LULIM piny mogo onongo kec tye ka nekogi. Limo kabedo ma gang me Beterekem macon onongo tye iye kikome omiyo kec onekogi, ma oweko gubedo ki miti me camo dek me tekwaro ma kunnu. Ngat acel i kingi oneno ot cam ma kitedo iye falafel​—cam ma kiyubo ki chickpeas, nyanya, mutungulu, ki dong pot dek mogo ci kicamo ki mugati pita. Cam man ma mit-ti ominigi kero me medde ki limo piny.

Wele magi onongo pe gingeyo ni mugati pita kibedo ka tedone i Beterekem pi kare malac adada. Mugati man onongo dong orii makato jami ducu ma guneno i nino meno. Beterekem te lokke ni “Ot me Mugati,” dok kibedo ka tedo mugati i kabedo meno pi mwaki alip mapol. (Ruth 1:22; 2:14, Baibol pa Katoli.) I kareni, mugati pita tye i kin mugati ma pud kimarogi loyo i Beterekem.

Cokcok mwaki alip angwen mukato angec, i kabedo mo ma pe bor ki kupiny me Beterekem, Cara dako pa Abraim otedo “mugati” bot wele adek ma gubino atura ka limogi. (Acakki 18:5, 6, Baibol pa Katoli.) ‘Moko mapwot’ ma Cara otiyo kwede-ni nen calo kirego ngano nyo cayiri. Cara orune oyotoyot ka tedo mugati dok nen calo otedo i kom got malyet.​—1 Luker 19:6.

Kit ma lok man nyuto kwede, lupaco pa Abraim onongo giyubo dok gitedo mugatigi gin kikomgi. Pien gubedo ka wot i kabedo mapat pat, man te lokke ni Cara kacel ki luticce onongo nen calo pe gitwero tedo mugati i keno ma kitedo ki mugati i Ur, i paco pa Cara. Cara onongo yubo moko mapwotte kun tiyo ki bel me kin paco. Man nen calo obedo tic matek pien omyero kireg ki cing nyo kiod ki pany.

I nge mwaki miya angwen, Cik ma Kimiyo bot Moses owaco ni onongo pe omyero kikwany min kidi rego ci kijeng woko, pien meno rom ki “kwanyo kwo pa dano me ajenga.” (Nwoyo Cik 24:6) Lubanga onongo tero kidi rego calo gin ma pire tek pien labongo kidi rego, lupaco moni pe giromo tedo mugati nino ducu.​—Nen bok ma wi lokke tye ni “ Rego Moko ki Dong Tedo Mugati i Kare me Baibul.”

Ginacoya loko i kom mugati tyen mapol. Man nyuto ni mugati onongo tye cam ma pire tek i kare me Baibul. Pire onongo tek adada mumiyo luco Baibul pol kare onongo gilwongo cam ni mugati. Yecu onyuto ni jo ma gitiyo pi Lubanga gitwero lega ki tekcwiny ni: “Miwa tin camwa me tin.” (Matayo 6:11) Kany, Yecu onyuto ni watwero jenge i kom Lubanga pi nongo camwa me nino ducu.​—Jabuli 37:25.

Ento, tye gin mo ma pire tek loyo mugati nyo cam. Yecu owaco ni: “Dano pe bibedo kwo ki kwon [mugati] keken, ento bedo kwo ki lok ducu ma a ki i dog Lubanga.” (Matayo 4:4) Lokke-ni nyuto ni en obedo ka lok i kom kare ma Luicrael onongo gijenge i kom Lubanga pi jami ducu. Man ocakke cutcut i kare ma guweko Ejipt. Camgi onongo tye ka tum woko i nge dwe acel keken ma gudonyo kwede i Tim me Cinai. Pien gutamo ni gubito ki kec i tim, gin guloko ma cwinygi kec ni onongo “wacamo mugati romowa” i Ejipt.​—Nia 16:1-3, Baibol pa Katoli.

Ki lok ada, mugati ma i Ejipt onongo mit adada. I kare pa Moses, ludiro i tedo mugati onongo gitedo mugati kacel ki cakes mapat pat bot jo Ejipt.  Ento, Jehovah onongo pe mito weko jone labongo mugati mo keken. En ocikke ni: “Nen abicwalo mugati cwer botwu ki i polo.” Ki lok ada, i odiko con, mugati man mua ki i polo onongo “ongidde matitino macalo pok rec” dok nen calo toyo nyo pee. I kare ma Luicrael guneno pi tyen mukwongo, gin gupenyo ni, “Man gin ango?” Moses odok iye botgi ni, “Man aye mugati ma Rwot [Jehovah] omiiniwu me acama.” Gin gulwongo ni manna, * dok gucamo mugati man pi mwaki 40 kulu.​—Nia 16:4, 13-15, 31, Baibol pa katoli.

I acakkine, manna ma Jehovah omiyo i yo me tango-ni nen calo oyomo cwiny Luicrael. Onongo mit calo “nyim kic,” dok pol ata ma romo dano ducu. (Nia 16:18) Ento ka kare woto ki kato, gin gucako paro cam mapat pat ma onongo gicamo i Ejipt. Gin gukok ni, “Gin mo bene dong peke, kono nyo manna man ma waneno kome-ni.” (Wel 11:6) Lacen, gin guloko lok akeca ni: “Cwinywa ocido woko ki cam [mugati] ma konnye pe-ni.” (Wel 21:5) Lacen, ‘mugati mabup mua ki i polo-ni’ odoko gin ma pe mit dok marac adada bot jo Icrael.​—Jabuli 105:40.

Ada, mugati tye i kin jami ma kiromo terone calo gin ma pire pe tek. Ento Baibul loko i kom mugati ma dok pat ma myero wabed ki pwoc pire. Mugati man ma Yecu oporo ki manna ma Luicrael gukwero lajwac-ci kelo adwogi mabeco pi naka.

Yecu owaco bot jo ma gitye ka winyo lokke ni: “An aye mugati me kwo. Kwariwu yam gucamo mugati i tim, ci guto woko. Man aye mugati ma olor piny ki i polo, wek ka ngat mo ocamo, pe oto. An aye mugati makwo, ma olor piny ki i polo. Ngat ma camo mugati man bikwo pi naka. Ki mugati  ma abimiyo aye ringu-koma ma amiyo wek lobo obed ki kwo.”​—Jon 6:48-51, Baibol pa Katoli.

Jo mapol ma gubedo ka winyo lok pa Yecu pe guniang gin ma en owaco i kare ma oloko i kom “mugati” ki ‘ringu-kome.’ Ento, lapor man onongo rwatte adada. Mugati ma Lujudaya onongo gicamo nino ducu-ni ominigi kero, kit macalo manna ogwoko kwogi pi mwaki 40 kulu i timmi. Kadi bed ni manna obedo mic mua ki bot Lubanga, pe omiyo kwo ma pe tum. Ki tungcel, gityer pa Yecu miyo kwo ma pe tum bot jo ma ginyuto niye i kome. Ki lok ada, en aye “mugati me kwo.”

Oromo bedo ni ka kec tye ka neki, ci icamo mugati mo manok. Dok bene oromo bedo ni imiyo pwoc bot Lubanga pi mini ‘cam ma tin.’ (Matayo 6:11) Kadi bed ni wapwoyo cam mamit ma kiminiwa, ento wiwa pe myero owil i kom “mugati me kwo” ma pire tek-ki, ma en aye Yecu Kricito.

Watwero nyutone nining ni pe watye calo Luicrael me kare pa Moses ca, ento watero mugati man calo gin ma pire tek? Yecu owaco ni: “Ka wumara, ci wubigwoko cikka.” Ka walubo cik pa Yecu, ci wabibedo ki gen me camo mugati ki yomcwiny pi naka.​—Nwoyo Cik 12:7.