La 104:1-35
104 Ha nɛ ma je* Yehowa yi.
Oo Yehowa ye Mawu, o kle wawɛɛ.
Agboje* kɛ afɛu ha o he.
2 La ha o he kaa tade;O gbla hiɔwe ɔmɛ a mi kaa bo nɛ a kɛ peeɔ bo tsu.
3 E ngɔ tsohi kɛ pee e hi he ngɛ nyuhi nɛ ngɛ hiɔwe ɔ nɔ,*E hiɔ bɔku ɔmɛ a nɔ kaa e ta zugba lɛ,Nɛ e yaa nɛ e baa ngɛ kɔɔhiɔ pɛli ɔmɛ a nɔ.
4 E pee e bɔfo ɔmɛ mumihi,E pee e sɔmɔli ɔmɛ la nɛ sãã nɔ́.
5 E ngɔ zugba a kɛ ma e sisi tomi ɔ nɔ;A be jee kɛ je e blɔ he* gblegbleegble.
6 O ngɔ nyuhi nɛ a mi kuɔ kɛ ha he kaa tade.
Nyu ɔmɛ ha yoku ɔmɛ a nɔ.
7 Benɛ o wo gbi kɛ wo mɛ ɔ, a tu fo;O hiɔwe simi ɔ ha nɛ a ye gbeye nɛ a tu fo
8 —Yokuhi kuɔ, nɛ dɔgbahi kplee—Kɛ ya he nɛ o to kɛ ha mɛ ɔ.
9 O to huzu nɛ́ a ko be he,Konɛ a ko ha zugba a nɔ hu gblegbleegble.
10 E haa nɛ nyu hɛngmɛhi beɔ kɛ yaa dɔgba amɛ a mi;*A beɔ ngɛ yoku ɔmɛ a kpɛ.
11 A haa nga mi lohwe awi yeli tsuo nyu;Nga mi tejihi nuɔ kɛ gbeɔ a kuma.
12 Lohwe pɛlitsɛmɛ pee a tsuhi ngɛ tso kɔnihi a nɔ ngɛ pa amɛ a tue;A laa ngɛ tso kɔni kusuu ɔmɛ a mi.
13 E pueɔ yoku ɔmɛ a nɔ nyu kɛ jeɔ e hiɔwe tsu ɔmɛ a mi.
Yiblii nɛ jeɔ o ní tsumi ɔmɛ a mi ɔ haa nɛ zugba a tɔɔ.
14 E haa nɛ nga puɛɔ kɛ haa nahi,Nɛ níhi puɛɔ kɛ haa adesahi,Konɛ a ná niye ní kɛ je zu mi,
15 Kɛ wai nɛ haa nɛ adesa tsui nyaa,Nu nɛ haa nɛ adesa he womi nɔ peeɔ tlotlootlo,Kɛ niye ní nɛ haa nɔmlɔ adesa* náa he wami.
16 Yehowa tso ɔmɛ naa nyu babauu,Lebanon seda tso ɔmɛ nɛ e du ɔ,
17 Lejɛ ɔ nɛ lohwe pɛlitsɛmɛ peeɔ tsuhi ngɛ.
Aklawa we mi ji junipa tsohi a mi.
18 Yoku gagaagahi a nɔ lɛ yoku nɔ apletsihi hiɔ;Tɛsa nɔ kpihi a wesa he ji tɛsahi a kpɛ.
19 E pee nyɔhiɔ ɔ konɛ e kadi behi;Pu ɔ le be tutuutu nɛ e sa kaa e ya nɔ si.
20 O haa nɛ diblii woɔ, nɛ je jɔɔ,Nɛ hue tso mi lohwe awi yeli tsuo jeɔ kpo nɛ a ya nyɛɛɔ.
21 Jatahi* huãã kɛ daa de,Nɛ a hlaa a niye ní kɛ jeɔ Mawu ngɔ.
22 Ke pu te si ɔ,A kpaleɔ a se, nɛ a ya hwɔɔ a muɔhi a mi.
23 Adesa jeɔ kpo kɛ yaa e ní tsumi he,Nɛ e tsuɔ ní kɛ ya siɔ gbɔkuɛ.
24 Oo Yehowa, hyɛ bɔ nɛ o ní tsumi ɔmɛ hiɛ ha!
Nile lɛ o kɛ pee mɛ tsuo.
Zugba a hyi tɔ kɛ níhi nɛ o pee.
25 Wo ɔ ji nɛ ɔ nɛ, e kle agbo nɛ e bli gbajaa,Níhi nɛ wami ngɛ a mi nɛ a be nyɛe maa kane yaa nɛ a baa ngɛ mi, ní nyafinyafihi kɛ ní nguanguahi tsuo.
26 Melehi guɔ nɔ,Nɛ o bɔ Leviatan* kaa e fiɛ ngɛ mi.
27 Mɛ tsuo a hyɛɔ mo blɔKonɛ o ha mɛ niye ní ngɛ be nya.
28 Nɔ́ nɛ o ha mɛ ɔ, lɔ ɔ lɛ a yeɔ.
Ke o bli o dɛ mi ɔ, a tɔɔ kɛ ní kpakpahi.
29 Ke o ngɔ o hɛ mi kɛ laa a, a haoɔ.
Ke o ngɔ a mumi ɔ, a gboɔ nɛ a kpaleɔ kɛ yaa zu mi.
30 Ke o tsɔ o mumi ɔ kɛ ho ɔ, o kɛ bɔɔ níhi,Nɛ o haa zugba a nɔ peeɔ ehe.
31 Yehowa hɛ mi nyami ɔ maa hi si kɛ maa ya neneene.
Yehowa ma nya ngɛ e ní tsumi ɔmɛ a mi.
32 Ke e hyɛ zugba a, zugba a hosoɔ;E taa yoku ɔmɛ a he, nɛ a jeɔ lasuku.
33 Ma la ha Yehowa ye wami ligbi ɔ tsuo;Ma la yi jemi lahi* kɛ ha ye Mawu ɔ be abɔ nɛ i ngɛ wami mi ɔ.
34 Ha nɛ ye susumihi nɛ sa e hɛ mi.*
Ma nya ngɛ Yehowa mi.
35 Yayami peeli maa laa ngɛ zugba a nɔ,Nɛ yiwutsotsɛmɛ be si hie hu.
Ha nɛ ma je* Yehowa yi. Nyɛ je Yah yi!*
Sisi Ningmahi
^ Aloo “ye klaa nɛ je.”
^ Aloo “Bumi.”
^ Ngɛ Hebri gbi mi ɔ, “ngɛ nyu ɔmɛ a mi.”
^ Aloo “E be mimiɛe.”
^ Aloo “dɔ ɔmɛ a nɔ.”
^ Ngɛ Hebri gbi mi ɔ, “Kɛ abolo nɛ haa nɔmlɔ adesa tsui.”
^ Aloo “Jata ku wawi kɛ a kuɛ he bwɔmi.”
^ Aloo “Ma fia la.”
^ Baiblo komɛ de ke “Ye yi mi tɛ nɛ i pueɔ ngɛ e he ɔ nɛ pee bua jɔmi.”
^ Aloo “ye klaa nɛ je.”
^ Aloo “Haleluyah!” “Yah” ji biɛ Yehowa a kpiti pomi.
