Can Mukato Kare Obedo Gin Ango?

CAN mukato kare weko kwo bedo matek adada. Man tere ni bedo labongo cam, pii, yen tedo nyo ot, kony me yot kom kacel ki kwan. Man mako dano makato bilion acel kulu, macok rom ki wel dano ma i Afrika lung. Ento, dano mapol i Kupoto ceng me Ulaya ki Kumalo me Amerika ma naka yam peya guneno ngat mo ka deno can mukato kare kit man. Dong kong wanenu mogo.

Mbarushimana bedo i lobo Rwanda, i Afrika, gin ki dakone ki lutinone abic. Latin me abicelle oto ki two maleria. En owacci: “Wora opoko ngomme i kin wan abicel. Mega onongo tidi adada ma oweko akwanyo jo me oda wacito ka bedo i taun. An ki dakona wabedo ka yweko gweng ki kweyo. Otwa onongo pe ki dirica. Wagamo pii ki i barak pa abili. Wacamo dek kicel nino acel, ento ka tic pe wabuto kec, dok nino ma cam pe, pe abedo paco​—pien pe amito neno lutinona ka gitye ka koko kec.”

Victor ki Carmen gikwoyo war macalo yo me kwogi. Gibedo i taun mo ma tye ka kene i lobo Bolivia ki lutinogi abic. Gipango ot rum acel mo ma dong oti woko kun wiye ton dok pe ki mac alektwic. Kabedo onongo pe romo lutino i cukul ma oweko Victor oyubo kom bedo ki nyare wek owiny pwony. Luoti myero guwot i bor piny me mairo abicel ka tongo yen tedo ki me lyeto pii amata. Carmen owaco ni, “Wape ki coron”. Dong “Pi meno omyero wawot i nam, ma kitiyo kwede me lwok ki bolo yugi. Lutinona gitwo kare ki kare.”

Francisco ki Ilídia gibedo i caro mo i lobo Mozambique. Lutinogi angwen gubwot ki i to; acel oto woko ki maleria i kare ma pe kigengo en i wi kitanda i ot yat. Luoti gipuro mucele ki layata i ngomgi matidi wek gunong cam ma romogi pi dwe adek. Francisco owaco ni: “Kare mukene kot bedo pe nyo lukwo kwalo cam man woko, pi meno atiyo cente manok kun atongo koo ci acato bot lugedo. Bene wagamo yen ki i bunga,  kun wawoto pi cawa aryo kulu. An ki dakona watingo wic acel acel, wic acel watedo kwede pi cabit acel ki acel wacato.”

Dano mapol gitamo ni gin mo tye marac ma pe tye atir i lobo-ni ma inongo dano 1 me 7 gikwo macalo Mbarushimana, Victor, ki Francisco, ento ki tungcel dano bilion mukene gitye ki twon lonyo ma lapore pe. Jo mukene gutemo miyo kony pi can man. Pwony ma lubu man binyutu tutegi kacel ki gen ma gitye kwede.

[Cal ma tye i pot karatac 3]

Carmen ki lutinone aryo gitye ka twomo pii ki i nam