La 33:1-22
33 Nyɛ nihi nɛ nyɛ peeɔ nɔ́ nɛ da, nyɛ he ose ngɛ níhi nɛ Yehowa pee ɔ he je.
E da blɔ kaa dali ma je e yi.
2 Nyɛɛ ngɔ kpã saku kɛ na Yehowa si;Nyɛɛ ngɔ kpã nyɔngma saku kɛ la yi jemi lahi* ha lɛ.
3 Nyɛ la la ehe ha lɛ;Nyɛɛ kɛ he bemi nɛ fia kpã saku ɔmɛ, nɛ nyɛ he ose.
4 Ejakaa Yehowa munyu ɔ da,Nɛ nɔ́ fɛɛ nɔ́ nɛ e peeɔ ɔ, a ma nyɛ maa fĩa kɛ fɔ nɔ.
5 E suɔ nɔ́ nɛ da kɛ dami sane yemi.
Yehowa suɔmi nɛ se pui ɔ hyi zugba a nɔ tɔ.
6 Yehowa munyu nya nɛ a pee hiɔwe ɔ,Nɛ mumi nɛ je e nya mi ɔ nya nɛ a pee nɔ́ fɛɛ nɔ́ nɛ ngɛ hiɔwe ɔ.*
7 E buaa wo ɔ nya kaa nyu nɛ a ngɔ gbogbo kɛ tsi lɛ blɔ;E ngɔɔ nyu babauu nɛ pee hamahama a kɛ toɔ nito hehi.
8 Zugba a tsuo nɛ ye Yehowa gbeye.
Nihi nɛ a ngɛ zugba a nɔ ɔ nɛ a ye lɛ gbeye.
9 Ejakaa e tu munyu, nɛ níhi ba;E fã nɛ níhi da si kpɛii.
10 Yehowa puɛ je ma amɛ a ga tsɔmi ɔmɛ;E puɛ ma amɛ a yi mi tomi* ɔmɛ.
11 Se yi mi kpɔhi nɛ Yehowa mwɔ ɔ* maa hi si kɛ ya neneene;Níhi nɛ e ma nya si ngɛ e tsui mi ɔ maa hi si yi nɔhi tsuo.
12 Ma nɛ Yehowa ji a Mawu ɔ ngɛ bua jɔmi,Nihi nɛ e ngɔ kɛ pee lɛ nitsɛ e weto ní ɔ ngɛ bua jɔmi.
13 Yehowa maa e yi si kɛ hyɛɛ zugba;E naa nimli a bimɛ tsuo.
14 E ngɛ e hi he ɔ,Nɛ e hyɛɛ nihi nɛ a ngɛ zugba a nɔ ɔ.
15 Lɛ nɛ e peeɔ nɔ fɛɛ nɔ tsui;E hyɛɛ a ní tsumi ɔmɛ tsuo a mi.
16 Tabo ngua be nyɛe ma he matsɛ ko matsɛ ko yi wami;Pi he wami ngua nɛ nyumu he walɔ ngɛ ɔ nɛ heɔ e yi wami.
17 Ke o ngɔ o hɛ kɛ fɔ okpɔngɔ nɔ kaa e ma he o yi wami ɔ,* o sisi o he;E he wami ngua a be nyɛe ma kpɔ̃ mo.
18 Hyɛ! Yehowa hɛngmɛ ngɛ nihi nɛ a yeɔ lɛ gbeye ɔ a he,Nihi nɛ hyɛɛ e suɔmi nɛ se pui ɔ blɔ ɔ, e hyɛɛ a nɔ,
19 Konɛ e kpɔ̃ mɛ* kɛ je gbenɔ mi,Nɛ́ e baa a yi ngɛ hwɔ be mi.
20 Wa* ngɛ Yehowa blɔ hyɛe.
Lɛ ji wa yemi kɛ bualɔ kɛ wa tsɛ̃i.
21 Wa tsui nyaa ngɛ e mi,Ejakaa wa ngɛ hɛ kɛ nɔ fɔmi ngɛ e biɛ klɔuklɔu ɔ mi.
22 Oo Yehowa, o suɔmi nɛ se pui ɔ nɛ hi wa nɔ,Be mi nɛ wa yaa nɔ nɛ wa hyɛɛ mo blɔ ɔ.
Sisi Ningmahi
^ Aloo “kɛ fia la.”
^ Ngɛ Hebri gbi mi ɔ, “nɛ a pee hiɔwe tabo ɔ tsuo.”
^ Aloo “a susumi.”
^ Aloo “Se Yehowa yi mi tomi.”
^ Aloo “e ma ha nɛ o ye kunimi ɔ.”
^ Aloo “a klaa.”
^ Aloo “Wa klaa.”
