Luka Sane Kpakpa a 9:1-62
-
A kɛ blɔ tsɔɔmi ha Ni Nyɔngma Kɛ Enyɔ ɔmɛ ngɛ sɔmɔmi ní tsumi ɔ he (1-6)
-
Yesu ha nɛ Hɛrode nya kpɛ e he (7-9)
-
Yesu ha nihi 5,000 niye ní (10-17)
-
Petro yo Kristo ɔ (18-20)
-
A gba Yesu gbenɔ ɔ kɛ fɔ si (21, 22)
-
Kaselɔ nitsɛnitsɛ peemi (23-27)
-
Yesu tsakemi ɔ (28-36)
-
A tsa nyumuyo ko nɛ daimoniohi ngɛ lɛ haoe (37-43a)
-
A gba Yesu gbenɔ ɔ kɛ fɔ si ekohu (43b-45)
-
Kaseli ɔmɛ sã nya ngɛ nɔ nɛ e ji nɔmlɔ ngua he (46-48)
-
Nɔ fɛɛ nɔ nɛ e ti si kɛ wui wɔ ɔ, e ngɛ wa blɔ fa mi (49, 50)
-
Samaria bi ɔmɛ a kɔpe ko mi bimɛ kua Yesu (51-56)
-
Bɔ nɛ a nyɛɛɔ Yesu se ha (57-62)
9 Lɔ ɔ se ɔ, e tsɛ Ni Nyɔngma Kɛ Enyɔ ɔmɛ kɛ kpe nɛ e ha mɛ he wami kɛ he blɔ ngɛ daimoniohi tsuo a nɔ konɛ a tsa hiɔhi.
2 Nɛ e tsɔ mɛ kaa a ya fiɛɛ Mawu Matsɛ Yemi ɔ, konɛ a tsa hiɔhi,
3 nɛ e de mɛ ke: “Ke nyɛ yaa a, nyɛ ko hɛɛ nɔ́ ko nɔ́ ko. Nyɛ ko hɛɛ dɛma tso, aloo niye ní kotoku, aloo niye ní, aloo sika;* nyɛ ko hɛɛ tade enyɔ* hulɔ.
4 Se he fɛɛ he nɛ nyɛ maa sɛ we ko mi ngɛ ɔ, nyɛɛ hi lejɛ ɔ kɛ yaa si be nɛ nyɛ maa je.
5 Nɛ he fɛɛ he nɛ nihi be nyɛ hɛ mi hae ngɛ ɔ, ke nyɛ ngɛ jamɛ a ma a mi jee ɔ, nyɛ si nyɛ nane si konɛ bunyuku nɛ ngɛ nyɛ nane he ɔ nɛ je kɛ pue si kɛ pee odase kɛ si mɛ.”
6 Kɛkɛ nɛ a pue nɔ kɛ ho nɛ a ya kpa zugba kpɔ ɔ tsuo mi kɛ je kɔpehi a mi kɛ ya kɔpehi a mi, nɛ a ya jaje sane kpakpa a, nɛ a tsa hiɔtsɛmɛ ngɛ he fɛɛ he.
7 Benɛ Hɛrode* nɛ ji kpokpa a nɔ yelɔ* ɔ nu nɔ́ fɛɛ nɔ́ nɛ ngɛ nɔ yae ɔ, e juɛmi gbɛ, ejakaa ni komɛ ngɛ dee ke a tle Yohane si kɛ je gbeje,
8 se ni kpahi ngɛ dee ke: Eliya lɛ e je e he kpo, nɛ ni kpa komɛ hu ngɛ dee ke blema gbali ɔmɛ a ti nɔ kake lɛ e te si.
9 Hɛrode de ke: “I po Yohane yi. Lɛɛ mɛnɔ ji nɔ nɛ i ngɛ sane nɛ ɔmɛ nue ngɛ e he ɔ mɔ?” Enɛ ɔ he ɔ, e ngɛ hlae nɛ e na lɛ.
10 Benɛ bɔfo ɔmɛ kpale a se kɛ ba a, a ba de Yesu níhi tsuo nɛ a ya pee ɔ. Nɛ e ngɔ mɛ kɛ piɛɛ e he nɛ mɛ pɛ a je kɛ ho ma ko nɛ a tsɛɛ ke Betsaida a mi ya.
11 Se benɛ asafo kuu ɔmɛ ná le enɛ ɔ, a nyɛɛ e se. Nɛ e kɛ bua jɔmi he mɛ, nɛ e bɔni Mawu Matsɛ Yemi ɔ he munyu tumi kɛ ngɛ mɛ tsɔɔe, nɛ e tsa a kpɛti nihi nɛ tsami he hia mɛ ɔ.
12 Kɛkɛ nɛ je bɔni jɔmi. Jehanɛ ɔ, Ni Nyɔngma Kɛ Enyɔ ɔmɛ ba nɛ a ba de lɛ ke: “Wo asafo kuu ɔ blɔ nɛ a ho, konɛ a ya ngmɔ si kɛ kɔpe ɔmɛ nɛ a bɔle si ɔmɛ a mi konɛ a ya hla hwɔ he kɛ niye ní, ejakaa he nɛ wa ngɛ nɛ ɔ tsɔ e he banee.”
13 Se e de mɛ ke: “Nyɛ ha mɛ nɔ́ ko nɛ a ye.” A de lɛ ke: “Wa be nɔ́ ko kaa ja abolo enuɔ kɛ lo enyɔ pɛ, lɛɛ ja eko ɔ, wɔ nitsɛmɛ wa ya nɛ wa ya he niye ní kɛ ba ha nimli nɛ ɔmɛ tsuo.”
14 Ngɛ anɔkuale mi ɔ, nyumuhi maa pee 5,000 lɛ a ngɛ lejɛ ɔ. Se e de e kaseli ɔmɛ ke: “Nyɛ ha nɛ a hi si ngɛ kuuhi a mi, nihi maa pee 50 nɛ a hi kuu kake mi.”
15 Nɛ a pee jã, nɛ a ha nɛ mɛ tsuo a hi si.
16 Jehanɛ ɔ, e ngɔ abolo enuɔ ɔ kɛ lo enyɔ ɔ, nɛ e hyɛ hiɔwe nɛ e jɔɔ nɔ. Kɛkɛ nɛ e ku a mi nɛ e kɛ bɔni e kaseli ɔmɛ hami konɛ a ngɔ kɛ ma asafo kuu ɔ hɛ mi.
17 Nɛ mɛ tsuo a ye nɛ a tɔ, nɛ a kukuɔ nɔ́ nɛ piɛ ɔ, nɛ a ná bibli kusii* 12.
18 Pee se benɛ lɛ pɛ e ya ngɛ sɔlee ɔ, kaseli ɔmɛ ba e ngɔ nɛ e bi mɛ ke: “Mɛnɔ nɛ asafo kuu ɔmɛ ngɛ dee ke i ji?”
19 A he nɔ ke: “Yohane Nɔ Baptisilɔ ɔ, se ni komɛ ke, Eliya, nɛ ni kpa komɛ hu deɔ ke, blema gbali ɔmɛ a ti nɔ kake lɛ e te si.”
20 Kɛkɛ nɛ e bi mɛ ke: “Nyɛ hu nɛɛ, mɛnɔ nyɛ deɔ ke i ji?” Petro he nɔ ke: “Mo ji Mawu we Kristo ɔ nɛ.”
21 Kɛkɛ nɛ e bɔ mɛ kɔkɔ kaa a ko de nɔ ko nɔ ko,
22 se e de ke: “E sa kaa nɔmlɔ Bi ɔ nɛ e na amanehlu babauu, nɛ nikɔtɔma amɛ kɛ osɔfo nikɔtɔma amɛ kɛ womi ngmali ɔmɛ ma kua lɛ, nɛ a maa gbe lɛ, nɛ ngɛ ligbi etɛne ɔ nɔ ɔ, a ma tle lɛ si.”
23 Lɔ ɔ se ɔ, e ya nɔ nɛ e de mɛ tsuo ke: “Ke nɔ ko suɔ kaa e maa nyɛɛ ye se ɔ, e kua e he, nɛ e wo e sɛumi tso* ɔ daa ligbi, nɛ e ya nɔ nɛ e nyɛɛ ye se.
24 Ejakaa nɔ fɛɛ nɔ nɛ e suɔ kaa e maa baa e wami* yi ɔ, e maa laa lɛ, se nɔ fɛɛ nɔ nɛ e wami* maa laa lɛ ngɛ ye he ɔ, e maa baa e wami ɔ yi.
25 Ngɛ anɔkuale mi ɔ, ke nɔmlɔ nine su je ɔ tsuo nɔ, se e laa lɛ nitsɛ e he aloo e hɛ mi kpata a, mɛni nɔ́ kpakpa nɛ e ma ná?
26 Ejakaa nɔ fɛɛ nɔ nɛ imi kɛ ye munyu ɔ he zo maa pee lɛ ɔ, lɛ hu e he zo maa pee nɔmlɔ Bi ɔ ke e ba ngɛ lɛ nitsɛ e hɛ mi nyami ɔ, kɛ e Tsɛ ɔ nɔ́ ɔ, kɛ bɔfo klɔuklɔu ɔmɛ a nɔ́ ɔ mi.
27 Se i ngɛ nyɛ dee ngɛ anɔkuale mi ke, nihi nɛ a daa si ngɛ hiɛ ɔ, a ti ni komɛ be a nya gbenɔ sae kulaa kɛ yaa si be nɛ a maa na Mawu Matsɛ Yemi ɔ kekle.”
28 Ngɛ anɔkuale mi ɔ, benɛ e tu munyu nɛ ɔ, maa pee ligbi kpaanyɔ se ɔ, e ngɔ Petro, Yohane, kɛ Yakobo kɛ piɛɛ e he nɛ a kuɔ yoku ɔ konɛ e ya sɔle.
29 Nɛ benɛ e ngɛ sɔlee ɔ, e hɛ mi tsake, nɛ tade nɛ e wo ɔ hiɛ futafuta nɛ e ngɛ kpɛe.
30 Nɛ hyɛ! nyumu enyɔ komɛ kɛ lɛ ngɛ ní sɛɛe; mɛ ji Mose kɛ Eliya.
31 A ba kɛ hɛ mi nyami, nɛ a kɛ lɛ ba bɔni e jemi ɔ nɛ e be kɛe nɛ e maa ba mi ngɛ Yerusalɛm ɔ he munyu tumi.
32 Jamɛ a be ɔ mi ɔ, mahe gbe Petro kɛ nihi nɛ a piɛɛ e he ɔ, se benɛ mahe ɔ po ngɛ a hɛ mi ɔ, a na e hɛ mi nyami ɔ kɛ nyumu enyɔ ɔmɛ nɛ a kɛ lɛ daa si.
33 Nɛ benɛ nyumu enyɔ ɔmɛ ngɛ Yesu he jee ɔ, Petro de Yesu ke: “Tsɔɔlɔ, e hi kaa wa ngɛ hiɛ ɔ. Enɛ ɔ he ɔ, ha nɛ waa ma bo tsu etɛ, o nɔ́ kake, Mose nɔ́ kake, kɛ Eliya hu nɔ́ kake.” E li nɔ́ nɛ e ngɛ dee ɔ.
34 Se benɛ e ngɛ munyu nɛ ɔmɛ tue ɔ, bɔku ko wo nɛ e bɔni a nɔ hami. Benɛ a sɛ bɔku ɔ mi ɔ, a ye gbeye.
35 Kɛkɛ nɛ gbi ko pɛ kɛ je bɔku ɔ mi ke: “Ye Bi ji nɛ ɔ nɛ, nɔ nɛ a hla lɛ ɔ. Nyɛɛ bu lɛ tue.”
36 Benɛ gbi ɔ se po ɔ, Yesu pɛ nɛ a na. Se a ma a nya ngɔ to nɔ, nɛ ngɛ jamɛ a ligbi ɔmɛ a mi ɔ, a de we nɔ ko nɔ ko níhi nɛ a na a.
37 E nɔ jena benɛ a kple si kɛ je yoku ɔ nɔ ɔ, nihi babauu kɛ lɛ ba kpe.
38 Nɛ hyɛ! asafo kuu ɔ mi nyumu ko kpa ngmlaa ke: “Tsɔɔlɔ, i kpa mo pɛɛ, moo hyɛ ye binyumu ɔ, ejakaa lɛ pɛ ji ye bi.
39 Nɛ hyɛ! mumi ko nuɔ lɛ, nɛ si kake too kɛkɛ e kpa ngmlaa, nɛ e haa nɛ si nɔɔmi hiɔ nɔɔ e nɔ nɛ e nya mi fiaa hwɔli, nɛ ke e plaa lɛ po ɔ, e sume kaa e maa ngmɛɛ e he.
40 I kpa o kaseli ɔmɛ pɛɛ kaa a hia lɛ, se a nyɛ we.”
41 Yesu he nɔ nɛ e de ke: “Oo yi nɔ kpɛ̃kpɛ̃ɛ nɛ be hemi kɛ yemi, mɛni be i kɛ nyɛ maa hi si kɛ ya si, nɛ mɛni be ma ná nyɛ he tsui kɛ ya si? Ngɔɔ o binyumu ɔ kɛ ba hiɛ ɔ.”
42 Se benɛ e piɛ bɔɔ nɛ e maa su Yesu he ɔ, daimonio ɔ sake lɛ kɛ fia si, nɛ si nɔɔmi hiɔ nɔ e nɔ nɛ e he do blibliibli. Se Yesu kã mumi nɛ e he tsɔ we ɔ hɛ mi nɛ e tsa nyumuyo ɔ, nɛ e ngɔ lɛ kɛ ha e tsɛ ɔ ekohu.
43 Nɛ mɛ tsuo a nya kpɛ a he ngɛ Mawu he wami kpetekpleenyɛ ɔ he.
Benɛ níhi tsuo nɛ e ngɛ pee ɔ ha nɛ mɛ tsuo a hɛ mi pee mɛ yaa a, e de e kaseli ɔmɛ ke:
44 “Nyɛɛ bu munyu nɛ ɔmɛ tue saminya konɛ nyɛ kai, ejakaa a maa tsɔɔ nɔmlɔ Bi ɔ se blɔ nɛ a maa ngɔ lɛ kɛ wo nimli a dɛ mi.”
45 Se a nui nɔ́ nɛ e ngɛ dee ɔ sisi. Ngɛ anɔkuale mi ɔ, a ngɔ kɛ laa mɛ konɛ a ko nu sisi, nɛ a ngɛ gbeye yee hu kaa a ma bi lɛ nɔ́ nɛ e de ɔ he sane.
46 Lɔ ɔ se ɔ, a sã nya ngɛ nɔ nɛ ji nɔmlɔ ngua pe kulaa ngɛ a kpɛti ɔ he.
47 Akɛnɛ Yesu le nɔ́ nɛ a ngɛ susue ngɛ a tsui mi he je ɔ, e ngɔ jokuɛ nyafii ko kɛ ba da si ngɛ e kasa nya,
48 nɛ e de mɛ ke: “Nɔ fɛɛ nɔ nɛ e ma ha jokuɛ nɛ ɔ hɛ mi ngɛ ye biɛ ɔ he je ɔ, e ha imi hu hɛ mi; nɛ nɔ fɛɛ nɔ nɛ e ma ha mi hɛ mi ɔ, e ha Nɔ nɛ e tsɔ mi ɔ hu hɛ mi. Ejakaa nɔ nɛ e peeɔ e he nɔ nyafii ngɛ nyɛ tsuo nyɛ kpɛti ɔ, lɛ ji nɔmlɔ ngua.”
49 Yohane de lɛ ke: “Tsɔɔlɔ, wa na nɔ ko nɛ e ngɔ o biɛ kɛ ngɛ daimoniohi hiae nɛ wa bɔ mɔde kaa wa maa tsi lɛ blɔ, ejakaa e nyɛɛ we wa se.”
50 Se Yesu de lɛ ke: “Nyɛ ko bɔ mɔde kaa nyɛ maa tsi lɛ blɔ, ejakaa nɔ fɛɛ nɔ nɛ e ti si kɛ wui nyɛ ɔ, e ngɛ nyɛ blɔ fa mi.”
51 Benɛ be ɔ nɛ a maa ngɔ Yesu kɛ ya hiɔwe ɔ ngɛ sue ɔ,* e ma e juɛmi nya si kaa e maa ya Yerusalɛm.
52 Lɔ ɔ he ɔ, e tsɔ tsɔli kɛ sɛ e hlami. Nɛ a ya Samaria bi ɔmɛ a kɔpe ko mi konɛ a ya dla níhi ngɔ to lɛ.
53 Se akɛnɛ e ma e juɛmi nya si kaa e yaa Yerusalɛm he je ɔ, a ha we lɛ hɛ mi.
54 Benɛ kaseli ɔmɛ nɛ ji Yakobo kɛ Yohane na nɔ́ nɛ ɔ, a bi ke: “Nyɔmtsɛ, anɛ o suɔ nɛ wa tsɛ la kɛ je hiɔwe nɛ e ba kpata a hɛ mi lo?”
55 Se e plɛ e he nɛ e kã a hɛ mi.
56 Enɛ ɔ he ɔ, a je kɛ ho kɔpe kpa mi ya.
57 Jehanɛ ɔ, benɛ a yaa ngɛ blɔ ɔ nɔ ɔ, nɔ ko de lɛ ke: “Ma nyɛɛ o se kɛ ya he fɛɛ he nɛ o maa ya a.”
58 Se Yesu de lɛ ke: “Kɔkɔbohi ngɛ muɔhi, nɛ hiɔwe lohwe pɛlitsɛmɛ hu ngɛ tsuhi, se nɔmlɔ Bi ɔ lɛɛ, e be he ko nɛ e kɛ e yi fɔɔ.”
59 Lɔ ɔ se ɔ, e de nɔ kpa ko hu ke: “Ba pee ye se nyɛɛlɔ.” Nyumu ɔ de lɛ ke: “Nyɔmtsɛ, ngmɛɛ mi blɔ nɛ ma ya pu ye tsaatsɛ lolo.”
60 Se Yesu de lɛ ke: “Ha nɛ gbogboe ɔmɛ nɛ a pu a gbogboehi, se moo lɛɛ yaa nɛ o ya jaje Mawu Matsɛ Yemi ɔ ngɛ he fɛɛ he.”
61 Nɛ nɔ kpa ko hu de ke: “Nyɔmtsɛ, ma nyɛɛ o se, se ngmɛɛ mi blɔ nɛ i kɛ ye we mi bimɛ nɛ ya ye sɛ lolo.”
62 Yesu de lɛ ke: “Nɔ nɛ e kɛ e nine pɛtɛɔ na kpakplaa he nɛ e ya hyɛɛ níhi nɛ a ngɛ e se ɔ, e sɛ Mawu Matsɛ Yemi ɔ.”
Sisi Ningmahi
^ Hela, “sika hiɔ.”
^ Aloo “tade kpa.”
^ Nɛ ji Herode Antipa. Hyɛ Munyu Komɛ A Sisi Tsɔɔmi.
^ Hela, “tetrake.”
^ Aloo “kɛtɛ.”
^ Hyɛ Munyu Komɛ A Sisi Tsɔɔmi.
^ Aloo “susuma.”
^ Aloo “susuma.”
^ Hela, “ligbi ɔmɛ nɛ a maa ngɔ Yesu kɛ ho hiɔwe ya a ngɛ tae ɔ.”
