Wang Baibul man tye i kin ginacoya ma pud dong gingene loyo ma kimaro tic kwedgi. Kiwaco ni pe tye ginacoya mo maber kato man ma “tito pi wat ma tye i kin Lubanga ki dano ki dong yo me nongo larre.” Pi tyen lok man, i lobbe mogo kitiyo ki wang ginacoya man, nyo kiketo “Jon 3:16” keken dok pol kare kimwono ka ma dano gure iye, i kom mutoka, nyo bene i kom jami mukene.

Jo ma gitiyo ki tyeng man gitye ki gen ni mar ma Lubanga tye kwede-ni moko ni wang ma dong ginongo kwo ma pe tum. Ento in kono? Pingo mar pa Lubanga pire tek boti? Itamo ni Lubanga otimo gin ango me nyuto marre piri?

Jo mapol gipwoyo Lubanga pi cweyo dano, jami ma i dan polo, ki dong lobo. Jami makwo tye mapol ata dok kicweyogi i yo me aura ma weko waye ni tye ngat mo maryek ma ocweyogi. Dano mapol gipwoyo Lubanga nino ducu pi minigi kwo. Gin bene gingeyo ni gijenge i kom Lubanga pi jami ducu ma mitte me kwo​—jami magi kwako yamo, pii, cam, ki dong mukene wek gimedde ki kwo dok ginong yomcwiny i ticgi.

Bedo ber ka wapwoyo Lubanga pi jami magi ducu, pien en aye ngat Mucweyowa ki dok Gwokowa. (Jabuli 104:10-28; 145:15, 16; Tic pa Lukwena 4:24) Wabedo ki pwoc pi mar ma Lubanga tye kwede piwa ka watamo i kom jami ma en tye ka timogi wek wamedde ki kwo. Lakwena Paulo ocoyo ni, “[Lubanga] kikome aye ma miyo  kwo ki dano ducu wa ki yweyo ki jami ducu . . . Wakwo i en, wawoto i en, wabedo i en.”​—Tic pa Lukwena 17:25, 28.

Ento, Lubanga pe nyuto marre i miyo botwa jami ma mitte me kom keken. En bene ocweyowa i yo madok pat ki lee, kun keto deyo i komwa wek wabed ki kero me bedo ki wat macok kwede dok konyowa me dongo wat man. (Matayo 5:3) I yo ma kit man,dano ma luwiny gibedo ki gen me doko “lutino” pa Lubanga.​—Jo Roma 8:19-21.

Kit ma Jon 3:16 waco kwede, Lubanga onyuto marre piwa kun cwalo Wode Yecu i lobo wek opwonywa lok i kom Lubangane ki Wonne ki dong me miyo kwone. Kadi bed kumeno, dano mapol giwacci pe giniang gin mumiyo onongo pire tek ni Yecu oto pi dano ki dong kit ma tone nyuto kwede mar pa Lubanga piwa. Kong wanenu gin ma Baibul wacciwa ma lubbe ki tyen lok mumiyo Yecu oto ki dong kit ma tone pire tek kwede.

Pe tye ngat mo ma obedo obar got, dano weng gitwo, gitii, dok gito. Ento meno pe obedo yub pa Lubanga i acakkine. En omiyo bot dano gen me bedo ki kwo ma pe tum i paradic i lobo kany. Ento man onongo jenge i kom gin acel: Onongo mittte ni gulub lokke. Lubanga owaco ni ka gukwero ci gibito. (Acakki 2:17) Laco mukwongo ojemo i kom cik pa Lubanga, dok en okelo to i kome ki bot likwayone. Lakwena Paulo otito ni: “Bal yam obino i lobo kun wok ki i dano acel, ka dong to obino pi bal, kit meno bene to onya oromo kin dano ducu, pien dano ducu gubalo.”​—Jo Roma 5:12.

Ento, Lubanga “maro ngolo kop atir.” (Jabuli 37:28) Kadi bed ni en onongo pe twero cayo bal ma Adam otimo akaka-ni, Lubanga pe otenyo dano liyak wek gumedde ki to ki deno can pi naka pi bal pa dano acel. En pe otimo kumeno pien otiyo ki cik ma wacci gibiculo “kwo ki kwo.” En ongolo kop atir dok man oyabo yo bot dano ma luwiny wek gunong kwo ma pe tum. (Nia 21:23) Lapeny dong tye ni, Kwo labongo roc ma Adam orwenyo-ni kitwero dwokone nining? Lagamme tye ni: Ngat mo omyero omi, nyo otyer kwo ma rom aroma ki pa Adam-mi​—kwo ma pe ki roc.

Ada, likwayo pa Adam gitye ki roc, ma oweko pe gitwero miyo ginkok kono do Yecu keken. (Jabuli 49:6-9) Yecu kinywalo labongo roc kit macalo Adam bene kicweyo labongo roc-ci. Pi meno, pien en omiyo kwone, Yecu okoko dano ki i opii me bal. Pien otimo meno, en omiyo bot likwayo pa luot mukwongo kare me bedo ki kwo ma pe ki roc ma Adam ki Kawa onongo gitye  kwede-ni. (Jo Roma 3:23, 24; 6:23) Tika tye gin mo ma myero watim wek wanong adwogi maber ki i mar madit ma kinyuto-ni?

Wi opo ni Jon 3:16 waco ni “wek dano ducu ma ye en [Yecu] owek to, ento obed ki kwo ma pe tum.” Man te lokke ni omyero watim gin mo olo to me nongo kwo ma pe tum. Omyero wabed ki niye i kom Yecu dok wawiny lokke wek ‘wanong kwo pe tum.’

Iromo penye kekeni ni: ‘Meno mono kwako bedo lawiny nining?’ Yecu owaco ni “dano ducu ma ye en” gibinongo kwo ma pe tum. Ada, bedo ki niye pire tek adada. Ento, pire tek ni wiwa opo ni i Baibul, bedo ki niye pe kwako ye ayea ni Yecu tye. Wek wanong cwak pa Lubanga, mitte ni ngat moni pe oye keken ni Yecu aye Lalar. Laye-ni myero otemme ki cwinye ducu me keto i tic jami ma Yecu opwonyogi. Ka en pe keto i tic, ci wacone ni etye ki niye konye pe. Baibul waco ni, “Niye ka pe giketo i tic, nongo dong oto woko.” (Yakobo 2:26) Waromo ketone i yo mukene ni, gin ma mitte ki bot laye moni aye ni en onyut niye i kom Yecu, ma te lokke ni en myero okwo ma lubbe ki niyene.

Paulo otito tyen lok man ni: “Mar pa Kricito loyo kwowa, pien dong wangolo kop kit man ni, ngat acel [Yecu] oto pi jo ducu . . . En yam oto pi dano ducu, wek jo makwo pe gumedde ki bedo kwo pigi kengi, ento gubed ki kwo pi ngat ma yam oto ka ocer pigi ca.” (2 Jo Korint 5:14, 15) Bedo ki pwoc ma a ki i cwinywa pi gityer pa Yecu myero owek watim alokaloka i kwowa​—waweko kwo piwa kenwa ento wakwo pi Yecu, ma oto piwa-ni. Ma nyutti gin ma pire tek i kwowa aye obedo keto i tic jami ma Yecu opwonyogi. Alokaloka ma kit meno gudo jami ma pigi tek botwa, ma wayerogi, ki dong jami ducu ma watimogi. Adwogi maber ango ma jo ma ginyuto niye i kom Yecu gibinongone?

Bute me agikki i Jon 3:16 nyuto cikke pa Lubanga bot jo ma ginyuto niye i ginkok pa Yecu dok gikwo ma lubbe ki cik pa Jehovah. Lubanga mito ni jo magi ma gin lugen-ni ‘guwek to, ento gubed ki kwo ma pe tum.’ Ento, jo ma ginongo adwogi maber ki i mar pa Lubanga gitye ki gen me kwo i kabedo mapat pat.

Bot gurup acel, Yecu ocikke me miyo botgi kwo ma pe tum i polo. En otito ka maleng bot lupwonnyene ma lugen ni ebicito ka yubo kabedo pigi wek gubed ka loc kacel kwede i deyone. (Jon 14:2, 3; Jo Pilipi 3:20, 21) Jo ma kibicerogi me kwo i polo “gibibedo ajwagi [lulamdog] pa Lubanga ki pa Yecu, dok bene gibibedo ka loc kacel kwede pi mwaka alip acel.”​—Niyabo 20:6.

Jo manok keken ki i kin lulub kor Kricito aye gibibedo ki mot man. Ki lok ada Yecu owaco ni, “Pe wulwor, wun romi manok, pien Wonwu oye atika me miyo botwu ker.” (Luka 12:32) Wel dano ma gitye i kin ‘romi manok-ki’ mono tye adi? Niyabo 14:1, 4 wacci: “Aneno Latin romo ma ocung i wi got Cion; onongo jo alip miya acel ki pyerangwen wiye angwen tye kacel kwede, ma dong onongo gicoyo nyinge ki nying Wonne woko i tur nyimgi. . . . Jo magi aye gin jo ma gikokogi ki i kin dano ducu, wek gubed calo cam mukwongo cek ma giyubo pi Lubanga ki Latin romo.” Ka iporo ki dano bilion mapol ma welgi pe kwanne, jo 144,000 gitye “romi manok.” Jo magi kilwongogi ni luker, ento gin gibiloyo angagi?

Yecu bene oloko i kom gurup me aryo pa jo ma gin lugen ma gibinongo adwogi maber ma Ker man me polo-ni bikelone. Kit ma kicoyo kwede i Jon 10:16, Yecu owaco ni: “Atye ki romi mukene bene, ma pe me dwol man; myero akelgi bene, gibiwinyo dwana. Kit meno bibedo lwak acel ki lakwat acel.” Jo magi ma gitye ‘romi-ni’ gitye ka kuro kwo ma pe tum i lobo​—kwo ma  Adam gin ki Kawa onongo gitye kwede. Wan wangeyo nining ni jo magi gibikwo i lobo?

Tyen mapol, Baibul wacci kibiloko lobo doko Paradic. Wek inen in kikomi, yab Baibulli ci ikwan wang Baibul magi: Jabuli 37:9-11; 46:8, 9; 72:7, 8, 16; Icaya 35:5, 6; 65:21-23; Matayo 5:5; Jon 5:28, 29; Niyabo 21:4. Tyeng magi giloko i kom agikki me lweny, kec, two, ki dong to. Giloko bene i kom kare ma nongo jo ma kitgi ber gibibedo ki yomcwiny me gero odigi, puro potigi, ki dong pito lutinogi i kabedo ma kuc opong iye. * Tika gen ma kit man yomo cwinyi? Watye ki tyen lok maber me ye ni cikke magi bicobbe.

Ka iling manok ci itamo i kom jami mapol ma Lubanga otimo piri ki pi dano ducu, ci nen ka maleng ni en otimo jami mapol. Watye ki kwo, waryek, komwa yot, dok watye ki jami ma mitte wek kwo omedde. Makato meno, mic me ginkok ma Lubanga omiyo macalo adwogi me to pa Yecu-ni romo keliwa mot madit loyo ducu kit ma waneno kwede i Jon3:16.

Kwo ma pe tum i kabedo me kuc, mamwonya, labongo two, lweny, kec, nyo to biyabo yo me nongo yomcwiny ki mot me labed naka. Kono ibinongo mot magi mapol-li nyo pe, meno dong cung i wi. Lapeny ma pud odong aye ni, Gin ango ma in itye ka timone pi Lubanga?