Luka Sane Kpakpa a 10:1-42
10 Ní nɛ ɔmɛ a se ɔ, Nyɔmtsɛ ɔ hla ni 70 kpa komɛ, nɛ e tsɔ mɛ enyɔɔnyɔ kɛ sɛ e hlami kɛ ya ma fɛɛ ma kɛ he fɛɛ he nɛ lɛ nitsɛ e maa ya a.
2 Kɛkɛ nɛ e de mɛ ke: “Ee, ní nɛ a ma kpa a hiɛ, se ní tsuli ɔmɛ a he pi. Enɛ ɔ he ɔ, nyɛ kpa Ngmɔtsɛ ɔ pɛɛ konɛ e wo ní tsuli blɔ nɛ a ba kpa ní ha lɛ.
3 Nyɛɛ ya! Hyɛ! i ngɛ nyɛ tsɔe kɛ yaa kaa jijɔ bimɛ ngɛ ogbeteehi a kpɛti.
4 Nyɛ ko hɛɛ sika kpɛɛ, aloo niye ní kotoku, aloo tokotahi, nɛ nyɛ ko fɔ nɔ ko* ngɛ blɔ ɔ nɔ hulɔ.
5 He fɛɛ he nɛ nyɛ maa sɛ we ko mi ngɛ ɔ, kekleekle ɔ, nyɛ de ke: ‘Tue mi jɔmi nɛ ba we nɛ ɔ nɔ.’
6 Nɛ ke tue mi jɔmi huɛ ko ngɛ lejɛ ɔ, nyɛ tue mi jɔmi ɔ maa hi e nɔ. Se ke nɔ ko kaa jã be ɔ, nyɛ tue mi jɔmi ɔ maa kpale kɛ ba nyɛ nɔ.
7 Nɛ nyɛɛ hi jamɛ a we ɔ mi, nɛ́ nyɛɛ ye nɛ nyɛɛ nu níhi nɛ a ma ha nyɛ ɔ, ejakaa ní tsulɔ hiɔwo sa lɛ. Nyɛ ko hi hiae kɛ hi we kake mi jee kɛ hi we kpa mi yae.
8 “Jehanɛ se hu ɔ, ma fɛɛ ma nɛ nyɛ maa sɛ mi nɛ a ma ha nyɛ hɛ mi ɔ, nɔ́ fɛɛ nɔ́ nɛ a kɛ maa ma nyɛ hɛ mi ɔ, nyɛɛ ye,
9 nɛ nyɛ tsa hiɔtsɛmɛ nɛ a ngɛ mi ɔ, nɛ nyɛ de mɛ ke: ‘Mawu Matsɛ Yemi ɔ ná nyɛ haa.’
10 Se ma fɛɛ ma nɛ nyɛ maa sɛ mi nɛ a be nyɛ hɛ mi hae ɔ, nyɛɛ je kpo kɛ ya jamɛ a ma a mi gbɛjegbɛ ngua amɛ a nɔ, nɛ nyɛ de ke:
11 ‘Wa ngɛ nyɛ ma a mi bunyuku nɛ ngɛ wa nane he ɔ po blɛe kɛ ngɛ nyɛ nɔ puee. Se kɛ̃ ɔ, nyɛ ná nɛ nyɛɛ le kaa Mawu Matsɛ Yemi ɔ su si ta.’
12 I ngɛ nyɛ dee ke e maa pee gbɔjɔɔ kɛ ha Sodom pe jamɛ a ma a.
13 “Korazin, musu tloo mo! Betsaida, musu tloo mo! kaa a tsu nyakpɛ níhi nɛ a tsu ngɛ nyɛ mi ɔ ngɛ Tiro kɛ Sidon ɔ, jinɛ a ko ha kpekpe nɛ a ko hi si ngɛ la zu mi momoomo kɛ ko tsɔɔ kaa a tsake a tsui.
14 Enɛ ɔ he ɔ, e maa pee gbɔjɔɔ kɛ ha Tiro kɛ Sidon ngɛ kojomi ɔ mi pe nyɛ.
15 Nɛ mo Kapenaum, anɛ a ma wo o nɔ gojoo kɛ ya hiɔwe lo? Gbeje* nɛ o maa ya!
16 “Nɔ fɛɛ nɔ nɛ e maa bu nyɛ tue ɔ, imi tue e bu ɔ nɛ. Nɛ nɔ fɛɛ nɔ nɛ e be nyɛ tue bue ɔ, imi tue e bui ɔ nɛ. Jehanɛ se hu ɔ, nɔ fɛɛ nɔ nɛ e bui mi tue ɔ, e bui Nɔ nɛ e tsɔ mi ɔ hu tue.”
17 Lɔ ɔ se ɔ, ni 70 ɔmɛ kpale a se kɛ ba kɛ bua jɔmi, nɛ a ba de ke: “Nyɔmtsɛ, benɛ waa kɛ o biɛ ɔ tsu ní ɔ, daimoniohi po ba a he si ha wɔ.”
18 Kɛkɛ nɛ e de mɛ ke: “I na Satan kaa e tsɔ kɛ ba nɔ si momo kaa oslabai nɛ gba kɛ je hiɔwe.
19 Hyɛ! i ha nyɛ he blɔ konɛ nyɛɛ naa sinɔhi kɛ nyingmogblakotohi kɛ he nyɛlɔ ɔ he wami ɔmɛ tsuo a nɔ, nɛ nɔ́ ko nɔ́ ko be nyɛ awi yee.
20 Se kɛ̃ ɔ, pi mumihi nɛ a ba a he si ha nyɛ ɔ he je nɛ e sa kaa nyɛ bua nɛ jɔ ngɛ, mohu ɔ, nyɛ bua nɛ jɔ, ejakaa a ngma nyɛ biɛ ngɛ hiɔwe.”
21 Ngɛ jamɛ a ngmlɛfia a mi nɔuu ɔ, e bua jɔ wawɛɛ ngɛ mumi klɔuklɔu ɔ mi, nɛ e de ke: “Tsaatsɛ, hiɔwe kɛ zugba Nyɔmtsɛ, i ngɛ o yi jee ngɛ ma hɛ mi, ejakaa o ngɔ ní nɛ ɔmɛ kɛ laa juɛmitsɛmɛ kɛ ní leli gbidigbidi, nɛ o je mɛ kpo ngɔ tsɔɔ jokuɛ tsɔwi. Ee, Oo Tsaatsɛ, ngɛ anɔkuale mi ɔ, jã ji bɔ nɛ o suɔ.
22 Ye Tsɛ ɔ tu níhi tsuo kɛ wo ye dɛ mi, nɛ nɔ ko be nɛ e le nɔ nɛ Bi ɔ ji, kaa ja Tsɛ ɔ, nɛ nɔ ko be nɛ e le nɔ nɛ Tsɛ ɔ ji, kaa ja Bi ɔ kɛ nɔ fɛɛ nɔ nɛ Bi ɔ suɔ kaa e ma ha nɛ e le Tsɛ ɔ pɛ.”
23 Jehanɛ ɔ, e plɛ e hɛ mi kɛ tsɔɔ e kaseli ɔmɛ pɛ nɛ e de mɛ ke: “Hɛ ngmɛhi nɛ a na níhi nɛ nyɛ ngɛ hyɛe nɛ ɔ ngɛ bua jɔmi.
24 Ejakaa i ngɛ nyɛ dee ke gbali kɛ matsɛmɛ babauu suɔ kaa a maa na níhi nɛ nyɛ ngɛ nae ɔ, se a nɛ, nɛ a suɔ kaa a maa nu níhi nɛ nyɛ ngɛ nue ɔ, se a nui.”
25 Jehanɛ ɔ, hyɛ! nyumu ko nɛ e le Mlaa a saminya a te si kɛ da si konɛ e ka lɛ, nɛ e bi lɛ ke: “Tsɔɔlɔ, mɛni lɛ e he hia kaa ma pee konɛ ma ná neneene wami?”
26 E de lɛ ke: “Mɛni a ngma ngɛ Mlaa a mi ɔ? Kɛ o kaneɔ lɛ kɛɛ?”
27 Nyumu ɔ ha lɛ heto ke: “‘E sa kaa o suɔ Yehowa* o Mawu ɔ kɛ o tsui tsuo kɛ o susuma* tsuo kɛ o he wami tsuo kɛ o juɛmi tsuo,’ nɛ ‘e sa nɛ o suɔ o nyɛmi kaa bɔ nɛ o suɔ o he ɔ.’”
28 Yesu de lɛ ke: “O heto ɔ da; yaa nɔ nɛ o pee jã, nɛ o ma ná wami.”
29 Se akɛnɛ nyumu ɔ ngɛ hlae nɛ e bu e he dalɔ he je ɔ, e bi Yesu ke: “Mɛnɔ tutuutu ji ye nyɛmi?”
30 Yesu he nɔ nɛ e de ke: “Nyumu ko ngɛ kplee kɛ je Yerusalɛm kɛ yaa Yɛriko nɛ e ya nɔ juli a kpɛti, nɛ a kpɔ e he tadehi, nɛ a kongo lɛ, nɛ a je e he, nɛ a si lɛ nɛ́ e gbo fã kɛ fã.
31 Tlukaa a, osɔfo ko nyɛɛ jamɛ a blɔ ɔ nɔ kɛ ngɛ kplee, se benɛ e na lɛ ɔ, e tsɔ e he kɛ be.
32 Jã kɛ̃ nɛ benɛ Levi no ko hu ba su lejɛ ɔ nɛ e na lɛ ɔ, e tsɔ e he kɛ be.
33 Se Samaria no ko nɛ e nyɛɛ blɔ ɔ nɔ ɔ ba su he nɛ nyumu ɔ ngɛ ɔ, nɛ benɛ e na lɛ ɔ, e ní pee lɛ mɔbɔ.
34 Lɔ ɔ he ɔ, e ya nyumu ɔ ngɔ, nɛ e plɛ nu kɛ wai ngɔ pue e pa amɛ a nɔ, nɛ e fĩ a nɔ ha lɛ. Lɔ ɔ se ɔ, e wo lɛ ngɔ fɔ lɛ nitsɛ e lohwe nɔ, nɛ e ngɔ lɛ kɛ ba nibwɔhi a to he ko, nɛ e hyɛ e nɔ.
35 E nɔ jena a, e je denario enyɔ ngɔ ha nibwɔhi a to he nɔ hyɛlɔ ɔ, nɛ e de lɛ ke: ‘Hyɛ e nɔ, nɛ nɔ́ fɛɛ nɔ́ nɛ o ma puɛ ngɛ enɛ ɔ se ɔ, ke i kpale kɛ ba a, ma ba ha mo.’
36 Ke o hyɛ ɔ, nimli etɛ nɛ ɔmɛ ɔ, a kpɛti mɛnɔ lɛ e pee e he nyumu ɔ nɛ e ya nɔ juli ɔmɛ a kpɛti ɔ nyɛmi?”
37 Nyumu ɔ ha lɛ heto ke: “Nɔ nɛ e na lɛ mɔbɔ ɔ.” Lɔ ɔ se ɔ, Yesu de lɛ ke: “Mo hu yaa nɛ o ya pee jã nɔuu.”
38 Jehanɛ ɔ, benɛ a ngɛ blɔ nɔ kɛ yaa a, e ya sɛ kɔpe ko mi. Yo ko nɛ a tsɛɛ lɛ ke Maata a ha nɛ e ba to e we ɔ mi.
39 E ngɛ nyɛmiyo ko hu nɛ a tsɛɛ lɛ ke Maria, nɛ e ba hi si ngɛ Nyɔmtsɛ ɔ nane nya nɛ e ngɛ nɔ́ nɛ e ngɛ dee* ɔ tue bue.
40 Se Maata lɛɛ, níhi fuu nɛ e ngɛ pee ɔ he e juɛmi. Enɛ ɔ he ɔ, e ba Yesu ngɔ nɛ e ba de lɛ ke: “Nyɔmtsɛ, nɛ ye nyɛmiyo ɔ si ní tsumi ɔ tsuo ngɔ fɔ imi nɔ kake too ye nɔ ɔ, anɛ e hɛwi mo lo? Mo de lɛ nɛ e ba ye bua mi.”
41 Nyɔmtsɛ ɔ ha lɛ heto ke: “Maata, Maata, o pee yeyeeye, nɛ o ngɛ o he nya gbae ngɛ níhi fuu a he.
42 Níhi bɔɔ ko aloo nɔ́ kake pɛ nɛ e he hia. Ngɛ Maria blɔ fa mi ɔ, e hla nɔ́ nɛ hi ɔ,* nɛ nɔ ko be kpɔ̃e ngɛ e dɛ.”
Sisi Ningmahi
^ Aloo “nyɛ ko fua nɔ ko kɛ fɔ lɛ.”
^ Aloo “Hades,” okadi peemi mi he ko nɛ gbogboe ɔmɛ ngɛ. Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
^ Hela, “e munyu ɔmɛ.”
^ Aloo “nɔ́ nɛ hi pe kulaa a.”
