La 28:1-9
-
A bu la polɔ ɔ sɔlemi tue
-
“Yehowa ji ye he wami kɛ ye tsɛ̃i” (7)
-
David la.
28 Oo Yehowa, ye Tɛsa, mo lɛ i yaa nɔ nɛ i tsɛɔ;Koo tsi o tue kɛ wo mi.
Ke o pui ye nya mi ɔ,Ma pee kaa nihi nɛ a gbo ɔ.*
2 Ke i plɛ ye hɛ mi kɛ tsɔɔ he nɛ o we klɔuklɔu ɔ se tsu ɔ ngɛ ɔ nɛ i wo ye nine nɔ,Nɛ i fo ya kɛ tsɛ mo ɔ, moo bu ye pɛɛ kpami ɔ tue,
3 Koo gbla mi kɛ piɛɛ yiwutsotsɛmɛ, nɛ ji nihi nɛ a peeɔ níhi nɛ yeɔ nɔ awi ɔ a he kɛ ho,Nihi nɛ a kɛ a nyɛmi nɔmlɔ tuɔ tue mi jɔmi munyuhi, se a tsui mi hyi tɔ kɛ ní yayamihi ɔ.
4 Moo wo mɛ hiɔ ngɛ a ní peepee ɔmɛ a he,Ngɛ ní yayamihi nɛ a peeɔ ɔ nya.
Moo wo mɛ hiɔ ngɛ a nine nya ní tsumi ɔmɛ a he,Ngɛ níhi nɛ a pee ɔmɛ a nya.
5 Ejakaa a kɛ a juɛmi yɛ níhi nɛ Yehowa pee ɔmɛ a nɔ,Aloo e nine nya ní tsumi ɔmɛ a nɔ.
E maa ku mɛ kɛ pue si, nɛ e be mɛ fiae kɛ ma si.
6 A je Yehowa yi,Ejakaa e nu pɛɛ nɛ i kpa lɛ kaa e ye bua mi ɔ.
7 Yehowa ji ye he wami kɛ ye tsɛ̃i;I ngɔ ye hɛ kɛ fɔ e nɔ kɛ ye tsui tsuo.
E yeɔ bua mi, nɛ ye tsui nyaa,Lɔ ɔ he ɔ, ma la kɛ je e yi.
8 Yehowa ji he wami kɛ ha e we bi;E ji he piɛ pomi he, nɛ e heɔ nɔ nɛ e pɔ lɛ nu ɔ yi wami.
9 Mo he o we bi ɔmɛ a yi wami, nɛ́ o jɔɔ o weto ní ɔ.
Moo hyɛ a nɔ kaa o tohi, nɛ́ o hɛɛ mɛ ngɛ o kɔni bɔkɔ mi kɛ ya neneene.
Sisi Ningmahi
^ Ngɛ Hebri gbi mi ɔ, “nihi nɛ a yaa yɔkɔ mi ɔ.”
