“Juɛmi mi nyagba nɛ nihewi kɛ yihewi kɛ ngɛ kpeeɔ ngɛ hɛdɔ wawɛɛ, nɛ wa yɔse kaa intanɛti nɔ huɛ bɔmi hehi piɛɛ níhi nɛ ha nɛ ní nɛ ɔmɛ ngɛ nɔ yae wawɛɛ ɔ he.”​—Dr. Vivek Murthy, U.S. surgeon general, New York Times, June 17, 2024.

 Mɛni blɔ nɔ nɛ fɔli ma nyɛ maa gu kɛ po a bimɛ ɔmɛ a he piɛ kɛ je oslaahi nɛ ngɛ intanɛti nɔ huɛ bɔmi hehi ɔ he? Baiblo ɔ haa wɔ ga womi komɛ nɛ ma nyɛ maa ye bua wɔ.

 Mo susu Baiblo sisi tomi mlaahi nɛ ɔmɛ a he.

 “Nɔ nɛ e hɛ mi tɛ ɔ susuɔ nɔ́ fɛɛ nɔ́ nɛ e peeɔ ɔ he.”​—Abɛ 14:15.

 Koo nu he kaa doo ɔ e sa nɛ o ngmɛ o bi ɔ blɔ nɛ e kɛ intanɛti nɔ huɛ bɔmi hehi nɛ tsu ní, ejakaa e ma nyɛ maa ye lɛ awi. Loko o maa ngmɛ o bi ko blɔ nɛ e kɛ intanɛti nɔ huɛ bɔmi hehi nɛ tsu ní ɔ, moo hyɛ saminya kaa o bi ɔ wa nɛ e kɛ e be ma nyɛ ma tsu ní saminya, e hlaa huɛmɛ kpakpahi, nɛ e hiee níhi nɛ sɛ.

•   Ke o suɔ nɛ o kase babauu ɔ, moo kane munyuhi nɛ ji “Should My Child Use Social Media?” kɛ “Teaching Your Teenager Social Media Safety.”

 “[O kɛ o] be nɛ tsu ní ngɛ blɔ nɛ hi pe kulaa nɔ.”​—Efeso Bi 5:16.

 Ke o ngmɛ o bi ɔ blɔ nɛ e kɛ intanɛti nɔ huɛ bɔmi hehi ngɛ ní tsue ɔ, moo tsɔɔ lɛ nɔ́ he je kɛ bɔ nɛ mlaahi nɛ o wo ɔ maa ye bua lɛ ha. Mo yɔse tsakemi nɛ ngɛ nɔ yae ngɛ o bi ɔ si himi mi, nɛ o le ke ji kaa e sa nɛ o ngmɛ lɛ blɔ nɛ e ya nɔ nɛ e kɛ intanɛti nɔ huɛ bɔmi hehi ɔ nɛ tsu ní aloo e kɛ kpa ní tsumi.

•   O kɛ ní tɛnimi nɛ tsɔɔ nɔ ní ɔ nɛ tsu nì O Kɛ Intanɛti Nɔ Huɛ Bɔmi Hehi Nɛ Tsu Ní Ngɛ Nile Mi kɛ ye bua o bi ɔ nɛ e hyɛ saminya ngɛ bɔ nɛ e kɛ intanɛti nɔ huɛ bɔmi hehi ma tsu ní ha a he.

 Baiblo ɔ de ke wa ngɛ “behi nɛ a mi wa nɛ a nya dami maa ye” ɔ mi. (2 Timoteo 3:1-5) Nɛ ngɛ jamɛ a be ɔ mi nɔuu, e kɛ ga womihi nɛ ma nyɛ maa ye bua wɔ konɛ wa nyɛ nɛ waa da nya a ha wɔ. O ma nyɛ maa na womihi nɛ a da Baiblo ɔ nɔ kɛ pee nɛ hiɛ pe 20 nɛ ma nyɛ maa ye bua fɔli kɛ a bimɛ ngɛ munyu nɛ ɔ mi níhi nɛ hao ɔ nihewi kɛ yihewi.