1. Ngo ma oweko Lukricitayo gunongo tito kwena tek adada?

 I KARE ma Lutino Kwan me Baibul * gucako tito kwena maber-ri mwaki 130 mukato angec, gin gukemme ki ariya mapol. Calo Lukricitayo me cencwari me acel, gin gubedo ka tito kwena ma pol pa dano pe gimito winyone. Gin onongo welgi nok, dok pol pa dano me lobo gitamo ni pe gukwano matut. Medo i kom meno, Catan Larac-ci onongo bibedo ki “akemo madwong” i komgi. (Yabo 12:12) Dok gin onongo gibitito kwena i “kare me agikki,” ma en aye kare ma “piny bibedo marac.”​—2 Tem. 3:1, Baibul pa Katoli.

2. Gin ango ma Jehovah obedo ka timone wek tic me tito kwena-ni omedde i kareni?

² Ento, yub pa Jehovah tye ni jone gutit kwena maber-ri i twok lobo ducu i kareni dok pe tye gin mo keken ma bigenge cobo yubbe meno. Kit macalo Jehovah olaro rok me Icrael ki i cing lobo Babilon-ni, en bene i kareni olaro luticce ki i “Babilon madit,” ma en aye twon ker malac me dini goba  me wi lobo-ni. (Yabo 18:1-4) En opwonyowa wek wabed maber, ominiwa kuc, dok bene okonyowa me pwonyo jo mukene. (Kwan Icaya 48:16-18.) Kadi bed ni Jehovah tye ki kero me ngeyo gin ma anyim, man pe te lokke ni en tiyo ki kerone-ni me doro jami ducu ma timme i lobo wek kitit kwena me Ker-ri. Tye jami mogo mutimme ma oweko tito kwena obedo yot, ento Jehovah keken aye okonyowa me ciro jami macalo aunauna ki dong pekki mukene ma miyo wanongo tek tutwal me tiyo tic man i lobo ma tye i te loc pa Catan-ni.​—Ic. 41:13; 1 Jon 5:19.

3. I yo ango ma ‘ngec me ada’ omedde kwede?

³ Jehovah oweko lanebi Daniel otito ni ‘ngec me ada’ bimedde i kare me agikki. (Kwan Daniel 12:4.) Jehovah okonyo Lutino Kwan me Baibul wek guniang pwony mogo ma pigi tego me Baibul ma dini pa Lukricitayo ata-ni obedo ka nywenone. En kombeddi tye ka tic ki jone me tito ngec me ada bot dano me twok lobo ducu. I kareni, lok pa lanebi Daniel-li tye ka cobbe. Cokcok dano ma romo 8,000,000 kulu gujolo lok ada me Baibul dok gitye ka titone i twok lobo lung. Ci dong, gin ango ma okonyo jo pa Jehovah wek gutit kwena i twok lobo ducu?

4. I 1900, Baibul onongo dong kigonyo i leb ma romo adi?

⁴ Gin acel ma okonyowa me tito kwena maber-ri aye ni dano mapol gitye ki Baibul. Pi mwaki miya mapol, lutela dini pa Lukricitayo ata-ni gugengo dano ni pe myero gukwan Baibul dok bene guneko jo mogo ma gubedo ka gonyone. Ento, i 1800 ki wiye, dul mogo gugonyo nyo gugoyo Baibul ducu nyo bute keken i leb ma romo 400 kulu. I 1900, dano mapol onongo dong gitye ki Baibul ento gipe ki ngec matir i kom Ginacoya.

5. Gin ango ma Lucaden pa Jehovah gutimo ma lubbe ki gonyo Baibul?

⁵ Lutino Kwan me Baibul onongo gingeyo ni myero gitit kwena, dok gin gutito labongo yweyo gin ma Baibul pwonyo. Medo i kom meno, jo pa Jehovah gubedo ka tic ki Baibul mapat pat dok bene gupoko bot dano. Nicakke i 1950, Baibul me New World Translation of the Holy Scriptures dong kityeko goyone ducu nyo bute keken i leb makato 120 kulu. I 2013, gin gugoyo Baibul me New World Translation i leb Muno dok gonyone bibedo yot tutwal i leb mukene. Man te lokke ni ka watiyo ki Baibul ma dano giniang dok kwanone yot, ci man bikonyowa me tito kwena.

6, 7. (a) Lweny macalo mene ma gubedo ka timme i mwaki 100 mukato angec? (b) Kuc ma obedo tye i lobbe mukene-ni okonyowa nining me tito kwena?

⁶ Iromo penye kekeni ni, ‘Pi kare ma rom mene ma kuc obedo tye i lobo?’ Me lapore, pi mwaki 100 mukato angec, dano mapol guto macalo adwogi me lweny, tutwalle lweny me acel ki aryo me wi lobo. Ento i kare ma Lweny me II me Wi Lobo tye ka medde anyim i 1942, Nathan Knorr, ma onongo tye ka telo Lucaden pa Jehovah-ni omiyo i gure madit pwony ma wi lokke tye ni “Kuc​—Tika Birii pi Naka?” Pwony meno ma kikwanyo ki i Niyabo cura 17 ni omoko ka maleng ni lweny-nyi pe bio wa i Armagedon, ento wabibedo ki kuc pi kare mo.​—Yabo 17:3, 11.

⁷ Kuc obedo pe i kabedo mukene i nge Lweny me II me Wi Lobo. Ma lubbe ki kwed mo ma kitimo, kinongo ni lweny ma romo 331 otimme i kine ka 1946 ki 2013. Dano milion mapol guto. Ento i lobbe mapol, kuc mo manok olo to onongo tye ma omiyo kare bot jo pa Jehovah me tito kwena. Adwogine obedo ningo? I 1944, lutit kwena me Ker-ri onongo welgi pe romo 110,000 i twok lobo lung. I kareni, welgi cok romo 8,000,000 kulu! (Kwan Icaya 60:22.) Watye ki pwoc madit ka watito kwena maber-ri i kare ma nongo kuc tye.

8, 9. I yo ango ma wot odoko yot i kareni, dok man konyowa nining i tito kwena?

⁸ Dongo rwom me giwot okonyo tutwal i tic me tito kwena. I 1900​—mwaki 21 onongo dong okato nicakke ma kigoyo kwede ki Wi Lubele mukwongo—​i kare meno mutoka onongo tye 8,000 keken i lobo Amerika dok yo mabeco onongo bene nok adada. I kareni, mutoka makato bilion acel ki nucu kacel ki yo mabeco tye i kabedo mapat pat i twok lobo lung. Mutoka kacel ki yo gukonyo lutit kwena mapol me tito kwena i kabedo ma o iye tek. Kadi bed ni wape ki giwot matir atir dok wawoto pi mairo maboco, ento pud watute me loko dano me doko lupwonnye pa Yecu.​—Mat. 28:19, 20.

⁹ Giwot mapat pat bene okonyowa adada i ticwa me tito kwena. Mutoka, yeya, ki dong gar gukonyo tutwal me tero bukkewa ma gijenge i Baibul i kabedo ma o iye tek i kine me cabit manok keken. Luneno me adwol, lumemba me Komitti me Jang Gang Kal, lumiconari, ki jo mukene giwoto ki dege me cito ka miyo pwony ki dong konyo kacokke mapat pat. Medo i kom meno, lumemba me Lukiko Madit kacel ki omege mukene ma i gang kal madit giwoto ki dege i lobbe mapol wek gicuk cwiny omege ki lumege dok gipwonygi. Dongo rwom me giwot okonyo me kelo note i kin jo pa Jehovah.​—Jab. 133:1-3.

10. Pingo kiromo wacci leb Muno obedo leb ma kiloko i twok lobo lung?

¹⁰ I cencwari me acel, dano mapol  ma gitye i te Ker me Roma onongo giloko leb Grik. Tika tye leb mo i kareni ma dano gingeyo i kabedo mapol? Pol pa dano giromo waco ni meno obedo leb Muno. Buk mo ma wi lokke tye ni English as a Global Language wacci: “Acel me angwen pa dano me wi lobo giloko nyo giniang leb Munu.” Leb ma dong kipwonyo loyo aye leb Muno, ma kitiyo kwede i lobbe mapol i cato wil, cung i wibye, cayan, ki dong tet.

11. Leb Muno okonyo nining me ilo malo woro me ada?

¹¹ Pien kiloko leb Muno i kabedo mapol, man okonyo tutwal i ilo malo woro me ada. Pi mwaki mapol, Wi Lubele kacel ki bukke mukene ma gijenge i Baibul gibedo ka goyogi i leb Muno keken. Man aye leb ma kiloko i gang kal madit pa Lucaden pa Jehovah. Dok kitiyo kwede me pwonyo omege ki lumege ma gibino ka kwan i Watchtower Educational Center i Patterson, i lobo Amerika.

12. Lutic pa Jehovah dong gutyeko gonyo bukke ma jenge i Baibul i leb ma romo adi, dok diro me tet okonyogi nining?

¹² Pien watye ki mot me tito kwena maber me Ker-ri bot dano me rok ducu, watyeko gonyo bukkewa i leb ma romo 700 kulu. Kompiuta ki dong purogram me kompiuta calo MEPS, okonyowa me medde ki gonyo leb. Tute ma kit man okonyowa me tito kwena me Ker-ri ki dok okelo note i kinwa i twok lobo lung. Ento gin ma pire tek ma notowa aye ni wan waloko “leb matir,” ma obedo lok ada me Ginacoya.​—Jep. 3:9, NW.

13, 14. Cik kacel ki kot ogwoko Lukricitayo me kareni nining?

¹³ Kit ma waneno kwede i pwony mukato-ni, cik pa Luroma ogwoko Lukricitayo i kare macon pien lobbe ducu ma gitye i te locce onongo gilubo. I kareni bene, cik me lobbe mapat pat konyowa i ticwa me tito kwena. Me labolle, i lobo Amerika, ka ma gang kalwa madit tye iye-ni, pen cik miyo twero bot lwak me bedo i dini ma gimito, me lok agonya, ki dong me gure kacel. Man oweko omege ki lumege me Amerika gitye agonya me rwatte ki dong nyamo lok me Baibul atyer ka maleng kun ginywako gin ma gipwonyo ki dano.  Ento, i kine mukene onongo mitte ni myero wacit i kot wek walweny pi twero ma watye kwede me tito kwena. (Pil. 1:7) I lobo Amerika, ka ce kitero jo pa Jehovah i kot, bedo ka koko apil teretere i kot mamalo omiyo gulwenyo pi twerogi me tito kwena me Ker-ri.

¹⁴ I lobbe mukene, kot ocung ingewa wek wabed ki twero me woro Jehovah ki dok tito kwena atyer i dye lwak. I kabedo mogo, kot oloyowa ci wakoko apil i kot me wi lobo. Me labolle, i Juni 2014, onongo dong waloyo kop ma romo 57 i European Court of Human Rights, dok kop ma kingologi-ni gudo pol pa lobbe ma gitye i Ulaya. Kadi bed ni ‘jo me rok ducu gidagwa,’ kot me lobbe mapat pat gungolo kop ni watye ki twero me medde ki woro me ada.​—Mat. 24:9.

15. Diro manyen ango ma kikati kwede ma lubbe ki goyo bukke, dok man okonyowa nining?

¹⁵ Diro manyen me goyo bukke okonyowa me tito kwena maber-ri i twok lobo ducu. Pi mwaki miya mapol, dano gubedo ka tic ki cuma me goyo bukke ma Johannes Gutenberg aye oyubo i kine ka mwaka 1450. Ento pi mwaki 200 mukato angec, alokaloka mapol otimme i tic me goyo bukke. I kareni, cuma me goyo bukke gidongo, gitiyo oyotoyot, dok rwomgi lamal adada. Yubo karatac kacel ki ribo bukke dong wele pe tek. Yo manyen me goyo bukke dong oweko kitye ka yubo bukke oyotoyot dok i rwom ma lamal. Alokaloka man ogudo kit me goyo bukkewa nining? Tam kong i kom lok man: Wi Lubele mukwongo (Julai 1879) kigoyo kopi 6,000 labongo cal dok i leb Muno keken. I kareni, i nge mwaki 136, kitye ka goyo dok kipoko bot dano Wi Lubele makato kopi 50,000,000 kulu dwe ki dwe. Wi Lubele magi gitye ki cal mabeco dok kigoyogi i leb makato 200.

16. Diro macalo mene ma gukonyowa me tito kwena i twok lobo lung? (Nen cal ma tye i pot karatac 22.)

¹⁶ Diro manyen mapat pat ma kikati kwede mwaki 200 mukato angec okonyo jo pa Jehovah me tito kwena maber-ri. Waloko i kom gar, mutoka, kacel ki dege, ento tye jami mukene calo lela, typewriters, cuma ma coyo coc pa lutowang, telegraph, cim, kamera, lamak vidio ki dwan, redio, telebijon, vidio, kompiuta ki dong Intanet. Jami magi gukonyowa i yo mapat pat wek wacob ticwa me loko dano gudok lupwonnye pa Yecu. Me cobo lok ma Jehovah owaco ni jone ‘bidoto cak pa jo me rok ducu-ni,’ watiyo maber adada ki jami me lobo calo diro manyen me tet wek wago Baibul kacel ki bukke ma gijenge i Baibul i leb mapol.​—Kwan Icaya 60:16.

17. (a) Lok ma wanyamo-ni konyowa me moko gin ango? (b) Pingo Jehovah oye ni wabed “lutic kacel” kwede?

¹⁷ Ada, watye ki lanyut ma miyo wamoko ni Lubanga tye ka goyo laane i komwa. Tye kono ni, Jehovah pe mito kony ki botwa wek ecob yubbe. Ento, Wonwa ma lamar-ri ye ni wabed “lutic kacel” kwede, ma man miyo wanyuto mar pire ki dong pi luwotwa. (1 Kor. 3:9; Mar. 12:28-31) Pi meno, watiyo maber adada ki kare ma ononge wek watit kwena me Ker-ri, tic ma pud dong pire tek loyo i lobo-ni. Ci dong, wanyut wunu ni watye ki pwoc madit pien Jehovah okonyowa dok ogoyo laane i kom ticwa me tito kwena i twok lobo lung.