Ma peya Yecu Kricito odok i polo i mwaka 33 K.M., en ocikke ni ebidwogo. En opore kekene macalo wod ker ma kong ocito i lobo mabor pi kare malac, ci odwogo ki twero me loc. Yecu bidwogo wek ekel loc maber.​—Kwan Luka 19:11, 12.

Kricito mono bidwogo nining? Kicere ki kom me cwiny. (1 Petero 3:18) Lacen, en odok i polo ci obedo tung acuc pa Lubanga. (Jabuli 110:1) I nge mwaki mapol, kikelo Yecu inyim Lubanga Jehovah, “Ngat ma yam okwongo bedo kwo con-ni,” ma omiyo twero bot Yecu me loyo dano ducu. Pi meno, Yecu pe bidwogo macalo dano adana ento macalo Kabaka ma pe nen.​—Kwan Daniel 7:13, 14.

Ka Yecu odwogo kacel ki lumalaikane ma nongo pe ginen, en bingolo kop i kom rok ducu. En bijwero jo maraco ducu ento miyo kwo ma pe tum bot jo ma jolo en macalo Kabaka.​—Kwan Matayo 25:31-33, 46.

Ka Yecu tye Kabaka, locce biloko lobo doko paradic. En bicero jo muto wek gunong mit pa kwo i lobo meno ma bidoko paradic-ci.—Kwan Luka 23:42, 43.