Lutino Mono Myero Gupwony Lok i Kom Lubanga?

“Dano pe gitye ki ngec muromo i kom dini ma atir, man oweko pe gingeyo kit me nyutu mar bot luwotgi.”​—JONATHAN SWIFT, LACO BUK I LEB MUNO.

SWIFT ocoyo tam meno i cencwari me 18, ento dano mapol i kare-ni giye lokke meno. Ki lok ada, jo mukene gitamo ni lunyodo pe myero gubed ki twero me pwonyo lutinogi lok i kom Lubanga. Gitamo ni lutino ma gudongo i paco ma jone ludini pol kare gibedo lucan.

In itamo ningo? I kin tam ma gitye piny kany-nyi, mene aye opore?

● Pe myero kiye lunyodo gupwony lutinogi lok i kom Lubanga.

● Lunyodo myero gukur wang ma lutinogi gudongo ci gucak nyamo lok me dini kwedgi.

● Niye ma lunyodo gitye kwede i kom Lubanga aye myero gupwony ki lutinogi ka pud gitino. Ento ka lutinogi woto ki teggi, lunyodo myero gucuk cwinygi me niang i kom jami magi pigi kengi.

● Lutino myero gulub niye pa lunyodogi i kom Lubanga labongo penyone ka ce rac nyo ber.

Dini Mono Balo Lutino?

Pe tye lanyodo mo ma lamar ma mito ni latinne oballe. Ento tika lok magi cwako lok pa jo ma gimito gengo lutino wek pe gupwony lok i kom Lubanga? Pi mwaki mapol, lukwed lok gukwedo adada adwogi ma dini pa lunyodo kelo i kom lutino. Ngo ma lukwed lok magi gunongo?

Lukwed lok magi gunongo ni ma ka balo lutino, dini twero kelo adwogi mabeco i kwo pa lutino. I 2008, ripot ma kicoyo i buk me Social Science Research * waco ni: “Dini tye gin ma jingo wat i kin lunyodo ki lutino.” Ripot man bene waco ni: “Dini ki pwony i yo me cwiny nen calo obedo gin ma pire tek i kwo pa lutino mapol dok mitte wek jo me ot gubed ki wat i kingi.” Nen kong kit ma lok meno rwatte kwede ki gin ma Yecu owaco: “Gitye ki gum [yomcwiny] jo ma gingeyo ni gin lucan i lok me cwiny.”​—Matayo 5:3.

Tam man ni lutino myero kong guteggi ka dong gucak pwonyo lok i kom Lubanga ki dini kono? Jo ma gitamo kit meno gicayo ada man: Adam wi latin rom ki baket ma iye tye nono ma myero kiony iye jami. Lunyodo myero guyer me onyo jami i “ baket” meno ki paco ki cik ma igi lac kacel ki niye ma gitamo ni opore nyo giye lutinogi pwonyo jami ma giwinyo ki bot jo mukene.

Mung Ango ma Tye?

Dano gitwero tic ki tam me dini macalo yo me cako apokapoka ki adegadega. Dong, lunyodo gitwero gengo adwogi ma Jonathan Swift owaco ni nining? Gin gitwero pwonyo lutinogi ki niye ma konyogi me maro jo mukene nining?

Lunyodo gitwero nongo munge i lagam me lapeny adek magi: (1) Ngo ma myero lutino gupwony? (2) Anga ma myero opwony lutino? (3) Yo ango me pwony ma tiyo maber loyo?

[Lok ma tye piny]