ANƐ o le nyɛminyumu ko aloo nyɛmiyo ko nɛ e hia kɛ ho ma se ya nɛ e ya ngɛ sɔmɔe ngɛ he nɛ Matsɛ Yemi fiɛɛli fuu a he hia ngɛ lo? Behi fuu ɔ, wa tsɛɛ Odasefohi nɛ a peeɔ jã a ke fiɛɛli nɛ a sɔmɔɔ ngɛ hehi nɛ fiɛɛli fuu a he hia ngɛ. Anɛ o bi o he hyɛ ke: ‘Mɛni lɛ woɔ mɛ he wami nɛ a ya sɔmɔɔ ngɛ ma se ɔ lo? Kɛ a plɛɔ kɛ dlaa a he kɛ haa sɔmɔmi nɛ ɔ ha kɛɛ? Anɛ ma nyɛ ma pee eko lo?’ Blɔ nɛ hi pe kulaa nɛ wa ma nyɛ maa gu nɔ kɛ ná sane bimi nɛ ɔmɛ a heto ji kaa wa ma bi nyɛmimɛ nyumuhi kɛ yihi nɛ a ya sɔmɔ ngɛ ma se ɔ konɛ a de wɔ. Lɔ ɔ he ɔ, nyɛ ha nɛ waa pee jã.

Mɛni ha nɛ o pee o juɛmi kaa o ma ya sɔmɔ ngɛ ma se he nɛ fiɛɛli fuu a he hia ngɛ ɔ? Amy nɛ amlɔ nɛ ɔ e ye jeha 35 kɛ se nɛ e je United States ɔ de ke: “Jeha komɛ nɛ be ɔ, i susu he kaa ma ya sɔmɔ ngɛ ma se, se e pee mi kaa e ji oti ko nɛ i be nyɛe ma su he.” Mɛni ha nɛ e tsake e juɛmi? E de ke: “Ngɛ jeha 2004 ɔ mi ɔ, nyɛminyumu ko kɛ e yo nɛ a ngɛ sɔmɔe ngɛ Belize ɔ fɔ mi nine kaa ma ba slaa mɛ, nɛ ma ba piɛɛ a he kɛ tsu blɔ gbami ní tsumi ɔ nyɔhiɔ kake. I pee jã, nɛ ye bua jɔ wawɛɛ! Jeha kake se ɔ, i hia kɛ ho Ghana ya konɛ ma ya sɔmɔ kaa blɔ gbalɔ ngɛ lejɛ ɔ.”

Jeha komɛ nɛ be ɔ, Stephanie nɛ amlɔ nɛ ɔ, e piɛ bɔɔ nɛ e maa ye jeha 30, nɛ lɛ hu e je United States ɔ hu hyɛ e si himi mi nɛ e de e he ke: ‘I ngɛ nɔmlɔ tso mi he wami kpakpa, nɛ weku blɔ nya ní tsumi ko be ye kuɛ nɔ. Ngɛ anɔkuale mi ɔ, ma nyɛ ma tsu ní babauu kɛ ha Yehowa pe bɔ nɛ i ngɛ pee amlɔ nɛ ɔ.’ Enɛ ɔ wo lɛ he wami nɛ e hia kɛ ho Ghana ya konɛ e ya bli e sɔmɔmi ní tsumi ɔ mi ngɛ lejɛ ɔ. Filip kɛ e yo Ida ji blɔ gbali. A ye jeha 50 kɛ se, nɛ a je Denmark. A suɔ kaa a maa hia kɛ ho he nɛ fiɛɛli fuu a he hia ngɛ ya. A hla níhi a mi konɛ a le blɔhi a nɔ nɛ a maa gu kɛ pee jã. Filip de ke: “Benɛ wa ná he blɔ ɔ, e pee wɔ kaa nɔ́ nɛ Yehowa ngɛ wɔ dee ke: ‘Nyɛɛ hia kɛ ho!’” Ngɛ jeha 2008 mi ɔ, a hia kɛ ho Ghana ya, nɛ a ya sɔmɔ ngɛ lejɛ ɔ pe jeha etɛ.

 Hans kɛ e yo Brook ji blɔ gbali. A ye jeha 30 kɛ se, nɛ a ngɛ sɔmɔe ngɛ United States. Ngɛ jeha 2005 ɔ mi ɔ, a ya ye bua nihi nɛ kɔɔhiɔ ngua ko nɛ a tsɛɛ ke Hurricane Katrina a kpata a níhi a hɛ mi ɔ. Pee se ɔ, a ngma womi nɔ ní kɛ bi kaa a suɔ kaa a kɛ a he maa wo tsuhi nɛ asafo ɔ ngɛ mae ngɛ je kɛ wɛ ɔ mi, se a tsɛ we mɛ. Hans de ke: “Lɔ ɔ se ɔ, wa bu munyu ko nɛ a tu ngɛ kpokpa nɔ kpe ko sisi ɔ tue. Munyu tulɔ ɔ wo Matsɛ David ta, nɛ e tsɔɔ kaa benɛ Yehowa ngmɛ́ David blɔ kaa e ma sɔlemi we ɔ, David kplɛɛ nɔ nɛ e tsake oti nɛ e kɛ ma e hɛ mi ɔ. Munyu nɛ ɔ ye bua wɔ nɛ wa na kaa tɔmi ko be he kaa nɔ ko ma tsake teokrase otihi nɛ e kɛ ma e hɛ mi ɔ.” (1 Kron. 17:1-4, 11, 12; 22:5-11) Brook hu de ke: “Yehowa suɔ kaa wa ya si sinya kpa.”

Benɛ Hans kɛ Brook nu a huɛmɛ nɛ a ya sɔmɔ ngɛ ma kpahi a nɔ ɔ a níhi a si kpamihi nɛ ngɛ bua jɔmi ɔ, lɔ ɔ wo mɛ he wami nɛ a bɔ mɔde kaa a ma ya sɔmɔ kaa blɔ gbali ngɛ ma se. Ngɛ jeha 2012 ɔ mi ɔ, a hia blɔ kɛ ho Ghana ya, nɛ a ya sɔmɔ ngɛ lejɛ ɔ nyɔhiɔ eywiɛ, kɛ ye bua mumuihi asafo ko. E ngɛ mi kaa a kpale kɛ ho United States ya mohu lɛɛ, se níhi a si kpamihi nɛ a ná ngɛ Ghana a ha nɛ a suɔ wawɛɛ kaa a kɛ Matsɛ Yemi ɔ maa pee nɔ́ titli ngɛ a si himi mi daa. Lɔ ɔ se ɔ, a ye bua kɛ ma asafo ɔ ní tsumi kɔni nɛ ngɛ Micronesia a.

Mɛni o pee kɛ dla o he konɛ o nyɛ nɛ o ya sɔmɔ ngɛ he nɛ fiɛɛli fuu a he hia ngɛ ɔ? Stephanie de ke: “I kane munyuhi nɛ a ngma ngɛ Hwɔɔmi Mɔ ɔ mi nɛ kɔɔ bɔ nɛ nɔ ko ma plɛ kɛ sɔmɔ ngɛ he nɛ fiɛɛli fuu a he hia ngɛ ɔ he. * Jehanɛ hu ɔ, i kɛ asafo mi nikɔtɔmahi kɛ kpɔmi nɔ hyɛlɔ ɔ kɛ e yo ɔ sɛɛ ní nɛ i de mɛ kaa i suɔ nɛ ma ya sɔmɔ ngɛ ma se. I sɔle ha Yehowa hulɔ, nɛ i de lɛ oti nɛ i kɛ ma ye hɛ mi ɔ.” Jamɛ a be ɔ mi ɔ, Stephanie bɔ mɔde kaa e maa pee e si himi kpokploo konɛ e nyɛ nɛ e to sika si nɛ e kɛ ya sɔmɔ ngɛ ma se.

Hans de ke: “Wa sɔle ha Yehowa konɛ e tsɔɔ wɔ blɔ, ejakaa wa suɔ kaa wa maa ya he nɛ e maa tsɔɔ wɔ kaa waa  ya a. Jehanɛ se hu ɔ, wa de Yehowa be pɔtɛɛ nɛ wa suɔ kaa wa ma tsu oti nɛ waa kɛ ma wa hɛ mi ɔ he ní.” Nyɛminyumu ɔ kɛ e yo ɔ ngma sɛ womi kɛ ya asafo ɔ ní tsumi kɔnihi eywiɛ. Benɛ asafo ɔ ní tsumi kɔni nɛ ngɛ Ghana a de mɛ ke a ma nyɛ maa ba a, a hia blɔ kɛ ho lejɛ ɔ ya kɛ juɛmi kaa a ma ya ye nyɔhiɔ enyɔ pɛ. Hans de ke: “Wa bua jɔ ní nɛ waa kɛ asafo ɔ ngɛ tsue ɔ he wawɛɛ, enɛ ɔ he ɔ, wa se kɛ ngɛ lejɛ ɔ pe be nɛ wa to kaa wa maa ye ɔ.”

George kɛ e yo Adria nɛ e piɛ bɔɔ nɛ a maa ye jeha 40 nɛ a je Canada a le kaa pi juɛmi kpakpa nɛ nɔ ko hɛɛɔ ɔ nɔ kɛkɛ nɛ Yehowa jɔɔ, mohu ɔ, ke nɔ ko mwɔ e yi mi kpɔ ngɛ blɔ nɛ da nɔ ɔ, Yehowa jɔɔ nɔ. Enɛ ɔ he ɔ, a bɔ mɔde nɛ a pee níhi nɛ maa ye bua mɛ konɛ a nyɛ nɛ a su oti nɛ a kɛ ma a hɛ mi ɔ he. A kɛ nyɛmiyo ko nɛ e ngɛ sɔmɔe ngɛ Ghana, he nɛ fiɛɛli fuu a he hia ngɛ ɔ sɛɛ ní, nɛ a bi lɛ sanehi fuu. A ngma sɛ womi ya ha asafo ɔ ní tsumi kɔnihi nɛ ngɛ Canada kɛ Ghana a hulɔ. Adria de ke: “Wa susu blɔhi a nɔ nɛ wa ma nyɛ maa gu kɛ pee wa si himi kpokploo pe bɔ nɛ wa pee momo ɔ po he.” Jã nɛ a pee ɔ ha nɛ a nyɛ nɛ a hia kɛ ho Ghana ya ngɛ jeha 2004 ɔ mi.

Mɛni nyagbahi o kɛ kpe benɛ o hia kɛ ho ma se ya a, nɛ mɛni o pee kɛ tsu he ní? Ngɛ Amy blɔ fa mi ɔ, nyagba nɛ e kɛ kpe kekleekle ji hɛja. E de ke: “E slo lejɛ ɔ si himi ngɛ he nɛ i je ɔ he.” Mɛni ye bua lɛ? E de ke: “Fiami nɛ ye weku li fiaa mi ngɛ tɛlifoo nɔ nɛ a deɔ mi ke a bua jɔ ní tsumi nɛ i ngɛ tsue ɔ he ɔ, ye bua mi nɛ ye hɛ ji nɔ́ he je nɛ i ma ye juɛmi nya si kaa ma hia kɛ ho ma se ya a nɔ. Pee se ɔ, i kɛ ye weku mi bimɛ ɔmɛ wa bɔni ní sɛɛmi ní ngɛ Intanɛti ɔ nɔ. Akɛnɛ i naa mɛ nɛ mɛ hu a naa mi he je ɔ, i nɛ kaa wa kpɛti kɛ hu.”  Amy tsɔɔ kaa akɛnɛ e kɛ nyɛmiyo ko nɛ e ngɛ ma a mi nɛ e ngɛ níhi a si kpami bɔ huɛ he je ɔ, nyɛmiyo ɔ ye bua lɛ nɛ e nu bɔ nɛ nihi peeɔ a ní ngɛ lejɛ ɔ ha a sisi saminya. E de ke: “Ke nihi pee nɔ́ ko nɛ i nui sisi ɔ, i ya biɔ ye huɛ ɔ. E ye bua mi nɛ i ba le nɔ́ nɛ e sa kaa ma pee, kɛ nɔ́ nɛ e sɛ kaa ma pee. Enɛ ɔ ye bua mi wawɛɛ nɛ i kɛ bua jɔmi tsu ye sɔmɔmi ní tsumi ɔ.”

George kɛ Adria tsɔɔ kaa benɛ a hia kɛ ho Ghana ya pɛ ɔ, níhi nɛ a kpa peemi ngɛ a nɛnɛ mɛ a yi nɔ ɔ, lɔ ɔ nɛ nihi peeɔ ngɛ lejɛ ɔ. Adria de ke: “Waa kɛ níhi a he fɔmi klama nyɛ we níhi a he fɔmi kaa bɔ nɛ wa peeɔ ngɛ wa ma mi ɔ, mohu ɔ, waa kɛ goga nɛ fɔɔ níhi a he. Niye ní nɛ waa kɛ hɛngmɛfia nyɔngma nɛ hooɔ ngɛ wa ma mi ɔ, waa kɛ ngmlɛfia kake kɛ fã lɛ hooɔ ngɛ Ghana. Se be saii mi ɔ, nɔ́ nɛ wa susu kaa e ji nyagba a ba pee ní hehi nɛ wa kase.” Brook de ke: “Ngɛ nyagbahi nɛ waa kɛ kpe ɔ tsuo se ɔ, wa tsui nɔ wa mi. Wa hɛ be níhi a si kpamihi nɛ wa ná a nɔ jee gblegbleegble.”

Mɛni he je nɛ o maa wo nɔ ko he wami kaa e ya fiɛɛ Matsɛ Yemi ɔ he sɛ gbi ɔ ngɛ ma se ɔ? Stephanie de ke: “Nɔ fɛɛ nɔ nɛ waa kɛ kpeɔ ngɛ zugba kpɔ ɔ mi ɔ suɔ kaa e maa le anɔkuale ɔ, nɛ e suɔ kaa e kɛ wɔ maa kase Baiblo ɔ daa ligbi. Enɛ ɔ haa nɛ ye bua jɔɔ wawɛɛ. E hi wawɛɛ kaa i mwɔ ye yi mi kpɔ kaa ma ya sɔmɔ ngɛ he nɛ fiɛɛli fuu a he hia ngɛ, nɛ lɔ ɔ ji yi mi kpɔhi nɛ hi pe kulaa nɛ i mwɔ ɔ a kpɛti kake!” Ngɛ jeha 2014 ɔ mi ɔ, Stephanie kɛ Aaron sɛ gba si himi mi, nɛ mwɔnɛ ɔ, a ngɛ sɔmɔe ngɛ asafo ɔ ní tsumi kɔni ɔ ngɛ Ghana.

Christine ji blɔ gbalɔ nɛ je Germany. E ye jeha 30 kɛ se, nɛ e ya sɔmɔ ngɛ Bolivia loko e hia kɛ ho Ghana ya. E de ke: “Akɛnɛ i kɛ ye weku mi bimɛ wa kpɛti kɛ he je ɔ, be fɛɛ be ɔ, i biɔ Yehowa yemi kɛ buami. Amlɔ nɛ ɔ, i ba na kaa Yehowa ji nɔ ko nɛ e ngɛ nitsɛnitsɛ. I na suɔmi kɛ kake peemi nɛ se be nɛ ngɛ Yehowa we bi a kpɛti ɔ hulɔ. Sɔmɔmi nɛ i ya sɔmɔ ngɛ ma se ɔ ha nɛ i ná níhi a si kpamihi fuu.” Lingmi nɛ ɔ, Christine kɛ Gideon sɛ gba si himi mi, nɛ a ngɛ sɔmɔe ngɛ Ghana.

Filip kɛ Ida tsɔɔ wɔ nɔ́ nɛ a pee kɛ ye bua Baiblo kaseli konɛ a ya a hɛ mi. Filip de ke: “Jinɛ wa ngɛ Baiblo kaseli 15, se wa gbɔ a nɔ nɛ e piɛ nihi 10 konɛ wa nyɛ nɛ wa tsɔɔ mɛ ní saminya.” Anɛ a Baiblo kaseli ɔmɛ ná he se lo? Filip de ke: “I kɛ niheyo ko nɛ a tsɛɛ lɛ ke Michael ɔ kase ní. E haa nɛ wa kaseɔ ní daa ligbi, nɛ e dlaa e he saminya kɛ haa ní kasemi ɔ, enɛ ɔ he ɔ, waa kɛ nyɔhiɔ kake kase Baiblo Tsɔɔmi womi ɔ tsuo. Lɔ ɔ se ɔ, Michael ba pee fiɛɛlɔ nɛ a baptisii we lɛ lolo. Kekleekle ligbi nɛ Michael ya fiɛɛmi ɔ, e bi mi ke, ‘O ma nyɛ maa ye bua mi konɛ i kɛ ye Baiblo kaselɔ ɔ nɛ ya kase ní lo?’ E pee mi nyakpɛ, nɛ i hyɛ lɛ too. Michael de mi ke e kɛ nihi etɛ bɔni Baiblo ɔ kasemi, nɛ e suɔ kaa ma ye bua lɛ konɛ e le bɔ nɛ e maa hyɛ ní kasemi ɔ nɔ ha.” Moo hyɛ, ní tsɔɔli fuu a he hia hluu kaa Baiblo kaseli po plɛ pee Baiblo tsɔɔli!

Amy tsɔɔ bɔ nɛ e plɛ kɛ le kaa fiɛɛli fuu a he hia ngɛ Ghana a. E de ke: “Benɛ i ya su Ghana a, e kɛ we kulaa nɛ wa ya fiɛɛ ngɛ kɔpe nyafii ko mi, nɛ waa kɛ ya hla mumuihi. Ngɛ jamɛ a kɔpe ɔ mi pɛ ɔ, wa na mumuihi kpaanyɔ sɔuu!” Pee se ɔ, Amy kɛ Eric sɛ gba si himi mi, nɛ a ngɛ sɔmɔe kaa blɔ gbali klɛdɛɛ. A ngɛ sɔmɔe ngɛ mumuihi asafo ko mi. A piɛɛ nyɛmimɛ kpahi a he kɛ ngɛ mumuihi nɛ a hiɛ pe 300 nɛ a ji fiɛɛli, kɛ mumuihi nɛ a ngɛ munyu ɔ he bua jɔmi nɛ a ngɛ Ghana ma a mi ɔ ye buae. Ngɛ George kɛ Adria a blɔ fa mi ɔ, sɔmɔmi nɛ a ya sɔmɔ ngɛ Ghana a ha nɛ a na bɔ nɛ ma se sane kpakpa fiɛɛmi ní tsumi ɔ ngɛ ha. Lɔ ɔ he ɔ, benɛ a fɔ mɛ nine kaa a ba Gilead Sukuu nɛ ji lafa kɛ nyingmi enyɔ kɛ ekpane ɔ, a bua jɔ wawɛɛ! Mwɔnɛ ɔ, a ngɛ sɔmɔe kaa ma se sane kpakpa fiɛɛli ngɛ Mozambique.

Nyɛmimɛ fuu jeɔ ma kpahi a nɔ kɛ ya piɛɔ nyɛmimɛ nyumuhi kɛ yihi nɛ a ngɛ Ghana a he kɛ tsuɔ ní kpami ní tsumi ɔ. Enɛ ɔ haa wa bua jɔɔ wawɛɛ. (Yoh. 4:35) Akɔtaa bumi tsɔɔ kaa daa otsi ɔ, a baptisiɔ nihi maa pee 120 ngɛ Ghana. Amlɔ nɛ ɔ, nimli 17 nɛ a ya ngɛ sɔmɔe ngɛ he nɛ fiɛɛli fuu a he hia ngɛ ngɛ Ghana. Suɔmi nɛ a ngɛ kɛ ha Yehowa a lɛ ha nɛ a pee jã a nɛ. Jã kɛ̃ nɛ suɔmi nɛ fiɛɛli akpehi abɔ ngɛ je kɛ wɛ ɔ hu ngɛ kɛ ha Yehowa a woɔ mɛ he wami nɛ ‘a kɛ a he haa ngɛ mɛ nitsɛmɛ a suɔmi nya.’ A ngɛ sɔmɔe ngɛ hehi nɛ Matsɛ Yemi fiɛɛli fuu a he hia ngɛ. Hyɛ bɔ nɛ Yehowa bua maa jɔ ha kaa nihi ngɔ a he kɛ ha ngɛ mɛ nitsɛmɛ a suɔmi nya!​—La 110:3; Abɛ 27:11.