1. Mɛni he je nɛ o bua jɔ Baiblo ɔ he ɔ?

 WA BUA JƆ wawɛɛ kaa Yehowa Mawu ha wɔ Baiblo ɔ! Ngɛ Baiblo ɔ mi ɔ, Yehowa ha wɔ ga womi nɛ nile ngɛ mi nɛ waa kɛ ma nyɛ maa da haomihi nɛ waa kɛ kpeɔ mwɔnɛ ɔ nya. Jehanɛ hu ɔ, e ha wɔ hwɔɔ se he hɛ nɔ kami nɛ se be. Nɔ́ nɛ pe kulaa a, kɛ gu Baiblo ɔ nɔ ɔ, Yehowa ha nɛ wa le e suhi fuu. Ke wa pue wa yi mi tɛ ngɛ Yehowa su kpakpa amɛ a he ɔ, e maa ta wa tsui he wawɛɛ, nɛ wa bua maa jɔ kaa wa maa pee e huɛ.​​—La 25:14.

2. Mɛni blɔ slɔɔtohi a nɔ nɛ Yehowa gu kɛ je e he kpo kɛ tsɔɔ adesahi?

² Yehowa suɔ nɛ nihi nɛ a le lɛ. Blema a, Yehowa gu nlamihi, ninahi, kɛ e bɔfohi a nɔ nɛ e kɛ sɛ gbihi ha ni kpahi. (4 Mose 12:6; Níts. 10:3, 4) Ke a ngmɛ́ nlamihi, ninahi, kɛ sɛ gbihi nɛ Yehowa gu bɔfohi a nɔ kɛ ha a kɛ fɔɛ si ɔ, kɛ wa ma plɛ kɛ kase ha kɛɛ? Yehowa suɔ nɛ waa le ní nɛ ɔmɛ, enɛ ɔ he ɔ, e ha nɛ a ‘ngma kɛ wo womi mi.’ (Yer. 30:2) Akɛnɛ ‘anɔkuale Mawu ɔ blɔ ɔmɛ hi kɛ pi si’ he je ɔ, wa ma nyɛ ma ná nɔ mi mami kaa blɔ nɔ nɛ e guɔ nɛ e kɛ wɔ sɛɛɔ ní ɔ hi, nɛ e maa ye bua wɔ.​​—La 18:30.

3. Mɛni blɔ nɔ Yehowa gu kɛ ha nɛ a baa Baiblo ɔ yi? (Yesaya 40:8)

³ Kane Yesaya 40:8. Ngɛ jeha akpehi abɔ nɛ be ɔ mi ɔ, nyumuhi kɛ yihi anɔkualetsɛmɛ ná ga womi kpakpahi ngɛ Mawu Munyu ɔ mi. Mɛni ha nɛ e ba jã a? Wa le kaa a ngma Mawu Munyu ɔ be kɛkɛɛ ji nɛ ɔ, nɛ a ngma ngɛ níhi nɛ a ma nyɛ ma puɛ nɔ hulɔ. Enɛ ɔ he ɔ, blema ngmami ɔmɛ nɛ a ngma ngɛ womi kpohi a nɔ ɔ, ekoeko be mwɔnɛ ɔ. Yehowa ha nɛ womi  ngmali ngma e munyuhi nɛ ngɛ klɔuklɔu ɔ kɛ fɔ si. E ngɛ mi kaa womi ngmali nɛ ɔmɛ yí mluku mohu lɛɛ, se a pee totooto. Kaa nɔ hyɛmi nɔ́ ɔ, womi ngmalɔ ko de ke: “Wa ngɛ nɔ mi mami kaa blema womi ko be nɛ a pee totooto kɛ ngma kaa Hebri Ngmami ɔmɛ.” E ngɛ mi kaa a ngma Baiblo ɔ be kɛkɛɛ ji nɛ ɔ ngɛ níhi nɛ a ma nyɛ ma puɛ ɔ a nɔ, nɛ nyumuhi nɛ a hyɛ nɔ nɛ a ngma eko kɛ fɔ si ɔ yí mluku mohu lɛɛ, se wa ma nyɛ ma ná nɔ mi mami kaa munyuhi nɛ wa kaneɔ ngɛ Baiblo ɔ mi mwɔnɛ ɔ je Yehowa nɛ ji Baiblo ɔ Ngmalɔ ɔ ngɔ.

4. Mɛni he wa ma susu ngɛ ní kasemi nɛ ɔ mi?

⁴ “Nike ní kpakpa fɛɛ nike ní kpakpa, kɛ nike ní nɛ hi kɛ pi si fɛɛ nike ní nɛ hi kɛ pi si” ɔ je Yehowa ngɔ. (Yak. 1:17) Nike ní kpakpahi nɛ Yehowa kɛ ha wɔ ɔ kake ji Baiblo ɔ nɛ. Ke nɔ ko ke wɔ nɔ́ ko ɔ, e tsɔɔ wɔ nɔ́ ko ngɛ nɔ ɔ he. E haa nɛ wa naa kaa nɔ ɔ le wɔ, nɛ e le wa hiami níhi. Jã pɛpɛɛpɛ nɛ e ji ngɛ nɔ nɛ ha wɔ Baiblo ɔ blɔ fa mi. Ke wa kase Baiblo ɔ saminya a, wa maa le níhi fuu ngɛ Yehowa he. Wa naa kaa Yehowa le wɔ saminya, nɛ e le wa hiami níhi. Ngɛ ní kasemi nɛ ɔ mi ɔ, wa ma susu nɔ́ nɛ wa ma nyɛ maa kase ngɛ Yehowa su etɛ komɛ a he ngɛ Baiblo ɔ mi. Su nɛ ɔmɛ ji: e nile, e dami sane yemi, kɛ suɔmi nɛ e ngɛ ɔ. Kekleekle ɔ, nyɛ ha nɛ wa susu nɔ́ nɛ Baiblo ɔ tsɔɔ wɔ ngɛ Mawu nile ɔ he ɔ he.

5. Mɛni ji blɔ kake nɔ nɛ Baiblo ɔ jeɔ Mawu nile ɔ kpo?

⁵ Yehowa le kaa wa hia e ga womi nɛ nile ngɛ mi ɔ. Enɛ ɔ he ɔ, nile munyuhi sɔuu lɛ ngɛ nike ní nɛ ji Baiblo ɔ mi. Baiblo ɔ mi ga womi ɔmɛ yeɔ bua nihi babauu nɛ e tsakeɔ a si himi. Benɛ Mose ngma kekleekle womi ɔmɛ ngɛ Baiblo ɔ mi ɔ, e de Israel bi ɔmɛ ke: “Mlaa nɛ ɔmɛ pi munyu guhi; nyɛ wami daa si ngɛ a nɔ.” (5 Mose 32:47) Nihi nɛ a kɛ Ngmami ɔmɛ a mi munyu ɔmɛ tsu ní ɔ, ye manye ngɛ si himi mi nɛ a si himi pee kpakpa. (La 1:2, 3) E ngɛ mi kaa a ngma Mawu Munyu ɔ be kɛkɛɛ ji nɛ ɔ mohu lɛɛ, se loloolo ɔ, e ngɛ he wami nɛ e tsakeɔ nihi a si himi. Kaa nɔ hyɛmi nɔ́ ɔ, ke o ya jw.org ɔ nɔ, nɛ o ya munyu nɛ ji, “Baiblo ɔ Tsakeɔ Nihi A Si Himi” blɔ he ɔ, o maa na kaa Baiblo ɔ tsake nihi babauu a si himi mwɔnɛ ɔ, nɛ a si himi pee kpakpa, ejakaa a kɛ ga womihi nɛ ngɛ Baiblo ɔ mi ɔ tsuɔ ní. Enɛ ɔ ji odase nɛ tsɔɔ kaa Baiblo ɔ ngɛ he wami, nɛ e ngɛ ní ‘tsue ngɛ nihi nɛ a he ye ɔ a mi.’​​—1 Tɛs. 2:13.

6. Mɛni he je nɛ wa ma nyɛ ma de ke Baiblo ɔ ngɛ slɔɔto kulaa ngɛ womi kpahi a he ɔ?

⁶ Womi ko be nɛ e ngɛ kaa Baiblo ɔ. Mɛni he je? Ejakaa Yehowa Mawu ji nɔ nɛ ngma Baiblo ɔ, nɛ e ngɛ he wami kɛ nile pe nɔ fɛɛ nɔ, nɛ e ngɛ kɛ yaa neneene. Behi fuu ɔ, nihi nɛ a ngmaa womi ɔ gboɔ kɛ jeɔ womi ɔ he, nɛ ke womi ɔ se ngɛ kɛe hu ɔ, ga womihi nɛ ngɛ mi ɔ be beɔ. Se sisi tomi mlaahi nɛ a ngɛ Baiblo ɔ mi lɛɛ, a be bi gblee. E ye bua nihi babauu nɛ́ a hi si ngɛ be slɔɔtohi a mi. Ke wa kane womi klɔuklɔu nɛ ɔ nɛ wa pue wa yi mi tɛ ngɛ nɔ́ nɛ wa ngɛ kasee ɔ he ɔ, Yehowa maa ngɔ e mumi klɔuklɔu ɔ kɛ ye bua wɔ konɛ waa le bɔ nɛ waa kɛ ga womihi nɛ ngɛ Baiblo ɔ mi ɔ ma tsu ní ha ngɛ wa si himi mi. (La 119:27; Mal. 3:16; Heb. 4:12) Ngɛ anɔkuale mi ɔ, Baiblo ɔ Ngmalɔ ɔ ngɛ kɛ yaa neneene, nɛ e pee klaalo kaa e maa ye bua mo. E sa nɛ enɛ ɔ nɛ wo wɔ he wami nɛ waa kane Baiblo ɔ daa!

7. Mɛni blɔ nɔ nɛ Baiblo ɔ ha nɛ Mawu we bi nɛ a hi si blema a pee kake?

⁷ Nɔ́ kpa ko hu nɛ haa nɛ wa naa kaa Mawu nile lɛ ngɛ Baiblo ɔ mi ɔ ji kaa Baiblo ɔ yeɔ bua Mawu we bi nɛ a peeɔ kake. Benɛ Israel bi ɔmɛ ya su Si Womi Zugba a nɔ ɔ, a to si ngɛ  he kpa he kpa. A kpɛti ni komɛ ba pee wo hɛli, na lɛli, nɛ ni komɛ hu ba pee ngmɔ huli. E ko nyɛ ba kaa Israel bi nɛ a to si ngɛ he pɔtɛɛ ko ɔ ma nyɛ ma kpa a nyɛmimɛ Israel bi nɛ a ya to si ngɛ he kpahi ɔ a he susumi. Se Yehowa to blɔ nya kɛ ha Israel bi ɔmɛ konɛ a bua a he nya si abɔ bɔ nɛ pee nɛ a kane e Munyu nɛ a ngma a kɛ ha mɛ, nɛ́ a tsɔɔ mɛ nya. (5 Mose 31:10-13; Neh. 8:2, 8, 18) Moo po he foni nɛ o hyɛ bɔ nɛ Israel no anɔkualetsɛ ko nɛ e ba he nya buami nɛ ɔ ngɛ Yerusalem ɔ maa nu he ha ke e na e nyɛmimɛ ayɔhi abɔ nɛ a je he kpahi kɛ ba lejɛ ɔ! Yehowa gu blɔ nɛ ɔ nɔ kɛ ha nɛ kake peemi hi a kpɛti. Pee se ɔ, benɛ a to Kristofohi asafo ɔ sisi ɔ, nyumuhi kɛ yihi nɛ a tuɔ gbi slɔɔtoslɔɔtohi ɔ ba pee Kristofohi. A kpɛti ni komɛ ji nihi nɛ a hɛɛ blɔ nya, nɛ a kpɛti ni komɛ hu ji nimli guhi, a kpɛti ni komɛ ji niatsɛmɛ, nɛ ni komɛ hu ji ohiatsɛmɛ. Se akɛnɛ mɛ tsuo a suɔ Ngmami ɔ he je ɔ, a pee kake kɛ sɔmɔ anɔkuale Mawu ɔ. Loko ni hehi nɛ a ba pee Kristofohi ɔ maa nu Mawu Munyu ɔ sisi ɔ, jã Kristofohi kpahi ye bua mɛ, nɛ a ya a kpe ɔmɛ eko.​​—Níts. 2:42; 8:30, 31.

8. Mɛni blɔ nɔ nɛ Baiblo ɔ yeɔ bua Yehowa we bi nɛ a peeɔ kake mwɔnɛ ɔ?

⁸ Kɛ gu Baiblo ɔ nɔ ɔ, wa Mawu ɔ nɛ e ngɛ nile ɔ yaa nɔ nɛ e tsɔɔ e we bi ní, nɛ e haa nɛ kake peemi hiɔ a kpɛti. Yehowa he anɔkualehi tsuo nɛ e sa nɛ waa le ɔ ngɛ Baiblo ɔ mi. Enɛ ɔ he ɔ, wa kpeɔ be fɛɛ be ngɛ asafo mi kpehi, kpɔ mi kpehi, kɛ kpokpa nɔ kpehi a sisi  nɛ a kaneɔ Ngmami ɔ, a tsɔɔ mi nɛ wa susuɔ he hulɔ. Baiblo ɔ ji nɔ́ titli nɛ Yehowa guɔ nɔ kɛ yeɔ bua e we bi konɛ ‘a pee kake kɛ sɔmɔ lɛ’.​​—Zef. 3:9.

9. Mɛni su nɛ wa hia konɛ wa nyɛ nɛ waa nu Baiblo ɔ sisi? (Luka 10:21)

⁹ Mo susu odase kpa nɛ tsɔɔ kaa Yehowa ngɛ nile ɔ he nɛ o hyɛ. E ha nɛ a ngma Baiblo ɔ mi womihi fuu ngɛ blɔ nɛ e sisi numi yi nɔ, konɛ nihi nɛ a baa a he si nɛ a kaneɔ ɔ nɛ a nu sisi. (Kane Luka 10:21.) Nihi slɔɔtoslɔɔtohi kaneɔ Baiblo ɔ. Ní lelɔ ko de ke, “Nihi babauu kaneɔ Baiblo ɔ pe womi kpahi tsuo, nɛ a toɔ a tsui si kɛ kaneɔ hulɔ.” Se nihi nɛ a baa a he si ɔ pɛ lɛ a nuɔ sisi saminya nɛ a kɛ nɔ́ nɛ Baiblo ɔ de ɔ tsuɔ ní.​​—2 Kor. 3:15, 16.

10. Mɛni blɔ kpa nɔ nɛ Baiblo ɔ haa nɛ wa naa Yehowa nile ɔ?

¹⁰ Blɔ kpa ko hu ngɛ nɛ wa guɔ nɔ kɛ naa Yehowa nile ɔ ngɛ Baiblo ɔ mi. Yehowa guɔ Baiblo ɔ nɔ kɛ tsɔɔ wɔ ní kaa asafo, se pi lɔ ɔ pɛ, e tsɔɔ wa kpɛti nɔ fɛɛ nɔ ní nɛ e woɔ wa bua kaa ni kakaakahi hulɔ. Ke wa kane Yehowa Munyu ɔ, wa maa na kaa Yehowa susuɔ wa kpɛti nɔ fɛɛ nɔ he. (Yes. 30:21) Anɛ o kane ngmami ko hyɛ be mi nɛ o kɛ haomi ko ngɛ kpee, nɛ o nu he kaa mo tutuutu lɛ a ngma kɛ ha lo? O ma nyɛ maa nu he jã be komɛ, se kɛ̃ ɔ, nihi ayɔhi abɔ kaneɔ Baiblo ɔ nɛ a nuɔ sisi. Ke jã a, lɛɛ mɛni he je nɛ munyuhi nɛ ngɛ Baiblo ɔ mi ɔ be bi, nɛ e haa nɛ o nuɔ he kaa mo tutuutu lɛ a ngma kɛ ha a? Nɔ́ he je ji kaa Baiblo ɔ Ngmalɔ ɔ le ní pe nɔ fɛɛ nɔ ngɛ je ɔ mi.​​—2 Tim. 3:16, 17.

11. Benɛ a ngɛ Baiblo ɔ ngmae ɔ, mɛni nɛ Mawu pee kɛ tsɔɔ kaa e hlɛ nɔ mi?

¹¹ Su kpa ko hu nɛ Yehowa ngɛ ji dami sane yemi. (5 Mose 32:4) Ke nɔ ko yeɔ dami sane ɔ, e hlɛ nɔ mi, nɛ wa le kaa Yehowa hlɛ nɔ mi. (Níts. 10:34, 35; Rom. 2:11) Yehowa ha nɛ a ngma Baiblo ɔ ngɛ gbihi nɛ nihi babauu tuɔ benɛ a ngɛ Baiblo ɔ ngmae ɔ mi. Enɛ ɔ maa nɔ mi kaa Yehowa hlɛ nɔ mi. A ngma Baiblo ɔ mi womihi 39 nɛ sɛ hlami ɔ hiɛhiɛɛ ngɛ Hebri gbi mi, ejakaa lɔ ɔ ji gbi nɛ Mawu we bi tuɔ wawɛɛ ngɛ jamɛ a be ɔ mi. Se Kristofohi nɛ a hi si ngɛ Kaseli ɔmɛ a be ɔ mi ɔ a kpɛti nihi hiɛhiɛɛ tuɔ Hela gbi ɔ. Enɛ ɔ he ɔ, a ngma Baiblo ɔ mi womihi 27 nɛ piɛ ɔ ngɛ jamɛ a gbi ɔ mi titli. Yehowa ha we nɛ a ngma e Munyu ɔ ngɛ gbi kake pɛ mi. Mwɔnɛ ɔ, nihi maa pee ayɔ akpe kpaanyɔ tuɔ gbi slɔɔtoslɔɔtohi ngɛ je ɔ mi. Mɛni blɔ nɔ nɛ nihi babauu kaa jã a maa gu kɛ kase Yehowa he ní?

12. Mɛni ji blɔ kpa nɔ nɛ Daniel 12:4 ɔ ba mi ngɛ nyagbe ligbi nɛ ɔmɛ a mi?

¹² Yehowa gu gbalɔ Daniel nɔ nɛ e wo si kaa ngɛ nyagbe be ɔ mi ɔ, ‘anɔkuale nile’ nɛ ngɛ Baiblo ɔ mi ɔ maa ‘hiɛ babauu,’ nɛ nihi fuu maa nu sisi. Baiblo ɔ de ke: “Nɛ mo Daniel, ngɔɔ munyu nɛ ɔ kɛ to, nɛ o sɔu womi ɔ nya kɛ ya si nyagbe be ɔ. Nihi babauu maa nyɛɛ kɛ ya kɛ ba, nɛ anɔkuale nile ɔ ma ba hiɛ babauu.” (Daniel 12:4, NW) Nɔ́ kake nɛ ye bua nihi babauu nɛ a nu Baiblo ɔ sisi ji kaa a tsɔɔ Baiblo ɔ kɛ Baiblo kasemi womihi a sisi kɛ ya gbihi fuu mi, nɛ a print nɛ a gba ha nihi fuu. Ngɛ je kɛ wɛ ɔ, Baiblo ɔ pɛ ji womi nɛ a tsɔɔ sisi kɛ ya gbihi fuu a mi, nɛ a gba kɛ ha nihi babauu pe womi kpahi. Baiblo ɔ nɛ a tsɔɔ sisi kɛ ya gbi kpahi a mi nɛ a ngɛ juae ngɛ ma a mi ɔ a he jua wa wawɛɛ. Amlɔ nɛ ɔ, Yehowa we bi tsɔɔ Baiblo ɔ tsuo loo e fã ko sisi kɛ ya gbihi nɛ hiɛ pe 240 a mi, nɛ nihi fuu a nine suɔ nɔ nɛ a wui he hiɔ. Enɛ ɔ ha nɛ nihi nɛ a ngɛ je ɔ mi tsuo ɔ ngɛ ‘sane kpakpa nɛ kɔɔ Matsɛ Yemi ɔ’ he nɛ a ngɛ fiɛɛe loko nyagbe ɔ nɛ ba a he ní kasee. (Mat. 24:14) Wa Mawu nɛ yeɔ  dami sane ɔ suɔ nɛ nihi babauu nɛ a kane e Munyu ɔ konɛ a ba le lɛ, ejakaa e suɔ wɔ tsuo wawɛɛ.

13. Mɛni he je nɛ wa ma nyɛ ma de ke Baiblo ɔ haa nɛ wa naa kaa Yehowa suɔ wɔ ɔ? (Yohane 21:25)

¹³ Baiblo ɔ ha nɛ wa na kaa Yehowa su nɛ pe kulaa ji suɔmi. (1 Yoh. 4:8) Mo susu níhi nɛ Yehowa ha nɛ a ngma kɛ wo Baiblo ɔ mi kɛ níhi nɛ e ha we nɛ a ngma kɛ wo mi ɔ he nɛ o hyɛ. Níhi nɛ maa hia wɔ pɛ nɛ e ha nɛ a ngma kɛ wo Baiblo ɔ mi, bɔ nɛ pee nɛ huɛ bɔmi kpakpa nɛ hi waa kɛ lɛ wa kpɛti, nɛ wa ná bua jɔmi ngɛ si himi mi, nɛ wa ná neneene wami hulɔ. Akɛnɛ Yehowa suɔ wɔ he je ɔ, e ha nɛ a ngma níhi nɛ a he maa hia wɔ ɔ pɛ ngɛ Baiblo ɔ mi konɛ wa nyɛ nɛ wa sɔmɔ lɛ.​​—Kane Yohane 21:25.

14. Mɛni blɔ kpa ko nɔ nɛ Baiblo ɔ maa nɔ mi kaa Mawu suɔ wɔ?

¹⁴ Bɔ nɛ Yehowa kɛ wɔ sɛɛɔ ní ha a ji nɔ́ kake hu nɛ tsɔɔ kaa e suɔ wɔ nɛ e woɔ wa hɛ mi nyami. Ngɛ Baiblo ɔ mi ɔ, Yehowa wui wɔ mlaahi fuu nɛ e kɛ tsɔɔ wɔ níhi tutuutu nɛ e sa nɛ waa pee kɛ níhi nɛ e sɛ kaa waa pee ngɛ wa si himi mi daa ligbi. Mohu ɔ, e guɔ níhi nɛ ya nɔ ngɛ nihi a si himi mi, gbamihi nɛ a sa kadimi, kɛ blɔ tsɔɔmihi a nɔ kɛ yeɔ bua wɔ konɛ waa mwɔ yi mi kpɔhi nɛ da. Enɛ ɔ he ɔ, ke wa kane e Munyu ɔ, wa jeɔ wa tsui mi kɛ buɔ lɛ tue nɛ wa jeɔ suɔmi kpo kɛ tsɔɔ lɛ wawɛɛ.

15. (a) Mɛni Yehowa pee kɛ tsɔɔ kaa e susuɔ nihi nɛ a kaneɔ e Munyu ɔ he? (b) Kaa bɔ nɛ foni ɔ tsɔɔ ɔ, mɛnɔmɛ a he sane nɛ jokuɛ yoyo ɔ, nyɛminyumu ɔ, kɛ nyɛmiyo nɔkɔtɔma a ngɛ a yi mi tɛ puee ngɛ a he ngɛ Baiblo ɔ mi? (1 Mose 39:1, 10-12; 2 Ma. 5:1-3; Luka 2:25-38)

¹⁵ Baiblo ɔ haa nɛ wa naa kaa Yehowa susuɔ wa he wawɛɛ nitsɛ. Ngɛ mɛni blɔ nɔ? Sanehi  nɛ ngɛ Baiblo ɔ mi ɔ ha nɛ wa na bɔ nɛ adesa komɛ nu he ha. Akɛnɛ nihi nɛ a tu a he munyu ngɛ Baiblo ɔ mi ɔ “ngɛ he numihi kaa wɔ nɔuu” he je ɔ, wa nyɛɔ nɛ wa nuɔ mɛ sisi. (Yak. 5:17) Nɔ́ nɛ pe kulaa a, ke wa kase bɔ nɛ Yehowa kɛ nihi nɛ a ngɛ kaa wɔ ɔ hi si ha a he ní ɔ, e haa nɛ wa naa kaa “Yehowa mi mi hi wawɛɛ nɛ e ji mɔbɔ nalɔ.”​​—Yak. 5:11.

16. Ke wa kase nihi nɛ a pee yayamihi a he sane ngɛ Baiblo ɔ mi ɔ, mɛni e tsɔɔ wɔ ngɛ Yehowa he? (Yesaya 55:7)

¹⁶ Baiblo ɔ haa nɛ wa naa bɔ nɛ Yehowa suɔ wɔ ha ngɛ blɔ kpa ko hu nɔ. Baiblo ɔ ha nɛ wa ná nɔ mi mami kaa Mawu be wɔ kuae ke wa tɔ̃ po. Benɛ Israel bi ɔmɛ tɔ̃ Yehowa nɔ si abɔ nɛ a tsake a tsui ɔ, Yehowa ngɔ a tɔmi ɔmɛ kɛ ke mɛ. (Kane Yesaya 55:7.) Kristofohi nɛ a hi si ngɛ kaseli ɔmɛ a be ɔ mi ɔ hu na kaa Yehowa suɔ mɛ wawɛɛ nitsɛ. Benɛ nyumu ko pee yayami nɛ hɛdɔ ngɛ he ɔ, bɔfo Paulo wo e nyɛmimɛ Kristofo ɔmɛ he wami kaa a ‘ngɔ kɛ pa lɛ nɛ a wo e bua.’ (2 Kor. 2:6, 7; 1 Kor. 5:1-5) E ngɛ bua jɔmi wawɛɛ kaa Yehowa kua we e sɔmɔli nɛ a tɔ̃ e nɔ ɔ! E je suɔmi mi nɛ e ye bua mɛ, e tsɔse mɛ, nɛ e fɔ mɛ nine konɛ a kpale kɛ ba e ngɔ ekohu. Mwɔnɛ ɔ hu ɔ, e wo si kaa e maa pee jã ha yayami peeli tsuo nɛ a ma tsake a tsui niinɛ ɔ.​​—Yak. 4:8-10.

17. Mɛni he je nɛ Baiblo ɔ ji nike ní nɛ ngɛ slɔɔto kulaa a?

¹⁷ Baiblo ɔ ji nike ní nɛ Yehowa kɛ ha wɔ. Mɛni he je nɛ Baiblo ɔ ngɛ slɔɔto kulaa a? Kaa bɔ nɛ wa kase ɔ, Baiblo ɔ tsɔɔ kaa Yehowa le ní, e yeɔ dami sane, nɛ e suɔ wɔ wawɛɛ. Baiblo ɔ ha nɛ wa na kaa Yehowa suɔ nɛ waa le lɛ, nɛ e suɔ nɛ waa pee e huɛ hulɔ.

18. Mɛni wa ma nyɛ maa pee kɛ tsɔɔ kaa wa bua jɔ Yehowa “nike ní kpakpa” nɛ ji Baiblo ɔ he?

¹⁸ Wa sume nɛ waa ngɔ “nike ní kpakpa” nɛ ji Mawu Munyu ɔ kɛ fiɛ kulaa. (Yak. 1:17) Nyɛ ha nɛ waa ya nɔ nɛ waa tsɔɔ kaa wa bua jɔ he wawɛɛ, kɛ gu sɔlemi nɛ wa maa sɔle kɛ Mawu Munyu ɔ nɛ wa maa kane nɛ wa ma pue wa yi mi tɛ ngɛ he ɔ nɔ. Ke wa pee jã a, wa ma nyɛ ma ná nɔ mi mami kaa Yehowa nɛ ji Baiblo ɔ tsuo Ngmalɔ ɔ maa jɔɔ wa mɔde bɔmi ɔ nɔ, nɛ wa ma ná “Mawu he nile.”​​—Abɛ 2:5.