1, 2. Pingo pe omyero wakok i kom Jehovah pi pekki ma dano tye ka denone? Mi lapor.

 KET kong ni dong irii i nyomwu pi mwaki mapol. Ento nino mo acel idwogo paco ci inongo ni kibolo jami ducu ata. Jami calo kom ki meja kiturogi woko, kikobo, cawan ki atabo ducu kityerogi woko, kapet bene oyec ma konye pe. Paconi odoko calo kabedo ma peko ma poto atura otimme iye. Tika ibiwaco ni, “Pingo dakona otimo gin man?” Nyo kece ibipenyo ni, “Anga ma otimo gin ma kit man?” Labongo akalakala, lapeny me aryo-ni aye bibino i wi. Pingo? Pien ingeyo ni dakoni ma imaro adada-ni pe twero timo kodi tim man.

² I kare-ni, wolo kabedo murumowa, tim gero kacel ki tim tarwang gubalo lobo adada. Macalo lutino kwan me Baibul, wangeyo ni Jehovah aye pe okelo pekki magi ducu. En ocweyo loboni me bedo paradic mamwonya. (Acak. 2:8, 15) Jehovah obedo Lubanga ma lamar. (1 Jon 4:8) Kwano Baibul okonyowa me niang anga kikome ma tye ka kelo pekki mapol ma i lobo-ni. Man obedo Catan Larac-ci, “lalo lobo.”​—Jon 14:30; 2 Kor. 4:4.

3. Ngo ma twero dwoyo tamwa?

³ Ento, pe waromo kok i kom Catan pi pekki ducu ma watye ka denone i lobo-ni. Pingo? Pien i cawa mukene wakelo peko i komwa kekenwa. (Kwan Nwoyo Cik 32:4-6.) Kadi bed waye lok meno, ento roc ma watye kwede twero dwoyo tamwa ci weko wacako lubo yo ma terowa i bal. (Car. 14:12) I yo ango? Ma ka kok i komwa kekenwa nyo Catan pi peko moni, watwero cako kok i kom Jehovah. Ki bene waromo bedo ki ‘akemo i kom Jehovah.’​—Car. 19:3.

4, 5. Lakricitayo twero bedo ki ‘akemo i kom Jehovah’ nining?

 ⁴ Tika ada twere me bedo ki ‘akemo i kom Jehovah’? Ki lok ada, timo meno konye pe. (Ic. 41:11) Pe tye adwogi maber mo ma wanongo. Laco mo acel ma coyo lwod owaco ni: “Baddi cek ma pe itwero dongo Lubanga.” Pe waromo kok i kom Jehovah atir atir kun watuco ka maleng ki dogwa. Ento Carolok 19:3 waco ni mingo pa ngat moni aye ‘kelo can bote, ci akemo make i kom Jehovah ki i cwinye.’ Ada, akemo twero mako ngat moni i kom Lubanga ki i cwinye. Kodi cwiny ma kit man twero nen i yo mapat pat ma pe waniang. Ngat moni twero bedo ki kec cwiny i kom Jehovah. Macalo adwogine, ngat moni twero a woko ki i kacokke nyo kwero cwako yub me woro Jehovah ki cwinye ducu.

⁵ Ngo ma twero weko wacako bedo ki ‘akemo i kom Jehovah’? Watwero gwokke wek pe wapot i owic man nining? Pire tek ni myero wange lagam pi lapeny magi pien gigudo watwa ki Lubanga Jehovah!

6, 7. Pingo Luicrael gucako koko i kom Jehovah i kare pa Moses?

⁶ Ngo ma twero weko latic ma lagen pa Jehovah cako koko i kom Lubanga? Kong dong wanenu jami abic ki dong labol pa jo mogo i Baibul ma gupoto i owic man.​—1 Kor. 10:11, 12.

⁷ Lok maraco ma jo mukene giwaco twero gudowa. (Kwan Nwoyo Cik 1:26-28.) Onongo pud kilaro Luicrael alara ki i opii i lobo Ejipt. Jehovah ocwalo pwod apar i kom Ejipt ci oneko Parao kacel ki dul monnye i Nam Makwar. (Nia 12:29-32, 51; 14:29-31; Jab. 136:15) Jo pa Lubanga onongo dong gicok donyo i Lobo ma Kiciko Pire-ni. Man obedo kare ma pire tek adada botgi, ento gin dok gucako koko i kom Jehovah. Ngo mumiyo pe gunyuto niye? Lworo omakogi i nge winyo ripot marac ma jo mogo ma kiorogi ka roto piny gukelo. (Wel 14:1-4) Adwogine obedo ningo? Pe kiye ni yalwak meno gudony i “lobo maber.” (Nwo. 1:34, 35) Tika wan bene i kine mogo waweko lok marac ma jo mukene giwaco miyo niyewa doko goro ci wacako nguro i kom Jehovah pi kit ma en terowa kwede?

8. Ngo mumiyo Lujudaya gucako koko i kom Jehovah pi pekkigi i kare pa Icaya?

⁸ Peko ki kwo matek twero turo cwinywa. (Kwan Icaya 8:21, 22.) I kare pa Icaya, Lujudaya onongo gitye i kwo matek adada. Lumonegi onongo gurumogi woko. Cam onongo nok. Kec onongo neko jo mapol. Ento ma dong rac loyo, onongo tye kec me winyo lok pa Jehovah. (Amoc 8:11) Ma ka yenyo kony ki bot Jehovah wek gilweny ki pekki magi, gin ‘gucako ceno’ kabakagi kacel ki Lubanga. Ada, gukok i kom Jehovah pi pekkigi. Ka ce watye i peko, tika wan bene waromo wacone ki i cwinywa ni, ‘Jehovah onongo tye kwene i kare ma amito ni okonya?’

9. Pingo Luicrael gubedo ki neno marac i kare pa Ejekiel?

⁹ Pe wangeyo lok ada ducu. Pien onongo pe gingeyo lok ada ducu, jo Icrael i kare pa Ejekiel gutamo ni gin ma Jehovah tye ka “timone pe atir.” (Ejek. 18:29) Onongo rom aroma calo guile malo macalo lungol kop i wi Lubanga, kun gineno ni rwomgi me ngolo kop atir ber loyo pa Jehovah kadi bed ni ngecgi nok. Ka ce pe waniang maber  lok moni me Baibul nyo gin mumiyo jami mogo timme i kwowa, tika watamo ki i cwinywa ni Jehovah pe ngolo kop atir, nyo ni timo jami i yo ma “pe atir.”?​—Yubu 35:2.

10. Ngat moni twero lubo lanen marac pa Adam nining?

¹⁰ Wakok i kom jo mukene pi bal ma watimo. I poto me Eden, Adam okok i kom Lubanga pi balle (Acak. 3:12) Kadi bed ni Adam obalo akaka kun onongo ngeyo adwogi ma turo cik pa Lubanga bikelone, en pud okok i kom Jehovah. Man rom aroma calo en owaco ni Jehovah omiye dako ma kite rac. Nicakke i kare meno, jo mukene gulubo lanen pa Adam-mi kun gikok i kom Lubanga pi balgi. Ber ka wapenye kekenwa ni, ‘Tika cwercwiny pi bal ma atimo miyo acako koko i kom Jehovah?’

11. Pwony ango ma wanongo ki bot Yona?

¹¹ Waketo tamwa ducu i komwa. Lanebi Yona cwinye pe obedo yom ki tam ma Lubanga omoko ma lubbe ki Nineve. (Yon 4:1-3) Pingo? En onongo lworo ni dano gibicaye pien lokke ma lubbe ki jwero Nineve-ni pe ocobbe. Yona oweko tamo pire keken oumo kica ma onongo en myero onyut i kom jo Nineve ma gungut-ti. Tika wan bene watwero cako tamo piwa kekenwa ci wamako ‘akemo i kom Jehovah’ pien en peya okelo agikki piny? Ka ce wabedo ka tito kwena pi mwaki mapol ni nino pa Jehovah dong onyiko cok, tika cwinywa cwer i kom Jehovah ka jo mukene gingalowa pi tito gin ma Baibul pwonyo?​—2 Pet. 3:3, 4, 9.

12, 13. Ngo ma myero watim ka wacako bedo ki akalakala i cwinywa i kom jami ma Jehovah otimo?

¹² Ngo ma watwero timone ka wacako bedo ki akalakala i cwinywa i kom jami ma Jehovah otimo? Wi opo ni meno pe nyuto ryeko. Baibul mukene gonyo Carolok 19:3 ni: “Ngat aming  ka opoto i peko pi timmere me mingo, cako koko-nono i kom Rwot [Jehovah].” (Baibul me leb Lango) Pi meno, kong dong wanenu jami abic ma gitwero konyowa wek cwercwiny pe omi wakok i kom Jehovah ka kwo odoko tek.

¹³ Pe iter watti ki Jehovah calo gin me tuko. Watwero gwokke ki mako akemo i kom Lubanga ka wabedo ki wat macok kwede. (Kwan Carolok 3:5, 6.) Omyero wagen Jehovah. Pire tek bene ni pe wabed ka tamo kekenwa ni waryek nyo keto tamwa ducu i komwa. (Car. 3:7; Latit. 7:16) Ka watimo kumeno, ci pe wabikok i kom Jehovah pi jami maraco ma timme.

14, 15. Ngo ma bikonyowa wek lok pa jo mukene pe obal cwinywa?

¹⁴ Pe iwek lok maraco obal cwinyi. Luicrael i kare pa Moses onongo gitye ki tyen lok mapol me ye ni Jehovah biterogi i Lobo ma Kiciko Pire-ni. (Jab. 78:43-53) Ento ka guwinyo ripot marac ma lurot piny apar-ri gukelo, “wigi owil woko i kom twerone.” (Jab. 78:42) Ka walwodo lok i kom jami ma Jehovah otimo, kun wapo i kom jami mabeco ma en otimo piwa, ci wabijingo watwa kwede. Macalo adwogine, pe wabiye ni tam maraco pa jo mukene opok kinwa ki Jehovah.​—Jab. 77:11, 12.

¹⁵ Ka wabedo ki cwiny marac i kom luye luwotwa kono? Ka ce tye kumeno, ci man bigudo watwa ki Jehovah. (1 Jon 4:20) I kare ma Luicrael gunguro i kom Aron pi tic ma kicime ni otim, Jehovah oneno calo gitye ka nguro i kome. (Wel  17:10) I yo acel-lu, ka wacako nguro i kom jo ma Jehovah tye ka tic kwedgi me telo but dulle ma i lobo, ci nongo rom aroma ma watye ka nguro i kome.​—Ibru 13:7.

16, 17. Wiwa myero opo i kom gin ango ka watye i peko?

¹⁶ Wi opo ni Jehovah aye pe keliwa peko. Kadi bed ni Luicrael i kare pa Icaya onongo pe gilubo cik pa Jehovah, En pud onongo mito konyogi. (Ic. 1:16-19) Kadi bed ni watye i peko ma rom mene, ngeyo ni Jehovah paro piwa dok mito konyowa kweyo cwinywa. (1 Pet. 5:7) Ki lok ada, en ocikke me miniwa teko wek wamedde ki ciro peko.​—1 Kor. 10:13.

¹⁷ Ka watye ka deno can nono pi gin ma pe watimo​—kit ma otimme kwede i kom Yubu-ni​—omyero wiwa opo ni Jehovah aye nongo pe okelo can meno. Jehovah dag ngolokop alenga; en maro kit ma atir. (Jab. 33:5) Calo Eliu, waye ni: “Lubanga pe twero timo gin marac kadi ki acel. Won Twer Ducu pe timo gin mo ma pe tye atir.” (Yubu 34:10) Ma ka keliwa peko, Jehovah miniwa “kit gin mo ducu maber, ki mot ducu mabeco.”​—Yak. 1:13, 17.

18, 19. Pingo pe omyero wabed ki akalakala i kom Jehovah? Mi lapor.

¹⁸ Pe ibed ki akalakala i kom Jehovah. Lubanga pe ki roc mo, dok tamme bene tye malo kato megwa. (Ic. 55:8, 9) Pi meno, cwiny me mwolo myero okonywa me ye ni pe waniang jami ducu. (Rom. 9:20) Pol kare pe wangeyo jami ducu madok i kom lok moni. Labongo akalakala, in bene imoko lok ma tye i carolok man: “Dano ma kwongo tito lok i lukiko nen calo lokke tye atir, nio ka lawote ma gipido kwede openye ki peny madwong.”​—Car. 18:17.

¹⁹ Ka watye ki larem mo ma wageno ma otimo gin mo ma pe waniang i acakkine nyo kelo peny i wiwa, tika wabirune me kok i kome ni otimo bal? Nyo kece wabigene, tutwalle ka watye  ki ngec i kome pi mwaki mapol? Ka ce watero luremwa ma gitye ki roc-ci i yo me mar, ci omyero wagen Wonwa me polo makato, kit macalo yone ki tamme kato mewa-ni!

20, 21. Pingo omyero wange ka ma peko ma watye ka denone-ni a ki iye?

²⁰ Nge ka ma peko ma itye ka denone-ni a ki iye. Pingo omyero watim man? I cawa mukene nongo wan aye wakelo peko i komwa. Ka wan aye wakelo peko i komwa, omyero pe wakwer. (Gal. 6:7) Pe itemme me kok i kom Jehovah pi pekoni. Pingo pe nyuto ryeko me timo meno? Nen kong lapor man: Mutoka moni twero bedo ki kero me ngwec i cipid adada. Go kong ni ladwor motoka-ni ongweco i cipid ma cik pe ye i yo ma tye ki kona ci en onongo awano marac. Tika pore me kok i kom layub mutoka-ni pi awano mutimme-ni? Pe wacel! I yo acel-lu, Jehovah ocweyowa ki kero me moko tamwa piwa kenwa. Ento en ominiwa cik me konyowa wek wamok tam me ryeko. Pi meno pe tye tyen lok mo me kok i kom Lacwecwa pi balwa.

²¹ Ki lok ada, pekkiwa ducu pe gitye macalo adwogi me bal ma watimo. Jami mukene gitimme macalo adwogi me “kare kacel ki jami ma gitimme atura.” (Latit. 9:11, NW) Ento, wiwa pe myero owil ni Catan Larac-ci aye kelo peko mapol loyo. (1 Jon 5:19; Yabo 12:9) En aye lamonewa​—pe Jehovah!​—1 Pet. 5:8.

22, 23. Wiwa myero opo i kom gin ango ka cwinywa otur pi pekkiwa?

²² Ka ce itye ka wok ki i kwo matek, wi opo i kom lanen pa Yocwa gin ki Kaleb. Co aryo magi pe gubedo calo lurot piny apar-ri pien gin gukelo ripot maber. (Wel 14:6-9) Gin gunyuto niye i kom Jehovah. Kadi bed kumeno, gin bene gulak i dye tim pi mwaka 40 kacel ki Luicrael mukene-ni. Tika Yocwa gin ki Kaleb gunguro nyo gubedo ki kec cwiny, kun gitamo ni kitye ka pwodogi nono? Pe. Gin gugeno Jehovah. Tika Jehovah ogoyo laa i komgi? Eyo! Kadi bed ni yalwak meno ducu guto i dye tim, co aryo magi gudonyo i Lobo ma Kiciko Pire-ni. (Wel 14:30) I yo acel-lu, Jehovah bigoyo laa i komwa ka pe “waol” woko i timo mitine.​—Gal. 6:9; Ibru 6:10.

²³ Ka ce cwinyi otur pi peko moni, pi roc pa jo mukene, nyo pi roc ma itye kwede, omyero itim ngo? Lwod lok i kom kit mamwonya pa Jehovah. Tam i kom gen ma Jehovah omini. Penye kekeni ni, ‘Ka pe pi Jehovah, onongo kono atye kwene?’ Bed cok kwede, dok pe iwek akemo omaki ki i cwinyi i kome!