La 101:1-8
La nɛ David po.
101 Ma la suɔmi nɛ se pui kɛ dami sane yemi he la.
Oo Yehowa, ma la yi jemi lahi* ha mo.
2 Ma pee ye ní ngɛ hɛ si kami mi, nɛ i be hae nɛ sane ko nɛ hi ye he.*
Mɛni be o maa ba ye ngɔ?
I kɛ tsui klɔuu maa nyɛɛ ngɛ ye we ɔ mi.
3 I be yaka nɔ́ ko ngɔe kɛ ma ye hɛ mi.
Nihi nɛ a gba kɛ je nɔ́ nɛ da peemi he ɔ, i hiɔ a ní peepee ɔmɛ;I kɛ mɛ be nɔ́ ko peemi.*
4 I kɛ nɔ fɛɛ nɔ nɛ e tsui dɛ ɔ he kɛ;I be nɔ́ yaya nɔ kplɛɛe.*
5 Nɔ fɛɛ nɔ nɛ e gbeɔ e nyɛmi he guɛ ngɛ laami mi ɔ,Ma ha nɛ́ e ma e nya.*
Nɔ fɛɛ nɔ nɛ e ngɛ he nɔ womi hɛngmɛ kɛ he nɔ womi tsui ɔ,I be lɛ hɛ mi hae.
6 Ma ye bua anɔkualetsɛmɛ nɛ a ngɛ zugba a nɔ ɔ,Konɛ a kɛ mi nɛ hi si.
Nɔ nɛ piami ko be e he ɔ,* lɛ nɛ e ma sɔmɔ mi.
7 Nɔ sisilɔ ko be ye we ɔ mi hie,Nɛ lakpatsɛ ko be si dae ngɛ ye hɛ mi.
8 Daa mɔtu ɔ, ma ha nɛ yiwutsotsɛmɛ tsuo nɛ a ngɛ zugba a nɔ ɔ ma ma a nya,*Nɛ ma poo yayami peeli tsuo ngɛ Yehowa ma a mi kɛ pue he.
Sisi Ningmahi
^ Aloo “ma fia la.”
^ Aloo “nɛ ma hi si ngɛ anɔkuale yemi mi.”
^ Aloo “A ní peepee ɔmɛ mɛtɛ we ye he.”
^ Ngɛ Hebri gbi mi ɔ, “I be nɔ́ yaya lee.”
^ Aloo “Ma kpata e hɛ mi.”
^ Aloo “Nɔ nɛ nyɛɛɔ ngɛ anɔkuale yemi mi ɔ.”
^ Aloo “ma kpata yiwutsotsɛmɛ tsuo nɛ a ngɛ zugba a nɔ ɔ a hɛ mi.”
