok i kom kwo kacel ki tic me pwony pa Yecu, ci wabedo ki pwoc pi mar ma Yecu onyutu i kom lupwonnyene. En bene ‘omiyo kwone pi romi.’ Co myero gulub lanen pa Yecu i nyutu mar bot jo ma gin gwoko. Ma ka bedo ki dic i kom dakone, laco ma mito nongo cwak pa Lubanga myero omedde ki maro dakone “kit macalo Kricito omaro kwede lwak muye en.” (Ep. 5:25) En myero olok ki kica dok ki niango, pien dako opore me nongo deyo.​—1 Pet. 3:7.

⁸ Ka odok i pwonyo lutino, lawi ot myero ocung matek me lubo cik pa Lubanga. Ento, en myero oneni enyuto mar pi lutinone. Pwod mo keken ma mitte myero kimi i yo me mar. Lutino mogo gitero kare me niang gin ma kimito ki botgi ka iporo ki lutino mukene. Ka tye kumeno, ci wego myero odi cwinye i komgi adada. Ka co gilubo lanen pa Yecu kore ki kore, gimiyo paco bedo kabedo ma lworo pe iye kun gwok nongo tye iye. Jo me odigi ginongo mit pa gwok me cwiny ma laco jabuli owero pire-ni.​—Kwan Jabuli 23:1-6.

9. Calo Nua, co ma Lukricitayo gitye ki tic ango, dok ngo ma bikonyogi me cobone?

⁹ Nua okwo i kare me agikki me lobone. Ento Jehovah ogwokke “ki jo mukene abiro, i kare ma yam en ocwalo pii aluka wek omwony lobo pa jo ma pe gilworo Lubanga woko.” (2 Pet. 2:5) Nua onongo tye ki tic me konyo jo me ode wek gubwot ki i Pii Aluka. Luwi odi ma Lukricitayo bene gitye kumeno i kare man me agikki-ni. (Mat. 24:37) Pud dong pire tek ya ni gin gukwan lok i kom lanen pa “lakwat maber” dok bene gutute me lubo lanene!

Mon​—‘Wuger Odiwu’

10. Mine ite loc pa laco te lokke ngo bot dako?

¹⁰ Lakwena Paulo ocoyo ni “Wun mon wumine kenwu i te loc pa cogwu, macalo wumine kenwu bot Rwot.” (Ep. 5:22) Ginacoya man pe tye ka wacci mon rwomgi tye lapiny. Ma peya kicweyo dako mukwongo, Kawa, Lubanga me ada owaco ni: “Pe ber dano ibedo kene; abino tiyo ngat ame konye ame oporre pire.” (Acak. 2:18, Baibul me Leb Lango) Tic pa ‘lakony’ ki ngat ‘mupore’​—ma obedo konyo cware kagwoko jo me ode-ni​—tye twon deyo madit atika.

11. Dako ma tye lanen maber ‘gero ode’ nining?

 ¹¹ Dako ma tye lanen maber tiyo wek pacone obed maber. (Kwan Carolok 14:1.) Ka i poro ki dako ma laming, ma pe nyutu woro pi yub me tela ma Jehovah oketo, dako maryek nyutu woro pi yub man. Ma ka nyutu cwiny pe me bedo lawiny ki me lone ken ma tye i lobo-ni, dako maryek mine ite loc pa cware. (Ep. 2:2) Dako ma laming loko marac i kom cware, ento dako maryek yelle me ilo malo woro ma lutinone ki jo mukene gimiyo bot cware. Dako ma kit meno pe cayo tela pa cware kun pyem apyema nyo bedo ka daa kwede. Tye bene lok mukene madok i kom tic ki lim i yo maber. Dako ma laming balo jami ma kitiyo ki kwok me nongone i ot. Ento dako ma konyo cware pe bedo kumeno. En note ki cware ka odok i lok me tic ki lim. Kit ma en tiyo kwede ki jami nyutu ryeko ki diro. En pe keto lyeto i kom cware me tic wa inge cawa me tic.

12. Ngo ma dako twero timone me konyo jo me ode wek ‘gubed ma wanggi twolo’?

¹² Dako ma tye lanen maber konyo jo me ot me ‘bedo ma wanggi twolo’ kun konyo cware i pwonyo lutino i yo me cwiny. (Car. 1:8) En teno kor yub me Woro pi Jo me Ot ki mit kom. Ento, en bene bedo ki cwak ka cware omiyo tira kacel ki pwod bot lutinogi. En pud dong pat adada ki dako ma pe note ki cware, ma lutinone deno can i yo me kom ki cwiny!

13. Pingo pire tek ni dako okony cware ka tiyo tic me tiokraci ki mit kom?

¹³ Dako ma konyo cware myero owiny nining ka en neno cware tiyo ticce ki mit kom i kacokke? Ada, cwinye bedo yom! Kadi bed cware tye lakony kor tic, laelda, nyo lamemba me Hospital Liaison Committee nyo Komiti ma Loyo Lok me Gedo i Rijon, en cwinye bedo yom pi mot me tic magi. Wek en okony cware ki mit kom i lok kacel ki tic mito jalle ken. Ento en ngeyoni ka cware tiyo tic me tiokraci, man konyo jo ducu me ot me bedo ma wanggi twolo i yo me cwiny.

14. (a) Ngo ma romo bedo atwom bot dako ma konyo cware, dok en twero cobo atwom man nining? (b) Dako twero miyo kwo pa jo ducu me ot bedo yot nining?

¹⁴ Bedo dako ma tye lanen maber i tic me konyo cware romo bedo atwom ka ce cware moko tam ma en pe cwako. Kadi bed kit meno, en myero onyut “cwiny mamwol, ma ling mot” kun note ki cware wek tam ma en moko ocobbe kakare. (1 Pet. 3:4) Dako maber tute me lubo lanen pa mon ma i kare macon gulworo Lubanga calo Cara, Ruth, Abigail, ki dong Maliam min Yecu. (1 Pet. 3:5, 6) En bene lubo lanen pa  mon ma guteggi i yo me cwiny i kare-ni ma gitye ki “woro i kit bedogi ducu.” (Tito 2:3, 4) Ka en nyutu mar ki woro pi cware, dako ma tye lanen maber miyo nyomgi cung matek dok kwo pa jo ducu me ot bedo yot. Pacone bedo kabedo ma kwo mit iye dok labongo ayela. Bot laco ma maro jami me cwiny, dako ma miyo kony wele dit!​—Car. 18:22.

Bulu​—‘Wucik Wangwu i Kom Jami ma Pe Nen’

15. I yo ango ma lutino gitwero tic kwede kacel ki lunyodogi wek jo me pacogi ‘gubed ma wanggi twolo’?

¹⁵ Wun lutino wutwero tic kacel ki lunyodwu wek jo me pacowu ‘gubed ma wanggi twolo’ i yo me cwiny nining? Tam kong mot ma Jehovah oketo tye piwu i anyim. Gwok nyo ocakke wa i ka tinoni, lunyodoni gunyutti cal ma cimo kit ma kwo bibedo kwede i Paradic. Ma iwoto ki dongo, oromo bedoni gutiyo ki Baibul ki bukke pa Lukricitayo me konyi wek igo i wi kit ma kwo ma pe tum bibedo kwede i lobo manyen-ni. Cik wangi i kom tic pa Jehovah kun igoyo pulan pi kwoni i yo ma bikonyi me ‘bedo ma wangi twolo.’

16, 17. Ngo ma bulu giromo timo me ngweco ngwec me kwo wa i tyekone?

¹⁶ Ket cwinyi i lok ma lakwena Paulo ocoyo i 1 Jo Korint 9:24. (Kwan.) Ngwec ngwec pi kwo-ni ki miti me loyone. Yer yo ma bimiyo inongo mot me kwo ma pe tum. Jo mapol guweko yenyo jami me kom odwoyo tamgi woko ki i ciko wanggi i kom mot man. Meno pud dong tye twon mingo ya! Goyo pulan pi kwowa kun jenge i kom nongo lonyo pe kelo yomcwiny me ada. Jami ma cente wilo pe rii. Ento in giri, ‘cik wangi i kom jami ma pe nen.’ Pingo? Pien ‘jami ma pe nen rii nakanaka.’​—2 Kor. 4:18.

¹⁷ ‘Jami ma pe nen’ magi kwako mot me Ker-ri. Go pulan wek i kwo i yo ma miyo inongo mot magi. Yomcwiny me ada bino ka itiyo ki kwoni i tic pa Jehovah. Tic pi Lubanga me ada miniwa kare me keto yub ma cobbe oyot kacel ki marii. * Keto yub mupore me cwiny twero konyi me keto tammi i tic pi Lubanga ki cwiny me nongo mot me kwo ma pe tum.​—1 Jon 2:17.

18, 19. Ngat matidi romo ngeyone nining ni dong eweko ada odoko yo me kwone?

¹⁸ Wun jo matino, yo mukwongo me alubo me nongo kwo aye me weko ada odok yo me kwowu. In dong ikwanyo yo meno? Penye kekeni ni: ‘An mono amaro jami me cwiny, nyo kece kit ma anywako kwede i tic me cwiny jenge i kom lunyodona? Tika adongo kit mabeco ma yomo cwiny Lubanga? An mono atute me nywako i tic ma lubbe ki woro me ada calo lega, kwan, wot i cokke, ki dong cito i ticwa me pwony kare ki kare? An mono atye ka nyikke cok bot Lubanga kun adongo wat macok kwede?’​—Yak. 4:8.

¹⁹ Tam kong i kom lanen pa Moses. Kadi bed en onongo tye ka lubo tekwaro mapat, en oyero me woro Jehovah ma ka bedo  wod pa nyar pa Parao. (Kwan Jo Ibru 11:24-27.) Wun bulu ma Lukricitayo, mitte ni wumok tamwu me tic pi Jehovah ki gen. Ka wutimo meno wubinongo yomcwiny me ada, kwo maber loyo kombeddi-ni, ki dong gen me nongo “kwo ma en aye kwo kikome.”​—1 Tem. 6:19.

20. I pyem ngwec me kwo, angagi ma ginongo mot?

²⁰ I pyem ngwec me kare macon, langwec acel keken aye ma loyo ngwec. Pe tye kit meno i ngwec me kwo. Lubanga mito “laro jo ducu, dok mito ni jo ducu gunge lok me ada.” (1 Tem. 2:3, 4) Dano mapol gungweco ngwec man labongo ayela, dok jo mukene gitye ka ngwecone kacel kwedi. (Ibru 12:1, 2) Jo ducu ma gibingwec wa i tyekone gibinongo mot man. Pi meno, mok tammi me loyone!

21. Ngo ma kibinyamo i pwony ma gilubo man?

²¹ ‘Nino madit ki ma kelo lworo pa Jehovah’ wang ma oo. (Mal. 4:5) Nino meno pe myero obin atura ma nongo jo me ot ma Lukricitayo pe gingeyo. Pire tek ni jo ducu me ot guti ticgi kit ma kicimo kwede i Ginacoya. Ngo mukene ma iromo timone me bedo ma ikiyo piny i yo me cwiny kun ijingo wati ki Lubanga? Pwony ma gilubo man binyamo jami adek ma gigudo kwo me cwiny pa jo ducu me ot.

[Lok ma tye piny]

Ngo ma i Pwonyo?

• Pingo pire tek pi jo me ot ma Lukricitayo me ‘bedo ma wanggi twolo’?

• Laco twero lubo lanen pa Lakwat Maber nining?

• Dako ma tye lanen maber romo timo gin ango me konyo cware?

• Lutino gitwero konyo jo me pacogi me bedo ma wanggi twolo i yo me cwiny nining?

[Peny me Kwan]

[Cal ma tye i pot karatac 12]

Dako ma miyo kony wele dit bot laco ma maro jami me cwiny