La 38:1-22
La nɛ David po, e ji kaimi la.*
38 Oo Yehowa, ko kã ye hɛ mi ngɛ o we abofu ɔ mi,Nɛ ko tsɔse mi ngɛ o mi mi la a mi hulɔ.
2 Ejakaa o kɛ̃ɛ̃ mi bi ɔmɛ gbu kɛ sɛ ye mi tɔɔ,Nɛ o nine nyɛɔ ye nɔ.
3 O we abofu ɔ he je ɔ, ye nɔmlɔ tso ɔ tsuo be he wami.*
Ye yayami ɔ he je ɔ, i be tue mi jɔmi.*
4 Ejakaa ye tɔmi ɔmɛ laa ye yi;A ngɛ kaa tlomi nɛ jiɔ, a jiɔ tsɔ pe bɔ nɛ ma nyɛ ma tloo.
5 Ye kuasia jemi ɔ he je ɔ,Ye pa amɛ sa, nɛ a ngɛ fu jee.
6 I hao nɛ ye ní pee mɔbɔ wawɛɛ nitsɛ;I kɛ aywilɛho yemi nyɛɛ kɛ bɔle si ligbi ɔ tsuo.
7 Ye he mi ngɛ mi sããe;*Ye nɔmlɔ tso ɔ tsuo be he wami.
8 Ye nɔmlɔ tso ɔ nui nɔ́ he hu, nɛ i kuɔ kulaa;Ye tsui nɛ hao ɔ he je ɔ, i kɛmɛɔ wawɛɛ.*
9 Oo Yehowa, níhi tsuo nɛ i suɔ ɔ, o le,Nɛ ye huu peemi ɔ hu, o nu.
10 Ye tsui siɔ wawɛɛ, ye he wami ta,Nɛ ye hɛngmɛ hyɛ we nɔ́ hu.
11 Ye huɛmɛ kɛ ye nyɛmimɛ kua mi ngɛ ye hiɔ ɔ he je,Nɛ nihi nɛ a hɛ kɛ su ye he wawɛɛ ɔ po tsɔ a he kɛ je ye he.
12 Nihi nɛ a ngɛ hlae nɛ a ngɔ ye wami ɔ* tsɔɔ mi klama;Nihi nɛ a ngɛ mɔde bɔe kaa a maa ye mi awi ɔ tuɔ blɔ nɔ nɛ a maa gu kɛ pee jã a he munyu;A tuɔ lakpa munyuhi ligbi ɔ tsuo.
13 Se imi lɛɛ i pee kaa tuekpokutsɛ, i be tue bue;I pee kaa mumui, i be ye nya mi pae.
14 I pee kaa nɔ ko nɛ nui nɔ́Nɛ́ nɔ́ ko be e nya mi nɛ e ma de kɛ fã e he.
15 Ejakaa mo Yehowa, mo lɛ i ngɛ blɔ hyɛe,Nɛ o he mi nɔ, Oo Yehowa ye Mawu.
16 Ejakaa i de ke: “A ko nya ngɛ ye nɔ́ nami ɔ he je,Nɛ ke i sane hu ɔ, a ko wo a he nɔ ngɛ ye nɔ.”
17 Jinɛ i miɔ nɛ ma nɔ si,Be fɛɛ be ɔ, i ngɛ piie.
18 I jaje ye tɔmi ɔ;Ye yayami ɔ hao mi.
19 Se ye he nyɛli ɔmɛ ngɛ gbugbuugbu* nɛ a he wa,*Nihi nɛ nyɛɔ mi yaka gu ɔ a he ba hiɛ.
20 A peeɔ mi yayami kɛ toɔ kpakpa nɛ i pee ɔ nane mi;A ngɛ ye nya tsie konɛ ma ko di nɔ́ kpakpa se.
21 Ao Yehowa, ko kua mi.
Ye Mawu, koo je ye he kɛ ya se tsitsaa lokoo.
22 Oo Yehowa, ye yi wami helɔ,O he nɛ sɔ kɛ ba ye bua mi.
Sisi Ningmahi
^ Aloo “konɛ a kɛ kai.”
^ Ngɛ Hebri gbi mi ɔ, “ye he lo ɔ he ko be nɛ yi mi.”
^ Ngɛ Hebri gbi mi ɔ, “Ye yayami ɔ he je ɔ, tue mi jɔmi ko be ye wu ɔmɛ a mi.”
^ Ngɛ Hebri gbi mi ɔ, “Ye se tso mi tsuo ngɛ mi sããe.”
^ Aloo “i huãã.”
^ Aloo “ye klaa a.”
^ Ngɛ Hebri gbi mi ɔ, “a hɛ ngɛ.”
^ Baiblo komɛ de ke “Se nihi nɛ i ba pee a he nyɛlɔ yaka gu ɔ a he hiɛ.”
