La 76:1-12
Kɛ ha la nɔ hyɛlɔ ɔ; á fia kpã sakuhi kɛ to he. La nɛ Asaf po.
76 A le Mawu ngɛ Yuda;E biɛ kle ngɛ Israel.
2 E bo tsu ngɛ Salem,Nɛ e hi he ngɛ Zion.
3 Lejɛ ɔ lɛ e ku kɛ̃ɛ̃ mi bihi nɛ a ngɛ tsoe ɔ,Tsɛ̃i ɔ, kɛ klaate ɔ, kɛ ta hwumi ní ɔmɛ ngɛ. (Sela)
4 O kpɛɔ wawɛɛ;*O je agbo pe yokuhi nɛ lohwe awi yeli ngɛ a nɔ ɔ.
5 A ha katsɛmɛ a ní.*
A hwɔ mahe;Tatsɛmɛ ɔmɛ tsuo nɛ nɔ́ ko nya.
6 Oo Yakob Mawu, o hɛ mi kami ɔ ha nɛZugba lɛ hɛɛlɔ ɔ kɛ okpɔngɔ ɔ tsuo hwɔ mahe pɔ̃pɔ̃ɔ̃pɔ̃.
7 Mo pɛ lɛ o he ngɛ gbeye.
Mɛnɔ ma nyɛ maa da o we abofu nɛ nya wa a nya?
8 O kojo kɛ je hiɔwe;Zugba a ye gbeye nɛ e pee dii
9 Benɛ Mawu te si konɛ e kojo,Nɛ́ e he nihi tsuo nɛ a he jɔ ngɛ zugba a nɔ ɔ a yi wami ɔ. (Sela)
10 Ejakaa adesa we abofu ɔ maa ngɔ yi jemi kɛ ha mo;O maa ngɔ a we abofu nɛ piɛ ɔ kɛ dla o he.
11 Nyɛ kã Yehowa nyɛ Mawu ɔ kitahi nɛ nyɛɛ ye a nɔ,Nyɛ nihi tsuo nɛ nyɛ bɔle lɛ ɔ, nyɛɛ kɛ gbeye yemi nɛ ngɔ nyɛ nike ní kɛ ba.
12 E maa ba hɛ mi nyɛɛli nɛ a woɔ a he nɔ ɔ* si;E haa nɛ gbeye nuɔ zugba a nɔ matsɛmɛ ɔmɛ.
Sisi Ningmahi
^ Aloo “La ha o he.”
^ Aloo “A ha nihi nɛ a tsui ngɛ kã a ní.”
^ Ngɛ Hebri gbi mi ɔ, “hɛ mi nyɛɛli a mumi.”
