La 24:1-10
-
Matsɛ nɛ e hɛ mi ngɛ nyami ɔ sɛ agbo ɔmɛ a mi
-
“Yehowa nɔ́ ji zugba a” (1)
-
La nɛ David po.
24 Yehowa nɔ́ ji zugba a kɛ nɔ́ fɛɛ nɔ́ nɛ ngɛ nɔ ɔ,E nɔ́ ji zugba nɛ baa ní ɔ kɛ nihi nɛ a ngɛ nɔ ɔ tsuo.
2 Ejakaa e to zugba a sisi saminya ngɛ wo ɔ* nɔ,Nɛ e kɛ ma si kpɛii ngɛ pahi a nɔ.
3 Mɛnɔ maa kuɔ kɛ ya Yehowa yoku ɔ nɔ,Nɛ mɛnɔ maa da si ngɛ e he klɔuklɔu ɔ?
4 Nɔ fɛɛ nɔ nɛ e nine he tsɔ, nɛ́ e tsui mi hu tsɔ,Nɛ́ e kɛ ye biɛ* kã we lakpa kita,Nɛ́ e kã we kita kɛ sisi nɔ hulɔ.
5 Yehowa maa jɔɔ lɛ,Nɛ Mawu nɛ heɔ e yi wami ɔ maa bu lɛ dalɔ.*
6 Ni nɛ ɔmɛ ji yi nɔ nɛ hlaa e se blɔ,Nihi nɛ hlaa kaa a maa na o hɛ mi, Oo Yakob Mawu. (Sela)
7 Nyɛ agbohi, nyɛ wo nyɛ yi nɔ;Nyɛ blema sinyahi, nyɛ bli,*Konɛ Matsɛ nɛ e hɛ mi ngɛ nyami ɔ nɛ sɛ mi!
8 Mɛnɔ ji Matsɛ nɛ e hɛ mi ngɛ nyami nɛ ɔ?
Lɛ ji Yehowa, nɔ nɛ e he wa wawɛɛ ɔ,Lɛ ji Yehowa, tatsɛ kpanaa a.
9 Nyɛ agbohi, nyɛ wo nyɛ yi nɔ;Nyɛ blema sinyahi, nyɛ bli,Konɛ Matsɛ nɛ e hɛ mi ngɛ nyami ɔ nɛ sɛ mi!
10 Mɛnɔ ji kikɛmɛ a Matsɛ nɛ e hɛ mi ngɛ nyami nɛ ɔ?
Lɛ ji Yehowa tabohiatsɛ ɔ—Matsɛ nɛ e hɛ mi ngɛ nyami ɔ. (Sela)
Sisi Ningmahi
^ Ngɛ Hebri gbi mi ɔ, “wohi a.”
^ Aloo “ye klaa,” nɛ ji Yehowa wami nɛ nɔ ko kɛ ma kã kita.
^ Aloo “maa ye dami sane ha lɛ.”
^ Aloo “nyɛɛ te si.”
