La 92:1-15
La nɛ a po. Hejɔɔmi Ligbi la.
92 E hi kaa a maa na Yehowa si,Nɛ́ a la yi jemi lahi* kɛ ha o biɛ ɔ, Oo Mo Nɛ O Nɔ Kuɔ Pe Kulaa,
2 Nɛ́ a jaje o suɔmi nɛ se pui ɔ mɔtu,Kɛ o we anɔkuale yemi ɔ nyɔ mi,
3 Nɛ́ a fia kpã nyɔngma saku kɛ kpã etɛ saku kɛ to he,Nɛ́ a fia saku nɛ gbi ngɔɔ kɛ to he.
4 Ejakaa o ha nɛ i nya ngɛ níhi nɛ o pee ɔmɛ a he je, Oo Yehowa;O nine nya ní tsumi ɔmɛ a he je ɔ, i kɛ bua jɔmi he ose.
5 Oo Yehowa, hyɛ bɔ nɛ o ní tsumi ɔmɛ kle ha!
Hyɛ bɔ nɛ o susumi ɔmɛ a mi kuɔ ha!
6 Nɔ ko nɛ susuu we nɔ́ he be nyɛe maa le ní nɛ ɔmɛ;Nɛ kuasia ko hu be nyɛe maa nu nɔ́ nɛ ɔ sisi:
7 Ke yiwutsotsɛmɛ puɛ kaa nga,*Nɛ yayami peeli tsuo bɔ ɔ,Nɔ́ nɛ maa je mi kɛ ba ji a hɛ mi ma kpata kɛ ya neneene.
8 Se mo Yehowa, o nɔ kuɔ kɛ yaa neneene.
9 Oo Yehowa, moo hyɛ o he nyɛli ɔmɛ a nɔ kunimi yemi ɔ,Hyɛ bɔ nɛ o he nyɛli ɔmɛ a hɛ mi ma kpata ha;A maa gbɛ yayami peeli tsuo kɛ fĩa.
10 Se o ma wo ye he wami* ɔ nɔ kaa nga mi na ku;Ma kpa nu kpakpa konɛ ye he mi nɛ jɔ mi.
11 Ye hɛngmɛ maa hyɛ ye he nyɛli ɔmɛ a nɔ kunimi yemi ɔ;Ye tue maa nu yayami peeli nɛ tuaa mi ɔ a si nɔmi ɔ he.
12 Se dalɔ maa bɔ kaa tã,Nɛ e maa kle agbo kaa Lebanon seda tso.
13 A du mɛ ngɛ Yehowa we ɔ;A waa flɔflɔɔflɔ ngɛ wa Mawu ɔ yale ɔ mi.
14 Ke a bwɔ* po, a maa ya nɔ maa hi yiblii woe;A maa ya nɔ maa hi he wami,* nɛ a he maa hi fɛu,
15 Nɛ a maa jaje kaa Yehowa da.
Lɛ ji ye Tɛsa, yayami ko be e mi.
Sisi Ningmahi
^ Aloo “Nɛ a maa fia la.”
^ Aloo “hu.”
^ Ngɛ Hebri gbi mi ɔ, “koli.”
^ Aloo “Ke a puɛ mua.”
^ Ngɛ Hebri gbi mi ɔ, “maa wo zɔ.”
