La 140:1-13
Kɛ ha la nɔ hyɛlɔ ɔ. La nɛ David po.
140 Oo Yehowa, mo kpɔ̃ mi kɛ je nimli yayamihi a dɛ mi;Moo po ye he piɛ ngɛ basabasa peeli a he,
2 Ngɛ nihi nɛ a toɔ ga yaya ngɛ a tsui mi,Nɛ́ a woɔ pɛ daa ligbi ɔ a he.
3 A lilɛ yeɔ nɔ awi kaa sinɔ;Sinɔ duɔtsɛmɛ a duɔ ngɛ a nya mi. (Sela)
4 Oo Yehowa, moo po ye he piɛ kɛ je yiwutsotsɛmɛ a he;Moo bu ye he ngɛ basabasa peeli a he,Ni nɛmɛ nɛ a toɔ ga konɛ a tsɛ̃ mi kɛ fia si ɔ.
5 He nɔ woli tsɔɔ mi klama kɛ laa;A kɛ kpãhi woɔ ya ngɛ blɔ tue.
A tsɔɔ mi klamahi. (Sela)
6 I deɔ Yehowa ke: “Mo ji ye Mawu.
Oo Yehowa, moo bu pɛɛ nɛ i ngɛ mo kpae kaa o ye bua mi ɔ tue.”
7 Oo Nyɔmtsɛ Matsɛ Yehowa, ye Yi Wami Helɔ nɛ he wa,O buɔ ye yi he ngɛ ta ligbi nɔ.
8 Oo Yehowa, ko ha yiwutsotsɛmɛ níhi nɛ a suɔ.
Ko ha nɛ a ga tsɔmi ɔmɛ nɛ ye manye konɛ a ko wo a he nɔ. (Sela)
9 Nihi nɛ a bɔle mi kɛ kpe ɔ,Ní yayahi nɛ mɛ nitsɛmɛ a de kɛ a nya a nɛ bu a yi.
10 La ngu hɛuu nɛ́ nɛ kɛ pue a nɔ.
A tsɛ̃ mɛ kɛ pue la mi,A tsɛ̃ mɛ kɛ pue muɔhi nɛ a mi kuɔ mi,* konɛ a ko te si hu gblegbleegble.
11 Nɔ he guɛ gbelɔ nɛ́ e ko ná hi he ngɛ zugba a nɔ.
Nɔ́ yayami nɛ fiee basabasa peeli a se nɛ e kpata a hɛ mi.
12 I le kaa Yehowa ma fã nihi nɛ a ní ngɛ mɔbɔ ɔ a he,Nɛ e maa ye dami sane ha ohiatsɛmɛ.
13 Niinɛ, dali maa ngɔ sina kɛ ha o biɛ ɔ;Nihi nɛ a da a maa hi o hɛ mi.
Sisi Ningmahi
^ Aloo “nyu muɔhi a mi.”
