Yecu Kit ma En Okwo Kwede

“Camma en tiyo gin ma ngat ma oora mito, ki cobo ticce.”​—JON 4:34.

GIN ma onongo tye ka timme i kare ma Yecu owaco lok man nyutu gin ma pire tek loyo i kwone. Yecu kacel ki lupwonnyene onongo gubedo ka wot odiko lung i caro me Camaria ma obedo godi godi-ni. (Jon 4:6) Lupwonnyene gumine ginacama pien gutamo ni kec nen calo tye ka neko Yecu. (Jon 4:31-33) Me dok i lokgi, Yecu owaco botgi gin ma pire tek i kwone. Kitung bote, timo tic pa Lubanga pire tek loyo wa camo cam. I lokke kacel ki ticce, Yecu otiyo ki kwone me timo miti pa Lubanga. Man kwako timo gin ango?

▪ Tito kwena ki pwonyo lok i kom Ker pa Lubanga Baibul tito tic ma Yecu otimo pi kwone ducu, kun wacci: “Owoto orumo lobo Galilaya ducu, kun pwonyo . . . dok tito lok me kwena maber me Ker pa Lubanga.” (Matayo 4:23) Yecu pe otito kwena nyo opwonyo keken lok i kom Ker pa Lubanga bot jo mukene. En bene opwonyo dano​—onyutu, otito, dok omiyo tyen lok mucwiny. Lok me Ker-ri onongo tye wi lok madit me pwony pa Yecu.

I ticce me pwony lung, Yecu opwonyo jo ma winye i kom gin ma Ker pa Lubanga obedo ki gin ma Ker-ri bitimone. Nen kong lok ada i kom Ker-ri kacel ki Ginacoya ma kiketogi ma gitito gin ma Yecu owaco i kom lok man.

▪ Ker pa Lubanga obedo gamente me polo, dok Jehovah aye ocimo Yecu me bedo Kabaka me Ker-ri.​—MATAYO 4:17; JON 18:36.

▪ Ker-ri bilonyo nying Lubanga dok bimiyo mitine timme i lobo kit ma timme kwede i polo.​—MATAYO 6:9, 10.

▪ Lobo ducu kibiloko doko paradic ka Ker pa Lubanga tye ka loc.​—LUKA 23:42, 43.

▪ Ker pa Lubanga cok bino dok bimiyo miti pa Lubanga pi lobo cobbe. *​—MATAYO 24:3, 7-12.

▪ Tiyo tic mogo me aura Yecu onongo ngene tutwalle calo “Lapwony.” (Jon 13:13) Kadi bed kumeno, i tiyo ticce me pwony pi mwaka adek ki nucu, en bene otimo tic mapol me aura. Tic magi tye pi tyen lok aryo. Mukwongo, gukonyo me nyutune ni ada Lubanga aye ocwale. (Matayo 11:2-6) Me aryo, gunyutu tic madito ma en bitimone i kare me anyim calo Kabaka me Ker pa Lubanga. Nen kong tango mogo ma en otimogi.

▪ En omiyo nam oling mot dok bene ojuko yamo.​—MARAKO 4:39-41.

▪ En ocango lutwo, ma bene tye iye lutowang, ludingit, ki dong lungolo.​—LUKA 7:21, 22.

▪ En onyayo cam, ci opito lwak ma kec tye ka nekogi.​—MATAYO 14:17-21; 15:34-38.

▪ Tyen adek kulu en ocero jo muto.​—LUKA 7:11-15; 8:41-55; JON 11:38-44.

Tam kong kit ma kwo bibedo kwede i lobo  ite loc pa Kabaka ma tye ki teko ma kit man!

▪ Nyutu kit pa Lubanga Jehovah Ka odok i lok me pwonyo jo mukene i kom Jehovah, pe tye ngat mo mupore loyo Wod pa Lubanga, ngat ma odoko Yecu Kricito. Calo “latin kayo me ginaketa ducu,” Yecu okwo kacel ki Jehovah i polo pi kare malac loyo cwec me cwiny mukene-ni. (Jo Kolocai 1:15) Tam kong kare ma en onongo tye kwede me niang tam pa Wonne ki pwonyo Mitine, rwomme, kacel ki yo ma mege.

Yecu owaco atir ni: “Ngat mo pe ma ngeyo ni Wod en anga, kono Won keken, dok bene ngat mo pe ma ngeyo ni Won en anga, kono Wod keken, ki ngat ma Wod oyero me nyuto Won bote.” (Luka 10:22) I kare ma en tye i lobo macalo dano, Yecu onyutu ki mit kom nga ma Wonne obedo. Yecu oloko dok opwonyo i yo mapat, kun wiye po i kom ngec ma en onongo i kare ma en tye i polo dok i nyim Lubanga Mamalo Twal.​—Jon 8:28.

Gin ma Yecu otimo me nyutu Wonne kiromo porone ki gin ma tranyfoma me mac alektwic timo. Tranyfoma gamo mac alektwic ma tye ki teko ma lamal ci dwoko tekone piny, wek obed yot pi dano me tic kwede. I kare ma en tye i lobo, Yecu otiyo ki ngec ma en onongo ki i polo i kom Wonne ci otito bot dano i lobo i yo ma niang iye ki ketone i tic yot.

Nen kong yo aryo ma pigi tego ma Yecu onyutu kwede Wonne.

▪ I pwony ma mege, Yecu omiyo lok ada i kom Jehovah ongene​—Nyinge, yubbe, kacel ki yone.​—JON 3:16; 17:6, 26.

▪ I ticce, Yecu onyutu kit mabeco pa Jehovah. Yecu onyutu i yo maber adada kit pa Wonne, ma oweko en owacci: ‘Ka wumito ngeyo nga ma Wora obedo, ci wunen an.’​—JON 5:19; 14:9.

Wabedo ki ur pi kit ma Yecu okwo kwede. Waromo nongo adwogi mapol ka wangiyo gin mumiyo en oto kun waketo gin ma wapwonyo i tic.

[Lok ma tye piny]