Pi Nongo Kwo Ki Kuc, Lub Yo Pa Cwiny Maleng
Pi Nongo Kwo Ki Kuc, Lub Yo Pa Cwiny Maleng
‘Pe dong walubo kit me kom ma ginywalowa kwede, ento walubo yo pa cwiny maleng.’—ROM. 8:4.
1, 2. (a) Pingo rac tutwal pi ngat moni me dwoyo mutoka kun jami mukene dwoyo tamme? (b) Adwogi marac ango ma twero bino i yo me cwiny ka ce jami mukene dwoyo tam pa ngat moni?
“JAMI ma dwoyo tam pa dano ki i dwoyo mutoka tye ka medde ameda mwaka ki mwaka dok tye calo two.” Man aye gin ma karan me dipatmen ma loyo giwot i U.S. owaco. Cim cing tye i kin jami mapol ma dwoyo tam pa deribwa ki i kom gin acel keken ma myero en otim—dwoyo mutoka. Wel dano makato acel me adek ma kipenyogi i kwed mo ma kitimo guwaco ni mutoka oyokogi nyo oloyo kwedgi cwicwi pien deribwa onongo tye ka lok ki cim cing. Timo jami mukene kun i woto ki dwoyo mutoka nen calo gin maber, ento adwogine twero bedo rac atika.
2 Tye kumeno bene ma lubbe ki ber bedowa i yo me cwiny. Calo deribwa ma tye ka dwoyo mutoka kun jami mukene dwoyo tamme woko dok pe twero neno lanyut me awano-ni, ngat ma jami mukene dwoyo tamme woko i yo me cwiny twero poto i bal oyot. Ka ce waye ni jami mukene gudwo tamwa motmot ki i yo me kwowa macalo Lukricitayo ki dong ticwa me tiokraci, ci niyewa biballe woko. (1 Tem. 1:18, 19) Lakwena Paulo opwoyo wi Lukricitayo luwote ma i Roma i kom peko man ni: ‘Tam ma lubo kit pa dano kelo to, ento tam ma lubo kit pa cwiny maleng miyo kwo ki kuc.’ (Rom. 8:6) Ngo ma onongo Paulo tye ka wacone? Wan watwero gwokke ki i “tam ma lubo kit pa dano” ci waketo cwinywa i ‘tam ma lubo kit pa cwiny maleng’ nining?
“Pe Dok Gingolo Kop Loyo[gi]”
3, 4. (a) Paulo ocoyo pi lweny ango ma en obedo kwede? (b) Pingo omyero waket tamwa i kom atwom ma Paulo obedo iye-ni?
3 I waraga ma Paulo ocoyo bot Luroma, en oloko i kom atwom ma ebedo kwede i kome—lweny i kin tamme ki dong kom ma ginywale kwede. (Kwan Jo Roma 7:21-23.) Paulo onongo pe tye ka gengo ngeye nyo kica omake i kome kekene, pien ni bal dong obwoye woko tutwal. Ento en onongo tye Lakricitayo muteggi i yo me cwiny, ma kiwiro dok kiyero me bedo “lakwena bot Lorok.” (Rom. 1:1; 11:13, Baibol pa Katoli) Ci dong, pingo Paulo ocoyo lok i kom lweny ma ebedo kwede i kome-ni?
4 Paulo onongo tye ka waco ni en pe etwero timo miti pa Lubanga pire kene kit ma emito kwede. Pi tyen lok ango? En owaco ni pien “dano ducu gubalo, pe gio i kom deyo pa Lubanga.” (Rom. 3:23) Macalo lakwar Adam, Paulo onongo tye ki roc ma obino pi bal. Calo Paulo wan ducu watye ki roc dok wayelle ki atwom man nino ducu. Medo i kom meno, tye jami mapol ma twero dwoyo tamwa kun miyo wangak woko ki i ‘yo mading ma tero dano i kwo.’ (Mat. 7:14) Ento, tye gin mo ma okonyo Paulo dok bikonyowa bene.
5. Paulo onongo kony me bedo agonya kikwene?
5 Paulo ocoyo ni: “Anga ma bilara . . . ? Apwoyo Lubanga pi Yecu Kricito Rwotwa!” (Rom. 7:24, 25) Lacen en ocoyo bot jo ma “gibedo i Kricito Yecu”—Lukricitayo ma kiwirogi. (Kwan Jo Roma 8:1, 2.) Pi cwiny maleng, Jehovah oyerogi me bedo lutinone, olwongogi me nywako “lonyone kacel ki Kricito.” (Rom. 8:14-17) Cwiny pa Lubanga med ki niyegi i kom ginkok pa Kricito, konyogi me loyo atwom ma Paulo oloko iye-ni dok weko “pe dok gingolo kop loyo[gi].” Pi meno, kigonyogi woko dong ki “i te cik me bal ki to.”
6. Pingo myero lutic ducu pa Lubanga guniang lok pa Paulo-ni?
6 Kadi bed lok pa Paulo-ni onongo tye pi Lukricitayo ma kiwirogi, ento gin ma en owaco i kom cwiny pa Lubanga ki ginkok pa Kricito-ni tye me kony bot lutic ducu pa Jehovah labongo poko kwene ma gitye ki gen me kwo iye. Pien tira man Paulo ocoyo pi teko pa cwiny maleng bot Lukricitayo ma kiwirogi, mitte ni lutic ducu pa Lubanga guniang dok gutute me nongo adwogi maber ki iye.
Kit ma Lubanga “Ongolo Kop Oloyo Bal ma Tye i Komwa”
7, 8. (a) I yo ango ma kwowa ma ginywalowa kwede onongo oloko Cik “odoko goro”? (b) Gin ango ma Lubanga ocobo pi cwiny mere maleng kacel ki ginkok?
7 I cura me 7 i buk pa Jo Roma, Paulo oye ni bal tye ki teko i kom ma tye ki roc. I cura me 8, en oloko i kom teko pa cwiny maleng. Lakwena Paulo otito kit ma cwiny pa Lubanga twero konyo kwede Lukricitayo i tutegi me loyo teko me bal wek gukwo ma lubbe ki mitti pa Jehovah kun bene ginongo cwakke. Paulo onyuto ni pi cwiny pa Lubanga kacel ki ginkok pa Wode, Lubanga ocobo gin mo ma Cik pa Moses onongo pe twero timone.
8 Cik pa Moses, ma onongo tye iye cik matino tino mapol ata-ni, ongolo kop oloyo lubalo. Lulamdog pa jo Icrael ma gutiyo i kare me Cik pa Moses onongo gitye ki roc dok pe gitwero tyero gitum mupore kikome me jwayo balgi ducu. Pien kwowa ma ginywalowa kwede onongo oloko Cik “odoko goro.” Ento pi “ooro Wode kikome me bino i kit kom ma cal ki mewa” kun tyero macalo ginkok, Lubanga “ongolo kop oloyo bal ma tye i komwa ma ginywalowa kwede,” ci ocobo “gin ma onongo cik pe twero tiyo.” Macalo adwogine, Lukricitayo ma kiwirogi gikwanogi ni kitgi atir pi niyegi i kom ginkok pa Yecu. Dok kicuko cwinygi pe me ‘lubo kit me kom ma ginywalogi kwede, ento yo pa cwiny maleng.’ (Kwan Jo Roma 8:3, 4.) Ki lok ada, omyero gutim kit meno ki gen nio wa i to wek giminigi “tok me deyo me kwo.”—Yabo. 2:10.
9. Nyik lok ni “cik” ma kitiyo kwede i Jo Roma 8:2 te lokke ngo?
9 Medo i kom “Cik pa Moses,” Paulo oloko i kom cik mukene, ‘cik pa cwiny’ ki dong “cik me bal ki to.” (Rom. 8:2) Cik magi gubedo gin ango? Nyig lok ni “cik” ma kitiyo kwede kany-nyi pe obedo cik mogo calo ma gitye i Cik pa Moses-ni. Buk mo acel nyuto ni: “Nyig lok me Grik ma kigonyo ni cik-[ki] te lokke gonye ni jami mabeco ki maraco ma dano gitimo dok doro kit ma gikwo kwede. Nyik lok man bene cung pi gin ma moko kit me kwo pa ngat moni.”
10. I yo ango ma wan watye kwede i te cik me bal ki to?
10 Lakwena Paulo ocoyo ni: “Bal yam obino i lobo kun wok ki i dano acel, ka dong to obino pi bal, kit meno bene to onya oromo kin dano ducu, pien dano ducu gubalo.” (Rom. 5:12) Macalo likwayo pa Adam, wan ducu watye i te cik me bal ki to. Komwa me bal-li tiko diyowa me timo jami ma pe yomo cwiny Lubanga, man kelo to keken. I waragane bot jo Galatia, Paulo olwongo tim kacel ki jami ma kit meno ni “tic me kit pa dano.” Dok omedde ni: “Jo ma timo gin macalo magi, ker pa Lubanga pe bibedo megi.” (Gal. 5:19-21) Jo ma kit magi girom ki jo ma gilubo kit me kom ma ginywalogi kwede. (Rom. 8:4) ‘Roc ma gitye kwede aye doro gin ma myero gutim’ ki dong ‘kit me kwogi,’ ma lubbe ki kwo ma ginywalogi kwede. Ento mono jo ma gilubo kit me kom ma ginywalogi kwede keken aye gitimo bal madongo calo tim me tarwang, woro cal jogi, ki dong tim tyet? Pe kumeno, pien tic me kit pa dano kwako bene jami mogo ma jo mukene gitwero neno mere ni goro mamwa calo nyeko, kiniga, daa, ki laro dito. Nga ma twero waco ni etye agonya kun pe elubo kit me kom ma ginywale kwede?
11, 12. Yub ango ma Jehovah oketo me konyowa me a ki i te cik me bal ki to, dok ngo ma myero watim me nongo cwak pa Lubanga?
11 Cwinywa yom atika pien Jehovah oweko dong twere botwa me a woko ki i te cik me bal ki to! Yecu owaco ni: “Lubanga con omaro lobo kumeno, omiyo iye Wode acel keken, wek dano ducu ma ye en owek to, ento obed ki kwo ma pe tum.” Ka wajolo mar pa Lubanga dok bene waketo niyewa i kom ginkok pa Yecu Kricito, ci watwero loyo ngolo kop ma bino pi adwogi me bal alaka. (Jon 3:16-18) Calo Paulo, watwero wacone ki yomcwiny ni: “Apwoyo Lubanga pi Yecu Kricito Rwotwa!”
12 Peko ma watye iye-ni rom aroma ki nongo cang ki i two mo marac adada. Ka watye ki gen me cang, ci omyero watim gin ma dokto wacciwa ni watim. Kadi bed bedo ki niye i kom ginkok twero miyo wa a woko ki i te cik me bal ki to, wan pud watye ki kom me roc dok watimo bal. Jami mapol mitte wek wabed ki wat macok ki Lubanga kun wanongo cwakke. Ma lubbe ki cobo “gin ma cik mito,” Paulo bene oloko i kom lubu yo pa cwiny maleng.
Watwero Lubo Yo pa Cwiny Maleng Nining?
13. Lubo yo pa cwiny maleng te lokke ngo?
13 Ka walubo yo moni, te lokke ni wamedde anyim nio ka wao i kabedo ma wamito cito iye-ni. Pi meno, lubo yo pa cwiny maleng te lokke ni wamedde anyim ki dongo i yo me cwiny—ento pe te lokke ni pe dong watimo bal. (1 Tem. 4:15) Nino ducu omyero watute me lubo nyo kwo ma lubbe ki tela pa cwiny maleng. Ye ni ‘cwiny pa Lubanga otelwa’ miyo wanongo cwak pa Lubanga.—Gal. 5:16.
14. Jo ma gilubo “kit me kom ma ginywalowa kwede” giketo tamgi i kom gin ango?
14 I waragane ma ocoyo bot Luroma, Paulo oloko i kom kit dano aryo ma gitye ki tam mapat pat. (Kwan Jo Roma 8:5.) Kany kom ma ginywalowa kwede-ni pe en aye komwa ma nen-ni. I Baibul, lok ni “kom ma ginywalowa kwede” nyo “kit pa dano” kare mukene kitiyo kwede me nyutu kwowa me anywali ma tye ki roc dok ma miyo watimo bal. Man aye gin ma kelo lweny i kin tam ki komwa ma ginywalowa kwede ma Paulo oloko iye i Jo Roma cura 7. Ento ka iporo ki Paulo, jo ma gilubo “kit me kom ma ginywalowa kwede[-ni]” giketo tamgi i kom miti me komgi. Ma ka keto cwinygi i kom gin ma Lubanga mito ki botgi kun giye kony ma en omiyogi, gin “giketo tamgi bene i kom gin ma lubo kit pa dano.” Gin pol kare pe giketo tamgi me cobo miti me cwiny ento me kom keken. Ka iporogi ki jo ma gilubo ‘yo pa cwiny maleng,’ ma giketo tamgi i kom ‘jami me cwiny’—jami ma Jehovah miniwa i yo me cwiny medo ki worowa macalo Lukricitayo.
15, 16. (a) Keto tamwa i kom gin moni gudu kit ma wamoko ki tamwa nining? (b) Gin ango ma pol pa dano i kare-ni giketo iye tamgi?
15 Kwan Jo Roma 8:6. Gin mo keken ma wamito timone—kono ber nyo rac—omyero kong watam iye. Jo ma kare ducu gitamo pi jami ma lubbe ki kom ma ginywalowa kwede inge kare manok gicako keto tamgi i kom jami ma lubo kit pa dano. Tamgi, mitigi ki dong margi pol kare bedo i kom jami ma kit meno keken.
16 Jami ango ma pol pa dano i kare-ni gulungo wigi iye? Lakwena Jon ocoyo ni: “Gin ducu ma tye i lobo, macalo miti me komwa ma ginywalowa kwede, ki miti marac pi gin ma waneno ki wangwa, ki dok wakke ki jami ma watye kwede i kwowa, magi ducu pe gua ki bot Won, ento gucakke i lobo kany.” (1 Jon 2:16) Miti magi ducu kwako tim me tarwang, yenyo yweka, ki dong bedo ki jami mapol me kom. Bukke, magajin, gajeti akwana, vidio, TV, ki dong Intanet gupong ki jami ma kit magi, pien meno aye gin ma pol pa dano gimito dok giketo tamgi iye. Ento, “tam ma lubo kit pa dano kelo to” i yo me cwiny i kare-ni ka dong lacen wan komwa i kare me anyim. Pingo? Pien “tam ma giketo i kit pa dano ki tung bot Lubanga en kwor, pien pe winyo cik pa Lubanga, pe bene twero winyone. Jo ma gibedo kun gilubo kit pa dano pe gitwero yomo cwiny Lubanga.”—Rom. 8:7, 8.
17, 18. Wan watwero yenyo tam ma lubo kit pa cwiny maleng nining, dok adwogi ango ma wabinongo?
17 Kitungcel, ‘tam ma lubo kit pa cwiny maleng miyo kwo ki kuc’—kwo ma pe tum i kare me anyim ki dong kuc i cwinywa ki i kinwa ki Lubanga. Wan watwero yenyo ‘tam ma lubo kit pa cwiny maleng nining’? Ka ce kare ducu waketo tamwa kun wadongo mitiwa i kom jami me cwiny. Ka watimo man, ci waweko tam ma wamoko konywa me “winyo cik pa Lubanga” dok bene watimo jami ma ‘rwatte’ ki tamme. Ka ce warwatte ki atematema pe wabedo ki akalakala i kom gin ma myero walubi. Wanongo kony me moko tam maber—ma rwatte ki jami me cwiny.
18 Pi meno, mitte ni waket tamwa i kom jami me cwiny. Watimo kumeno ka ‘wayubbe i tamwa,’ kun watimo jami me cwiny calo lega kare ki kare, kwano Baibul ki dong kwan piwa, bedo tye i cokke, kacel ki tiyo ticwa me pwony. (1 Pet. 1:13) Ma ka weko jami me kom ma ginywalowa kwede odwo tamwa, waketo tam i kom jami me cwiny. Meno bikonyowa me lubo kit pa cwiny maleng. Timo meno bimiyo wanongo mot mapol, pien tam ma lubo kit pa cwiny maleng kelo kwo ki kuc.—Gal. 6:7, 8.
Tika Itwero Titone?
• Gin ango ma onongo “cik pe twero tiyone,” dok Lubanga ocobo gin meno nining?
• “Cik me bal ki to” obedo gin ango dok watwero loyo ki iye nining?
• Ngo ma myero watim wek wadong “tam ma lubo kit pa cwiny maleng”?
[Peny me Kwan]
[Cal ma tye i pot karatac 16]
In mono ilubo kit me kom ma ginywalowa kwede kece yo pa cwiny maleng?
