Kutu pɛli ɔmɛ gblaa he wami nɛ ngɛ pu ɔ mi, he wami nɛ ɔ yeɔ bua lɛ nɛ e nyɛɔ nɛ e te ɔ. Se ke pu tsui loo afua wo po ɔ, kutu nɛ ɔ nyɛɔ teɔ mla pe kutu kpahi. Mɛni haa nɛ e nyɛɔ peeɔ jã?

 Mo Susu He Nɛ O Hyɛ: Loko kutu henɔ slɔɔtohi tsuo ma nyɛ maa te ɔ, ja a gbɛ a pɛli ɔmɛ a mi kɛ he pu la bɔɔ loko a náa he wami kɛ teɔ. Se kutu he nɔ nɛ ɔ lɛɛ e be jã. E gbɛɔ e pɛli ɔmɛ a mi kaa bɔ nɛ ningma okadi V ngɛ ha a. Níhi a mi hlami ha nɛ a na kaa kutu henɔ nɛ ɔ gbɛɔ e pɛli ɔmɛ a mi kaa ningma okadi V ɔ bɔ nɛ pee nɛ e nyɛ nɛ e ná pu la babauu ɔ kɛ te mla. Enɛ ɔ yeɔ bua nɛ pu la fuu sɛɔ e pɛli ɔmɛ a mi mla nɛ e náa he wami kɛ teɔ.

 Níhi a mi hlali nɛ a ngɛ University of Exeter, England ɔ bɔ mɔde kaa a maa pee solar panel nɛ e nyɛ nɛ e gbla pu ɔ mi he wami ɔ fuu kaa bɔ nɛ kutu nɛ ɔ pɛli ɔ nyɛɔ peeɔ ɔ. Benɛ a gbe nya a, a yɔse kaa solar panel nɛ a hyɛ kutu ɔ pɛli ɔ nɔ kɛ pee ɔ gblaa pu ɔ he wami ɔ wawɛɛ pe ní nɛmɛ nɛ a ngɛ momo ɔ.

 Níhi a mi hlali ɔmɛ yɔse hu kaa kutu nɛ ɔ pɛli ɔmɛ a nɔ kpɛɔ wawɛɛ. Kutu nɛ ɔ pɛli ɔ nɛ a pee níhi a mi hlami kɛ kɔ he ɔ ha nɛ a nyɛ nɛ a pee solar panel nɛ a mi jiɔ we nɛ a gblaa pu la wawɛɛ hulɔ. Enɛ ɔ ha nɛ ní lelɔ Richard ffrench-Constant nɛ e piɛɛ níhi a mi hlali ɔmɛ a he ɔ de ke, ‘kutu nɛ ɔ ji lohwe ko nɛ a to e he blɔ nya saminya konɛ e nyɛ nɛ e gbla pu ɔ he wami ngɛ blɔ nɛ e hi wawɛɛ nɔ.’

 Kɛ o susu kɛɛ? Anɛ bɔ nɛ kutu nɛ ɔ gbɛɔ e pɛli ɔ mi ha a ba gu aloo nɔ ko lɛ bɔ?