La 96:1-13
96 Nyɛ la la ehe ha Yehowa.
Nyɛ la ha Yehowa, nyɛ zugba a tsuo!
2 Nyɛ la ha Yehowa; nyɛ je e biɛ ɔ yi.
Nyɛɛ jaje e yi wami hemi ɔ he sane kpakpa a daa ligbi.
3 Nyɛɛ jaje e hɛ mi nyami ɔ ngɛ je ma amɛ a kpɛti,Nyɛɛ jaje e nyakpɛ ní tsumi ɔmɛ ngɛ ni ɔmɛ tsuo a kpɛti.
4 Yehowa kle nɛ e sa yi jemi wawɛɛ nitsɛ.
E sa nɛ a ye lɛ gbeye pe mawu kpa amɛ tsuo.
5 Je ma amɛ a mawu ɔmɛ tsuo a he be se nami,Se Yehowa ji nɔ nɛ pee hiɔwe ɔmɛ.
6 Hɛ mi nyami* kɛ agboje bɔle lɛ kɛ kpe;He wami kɛ afɛu ngɛ e jami he ɔ.
7 Nyɛ je Yehowa yi, nyɛ wekuhi nɛ nyɛ ngɛ ni ɔmɛ a kpɛti,Nyɛ je Yehowa yi ngɛ e hɛ mi nyami kɛ e he wami ɔ he je.
8 Nyɛɛ kɛ hɛ mi nyami nɛ sa Yehowa biɛ ɔ nɛ ha lɛ;Nyɛɛ ngɔ nike ní kɛ ba, nɛ́ nyɛɛ ba e yale ɔmɛ a mi.
9 Nyɛ kplã si ha* Yehowa kɛ nyɛ he tade klɔuklɔuhi.*Nyɛ he nɛ do blibliibli ngɛ e hɛ mi, nyɛ je ɔ tsuo!
10 Nyɛɛ jaje ngɛ je ma amɛ a kpɛti ke: “Yehowa ba pee Matsɛ!
E ngɔ zugba a* kɛ ma si kpɛii, nɛ nɔ́ ko nɔ́ ko be nyɛe ma je lɛ kɛ je e blɔ he.*
Mawu maa kojo ni ɔmɛ* ngɛ blɔ nɛ da nɔ.”
11 Hiɔwe ɔmɛ nɛ a nya, nɛ zugba a bua nɛ jɔ;Wo ɔ kɛ e mi níhi tsuo nɛ a wo gbi;
12 Ngmɔhi kɛ a nɔ níhi tsuo nɛ a nya.
Jamɛ a be ɔ mi nɔuu ɔ, tsohi tsuo nɛ ngɛ hue tso ɔ mi ɔ nɛ a he ose kɛ bua jɔmi
13 Ngɛ Yehowa hɛ mi, ejakaa e ma,*E ma nɛ e ba kojo zugba a.
E kɛ dami maa kojo nihi nɛ a ngɛ zugba a nɔ ɔ,*Nɛ e kɛ e we anɔkuale yemi ɔ maa kojo ni ɔmɛ.
Sisi Ningmahi
^ Aloo “Bumi.”
^ Aloo “Nyɛ ja.”
^ Baiblo komɛ de ke “akɛnɛ e ngɛ klɔuklɔu wawɛɛ ɔ he je.”
^ Aloo “zugba nɛ baa ní ɔ.”
^ Aloo “e be nyɛe ma mimiɛ.”
^ Aloo “E ma fã ni ɔmɛ a he.”
^ Aloo “e ba.”
^ Aloo “kojo zugba a.”
