1. Pingo lubo lanen pa Yecu miyo wanyikke cok bot Jehovah?

 POL kare walubo lanen pa jo ma wamaro dok waworogi. I kin dano ducu ma dong gukwo i lobo-ni, Yecu Kricito keken aye ngat maber loyo ma watwero lubo lanenne. Pingo tye kumeno? Yecu kikome owaco ni: “Ngat ma oneno an dong oneno Won.” (Jon 14:9) Yecu onyuto kit Wonne maber adada, ma oweko ka wapwonyo lok i kome, ci nongo watye ka pwonyo lok i kom Wonne. Pi meno, ka wamedde ki lubo lanen pa Yecu, man miyo wanyikke cok bot Jehovah, Ngat madit loyo i polo ki lobo. Man pud dong obedo twon mot madit ya!

2, 3. (a) Pingo Jehovah oweko kicoyo botwa lok i kom Wode, dok ngo ma Jehovah mito ni watim? (b) Gin ango ma wabinyamo i pwony man ki ma lubo?

² Ento, wan watwero ngeyo Yecu nining? Watye ki pwoc madit atika pien kicoyo lok matut i kom Yecu i Baibul. Jehovah oweko kicoyo rekod meno i Ginacoya me Leb Grik pien mito ni wange Wode wek walub lanenne. (Kwan 1 Petero 2:21.) Ka Baibul owaco ni omyero walub kor Yecu Kricito, man mono nongo te lokke ngo? Jehovah mito ni walub lanen pa  Yecu i jami ducu ma en otimo. Ki lok ada, Yecu oweko botwa lanen maber atikatika, kun inongo ni watye ki roc. Ento Jehovah pe dok keto gingi i komwa tutwal ni myero walub lanen pa Yecu. Ma ka meno, Lubanga mito ni watute ki kerowa ducu me lubo lanen pa Wode.

³ Pi meno, kong dong wanenu kit mogo mabeco pa Yecu. I pwony man, wabinyamo lok i kom mwolo ki cwiny me kica ma en onongo tye kwede; i pwony ma lubo, wabineno lok i kom tekcwinye ki kit ma en onyuto kwede niango. Ma lubbe ki kit acel acel, wabigamo lapeny adek: Man te lokke ngo? Yecu onyuto kit man nining? Wan waromo lubo lanenne nining?

4. Mwolo obedo gin ango?

⁴ Mwolo obedo gin ango? I lobo man ma dano luwakke tutwal-li, jo mogo gitamo ni ka ngat moni mwol, man te lokke ni en nongo goro nyo lwor. Ento, meno aye pe gin ma mwolo obedo. Wek wanyut mwolo, mitte ni omyero wabed jo ma cwinygi tek. Mwolo obedo olungtuke me awaka. Mwolo cakke ki i kit ma watamo kwede i komwa kekenwa. Dikconari mo acel me Baibul owaco ni: “Mwolo miyo wangeyo kit ma rwomwa lapiny kwede i wang Lubanga.” Ka ce ada wamwol i wang Lubanga, ci pe wabikette kenwa ni wan dok piwa tek kato jo mukene. (Rom. 12:3; Pil. 2:3) Pe yot pi jo ma tye ki roc me dongo cwiny me mwolo. Ento, watwero pwonyo kit man ka walwodo lok i kom dit pa Lubanga Jehovah ki dok walubo lanen pa Wode Yecu Kricito.

5, 6. (a) Mikael lamalaika madit obedo anga? (b) Mikael onyuto cwiny me mwolo nining?

⁵ Yecu onyuto mwolo nining? Wod pa Lubanga dong obedo ka nyuto mwolo pi kare malac, cakke wa i kare ma en tye cwec me cwiny matek adada i polo ki dong i kare ma en obino i lobo kany. Nen kong labol mogo.

⁶ Cwiny ma en obedo kwede. I buk pa Juda, wakwano lok i kom kit ma Yecu onyuto kwede lanen me mwolo ma peya en obino i lobo. (Kwan Juda 9.) Mikael lamalaika madit, nyo Yecu “yam olwenyo [ogwenyo lok] ki Catan” dok ‘opyem’ ki larac-ci. Lok man onongo kwako “kom Moses.” Wi myero opo ni i kare ma Moses oto, Jehovah oyiko kome ka ma dano mo keken pe ngeyo. (Nwo. 34:5, 6) Twero bedo ni Larac-ci onongo mito tic ki kom Moses me ilo malo woro me goba. Kadi bed ni Larac-ci onongo tye ki pulan marac, ento Mikael ojuke woko ki tekcwiny. Buk mo acel waco ni lok me leb Grik ma kigonyo ni “olwenyo [ogwenyo lok]” ki dok ‘opyem-mi’ kitiyo kwede “bene ma lubbe ki laro lok i kot” dok konyowa me niang “ni Mikael ‘opyem i kom twero ma Larac-ci tye kwede me kwanyo kom Moses.’” Kadi bed kumeno, Lamalaika Madit-ti oniang ni pe obedo ticce me ngolo kop. Ma ka meno, en oweko lok man i cing Jehovah, Langolkop Madit. Pi meno, kadi bed ni kicwero cwinye, ento Mikael pe ongwete me timo tic ma pe kimiye. En pud dong onyuto cwiny me mwolo ya!

7. Yecu onyuto mwolo nining i lokke ki dong i ticce?

⁷ I kare ma Yecu tye ka tiyo ticce me pwony i lobo, Yecu oloko dok otimo jami i yo ma nyuto ni en mwol. Lokke. En pe oywayo tam pa dano i kome wek enong yweka. Ma ka meno, en omiyo deyo ducu bot Wonne, Jehovah. (Mar  10:17, 18; Jon 7:16) Yecu pe oloko ki lupwonnyene i yo ma keligi lewic dok pe oterogi calo jo ma konygi pe. Ma ka meno, en nyuto ni eworogi kun pwoyogi pi gin maber ma gitimo dok oketo genne i komgi. (Luka 22:31, 32; Jon 1:47) Ticce. Yecu oyero me kwo kwo ma rwomme lapiny labongo bedo ki jami mapol me kom. (Mat. 8:20) En ojalle me tiyo tic ma rwomme lapiny ma jo mukene pe gimito timone. (Jon 13:3-15) Yo ma pire tek adada ma en onyuto kwede ki cwiny me mwolo aye ni en obedo ngat ma lawiny. (Kwan Jo Pilipi 2:5-8.) Yecu onongo pat ki jo ma luwaka ma pe gimito bedo luwiny-nyi pien en omwolle kekene me timo gin ma Lubanga mito kun bedo “lawiny nio wa i to.” Man nyuto atir ka maleng ni Yecu, Wod pa dano, obedo ‘mwol i cwinye’?​—Mat. 11:29.

8, 9. Watwero nyuto cwiny me mwolo nining?

⁸ Wan watwero lubo lanen pa Yecu nining i nyuto cwiny me mwolo? Cwiny ma watye kwede. Ka wamwol, ci man bikonyowa me ngeyo ka ma twerowa gik iye. Ka wangeyo ni pe obedo ticwa me ngolo kop i wi jo mukene, man miyo pe warune me kok i komgi pi bal ma gutimo dok pe wabedo ki gungcwiny i komgi. (Luka 6:37; Yak. 4:12) Mwolo konyowa bene pe me bedo ma nongo watamo ni wan dok ‘kitwa atir tutwal,’ kun wacayo jo ma gipe ki kero nyo mot me tic ma watye kwede. (Latit. 7:16) Luelda ma ginyuto cwiny me mwolo pe ginene macalo jo ma rwomgi lamal kato pa Lukricitayo luwotgi. Ma ka meno, lukwat magi ‘gitero luwotgi macalo jo madito loyogi’ dok ginene calo jo ma rwomgi lapiny.​—Pil. 2:3; Luka 9:48.

⁹ Nen kong labol pa omego mo ma nyinge W. J. Thorn, ma obedo ka tic macalo laneno ma woto awota, cakke i mwaka 1894. I nge tiyo tic meno pi mwaki mapol, kilwonge i Kingdom Farm ma tye tung kumalo me boma me New York, i lobo Amerika, ka ma kimiyo bote tic me gwoko gweni. Omego Thorn owaco ni ka ce ecako tamo ni myero ebed ka timo tic ma pire tek loyo meno, onongo eloko kekene ni: “In apwa mamwa-ni. Pingo itye ka wakke kumeno?” (Kwan Icaya 40:12-15.) Man pud dong nyuto cwiny me mwolo ya!

10. Watwero nyuto mwolo nining i lokwa ki dong i ticwa?

¹⁰ I lokwa. Ka ce ada wamwol, ci man bigudo kit ma waloko kwede ki jo mukene. (Luka 6:45) Ka watye ka boko lok ki jo mukene, pe wabiloko tutwal i kom gin ma watimo nyo i kom mot me tic ma watye kwede. (Car. 27:2) Ma ka meno, wabipwoyo omegiwa ki lumegiwa pi kitgi mabeco, diro ma gitye kwede, ki dong jami mabeco ma gitimo. (Car. 15:23) I ticwa. Lukricitayo ma gitye ki cwiny me mwolo pe giyenyo yweka i lobo man. Gin gikwo kwo ma rwomme lapiny, kun bene gitiyo tic ma dano gicayo wek ominigi kare me tic pi Lubanga Jehovah ki kerogi ducu. (1 Tem. 6:6, 8) Ma dong pire tek loyo, watwero nyuto cwiny me mwolo ki bedo luwiny. Mwolo mitte me ‘winyo lok pa jo ma telowa’ i kacokke ki dok jolo tira ma wanongo ki bot dul pa Jehovah.​—Ibru 13:17.

11. Tit kong gin ma cwiny me kica obedo.

¹¹ Cwiny me kica obedo but mar. Ginacoya waco ni Lubanga Jehovah gin  ki wode Yecu ginyuto cwiny me kica ki mar matut adada. (Luka 1:78; 2 Kor. 1:3; Pil. 1:8) Buk mo acel waco ni nyuto cwiny me kica pe kwako mere bedo ki cwer cwiny pi jo ma gitye ka deno can. Buk-ki bene medde ni bedo ki cwiny me kica “kwako konyo jo mukene” kun itimo gin mo ma loko kwogi wek obed maber. Ki lok ada, ngat ma tye ki cwiny me kica tute matek me nenone ni olo to ekelo alokaloka mo i kwo pa jo mukene.

12. Ngo ma nyuto ni kica omako Yecu i kom jo mukene, dok cwiny me kica omiyo en otimo gin ango?

¹² Yecu onyuto cwiny me kica nining? Kit ma en owinyo kwede ki i cwinye ki dong ticce. Kica omako Yecu i kom jo mukene. I kare ma en oneno lareme Maliam ki jo ma gitye ka koko pi to pa Lajaro, Yecu bene “okok ki pig wange.” (Kwan Jon 11:32-35.) I ngeye, cwiny me kica ma omiyo en ocero wod pa dato mo acel dok aye omiyo en ocero Lajaro. (Luka 7:11-15; Jon 11:38-44) I timo meno, Yecu okonyo Lajaro me bedo ki gen me cito i polo. Con kong, ‘kica omako’ Yecu i kom lwak ma gubino bote. Man omiyo en “opwonyogi ki lok mapol.” (Mar. 6:34) Pwony meno pud dong oloko kwo pa jo ma gujolo ya! Nge ni cwiny me kica ma Yecu obedo kwede-ni onongo pe kwako kit ma en winyo kwede ki i cwinye keken; ento bene omiyo en otelo yo i konyo jo mukene.​—Mat. 15:32-38; 20:29-34; Mar. 1:40-42.

13. Yecu oloko ki jo mukene i yo me kica nining? (Nen cal ma tye i pot karatac 7.)

¹³ Lokke me kica. Cwiny me kica ma Yecu obedo kwede-ni omiyo en oloko ki jo mukene i yo me kica, tutwalle jo ma kiunogi. Lakwena Matayo oloko i kom Yecu kun tiyo ki gin ma kicoyo i Icaya ni: “Pe bituro lagada ma okak, dok pe bineko mac tara ma lyel.” (Ic. 42:3; Mat. 12:20) Yecu oloko i yo ma cuko cwiny jo ma onongo gitye calo lagada ma okak nyo mac tara macok to woko. En otito kwena “me kweyo cwiny jo ma cwinygi cwer.” (Ic. 61:1, NW) En olwongo ‘jo ducu muol ki ma yec onurogi’ me bino bote, kun minigi gen ni ‘gibilimo yweyo i cwinygi.’ (Mat. 11:28-30) En ocuko cwiny lulub kore ni Lubanga paro pi jo ducu ma Giwore, ma i kine tye iye ‘jo matino’ ma kinenogi calo jo ma konygi pe i lobo-ni.​—Mat. 18:12-14; Luka 12:6, 7.

14. Wan watwero bedo ki cwiny me kica i kom jo mukene nining?

¹⁴ Wan waromo lubo lanen pa Yecu i nyuto cwiny me kica nining? Bed ki cwiny me kica. Cwiny ma kit man pe cakke pire kene, ento Baibul wacci omyero watute matek me dongone. ‘Cwiny ma miyo waparo pi can pa luwotwa’ obedo but kit manyen ma Lukricitayo ducu myero guruki. (Kwan Jo Kolocai 3:9, 10, 12.) In itwero bedo ki cwiny me kica i kom jo mukene nining? Yab cwinyi malac. (2 Kor. 6:11-13) Ter iti ka ngat moni tye ka tito kit ma en winyo kwede kacel ki cwercwinye. (Yak. 1:19) Ti ki wi kun ipenye kekeni ni: ‘Ka ce an, onongo abiwinyo nining? Gin ango ma onongo abimito?’​—1 Pet. 3:8.

15. Gin ango ma waromo timone me konyo jo ma gitye ka kumo nyo deno can?

¹⁵ Tic ma nyuto cwiny me kica. Bedo ki cwiny me kica weko wakonyo jo ma  gitye ka kumo nyo deno can. Wan waromo konyo jo magi nining? Jo Roma 12:15 waco ni: “Wukok bene kacel ki jo ma kok.” Jo ma cwinygi otur gimito ni kinyutigi cwiny me kica dok bene gimito larem ma winyo lokgi. Laminwa mo acel ma omege ki lumege gukweyo cwinye i nge to pa nyare owaco ni: “Atye ki pwoc madit tutwal pien lurema gubino dok wakok kacel.” Waromo bene nyuto cwiny me kica ka wamiyo kony bot jo mukene. Tika ingeyo dato mo ma mito ni kiroc ode? Tika tye Lakricitayo mo muteggi ma mito giwot me cito i cokke, i ticwa me pwony, nyo i ot yat? Kony matidi ma wamiyo romo kelo alokaloka madit i kwo pa Lakricitayo mo ma tye i peko. (1 Jon 3:17, 18) Ma dong pire tek loyo, wan waromo nyuto cwiny me kica bot jo mukene ka wanywako i ticwa me pwony ki kerowa ducu. Pe tye gin mo mukene ma pire tek loyo man ma waromo timone me kelo alokaloka i kwo pa jo ma cwinygi atir!

16. Gin ango ma waromo wacone me cuko cwiny jo ma cwinygi otur?

¹⁶ Lok i yo ma nyuto cwiny me kica. Cwiny me kica ma watye kwede pi jo mukene weko ‘wacuku cwiny jo ma cwinygi otur.’ (1 Tec. 5:14) Gin ango ma waromo wacone me cuko cwiny jo ma kit meno? Watwero cuko cwinygi kun wawaco botgi ni watamo dok waparo pigi adada. Waromo bene pwoyogi wek gunen kit mabeco kacel ki kero ma gitye kwede. Watwero poyo wigi ni Jehovah nyikogi cok bot Wode Yecu, ma man tye lanyut ma cimo ni pigi tek bote. (Jon 6:44) Watwero jingo cwinygi ni Lubanga Jehovah paro pi luticce kadi bed ni “cwinygi cwer” nyo “gitye ki arem madwong i cwinygi.” (Jab. 34:18, Baibol pa Katoli) Ka waloko i yo ma nyuto cwiny me kica, man romo cuko cwiny jo ma gimito ni kicuk cwinygi i kare me peko.​—Car. 16:24.

17, 18. (a) Jehovah mito ni luelda guter romine nining? (b) Gin ango ma wabinyamo i pwony ma lubo man?

¹⁷ Jehovah mito ni luelda guter romine i yo ma nyuto ni gitye ki cwiny me kica. (Tic 20:28, 29) Wi luelda myero opo ni obedo ticgi me pwonyo ki dong cuko cwiny romi pa Jehovah. (Ic. 32:1, 2; 1 Pet. 5:2-4) Pi meno, laelda ma tye ki cwiny me kica pe temme me keto dic i kom romi kun como cik nyo tiyo ki bal pa ngat moni wek en oti tic mapol ma kerone pe twero. Ma ka meno, laelda-ni tute matek me konyogi wek gubed ki yomcwiny kun geno ni mar ma gitye kwede pi Jehovah bimiyo gitiyo pire ki cwinygi ducu.​—Mat. 22:37.

¹⁸ Ka nongo watamo i kom mwolo kacel ki cwiny me kica ma Yecu onyuto, man bimiyo wamedde ki lubo kore. I pwony ma lubo man, wabinyamo kit aryo mukene mabeco ma Yecu onyutogi​—tekcwiny ki dong niango.