La 10:1-18
ל [Lamed]
10 Oo Yehowa, mɛni he je nɛ o daa si ngɛ se lokoo ɔ?
Mɛni he je nɛ o laa o he ngɛ haomi behi a mi ɔ?
2 He nɔ womi haa nɛ yiwutsotsɛ fieeɔ nɔ nɛ be yemi kɛ bualɔ ɔ se,Se gahi nɛ e tsɔɔ ɔ maa du lɛ nitsɛ.
3 Ejakaa yiwutsotsɛ kɛ níhi nɛ lɛ nitsɛ e suɔ* ɔ fĩaa,Nɛ e jɔɔ nɔ nɛ hɛ tsuɔ;*נ [Nun]E bui Yehowa.
4 Yiwutsotsɛ woɔ e he nɔ, nɛ e hla we níhi a mi;E susumi tsuo ji: “Mawu ko be.”
5 E yeɔ manye ngɛ nɔ́ fɛɛ nɔ́ nɛ e peeɔ ɔ mi,Se e nui o kojomi ɔmɛ a sisi;E yeɔ e he nyɛli ɔmɛ tsuo a he fɛu.*
6 E deɔ ngɛ e tsui mi ke: “I be mimiɛe* gblegbleegble;Ngɛ yi nɔ fɛɛ yi nɔ nɛ maa ba a mi ɔ,I be amanehlu nae gblegbleegble.”
פ [Pe]
7 Gbiɛmi, lakpa, kɛ nɔ he gbeye womi munyuhi hyi e nya mi tɔ;Haomi kɛ munyuhi nɛ yeɔ nɔ awi ngɛ e lilɛ sisi.
8 E woɔ ka ngɛ kɔpehi a mi;E jeɔ e laami he ɔ kɛ gbeɔ nɔ nɛ sane ko be e he.
ע [Ayin]
E hɛngmɛ poɔ si kaa e maa na nɔ ko nɛ e ní ngɛ mɔbɔ nɛ́ e ye lɛ awi.
9 E mlɛɔ ngɛ e laami he ɔ kaa jata ngɛ e hi he.*
E mlɛɔ konɛ e nu nɔ nɛ be yemi kɛ bualɔ ɔ.
E nuɔ nɔ nɛ be yemi kɛ bualɔ ɔ ke e nga e ya a nya pɛ.
10 E tsɛ̃ɛɔ nɔ nɛ e nine su e nɔ ɔ kɛ fɔɔ si;Nihi nɛ a ní ngɛ mɔbɔ ɔ nɔɔ e dɛ mi.
11 E deɔ ngɛ e tsui mi ke: “Mawu hɛ je nɔ.
E je e hɛ.
E yɔse we kɔkɔɔkɔ.”
ק [Kof]
12 Oo Yehowa, tee si. Ao Mawu, wo o nine nɔ.
O hɛ nɛ ko je nihi nɛ a be yemi kɛ bualɔ ɔ nɔ.
13 Mɛni he je nɛ yiwutsotsɛ bui Mawu ɔ?
E deɔ ngɛ e tsui mi ke: “O kɛ mi be yee.”
ר [Resh]
14 Se o naa haomihi kɛ nyagbahi.
O hyɛɛ, nɛ o peeɔ he nɔ́ ko.
O ngɔ lɛ nihi nɛ a ní ngɛ mɔbɔ ɔ baa;Mo ji awusahi* a yemi kɛ bualɔ.
ש [Shin]
15 Moo ku yiwutsotsɛ kɛ nɔmlɔ yayami ɔ nine,Konɛ ke o ngɛ e yi wu tso ní peepee ɔ hlae ɔ,O ko na hu.
16 Yehowa ji Matsɛ kɛ yaa neneene.
Je ma amɛ a hɛ mi kpata ngɛ zugba a nɔ.
ת [Taw]
17 Oo Yehowa, nihi nɛ a he jɔ ɔ, o maa nu a ní bimi.
O ma ha nɛ a tsui ma ná he wami, nɛ o maa bu mɛ tue saminya.
18 O maa ye dami sane kɛ ha nihi nɛ a be tsɛmɛ kɛ nihi nɛ a hao,Bɔ nɛ pee nɛ nɔmlɔ adesa* nɛ zu a kɛ bɔ lɛ ɔ nɛ e ko wo a he gbeye hu.
Sisi Ningmahi
^ Aloo “níhi nɛ e klaa suɔ.”
^ Baiblo komɛ de ke “nɔ nɛ hɛ tsuɔ ɔ jɔɔ lɛ nitsɛ e he.”
^ Aloo “E peeɔ pupuupu ngɛ e he nyɛli ɔmɛ tsuo a nɔ.”
^ Aloo “I be dedee.”
^ Aloo “ngɛ e hue kpɔ mi.”
^ Ngɛ Hebri gbi mi ɔ, “bi nɛ e be tsɛ ɔ.”
^ Ngɛ Hebri gbi mi ɔ, “adesa nɛ gboɔ.”
