La 94:1-23
94 Oo Yehowa, mo Mawu nɛ o yeɔ lue,Oo mo Mawu nɛ o yeɔ lue, mo kpɛ!
2 Oo zugba a Kojolɔ, tee si.
Moo wo he nɔ woli hiɔ bɔ nɛ sa mɛ.
3 Ao Yehowa, kɛ yaa si mɛni be,Kɛ yaa si mɛni be nɛ yiwutsotsɛmɛ ma nya?
4 A tuɔ munyu puu, nɛ a tuɔ he nɔ womi munyuhi;Yayami peeli tsuo fĩaa.
5 Oo Yehowa, a fiaa o we bi ɔmɛ ní,Nɛ a waa o we bi ɔmɛ yi mi.
6 A gbeɔ yalɔyo kɛ nubwɔ,Nɛ a gbeɔ awusahi.*
7 A deɔ ke: “Yah tsa nɛ;Yakob Mawu ɔ tui he hɛ.”
8 Nyɛ nihi nɛ nyɛ susuu we nɔ́ he, nyɛɛ nu nɔ́ nɛ ɔ sisi;Nyɛ kuasiahi, mɛni be nɛ nyɛ ma kɔ nɔ́ se?
9 Nɔ nɛ pee* tue ɔ be nyɛe maa nu nɔ́ lo?
Nɔ nɛ pee hɛngmɛ ɔ be nyɛe maa hyɛ nɔ́ lo?
10 Nɔ nɛ tsɔseɔ je ma amɛ ɔ be nyɛe ma kã nɔ hɛ mi lo?
Lɛ ji nɔ nɛ haa nihi nile!
11 Yehowa le adesahi a susumihi,E le kaa a susumi ji gugwɔ mi kɔɔhiɔ kɛkɛ.
12 Oo Yah, nɔ nɛ o tsɔseɔ lɛ ɔ ngɛ bua jɔmi,Nɔ nɛ́ o ngɔɔ o mlaa a kɛ tsɔɔ lɛ ní
13 Konɛ o ha lɛ he jɔmi ngɛ haomi ligbihi a mi,Kɛ ya si be nɛ a maa tsua muɔ kɛ ha yiwutsotsɛ.
14 Ejakaa Yehowa be e we bi a he ngmɛɛe,Nɛ e be e we bi ɔmɛ kuae hulɔ.
15 Ejakaa a maa kojo ngɛ dami mi ekohu,Nɛ nihi tsuo nɛ a da ngɛ a tsui mi ɔ ma fĩ se.
16 Mɛnɔ maa te si kɛ wo yiwutsotsɛmɛ ha mi?
Mɛnɔ kɛ yayami peeli maa to ní ha mi?
17 Ke pi Yehowa nɛ ye bua mi ɔ,Jinɛ ye* hɛ mi ko kpata* oya nɔuu.
18 Benɛ i de ke: “Ye nane ngɛ sanee” ɔ,
Oo Yehowa, o suɔmi nɛ se pui ɔ ya nɔ nɛ e ye bua mi.
19 Benɛ haomihi* hiɛ ngɛ ye nɔ ɔ,*O wo ye bua nɛ o ha nɛ ye he jɔ mi.*
20 Anɛ matsɛmɛ* nɛ a peeɔ yayami kɛ mo ma nyɛ maa nu huɛ,Be mi nɛ a hɔɔ woɔ mlaa se kɛ yeɔ sane yaya?
21 A kɛ yiwutso ya tuaa dalɔ,*Nɛ a buɔ nɔ nɛ sane ko be e he ɔ gbenɔ fɔ.*
22 Se Yehowa maa pee ye wesa he* nɛ ngɛ slɔkee,Ye Mawu ɔ ji ye tɛsa, he nɛ i saa we ngɛ.
23 E ma ha nɛ a yiwutso ní peepee ɔmɛ ma kpa bu mɛ nitsɛmɛ a yi.
E maa ngɔ mɛ nitsɛmɛ a yayami ɔ kɛ kpata a hɛ mi.*
Yehowa wa Mawu ɔ ma kpata a hɛ mi.*
Sisi Ningmahi
^ Ngɛ Hebri gbi mi ɔ, “jokuɛwi nɛ a be tsɛmɛ.”
^ Ngɛ Hebri gbi mi ɔ, “Nɔ nɛ ma.”
^ Aloo “ye klaa.”
^ Ngɛ Hebri gbi mi ɔ, “Jinɛ i ko pee dii.”
^ Aloo “yi mi susumi.”
^ Aloo “ba hiɛ ngɛ ye mi ɔ.”
^ Aloo “O bua womi ɔ haa nɛ ye klaa he jɔɔ lɛ.”
^ Aloo “nɔ yeli; kojoli.”
^ Aloo “dalɔ klaa.”
^ Ngɛ Hebri gbi mi ɔ, “Nɛ a buɔ nɔ nɛ sane ko be e he ɔ muɔ he fɔ (kaa e pee yayami).”
^ Aloo “he nɛ ya hiɔwe.”
^ Ngɛ Hebri gbi mi ɔ, “kɛ ma a nya.”
^ Ngɛ Hebri gbi mi ɔ, “ma ma a nya.”
