Maako Sane Kpakpa a 8:1-38
8 Ngɛ jamɛ a ligbi ɔmɛ a mi ɔ, nimli babauu ba bua a he nya ekohu, nɛ a be nɔ́ ko nɛ a maa ye. Enɛ ɔ he ɔ, e tsɛ kaseli ɔmɛ nɛ e de mɛ ke:
2 “Asafo kuu ɔ he ngɛ mi mɔbɔ pee, ejakaa a kɛ mi hi si ligbi etɛ momo nɛ a be nɔ́ ko nɛ a maa ye.
3 Ke i wo mɛ blɔ kɛ ho a wehi a mi ya kɛ a mi mi hwɔ ɔ, a hɛ mi ma ya yu mɛ ngɛ blɔ ɔ nɔ, nɛ he nɛ a ti ni komɛ hu je ɔ kɛ.”
4 Se e kaseli ɔmɛ bi lɛ ke: “Hiɛmɛ nɛ ɔ tsɔ e he banee, nɛ jije nɔ ko ma ná niye ní nɛ hiɛ bɔ nɛ sa nɛ e maa tɔ nimli nɛ ɔmɛ tsuo ngɛ?”
5 Kɛkɛ nɛ e bi mɛ ke: “Abolo enyɛmɛ nɛ nyɛ ngɛ?” A he nɔ ke: “Kpaago.”
6 Kɛkɛ nɛ e de asafo kuu ɔ ke a hi si ngɛ zugba. Enɛ ɔ se ɔ, e ngɔ abolo kpaago ɔ, nɛ e na Mawu si, nɛ e ku a mi, nɛ e kɛ bɔni e kaseli ɔmɛ hami konɛ a gba ha ni ɔmɛ, nɛ a gba kɛ ha asafo kuu ɔ.
7 Jehanɛ hu ɔ, a ngɛ lo tsɔwi bɔɔ ko, nɛ benɛ e jɔɔ nɔ ɔ, e de mɛ ke a gba lɔ ɔ hu kɛ ha ni ɔmɛ.
8 Nɛ a ye nɛ a tɔ, nɛ a kukuɔ e bibli nɛ piɛ ɔ, nɛ e hyi kusii* nguanguahi kakaaka kpaago tɔtɔɔtɔ.
9 Jamɛ a be ɔ mi ɔ, nyumuhi maa pee 4,000 nɛ ngɛ lejɛ ɔ. Kɛkɛ nɛ e wo mɛ blɔ.
10 Oya nɔuu nɛ e kɛ e kaseli ɔmɛ sɛ lɛ ɔ mi nɛ a ba Dalmanuta kpokpa a nɔ.
11 Farisi bi ɔmɛ ba hiɛ ɔ nɛ a kɛ lɛ ba bɔni nya sami, nɛ a ka lɛ nɛ a bi lɛ nɛ e ha mɛ okadi ko nɛ je hiɔwe.
12 Kɛkɛ nɛ e hao wawɛɛ ngɛ e mumi mi nɛ e de ke: “Mɛni he je nɛ yi nɔ nɛ ɔ ngɛ okadi hlae ɔ? Ngɛ anɔkuale mi ɔ, i ngɛ nyɛ dee ke, a be yi nɔ nɛ ɔ okadi ko hae.”
13 Kɛkɛ nɛ e je a he, nɛ e ya sɛ lɛ mi ekohu, nɛ e je kɛ ho wo ɔ se ya.
14 Se a hɛ je nɔ kaa a maa ngɔ abolo kɛ ya, nɛ a be nɔ́ ko nɔ́ ko ngɛ a dɛ ngɛ lɛ ɔ mi kaa ja abolo kake pɛ.
15 Nɛ e bɔ mɛ kɔkɔ wawɛɛ ke: “Nyɛ hɛ nɛ hi nyɛ he nɔ; nyɛɛ hyɛ nɛ hi ngɛ Farisi bi ɔmɛ a masa a kɛ Hɛrode masa a he.”
16 Enɛ ɔ he ɔ, a kɛ a sibi bɔni nya sami akɛnɛ a be niye ní ɔ he je.
17 Benɛ e na nɔ́ nɛ ɔ, e de mɛ ke: “Mɛni he je nɛ nyɛ ngɛ nya sãe ngɛ niye ní nɛ nyɛ be ɔ he ɔ? Anɛ loloolo ɔ, nyɛ kɔ we se, nɛ nyɛ nui sisi lo? Anɛ loloolo ɔ, nyɛ tsui nui níhi a sisi mla lo?
18 ‘Nyɛ ngɛ hɛ ngmɛ, anɛ nyɛ hyɛ we nɔ́ lo; nɛ nyɛ ngɛ tue, anɛ nyɛ nui nɔ́ lo?’ Nyɛ kai we
19 benɛ i ku abolo enuɔ ɔ mi kɛ ha nyumuhi 5,000 ɔ lo? Kusiihi nɛ bibli ɔ hyi mɛ tɔtɔɔtɔ ɔ enyɛmɛ nya nɛ nyɛ bua?” A he nɔ ke: “Nyɔngma kɛ enyɔ.”
20 “Benɛ i ku abolo kpaago ɔ mi kɛ ha nyumuhi 4,000 ɔ, kusii nguanguahi nɛ bibli ɔ hyi mɛ tɔtɔɔtɔ ɔ, enyɛmɛ nɛ nyɛ muɔɔ?” A he nɔ ke: “Kpaago.”
21 Kɛkɛ nɛ e de mɛ ke: “Loloolo ɔ, anɛ nyɛ nui sisi lo?”
22 Jehanɛ ɔ, a ba Betsaida. Nihi ngɔ nyumu ko nɛ e hɛ ngmɛ yu kɛ ba e ngɔ ngɛ hiɛ ɔ, nɛ a kpa lɛ pɛɛ kaa e ta e he.
23 Nɛ e pɛtɛ nyumu ɔ nɛ e hɛ ngmɛ yu ɔ nine he nɛ e kɛ lɛ je kɔpe ɔ mi. Benɛ e su lada ngɔ pue e hɛ ngmɛ ɔmɛ a nɔ se ɔ, e ngɔ e ninehi kɛ pue e nɔ nɛ e bi lɛ ke: “O na nɔ́ ko lo?”
24 Nyumu ɔ wo e yi nɔ nɛ e de ke: “I na nimli, se a ngɛ kaa tsohi nɛ a ngɛ nyɛɛe kɛ ngɛ yae kɛ ngɛ bae.”
25 E kpale ngɔ e nine ɔmɛ ngɔ pue nyumu ɔ hɛ ngmɛ ɔmɛ a nɔ ekohu, nɛ nyumu ɔ hyɛ nɔ́ heii. E hɛ ngmɛ ɔmɛ bli, nɛ e naa nɔ́ fɛɛ nɔ́ saminya.
26 Kɛkɛ nɛ e wo lɛ blɔ kɛ ho we mi ya nɛ e de lɛ ke: “Koo ya kɔpe ɔ mi.”
27 Jehanɛ ɔ, Yesu kɛ e kaseli ɔmɛ je kɛ ho kɔpehi nɛ a ngɛ Kaisarea Filipi ɔ ya, nɛ benɛ a ngɛ blɔ ɔ nɔ kɛ yaa a, e bɔni e kaseli ɔmɛ sane bimi. E bi mɛ ke: “Mɛnɔ nɛ nihi ngɛ dee ke i ji?”
28 A ha lɛ heto ke: “Yohane Nɔ Baptisilɔ ɔ, se ni kpahi hu ngɛ dee ke Eliya, nɛ ni kpa komɛ hu deɔ ke, gbali ɔmɛ a ti nɔ kake.”
29 Kɛkɛ nɛ e bi mɛ ke: “Nyɛ hu nɛɛ, mɛnɔ nyɛ deɔ ke i ji?” Petro ha lɛ heto ke: “Mo ji Kristo ɔ nɛ.”
30 Enɛ ɔ he ɔ, e bɔ mɛ kɔkɔ kaa a ko de nɔ ko nɔ ko nɔmlɔ nɛ e ji.
31 Jehanɛ se hu ɔ, e bɔni mɛ ní tsɔɔmi kaa e sa kaa nɔmlɔ Bi ɔ nɛ e na amanehlu babauu, nɛ nikɔtɔma amɛ kɛ osɔfo nikɔtɔma amɛ kɛ womi ngmali ɔmɛ ma kua lɛ nɛ a maa gbe lɛ, nɛ ligbi etɛne ɔ nɔ ɔ, e maa te si.
32 Ngɛ anɔkuale mi ɔ, e ha nɛ munyu nɛ ɔ pee heii. Se Petro ngɔ lɛ kɛ ya se nɛ e bɔni e hɛ mi kami.
33 Kɛkɛ nɛ e plɛ e he nɛ e hyɛ e kaseli ɔmɛ, nɛ e kã Petro hɛ mi ke: “Satan, bee kɛ ho ye se ya! ejakaa o susuu we níhi a he kaa bɔ nɛ Mawu susuɔ níhi a he ɔ, mohu ɔ, o susuɔ níhi a he kaa adesahi.”
34 Jehanɛ ɔ, e tsɛ asafo kuu ɔ kɛ ba e kɛ e kaseli ɔmɛ a ngɔ nɛ e de mɛ ke: “Ke nɔ ko suɔ kaa e maa nyɛɛ ye se ɔ, e kua e he, nɛ e wo e sɛumi tso* ɔ, nɛ e ya nɔ nɛ e nyɛɛ ye se.
35 Ejakaa nɔ fɛɛ nɔ nɛ e suɔ kaa e maa baa e wami* yi ɔ, e maa laa lɛ, se nɔ fɛɛ nɔ nɛ e wami* maa laa lɛ ngɛ imi kɛ sane kpakpa a he ɔ, e maa baa e wami ɔ yi.
36 Ngɛ anɔkuale mi ɔ, ke nɔmlɔ nine su je ɔ tsuo nɔ, se e wami* laa lɛ ɔ, mɛni nɔ́ kpakpa nɛ e ma ná?
37 Mɛni tutuutu nɛ nɔmlɔ maa ngɔ kɛ ha konɛ e kɛ tsake e wami?*
38 Ejakaa nɔ fɛɛ nɔ nɛ imi kɛ ye munyu ɔ he zo maa pee lɛ ngɛ yi nɔ gba puɛli* kɛ yayami peeli nɛ ɔmɛ a kpɛti ɔ, lɛ hu e he maa pee nɔmlɔ Bi ɔ zo ke e ba ngɛ e Tsɛ ɔ hɛ mi nyami ɔ mi be mi nɛ bɔfo klɔuklɔu ɔmɛ piɛɛ e he ɔ.”
Sisi Ningmahi
^ Aloo “kɛtɛ.”
^ Hyɛ Munyu Komɛ A Sisi Tsɔɔmi.
^ Aloo “susuma.”
^ Aloo “susuma.”
^ Aloo “susuma.”
^ Aloo “susuma.”
^ Aloo “nɛ yi anɔkuale.”
