In Tika Dong Kibwoli?

PE TYE jami mapol ma cwero cwinyi loyo niang ni ngat mo ma igeno adada obwoli. Lewic twero maki, cwinyi cwer, nyo itamo ni ngat meno pe genni. Bwola balo lirem, nyom; dok miyo dano rwenyo cente milion mapol ata.

Tam kong kit ma ibiwinyo kwede ka iniang ni kibwoli ki lok madok i kom Lubanga. Ka imaro lega, ci man twero gudo kwoni adada kit ma ogudo kwede kwo pa jo magi ma onongo gimaro wot i kanica:

● “Awinyo ki i cwinya ni kanica pe otito bota lok ada.”​—DEANNE.

● “Cwinya ocwer matek. Aniang ni kibwola ki diro—genna ki yubba gudoko gin ma konygi pe.”​—LUIS.

Iromo tamo ni pe twere wacel ni dong kibwoli ki lok madok i kom Lubanga. Jami ma ingeyo twero bedo ni dano mo ma i geno aye owacci dok en pe twero cwero cwinyi akaka​—twero bedo lanyodo ni, padi, lakwat, nyo laremi mo macok kwedi. Romo bedo ni pi kwoni ducu ibedo ka ye pwony moni. Ento, tika i ye ni kadi wa tam ma dano mapol giye romo bedo goba? Preciden macon me lobo Amerika Franklin D. Roosevelt oye lok man, en owacci: “Bedo ka nwoyo lok teretere pe weko lok goba moni doko lok ada.”

Ento in kono itwero ngeyone nining ni kibwoli? I nino mo acel, Yecu olego bot Lubanga ni: “Lokki en ada.” (Jon 17:17) Ada, Lok pa Lubanga, ma en aye Baibul-li, tye ki gin ma wamito wek wapok kin lok me ada ki lok goba.

Bibedo ber ka ikwano Baibul wek inge lok goba abic ma dano giwaco madok i kom Lubanga. Ibineno kit ma lok me ada biloko kwede kwoni wek obed maber.