Gin Gukuro Meciya

“Lwak onongo gitye ka kuro, kun gipenye ki i cwinygi pi Jon, ka en aye Meciya.”​—LUKA 3:15, THE EMPHATIC DIAGLOTT.

1. Lukwat mogo guwinyo lok ango ma lamalaika oloko?

 PINY onongo dong col. Lukwat onongo gitye i dye tim ka gwoko romigi i dyewor. Gubedo ki lworo i kare ma lamalaika pa Jehovah ocung cok kwedgi kun deyo pa Lubanga ryeny rumogi! Lamalaika-ni oloko ki yomcwiny ni, wuwiny!: “Pe wulwor, pien nen, akelliwu lok maber me yomcwiny ma bibedo bot dano ducu. Ginywalo piwu lalar, en Kricito Rwot,” ma bibedo Meciya. Lukwat-ti onongo gitwero nongo latin man tye obuto i weer pa dyang. Oyotoyot “lwak mony me polo” gucako pako Jehovah kun giwaco ni: “Deyo obed bot Lubanga malo i wi polo kuc obed i kin jo ma en pwoyo!”​—Luka 2:8-14.

2. “Meciya” tyen lokke ngo, dok kitwero ngeyo en nining?

² Ngene kene ni lukwata ma Lujudaya-ni onongo gingeyo ni tyen lok me “Meciya,” nyo “Kricito,” tye pi dano pa Lubanga, “Ngat ma Kiwiro.” (Nia 29:5-7) Ento i yo ango ma gitwero ngeyo kwede jami mapol dok gitito bot jo mukene ni latin ma malaika owaco-ni aye bibedo Meciya ma Jehovah ocimo? Meno twere ka gingiyo lok pa lunebi ma nonge i Ginacoya me leb Ibru kun giporo ki kwo kacel ki tic pa latin man.

Pingo Dano Onongo Gitye ka Kuro Meciya?

3, 4. Daniel 9:24, 25 ocobbe kakare nining?

³ I kare ma Jon Labatija obino i nge mwaki mogo, lokke ki ticce omiyo jo mogo gucako tamo ni Meciya nen calo dong oo woko. (Kwan Luka 3:15.) Man otwere pien jo mukene guniang maber lok pa lanebi i kom Meciya ma lubbe ki “mwaka miya angwen ki pyerabongwen.” Ka tye kumeno, ci romo bedo ni guromo ngeyo awene ma Meciya onongo bibino iye.  But lok pa lanebi-ni waco ni: “Nia i kare ma lok man cito kwede woko pi roco ki pi gero Jerucalem odoco, nio wa i bino pa dano ma giwiro ma en laker, bibedo mwaka pyerangwen wiye abongwen. Ci gang bibedo mwaka miya angwen ki pyeradek wiye angwen.” (Dan. 9:24, 25)

⁴ I kare-ni, lutic pa Jehovah gingeyo ni mwaka 49 ki mwaka 434 nyo 483, ma tye i Daniel 9:25 ocakke i 455 K.M.P. i kare ma Kabaka me Percia Aritakcec omiyo twero bot Nekemia me gero Jerucalem. (Nek. 2:1-8) Mwaki 483 ca ogik i mwaka 29 K.M., i kare ma kibatija Yecu me Najaret dok kiwire ki cwiny maleng ci odoko Meciya.​—Mat. 3:13-17. *

5. Lok mene pa lunebi ma wabinenogi?

⁵ Baibul tye ki lok mogo mapol ma lunebi guloko i kom Meciya. I pwony man wabineno mogo i kingi. Lok pa lunebi-ni tye ma lubbe ki nywalle, kare me tinone ki ditte, ki dong ticce me pwony. Wabipwonyo kit ma lok pa lunebi-ni gucobbe kwede i kwo pa Yecu. Man bijingo niyewa i kom Baibul dok bene nyutiwa ni Yecu aye Meciya ma dano gubedo ka kurone-ni.

Kitito pi Kare me Tinone

6. Tit kit ma Acakki 49:10 ocobbe kwede.

⁶ Kitito ni kibinywalo Meciya i kaka pa Juda me Icrael. I kare ma Yakobo tye ka miyo laa bot awobene ma en dong cok to, en owaco ni: “Odoo-ker pe bia ki bot Juda, tal-ker bene pe bia ki ka tyene, nio ka rwode kikome bibino; en aye rok ducu biworo doge.” (Acak. 49:10) Lukwan madongo ma gin Lujudaya onongo gitero ni Yakobo obedo ka lok i kom Meciya. Ento tyen lok me lok pa Yakobo-ni tye ningo? Wangeyo ni en onongo tye ka lok i kom kabaka pien odoo ker nyo tal-ker obedo odoo ma kabaka aye mako me nyuto ni en tye ki twero me loc. Pi meno, lok pa lanebi man nyuto ni kabaka, ma tye ki twero me locci, myero onongo oa ki i kaka pa Juda. I ngom kany, Kabaka me acel me Juda obedo Daudi, Jedekia obedo kabaka me agikkine. Ento lok pa Yakobo-ni onongo loko i kom kabaka ma biloc pi naka. Ma peya kinywalo Yecu, malaika Gabriel owaco ki Maliam ni: “Lubanga [Jehovah] bimiye komker pa kwarone Daudi. En biloyo jo me ot pa Yakobo matwal; kerre pe bigik.” (Luka 1:32, 33) Yecu oa ki i kaka pa Juda dok ki i dog ot pa Daudi. Yecu aye ngat ma oa ki i doggola pa Daudi ma Jehovah ocikke me miye twero me bedo kabaka. Dong Yecu Kricito aye myero obed ngat ma kiloko i kome i Acakki 49:10​—Mat. 1:1-3, 6; Luka 3:23, 31-34.

7. Kinywalo Meciya kwene, dok pingo man onongo pire tek?

⁷ Kitito ni kibinywalo Meciya i Beterekem. Lanebi Mika ocoyo ni: “In, Beterekem Eprata, in itidi pe iporre me bedo i kin kaka me Juda, dano ma bibedo laloc i Icrael bibino pi an kun a ki i in; acakki me binone obedo con, ma i kare macon mada.” (Mika 5:2) Kitito ni kibinywalo Meciya i boma me Beterekem i Juda, ka ma onongo yam kilwongo ni Eprata. Kadi bed Maliam min Yecu, ki Yucepu ma opito Yecu macalo latinne onongo gibedo i Najaret, cik pa Luroma me cone omiyo gucito i Beterekem, ka ma kinywalo iye Yecu i 2 K.M.P. (Mat. 2:1, 5, 6) Lok pa lanebi man ocobbe i wange nitap!

8, 9. Ngo ma kitito pire con i kom nywalo Meciya kacel ki jami mutimme ingeye lacen?

⁸ Kitito ni nyako mo ma peya ongeyo laco aye binywalo Meciya. (Kwan Icaya 7:14.) I Icaya 7:14, kiloko con ni “nyako mo ma  peya ongeyo laco” binywalo latin awobi. Kitiyo ki kit lok acel-lu i kom Labeka i kare ma en peya onyomme. (Acak. 24:16, 43) Pi teko pa cwiny maleng, Matayo otiyo ki lok me Grik ni “nyako mo ma peya ongeyo laco” (par·theʹnos) i kare ma tye ka nyuto ni Icaya 7:14 ocobbe ma lubbe ki nywalo Yecu. Matayo ki Luka ma gubedo luco Jiri guwaco ni Maliam onongo pe ngeyo laco i kare ma oyac pi teko pa cwiny pa Lubanga.​—Mat. 1:18-25; Luka 1:26-35.

⁹ Kibineko lutino i nge nywalo Meciya. Gin ma kit meno kong otimme con i cencwari mapol angec i kare ma Parao me Ejipt omiyo cik ni omyero kibol lutino co ma Luibru woko i Kulu Nail. (Nia 1:22) Ento tutwalle dong okati i Jeremia 31:15, 16, ka ma kiloko i kom Lakeri calo tye ka kok pi awobene ma kiterogi i ‘lobo pa lukworgi.’ Kokone owinye wa i Rama ma tye i bor piny, i kabedo pa jo Benjamin ma tye i kumalo me Jerucalem. Matayo onyuto ni lok pa Jeremia-ni ocobbe i kare ma Kabaka Kerode omiyo cik ni omyero kinek lutino co me Beterekem ki kabedo ma orumo ka ngete. (Kwan Matayo 2:16-18.) Kong igo twon kumu ma jo me kabedo meno gubedo kwede!

10. Tit kit ma Kocea 11:1 ocobbe kwede i kom Yecu.

¹⁰ Kibilwongo Meciya ki i Ejipt, calo jo Icrael. (Koc. 11:1) Ma peya Kerode omiyo cikke me nek, lamalaika mo owaco bot Yucepu gin ki Maliam ni gua woko ki i Icrael guter Yecu i Ejipt. Gubedo kunnu “nio ka Kerode oto. Lok man otimme wek lok ma yam Rwot oloko ocobbe kakare, ma yam oloko ki i dog lanebi ni, ‘Yam alwongo Woda nia ki i Ejipt.’” (Mat. 2:13-15) Ngene kene ni Yecu pe onongo romo yubo jami ma kitito pigi con-ni ma lubbe ki nywalene ki kwone i kare me tino.

Meciya Ocako Ticce me Pwony!

11. Kiyubo yo pi Ngat ma Jehovah Owiro nining?

¹¹ Kitito ni kibiyubo yo pi Ngat ma Lubanga Owiro. Malaki otito con ni “lanebi Elia” bitimo tic me loko cwiny dano me kuro bino pa Meciya. (Kwan Malaki 4:5, 6.) Yecu kikome onyuto ni “Elia” man obedo Jon Labatija. (Mat. 11:12-14) Marako bene onyuto ni tic me pwony pa Jon ocobo lok pa lanebi Icaya. (Ic. 40:3; Mar. 1:1-4) Yecu pe oyubo ni Jon ma okwongo kwo ki en-ni myero otim tic calo pa Elia. Tic pa “Elia” man ma kitito pire con-ni orwatte ki miti pa Lubanga me nyuto Meciya.

12. Tic ango ma okonyo dano me ngeyo Meciya?

¹² Tic ma Lubanga omiyo okonyo me nyuto Meciya. I ot me cokke i Najaret, ma obedo boma ma en odongo iye, Yecu okwano buk pa lanebi Icaya ci otiyo ki lokke i kome kekene ni: “Cwiny pa Rwot tye i koma, pien dong owira woko ki moo wek atit lok me kwena maber bot lucan. Oora me tito bot jo ma tye i opii ni gibigonyogi, ki bot jo ma wanggi oto ni gibiyabo wanggi, ki me gonyo jo ma giunogi wek gucit ki kuc, dok pi tito pi mwaka ma Rwot binyuto iye berre bot dano.” Kit ma en obedo Meciya-ni, Yecu onongo twero wacone kakare ni: “Tin ginacoya man ocobo kakare kun wuwinyo ki itwu.”​—Luka 4:16-21.

13. Kitito pi tic me pwony pa Yecu i Galilaya nining?

¹³ Kitito pi tic me pwony pa Meciya i Galilaya. Ma lubbe ki “lobo Jebulon ki lobo Naptali . . . Galilaya pa lurok,” Icaya ocoyo ni: “Jo ma yam gibedo i piny macol dong guneno dero ceng madit; ki jo ma yam bedo i lobo me mutu me piny macol licuc,  ceng dong oryeny omenyogi.” (Ic. 9:1, 2) Yecu ocako ticce me pwony ki i Galilaya, i boma ma kilwongo ni Kapernaum, en bene opwonyo i Jebulon ki Naptali ma omiyo dano mapol gunongo adwogi maber me dero ma en okelo botgi i yo me cwiny. (Mat. 4:12-16) Ki i Galilaya, Yecu omiyo pwonye madit me wi got, oyero lukwenane, otimo tangone mukwongo, dok nen calo en onen iye bot lukwenane ma giromo 500 i nge cerre. (Mat. 5:1–7:27; 28:16-20; Mar. 3:13, 14; Jon 2:8-11; 1 Kor. 15:6) En ocobo lok pa lanebi Icaya kun pwonyo i “lobo Jebulon ki lobo Naptali.” Man pe te lokke ni Yecu pe ocito ka tito kwena me Kerri i kabedo mukene i Icrael.

Kitito Con pi Tic Mukene pa Meciya

14. I yo ango ma Yecu omiyo Jabuli 78:2 ocobbe kwede?

¹⁴ Kitito ni Meciya bilok i carolok, nyo lapor. Acap ma ocoyo Jabuli owero ni: “Abiwaco botwu lok i carolok.” (Jab. 78:2) Wan watwero ngeyone nining ni lok pa lanebi-ni oloko i kom Yecu? Matayo wacciwa kumeno. I nge tito lapor ma Yecu oporo Ker pa Lubanga ki kodi karadali, Matayo owacci: “En pe obedo ka lok kwedgi lok mo labongo bolo carolok, wek omi lok ma yam lanebi oloko ocobbe kakare ni, ‘Abiwaco botwu lok i carolok, abitito botwu lok ma yam okanne woko cakke wa i acakki piny.’” (Mat. 13:31-35) Carolok obedo yo acel maber ma Yecu otiyo kwede me pwony.

15. Nyut kit ma Icaya 53:4 ocobbe kwede.

¹⁵ Gorowa kiketo i kom Meciya. Icaya otito con ni: “Adada, en ociro can piwa, otingo aremwa ducu i kome.” (Ic. 53:4) Matayo onyuto ni i nge cango maro pa Petero, Yecu ocango jo mukene wek “lok ma yam lanebi Icaya oloko ocobbe kakare ni, ‘En otingo gorowa, dok otingo twowa ducu i kome.’” (Mat. 8:14-17) Man obedo dano acel ki i kin mukene mapol ma Yecu ocango ma kicoyo lokke i Baibul.

16. Lakwena Jon onyuto ni Yecu omiyo Icaya 53:1 ocobbe nining?

¹⁶ Kitito ni kadi bed Meciya otim jami mabeco mapol, jo mapol pe gibiketo niyegi i kome. (Kwan Icaya 53:1.) Me nyuto ni lok pa lanebi man ocobbe, lakwena Jon ocoyo ni: “Kadi otiyo lanyut ma rom meno i nyimgi, pe guye en; wek lok pa lanebi Icaya ocobbe kakare, ni, ‘Rwot [Jehovah], anga ma oye lok ma watito? Dok anga ma Rwot onyuto tekone bote?’” (Jon 12:37, 38) Dok jo manok aye guye lok me kwena maber i kom Yecu, Meciya, i kare ma lakwena Paulo tye ka tiyo ticce me pwony.—Rom. 10:16, 17.

17. Jon onyutu ni Jabuli 69:4 ocobbe kakare nining?

¹⁷ Kitito ni kibidago Meciya labongo tyen lok mo. (Jab. 69:4) Lakwena Jon ocoyo gin ma Yecu owaco ni: “Kono yam pe atiyo i kingi tic ma dano mo mukene pe otiyo, kono pe gitye ki bal, ento koni dong guneno dok gukwero an ki Wora. Ento man otimme wek lok ma gicoyo i cik megi ocobbe kakare, ni, ‘Gikwera nono.’” (Jon 15:24, 25) Pol kare “Cik” cung pi Ginacoya ducu. (Jon 10:34; 12:34) Lok me Jiri nyuto ni kidago Yecu, tutwalle ludito dini pa Lujudaya aye dong gudage matek. Medo i kom meno, Kricito owaco ni: “Lobo pe twero kwerowu, ento okwero an, pien an atuco lok i kome, ni ticce ducu racu.”​—Jon 7:7.

18. Gin ango ma wabipwonyo ma bijingo niyewa ni Yecu aye Meciya?

¹⁸ Lupwonnye pa Yecu i cencwari me acel onongo gingeyo atir ni Yecu aye Meciya, pien en ocobo lok ducu ma lunebi guloko i kom Meciya i Ginacoya me leb  Ibru. (Mat. 16:16) Kit ma waneno kwede, lok pa lunebi mogo gucobbe i kom Yecu me Najaret i kare me tinone kacel ki ticce me pwony. Lok mukene pa lunebi madok i kom Meciya wabinenogi i pwony ma lubo man. Ka watamo matut i kom lok pa lunebi magi, ci wabibedo labongo akalakala ni Yecu Kricito aye Meciya ma Wonwa me polo Jehovah ocimo.

[Lok ma tye piny]

In Iromo Gamone Ningo?

• Lok mene pa lunebi ma gucobbe ma lubbe ki nywalo Yecu?

• Kiyubo yo pi bino pa Meciya nining?

• Lok mene ma nonge i Icaya cura 53 ma gucobbe i kom Yecu?

[Peny me Kwan]