1. Pwony macalo mene ma jo pa Lubanga ginyamo kare ki kare, dok adwogi maber ango ma wanongo?

 KA ITYE ka yubo Wi Lubele ma kibinyamo i cokke, tika dong ipenye kekeni ni, ‘Pwony man mono pe dong wanyamo i kare mukato angec?’ Ka ce ibedo ka wot i cokke pi kare malac, nen calo dong ineno ni pwony mogo kinyamogi kare ki kare. Pwony madok i kom Ker pa Lubanga, ginkok, tic me tito kwena, ki dong kit mogo calo mar ki niye kimaro nyamogi. Nyamo pwony magi kare ki kare konyowa wek wacung matek i niye ki bene wek ‘waket gin ma giloko i tic, ento pe wawiny awinya keken.’​—Yak. 1:22.

2. (a) Nyig lok me leb Ibru ma gonye ni “poyo wic-ci” pol kare te lokke ngo? (b) Cik pa Lubanga pat ki pa dano i yo ma nining?

² Nyig lok me leb Ibru ma gonye ni “poyo wic-ci” te lokke ni gin ma Lubanga “ociko” nyo tira ma en miyo bot jone. Cik pa Jehovah genne kare ducu ka iporo ki cik pa dano ma ki bedo ka lokone kare ki kare-ni. Kadi bed ni cik mogo kimiyo pi kare moni nyo pi tyen lok moni i kare mukato angec, cik magi pud gikonyowa i kare-ni bene. Laco jabuli owaco ni: ‘Lok me poyo wic ma Jehovah miniwa tye atir dok bedo nakanaka.’​—Jab. 119:144.

3, 4. (a) Cik ma Jehovah omiyo bot Luicrael kwako lok mene? (b) Adwogi maber ango ma Luicrael onongo gibinongo ka gulubo cik magi?

³ Oromo bedo ni dong iniang ni cik pa Lubanga i kine mukene kwako lok me ciko dano. Jehovah obedo ka ciko rok me Icrael kare ki kare kun tiyo ki lunebine. Me labolle, i kare ma Luicrael gicok donyo i Lobo ma Kiciko Pire-ni, Moses ocikogi ni: “Wugwokke wek pe gibwolwu, miyo wulokke wubarre woko, wutiyo bot lwak lubanga mukene, wuworogi bene, miyo kiniga mako Rwot [Jehovah] i komwu.”  (Nwo. 11:16, 17) Baibul tito ni Lubanga ociko jone tyen mapol wek okonygi.

⁴ Tyen mapol, Jehovah ocuko cwiny Luicrael me lwore, winyo doge, ki dong lonyo nyinge. (Nwo. 4:29-31; 5:28, 29) Ka onongo gulubo cik magi, kono gunongo mot mapol.​—Levi 26:3-6; Nwo. 28:1-4.

5. Pingo Jehovah olwenyo pi Kabaka Kejekia?

⁵ I kare ducu ma piny odiyo Luicrael, Lubanga obedo ka cobo cikkene. Me lapore, i kare ma Cenakerib, Kabaka me Aciria obino ka lweny i kom Juda kun miyo bura ni ebituro ker pa Kabaka Kejekia, Jehovah ooro lamalaika. I dyewor acel keken, lamalaika pa Lubanga otyeko “twoni oteka lweny” me dul mony pa Aciria. Man oweko Cenakerib odok paco ki lewic madit adada. (2 Tekwaro 32:21; 2 Luker 19:35) Pingo Lubanga olwenyo pi Kabaka Kejekia? Pien en “omoko i kom Rwot matek; pe obwoto lubo kor Rwot [Jehovah], ento obedo ka lubo cik ducu.”​—2 Luker 18:1, 5, 6.

6. Kabaka Yocia oketo genne i kom Jehovah nining?

⁶ Labol mukene pa ngat ma olubo cik pa Jehovah aye Kabaka Yocia. I kare ma en tye ki mwaka aboro keken, “Yocia obedo ka tiyo gin ma nen atir i wang Rwot [Jehovah] . . . Pe obedo ka cabbe yo tung acuc nyo yo tung acam.” (2 Tekwaro 34:1, 2) Yocia onyuto ni egeno Jehovah kun jwero cal lubanga ducu dok bene oroco woro me ada. I timo meno, Yocia kacel ki rok me Icrael gunongo mot.​—Kwan 2 Tekwaro 34:31-33.

7. Gin ango ma onongo timme ka Luicrael pe gulubo cik pa Jehovah?

⁷ Ento, tye me cwercwiny ni jo pa Lubanga pe guketo gengi i kom cik pa Jehovah kare ducu. Pi cencwari mapol, gin i kine mukene onongo giwinyo dog Jehovah ento i kine mogo onongo pe giwinyo. Ka niyegi odoko goro, pol kare onongo giweko “yamo me pwony mapatpat wirogi dwokogi tungi ki tungi.” (Ep. 4:13, 14) Kit ma kitito kwede, gin onongo gicamo anywargi ka pe guketo gengi i kom cik pa Lubanga.​—Levi 26:23-25; Jer. 5:23-25.

8. Pwony ango ma wanongo ki i lanen pa Luicrael?

⁸ Pwony ango ma wanongo ki i lanen pa Luicrael? Lutic pa Lubanga i kareni bene ginongo tira ki pwod. (2 Pet. 1:12) Lok pa Lubanga twero poyo wiwa kare  ducu ka wakwano. Kit macalo watye agonya me moko tamwa piwa kenwa-ni, waromo yero me lubo tira pa Jehovah nyo timo gin ma waneno ni ber i wangwa. (Car. 14:12) Kong dong wanenu tyen lok mogo mumiyo watwero keto genwa i kom cik pa Jehovah ki kit ma watwero nongo adwogi maber ki i lubogi.

9. I kare ma Luicrael gitye i dye tim, Jehovah onyuto atir ni etye ka konyogi nining?

⁹ I kare ma Luicrael gucako wotgi ma otero mwaki 40 i ‘dye tim malac ki malik-ki’, Jehovah pe owaccigi kore ki kore kit ma ebitelogi ki dok ebigwokogi kwede. Ento, onyuto teretere ni gitwero geno en ki cikke bene. I kare ma gitye i dye tim malik-ki, Jehovah obedo ka telo wi Luicrael ki wir nyo pagi me pol wek epo wigi ni etye ka konyogi. (Nwo. 1:19; Nia 40:36-38) En bene omiyo botgi jami ma mitte me kom. “Bongngigi yam pe guti guyec woko ducu, ki tyengi bene yam pe okwot.” Ki lok ada, onongo gitye ki “gin ducu ma gin mito.”​—Nek. 9:19-21.

10. Jehovah tye ka telo jone i kareni nining?

¹⁰ Lutic pa Lubanga i kare-ni bene dong gicok donyo i lobo manyen ka ma kit ma atir bedo iye. Tika waketo gen i kom Jehovah ni en biminiwa jami ma wamito wek wabwot ki i ‘twon can madit atika-ni’? (Mat. 24:21, 22; Jab. 119:40, 41) Ada, i kareni Jehovah pe tye ka tic ki wir me pol nyo me mac me telowa i lobo manyen. Ento en tye ka tic ki dulle me konyowa wek wabed ma wangwa twolo i yo me cwiny. Me lapore, kibedo ka nwoyone teretere ni myero wakwan Baibul piwa kenwa, wabed ki otyeno me Woro pi Jo me Ot, wabed tye i cokke kare ki kare, ki bene wawot i ticwa me pwony wek wamedde ki dongo niyewa. Tika dong watimo alokaloka wek wacob jami magi? Timo man bikonyowa me bedo ki niye matek wek wadony i lobo manyen.

11. I yo macalo mene ma Lubanga nyuto ni eparo piwa?

¹¹ Medo i kom konyowa me bedo ma wangwa twolo i yo me cwiny, tira ma kiminiwa konyowa me moko tam maber ma lubbe ki kwowa me nino ducu. Man kwako bedo ki neno mupore ma lubbe ki jami me kom ki dong bedo ki wang ma pe wor wek pe wabed ki par mapol. Wanongo bene adwogi maber ma a ki i tira ma loko i kom rukwa ki kit ma wanen kwede, galowang ma myero wayer, ki dong moko tam i lok me kwan. Ki bene, tam i kom lok me poyo wic ma wanongo ma lubbe ki kit ma watwero gwokke kwede wek pe wanong awano i gangiwa, Odi me Ker, ka watye ka dwoyo mutoka, ki dong yubbe con pi awano ma bino atura. Tira ma kit meno nyuto ni Lubanga paro pi ber bedowa.

12. (a) Yecu oloko teretere bot lupwonnyene i kom gin ango? (b) Tic ango me mwolo ma omoko liking i wi Petero, dok omyero ogudwa nining?

¹² I cencwari me acel, ki bedo ka poyo wi jo pa Lubanga kare ki kare. Yecu oloko teretere bot lupwonnyene i kom gin mumiyo pire tek me dongo cwiny me mwolo. Ento, en pe otito mere atita bot lupwonnyene te lok me bedo ngat ma mwol​—en onyuto man i tic. I dyewor ma peya kineko Yecu, en kacel ki lukwenane onongo gucokke kacel ka kwero nino me Kato. I kare ma lukwenane gitye ka cam, Yecu oa malo ki i dog cam ci ocako lwoko tyengi​—tic ma pol kare opii aye onongo timo. (Jon 13:1-17) Tic man me  mwolo ma Yecu otimo-ni omoko i wigi liking. I nge mwaki ma romo 30, lakwena Petero, ma onongo tye i dog cam i dyewor meno omiyo bot luye luwote tira madok i kom mwolo. (1 Pet. 5:5) Lanen pa Yecu-ni omyero ocuk cwinywa me nyuto mwolo i yo ma watero kwede luwotwa.​—Pil. 2:5-8.

13. Yecu opoyo wi lupwonnyene ni myero gudong kit ango ma pire tek?

¹³ Yecu bene onyamo lok teretere ki lupwonnyene i kom gin mumiyo pire tek me bedo ki niye matek. I kare ma ryemo cen ki i kom awobi mo oloyogi, lupwonnye gupenyo Yecu ni: “Gin ango mugengowa ryemone?” Yecu odok iye ni: “Pien niyewu nok. Pien ada, awacciwu ni, ka ce niyewu obedo calo nyig kodi karadali, . . . ci gin mo pe biloyowu.” (Mat. 17:14-20) I ticce me pwony lung, Yecu opwonyo lupwonyene ni niye tye kit ma pire tek adada. (Kwan Matayo 21:18-22.) Tika watye ka tic ki kare ma watye kwede i yo maber wek ojing niyewa kun watiyo ki tira ma kiminiwa i gure madit, gure me adwol ki me nino acel kacel ki cokke pa Lukricitayo? Gure magi pe gubedo kare me yomcwiny keken ento kare me nyuto ni wageno Jehovah.

14. Pingo pire tek ni wadong mar calo pa Kricito i kareni?

¹⁴ Ginacoya me Leb Grik opong ki lok ma poyo wiwa wek wanyut mar bot jo mukene. Yecu owacci cik me aryo ma pire tek loyo en aye ni “mar lawoti macalo imarre keni.” (Mat. 22:39) I yo acel-li, Yakobo, omin Yecu, owacci mar aye “cik” ma pire tek loyo. (Yak. 2:8) Lakwena Jon ocoyo ni: “Lurema, an pe atye ka coyo botwu cik mo manyen, ento cik macon ma yam watye kwede wa con nia i acakki piny.” (1 Jon 2:7, 8) Gin ango ma onongo Jon tye ka lok iye i kom “cik macon”? En onongo tye ka lok i kom cik me mar. Onongo obedo “cik macon” pien Yecu otito pire wacon i “acakki piny.” Ento onongo bene ‘nyen’ i yo ni mito cwiny me jalle ken, ma lupwonnyene onongo myero gudong pien gin onongo gibirwatte ki jami mapol i kwogi. Macalo lupwonnye pa Kricito, tika watye ki pwoc ni kitye ka cikowa me gwokke wek pe wabed ki cwiny marac me lobo-ni, ma romo rwenyo mar ma watye kwede pi luwotwa?

15. Tic ango ma pire tek loyo ma Yecu obino ka timone i lobo?

¹⁵ Yecu onongo paro pi dano ducu. Cwiny me mar man onen i kare ma en ocango jo ma komgi lit ki dok ocero jo muto. Ento, cango dano aye pe obedo gin ma pire tek ma Yecu obino ka timone  i lobo. Ticce me tito kwena ki pwony-nyi aye okonyo dano loyo. I yo mene? Me lapore, wangeyo ni jo ma Yecu ocangogi ki bene ocerogi i cencwari me acel-li lacen guti ci guto woko, ento jo ma gujolo lokke gibinongo kwo ma pe tum.​—Jon 11:25, 26.

16. Tic man me tito kwena ki loko dano me doko lupwonnye-ni rwomme tye lakwene i kareni?

¹⁶ Tic me tito kwena ma Yecu ocako i cencwari me acel-li, kitye ka timone i twok lobo ducu i kare-ni. Yecu ociko lupwonnyene ni: “Pi meno dong wuciti wucilok jo me rok ducu.” (Mat. 28:19) Ki lok ada, gin gutito kwena dok wan bene i kare-ni watye ka timone! Cokcok Lucaden pa Jehovah makato milion abiro kulu gitye ka tito pi kwena me Ker-ri ki mit kom i lobbe makato 230, dok Lucaden magi gikwano Baibul ki dano milion mapol ata. Tic man me tito kwena-ni moko atir ni watye ka kwo i kare me agikki.

17. Tira ango ma Paulo ki Petero gumiyo?

¹⁷ Nen ka maleng ni lok me poyo wic okonyo Lukricitayo i kare macon me cung matek i niye. Me lapore, i kare ma Paulo onongo tye i buc i Roma, en owaco bot Temceo ni: “Lanenni me aluba myero obed lok me ada ma yam iwinyo ki bota,” lok man pud dong ocuko cwinye ya! (2 Tem. 1:13) I nge cuko cwiny Lukricitayo luwote ni gudong kit mogo calo diyo cwiny, mar me omego, ki cwiny me gwokke ken, lakwena Petero owacci: “Kare ducu amito poyo wiwu i lok magi, kadi bed wungeyogi, dok bene wumako matek liking lok ada.”​—2 Pet. 1:5-8, 12.

18. Lukricitayo me cencwari me acel onongo gitero lok me poyo wic nining?

¹⁸ Ki lok ada, waraga ma Paulo ki Petero gucoyo-ni onongo tye iye “lok ma lunebi maleng yam guloko con.” (2 Pet. 3:2) Tika Lukricitayo me cencwari me acel gukwero winyo tira ma kit meno? Pe, man onongo nyuto mar pa Lubanga pigi ma okonyogi me ‘dongo i kica pa Rwotwa, ma en Lalarwa Yecu Kricito, kun gimedde ki nongo ngec i kome bene.’​—2 Pet. 3:18.

19, 20. Pingo myero wabed ki gen i kom lok me poyo wic ma a ki bot Jehovah, ki dok watwero nongo adwogi maber ki iye nining?

¹⁹ I kareni, watye ki tyen lok mucwiny me keto genwa i kom lok me poyo wic ma a ki bot Jehovah, ma ginonge i Baibul. (Kwan Yocwa 23:14.) I Baibul wanongo iye kit ma Lubanga obedo ka tic kwede ki dano ma gitye ki roc pi mwaki mapol mukato angec. Jami magi ducu kicoyogi wek wanong adwogi maber. (Rom. 15:4; 1 Kor. 10:11) Waneno cobbe pa lok pa lunebi ma kicoyogi i Baibul-li. Lok pa lunebi kitwero porone ki lok me poyo wic ma kitito pire wacon. Me lapore, dano milion mapol ata gitye ka jolo woro me ada, kit ma lunebi gutito kwede ni bitimme “i kare ma pud tye anyim.” (Ic. 2:2, 3) Balle pa lobo i kareni tye ka cobo lok pa lunebi me Baibul. Kit ma kitito kwede con, tic me tito kwena ma tye ka timme i twok lobo ducu-ni, tye ka cobo lok ma Yecu owaco wacon.​—Mat. 24:14.

²⁰ Pi mwaki mapol, Lacwecwa otimo jami mapol ma weko watwero keto genwa ducu i kome. Tika watye ka nongo adwogi maber ki iye? Myero wabed ki gen i kom lokke me poyo wiwa. Meno aye gin ma Rosellen otimo. En owacci: “I kare ma acako keto genna ducu i kom Jehovah, acako neno ka maleng kit ma en gwoka dok jingo cwinya kwede.” Wan bene myero wanong adwogi maber ki i lok me poyo wic ma a ki bot Jehovah.