1, 2. (a) Pingo iye ni Jehovah maro jone? (b) Jehovah ocweyo dano ducu ki cwiny ango?

 PINGO iye ni Jehovah maro jone? Ma peya igamo lapeny meno, nen kong labol magi: Pi mwaki mapol, omege ki lumege gubedo ka waco ki laminwa mo ma nyinge Taylene ni pe myero obed ka keto gingi tutwal i kome kekene. En owaco ni: “Ka ni Jehovah onongo pe mara, ci en onongo pe mina tira teretere.” Brigitte, ma opito lutinone aryo i nge to pa cware owaco ni: “Pito lutino i lobo pa Catan-ni tek ma pe twere, tutwalle ka itye lanyodo acel keken. Ento atye ki gen ni Jehovah mara pien okonya i kare ma atye i peko, dok en pe weko peko diya ma pe aromo kanyone.” (1 Kor. 10:13) Sandra otute ki two mo ma pe cang pi kare malac. I gurewa madit, dako pa omego mo ma ngene adada onyuto cwiny me kica bote. Cwar Sandra owaco ni: “Kadi bed ni onongo pe wangeye ento cwiny me kica ma en onyuto okeliwa yomcwiny. Mar ma omege ki lumege gitye kwede i komwa nyutta ni Jehovah marowa adada.”

² Jehovah ocweyo dano ki cwiny me nyuto mar dok bene gimito ki margi. Cwinywa tur oyotoyot adada ka komwa lit  nyo pi can cente nyo bene ka pe watye ka nongo adwogi maber i ticwa me pwony. Ka wacako bedo ki cwiny ni meno Jehovah pe marowa, ci wiwa myero opo ni piwa tek bote adada dok en ‘omako cingwa tung acuc liking’ kun bene konyowa. Wi Jehovah pe biwil i komwa ka wabedo lugen bote.—Ic. 41:13; 49:15.

3. Gin ango ma twero konyowa me bedo ki gen ni meno Jehovah marowa?

³ Jo ma waloko i komgi malo-ni onongo giye ni Lubanga okonyogi adada i kare me atematema. Wan bene watwero bedo ki gen acel-li. (Jab. 118:6, 7) Pwony man nyamo kit ma mar pa Lubanga nen kwede i (1) cwecce, (2) Lokke, (3) lega, ki dong (4) ginkok. Ka walwodo lok i kom jami mabeco ma Jehovah otimogi, man bikonyowa me dongo pwoc pi mar pa Jehovah.—Kwan Jabuli 77:11, 12.

4. Ngo ma wapwonyo ki i lwodo lok i kom cwec pa Jehovah? (Nen cal ma tye i poto karatac 9.)

⁴ Tika watwero neno kit ma Jehovah marowa kwede ki i kom cwecce? Watwero, pien kit ma Lubanga ocweyo kwede ki jami nyuto marre. (Rom. 1:20) En ocweyo jami ma i lobo-ni i yo ma weko kwo bedo mit dok labongo ayela. Ento, en pe mito ni wakwo keken. Myero wacam wek wamedde ki kwo. Jehovah ocweyo kwayi yen mapat pat i lobo ma gitwero nyako nyiggi me acama. En bene oweko cam tye gin mamit dok kelo yomcwiny bot dano! (Latit. 9:7) Laminwa mo ma nyinge Catherine nongo yom cwiny ki i neno ginacweya, tutwalle i kare me poto kot i lobo Canada. En owaco ni: “Neno jami ducu pud dong mwonya adada—kit ma ature cako twi kwede ki i ngom ki dok kit ma winyi gidwogo kwede ki ma onongo gudak iye, i kingi tye iye lakado nyo akadi ma gicamo cam ki i wang ot me jokon ka ma aketo iye cam pa winyi. Man nyuto ni Jehovah marowa adada pien en weko waneno jami mamwonya kuman.” Wonwa me polo maro cwecce dok mito ni wanong yomcwiny ki iye.—Tic 14:16, 17.

5. Mar pa Jehovah onen nining i kit ma en ocweyo ki dano?

⁵ Jehovah ocweyowa ki kero me tic ki dok me nongo yomcwiny i ticwa. (Latit. 2:24) Mitine tye ni dano gupong lobo, gupur, gulo rec, winyi, ki bene jami mukene ma kwo. (Acak. 1:26-28) Jehovah pud dong marowa ya pien ocweyowa ki kit mabeco ma weko walubo lanenne!—Ep. 5:1.

6. Pingo omyero wabed ki pwoc madit pi Lok pa Lubanga?

⁶ Lubanga onyuto mar madit adada pien ominiwa Lokke. Baibul tittiwa gin ma myero wange i kom Lubanga ki kit ma en tero kwede ki dano. Me labolle, Ginacoya tittiwa kit ma en otero kwede Luicrael ma gubedo ka kwero bedo luwiny teretere. Jabuli 78:38 waco ni: “Kica omako Lubanga i kom lwakke. En oweko balgi, omiyo pe otyekogi woko. Obedo ka juko kinigane pi tyen mapol, pe obedo ka tugo akemone ducu.” Lwodo lok i kom tyeng man romo konyi me bedo ki pwoc i kom mar pa Jehovah ki dok kit ma en paro kwede piri. Bed ki gen ni  meno piri bot Jehovah.—Kwan 1 Petero 5:6, 7.

7. Pingo omyero water Baibul calo gin ma pire tek?

⁷ Omyero water Baibul calo gin ma pire tek pien Lubanga tiyo kwede me lok kwedwa. Lok maber ki dok i yo me kica pire tek pien jingo gen kacel ki mar ma tye i kin lutino ki lanyodogi. Ngo ma Jehovah twero timone piwa? Kadi bed ni peya wanene nyo wawinyo dwane, ento en “loko” kwedwa kun tiyo ki Baibul dok mitte ni wabed luwiny. (Ic. 30:20, 21) Miti pa Jehovah tye me gwoko wan jo ma wadyere bote ki i jami maraco. En bene mito ni wangeye ki dok wagenne.—Kwan Jabuli 19:7-11; Carolok 1:33.

8, 9. Ngo ma Jehovah mito ni wange? Mi labol kun itiyo ki lanen ma tye i Baibul.

⁸ Jehovah mito ni wange ni emarowa dok pe eneno rocwa. En keto cwinye me neno jami mabeco ma watimogi. (2 Tekwaro 16:9) Me labolle, Jehovah oneno gin maber ma Kabaka Yekocapat me Juda otimo. I nino mo acel, Yekocapat onyuto mingo i kare ma oye konyo Kabaka Akab me Icrael wek gilweny me gamo Ramot-gilead ki bot Ciria. Kadi bed ni lunebi 400 ma gin lugoba guwacci Akab ma kit rac-ci biloyo lweny meno, ento Mikaya, lanebi pa Jehovah otito ni kibiloyo Akab woko. Kineko Akab i lweny meno ento Yekocapat obwot. I kare ma en odwogo i Jerucalem, kimiye tira magwar pi ribbe  ki Akab. Kadi bed kumeno, Yeko wod pa Kanani ma lanen-piny owaco bot Yekocapat ni: “Gin maber tye i kin jami ma itiyogi.”—2 Tekwaro 18:4, 5, 18-22, 33, 34; 19:1-3.

⁹ I acakki me loc pa Yekocapat, en ociko lutino ker, Lulevi, ki lulamdog ducu me cito i gangi me Juda wek gupwony jo ducu ki Cik pa Jehovah. Pwony man owoto maber adada ma oweko lobbe ma gurumo ngetgi gucako lworo Jehovah. (2 Tekwaro 17:3-10) Ada, Yekocapat otiyo tic me mingo, ento Jehovah pud oneno jami mabeco ma en otimogi. Labol meno kweyo cwinywa pien i cawa mukene watimo bal pi roc ma watye kwede, ento Jehovah pud bimedde ki marowa ka watimo jami ma yomo cwinye.

10, 11. (a) Pingo watwero tero lega calo mot mua ki bot Jehovah? (b) Lubanga romo gamo legawa nining?

¹⁰ Wego ma lamar ciko ite ka lutinone gimito lok kwede. En keto cwinye me ngeyo gin ma tye i cwinygi pien paro pigi. Wonwa me polo, Jehovah, timo bene kumeno pien winyo lokwa ka walego bote. Lega bot Lubanga Jehovah obedo twon mot madit adada!

¹¹ Watwero lega bot Jehovah i cawa mo keken. En pe oketo kigeng mo keken i komwa. En tye Laremwa ma kare ducu tye atera me winyo lokwa. Taylene, ma waloko i kome malo-ni owacci: “Itwero wacce gin ma tye i cwinyi i cawa mo keken ma imito.” Ka watito bot Lubanga gin mukane i cwinywa, en twero miniwa lagamme kun tiyo ki tyeng mo me Baibul, pwony ma kicoyo i magajinwa, nyo tiyo ki laye lawotwa mo me cuko cwinywa. Jehovah winyo legawa dok niang kit ma wawinyo kwede ki i cwinywa ka iporo ki jo mukene. Kit ma en gamo kwede ki legawa nyuto marra piwa.

12. Pingo omyero walwod lok i kom lega ma kicoyogi i Baibul? Mi labol acel.

¹² Watwero pwonyo jami mapol ki i lega ma kicoyogi i Lok pa Lubanga. I kine mukene, watwero nongo adwogi maber ka wanyamo lega magi i otyeno me woro pi jo me ot. Lwodo lok i kom kit ma lutic pa Jehovah i kare macon gubedo ka lega kwede bot Lubanga ki cwinygi ducu bikonyowa bene me yubo legawa. Me labolle, tam kong kit ma Yona olego kwede i kare ma tye i rec madit. (Yon 1:17–2:10) Nen bene kit ma Solomon olego kwede i kare ma tye ka dyero ot pa Lubanga. (1 Luker 8:22-53) Lwod bene lok i kom lega ma Yecu omiyo macalo lapor-ri. (Mat. 6:9-13) Ma dong pire tek loyo, omyero kare ki kare ‘wami Lubanga onge gin ma wamito’ i lega. Macalo adwogine, “man bimiyo kuc pa Lubanga ma kato ngec pa jo ducu gwoko cwinywu ki tamwu maber.” Pwocwa pi mar pa Jehovah bimedde ki dongo.—Pil. 4:6, 7.

13. Yo ango ma dong oyabbe bot dano ducu macalo adwogi me miyo ginkok?

¹³ Mic me ginkok pa Yecu kimiyo “wek omi wabed kwo.” (1 Jon 4:9) I kare ma lakwena Paulo tye ka lok i kom mar man mamwonya pa Lubanga-ni, en owaco ni: “Kricito oto pi dano ma pe gilworo Lubanga. Kadi pi ngat ma kite atir, bedo tek twatwal bot dano mo me to pire. Gwok nyo ka obed dano ma kite ber, ngat mo twero diyo cwinye  me to pire. Ento Kricito yam oto piwa i kare ma pud wan lubalo; meno nyuto kit mar ma Lubanga marowa kwede.” (Rom. 5:6-8) Mar man madit ma Lubanga onyuto-ni oyabo yo bot dano ducu me bedo ki wat maber ki Jehovah.

14, 15. Adwogi maber ango ma ginkok miyo bot (a) Lukricitayo ma kiwirogi? (b) jo ma gitye ki gen me kwo i lobo?

¹⁴ Pi ginkok-ki, Lukricitayo manok keken aye giwinyo ki i cwinygi mar ma Jehovah onyuto-ni i yo madok pat. (Jon 1:12, 13; 3:5-7) Pien kiwirogi ki cwiny maleng, gin gidoko “litino pa Lubanga.” (Rom. 8:15, 16) Paulo owaco ni Lukricitayo ma kiwirogi ‘kicerogi woko ka dong kiketogi i kom ker i polo kacel ki Kricito Yecu.’ (Ep. 2:6) Gin gitye ki mot man pien ‘gimiyogi cwiny maleng ma con Lubanga ociko pire-ni, wek obed macalo lanen ma mere ma dong giketo i komgi. En aye gin ma gijengo ma nyuto ni gibinongo gin ducu,’ ma meno aye ‘gin ma gigeno ma gikano i polo pigi.’—Ep. 1:13, 14; Kol. 1:5.

¹⁵ Pi lwak jo mapol ma giketo niyegi i kom ginkok-ki, gin gitye ki kare me bedo lurem Jehovah ki gen me doko litinone ki dong kwo i Paradic ma kiciko pire-ni i lobo kany. Pi meno, mic me ginkok nyuto mar ma Jehovah tye kwede pi dano. (Jon 3:16) Ka watye ki gen me kwo i lobo kany pi naka kun wamedde ki tic pi Jehovah ki cwinywa ducu, man miyo wabedo labongo akalakala ni en biweko wabedo ki kwo mayot i lobo manyen. Pud dong pire tek ya me tero ginkok macalo lanyut me mar madit ma Lubanga tye kwede piwa!

16. Lwodo lok i kom mar ma Jehovah tye kwede piwa konyowa nining?

¹⁶ Pe watwero tito jami mapol ma Jehovah otimogi ma ginyuto marre piwa. Daudi ma ocoyo Jabuli owero ni: “Ai Lubanga, tammi beco bota kuman! Gin ducu mono gitye adi! Ka awacci akwangi akwana, gipol gikato kweyo woko.” (Jab. 139:17, 18) Myero wawek tam magi omi wadong miti matut me maro Jehovah, me nyuto pwocwa i kom kit ma en paro kwede piwa i yo mapat pat. Pi man dong, omyero watute me tic pi Jehovah ki cwinywa ducu.

17, 18. I yo mene ma watwero nyuto kwede marwa pi Lubanga?

¹⁷ Tye yo mapol ma watwero nyuto kwede ni wamaro Jehovah. Me labolle, wanyuto mar pi Lubanga ki luwotwa ka wanywako i tic me tito kwena me Ker-ri ki mit kom. (Mat. 24:14; 28:19, 20) Wanyuto ni wamaro Jehovah ka waciro atematema ki bene wagwoko gennewa. (Kwan Jabuli 84:11; Yakobo 1:2-5.) Ka watye i atematema mukato kakare, watwero bedo ki gen ni meno Lubanga ngeyo pekowa dok bene en bikonyowa pien piwa tek bote.—Jab. 56:8.

¹⁸ Marwa pi Jehovah miyo walwodo lok i kom cwecce kacel ki jami mukene mamwonya ma en otimogi. Wanyuto mar pi Lubanga kacel ki Lokke ka wakwano Baibul kare ki kare i yo matut. Mar pi Jehovah weko wanyikke bote i lega. Dok bene marwa pi Lubanga dongo matut ka walwodo lok i kom ginkok ma en omiyo pi balwa. (1 Jon 2:1, 2) Magi aye tyen lok mogo manok ma giweko wamaro Jehovah macalo adwogi me marre piwa.